CHACHA WARMINAKATAKI
3. Respetasiña
¿KAMSAÑSA MUNI?
Respetomp uñjasiri chacha warminakajj janis mä pachpak amuyapkchejja, munasiñampiw uñjasipjje. Diez claves para transformar tu matrimonio librojj akham siwa: “Respetomp uñjasiri chacha warminakajj janiw maynikis razonanïkaspa ukham amuyapkiti. Antisas kuna jan walinakas utji ukanakat respetompiw parltʼasipjje. Kunsa maynejj amuyi uksa respetompiw istʼapjje, kunas panipar yanaptʼaspa ukarjamaw mä amtar puripjjaraki” sasa.
BIBLIAJJ KAMSISA: “Munasir jaqejj [...] janiw kunatï jupatak walïki ukak thaqkiti” (1 Corintios 13:4, 5).
“Nayatakejja, esposajar respetañajj wali valoranit uñjaña, jan chuyma ustʼayaña, kunatï matrimoniojar jan waltʼaykaspa ukanak jan lurañawa” (Micah).
¿KUNATSA WALI WAKISKIRI?
Chacha warminakajj jan respetasipki ukhajja, jiskʼachiri, chuym ustʼayiri arunakampiw parlapjjaspa. Yatjjatat jaqenakajja, ukham parlasir chacha warminakajj divorciasiñaruw puripjjaspa sasaw sapjje.
“Chachatï warmipar chuyma ustʼayir arunakamp parlani, jiskʼacharakini ukhajja, warmejj janis kunatak walïkaspa ukhamwa amuyasini, chachaparus janiw confiyjjaniti” (Brian).
¿KUNSA LURASMA?
AKHAM JISKTʼASIM
Pasïr semanajj kunjamsa apasipjjta jan ukajj kunjamsa parltʼasipjjta uk amtasajj akham jisktʼasim:
-
“¿Qhawqha kutis arunakajamp jiskʼachtjja, qhawqha kutirakis suma luratanakapat ‘walik ukham lurtajj’ sasin sistjja?”.
-
“¿Kunanak lurasas respetataj uñachtʼaytjja?”.
CHACHA WARMI PARLTʼASIÑATAKI
-
¿Kuna arunakasa, kuna luratanakas respetomp uñjasiñatak yanaptʼistu?
-
¿Kuna arunakasa, kuna luratanakas janis respetomp uñjatäksna ukham amuyayistu?
AKANAKWA LURASMA
-
Kunjamsa respetomp uñjatäñ munapjjta ukwa kimsa toqet qellqtʼasipjjañama. Ukanak churasisajja, ukarjam lurañatakiw chʼamachasipjjañama.
-
Chachamana jan ukajj warmiman kunjam chuymanïtapas jumatak wali valorani uk qellqtʼasajja, jupar yatiyam.
“Nayatakejja, luratanakajampi esposojar wali valoranit uñjaña, jupajj kusisit jakasispa uk munañaw respetomp uñjañajja. Janiw jachʼa luräwinak lurasapunejj respeto uñachtʼayksnati, nayajj mä qhawqha arunakampi jan ukajj jiskʼa luräwinak lurasaw esposojar respetataj uñachtʼaytjja” (Megan).
“Nayajj respetompiw uñjta” sañat sipansa, jupajj respetat amuyasispa ukaw jukʼamp wakiskirejja.
BIBLIAJJ KAMSISA: “Chuymatpach sinttʼasiñampi, suma chuymanïñampi, humilde chuymanïñampi, llampʼu chuymanïñampi, paciencia chuymanïñampi isthapisipjjam” (Colosenses 3:12).
