Janipun jaljtañ amtamp casarasipki uka chacha warminakajja, jan jaljtasa jiwañkam jakañatakiw amtapjje. Ukaw taqe confiyansamp sum jakasiñatak yanaptʼi. “Kunas kunäpan janipuniw jaljtkañäniti” sasaw casarasipjje.

Yaqhep chacha warminakajja, familiapana jan ukajj amigonakapan “janiw jaljtapjjañamäkiti” satakiw jan jaljtapkiti. Ukampis munasiñampi respetomp utjatapatwa jan jaljtapjjañapäkiti.

BIBLIAJJ KAMSISA: “Chachajj janirakiw warmipar jaytanukuñapäkiti” (1 Corintios 7:11).

“Jan jaljtañ amtamp casarasktan ukhajja, janiw jankʼak chuym ustʼayasktanti. Perdonañasa perdón mayisiñas janiw chʼamäkiti. Jan waltʼäwinakajj utjki ukhasa, jaljtañ amtañat sipansa, ukanak jankʼak askichañatakiw chʼamachastanjja” (Micah).

Jaljtañ amtamp casarasir chacha warminakajja, familian problemanakajj utjki ukhajj chachapas warmipas janis jupatakïkaspa ukhamwa amuyjjapjje, jankʼakiw jaljtañatak kuns thaqapjjaraki.

“Waljaniw divorciasiñ amtamp casarasipjje. Jumatï uka amtamp casarastajja, maynimp jan jaljtasa jakañajj janiw chuymaman utjkänti” (Jean).

AKHAM JISKTʼASIM

“Chacha warmjam jan waltʼayasipkta ukhajja,...

• ... ¿‘kunatakis casaraspachätjja’ sasat arrepentistjja?”.

• ... ¿‘yaqhampïrista ukhajj kunjamakïspasa’ sasat amuytjja?”.

• ... ¿‘jaytjämawa’ jan ukajj ‘yaqhampiw sarjjä’ sasat saraktjja?”.

Uka jisktʼanakat mayarukis “jïsa” sasin sawaysta ukhajja, jan jaljtañ amtamp casaraskta ukarjam sarnaqañatakiw chʼamachasiñama.

CHACHA WARMI PARLTʼASIÑATAKI

• ¿“Jiwañkamaw juntüñäni” sasin arsuwayktan uk armasjjtanti? Ukhamächi ukhajja, ¿kunatsa ukhamar purtʼastanjja?

• Jan jaljtañ amtamp casarasktan ukarjam sarnaqañatakejj ¿kunas yanaptʼistaspa?

AKANAKWA LURASMA

• Esposomarusa jan ukajj esposamarus qhawqsa munasta uk mä jiskʼa tarjetar qellqtʼasaw jupar churasma.

• Jupan fotopwa kawkjantï trabajta ukan uchasisma.

• Trabajonkkasasa yaqha cheqar sarasasa, sapür jawsañatakiw chʼamachasiñama.

BIBLIAJJ KAMSISA: “Kuntï Diosajj mä yukur mayachki ukjja, jan khiti jaqes jaljtaypanti” (Mateo 19:6).