Kusisitäña
Bibliajja, kunanakatï chuymasarusa pʼeqesarus jan waltʼaykaspa ukanakat jarkʼaqasiñataki, kunanakatï yanaptʼkistaspa ukanak lurañatakiw chʼamañchistu.
COLERAÑA
BIBLIAJJ KAMSISA: “Paciencianïñaw askejja, jan ajjsarir jaqet sipansa” (Proverbios 16:32).
KAMSAÑSA MUNI. Colerasiñamp jan atipayasiñajj wali askiwa. Awisajj colerañatak razonajj utjkchisa, ukamp atipayassna ukhajj jan waliruw purtʼayistaspa. Maynejj colerañamp atipayasi ukhajja, jan amuytʼasisaw kuns parli, kuns luraraki. Ukat qhepatakwa ukanakat arrepentisi.
KUNSA LURASMA. Jan jankʼak colerañwa yateqañama, jan ukham lurkäta ukhajj munañaparuw apnaqätam. Coleramp atipayasirinakajj jan ajjsarirïpkaspas ukhamwa amuyasipjje, ukampis janiw ukhamäkiti, cobarde jaqenakakiw jankʼak coleramp atipayasipjje. Bibliajj akham siwa: ‘Kunjamatï mä markajj jan perqanïkasina jan waltʼañankkejja, ukhamaw coleramp atipayasir jaqejja’ sasa (Proverbios 25:28). Janïr kun arskasin nayraqat sum yatjjatañaw jan jankʼak colerañatak yanaptʼätam. “Yatiñan jaqejj janiw mäki coleraskiti” (Proverbios 19:11). Kunas pasawayi uk nayraqat sum yatjjatañaw jan mäki colerañatak yanaptʼätam.
YUSPÄRAÑA
BIBLIAJJ KAMSISA: “Yuspärasirïpjjapunim” (Colosenses 3:15).
KAMSAÑSA MUNI. Yuspärasirinakakiw kusisitäpjjaspa sasaw yaqhepanakajj sapjje. Khitinakantï mä munat familiarapajj jiwjje ukanakasa, wali valoraninak aptʼasipki ukanakas ukhamätapwa amuyapjjaraki. Jupanakajj akham sapjjewa: ‘Kunanaktï aptʼasktan ukanakat sinti llakisiñat sipansa, kunanakatï utjkistu ukanakat yuspärañaw kusisitäñatak yanaptʼistu’ sasa.
KUNSA LURASMA. Kunanakatsa wal yuspärañ munta ukanak mä listar sapüru qellqtʼasim. Ukanakajj janiw wali importantëñapapunïkiti. Sañäni, sapüru inti jalsunitapata, munat mä familiaramp sum parltʼasitamata, jan ukajj mä urump jakaskatamatwa lupʼisma. Ukham lurañatak chʼamachasïta ukhajj jukʼamp kusisitaw jakasïta.
Familiaranakamaru, amigonakamar yuspärañaw jukʼamp kusisitäñatak yanaptʼarakiristam. Kunsa jupanakat wali valoranit uñjta ukanak jupanakar yatiyam, ukjja mä carta toqe, mä correo toqe, mä mensaje toqew yatiyasma. Ukham lurasajj jukʼamp sumaw jupanakamp apasïta, mayninakar yanaptʼañajj kunja kusiskañasa uksa yatirakïtawa (Hechos 20:35).
BIBLIAN YAQHEP WIÑAY YATICHÄWINAKAPA
Bibliajj istʼañatak utjki ukjja, Internetan jw.org cheqatwa apaqasma, ukajj mä 40 arunakanwa utji.
JAN CHʼAJJWAÑA
“Chʼajjwaña qalltañasti, umasa jilarkaspa ukhamawa; uka chʼajjwañata jitheqtañasti jukʼampi askiwa” (PROVERBIOS 17:14).
JUTÏRIT JAN SINT LLAKISIÑA
“Ukhamajj jan qharürut llakisipjjamti, qharürojj yaqha llakinakaw utjarakini. Sapüruw jan walinakajj utji” (MATEO 6:34).
JANÏR KUN LURKASIN AMUYTʼASIÑA
“Suma amuytʼasirïñaw jumarojj uñjätam, yatiñanïñaw jarkʼaqarakïtam” (PROVERBIOS 2:11, NM).
Akanakajj inas gustarakiristam
¡SARTAPJJAÑÄNI!
Estresampi jan aynachtʼañatakejj ¿kunas yanaptʼiristamjja?
Estresampi jan usuntañatakisa, jan sint aynachtʼañatakis kunas yanaptʼiristam uk akan yatjjatam.
