‘Aka tiemponjja, tecnología toqetsa, ciencia toqetsa, qollqe toqets jaqenakajj nayraruw sartasipki. Ukampis jupanak pachparakiw aka mundor jan waltʼayasipki’. (Informe Global de Riesgos 2018 del Foro Económico Mundial).

¿KUNATSA YATJJATAT JAQENAKAJJ JUTÏRITSA AKA ORAQETSA LLAKISIPJJE? KUNA JAN WALINAKANSA UÑJASTAN UK MÄ QHAWQHA YATJJATAÑÄNI.

• INTERNETAR MANTAÑAJJ AJJSARAÑJAMAWA. The Australian sat mä periodicojj akham siwa: “Internetajj sapürutjamaw jukʼamp jan walëjje. Ukanjja, wawanakar abusir jaqenakasa, qʼañunak luririnakasa, jaqenakar engañjas maynir jan waltʼayirinakasa jukʼampiw jiljjattaski. Maynin sutipjjar jan walinak luririnakajj jukʼampiw aka oraqpachan jiljjattaskaraki [...]. Internet toqew jaqenakajj jupanakpachpat jan wali jaqenakäpjjatapa, qʼañu amuyunïpjjatap uñachtʼayapjje” sasa.

• QOLLQE TOQET JANIW MÄ IGUALAKÏKTANTI. Oxfam International sat organizacionajj jichhak yatiyki ukarjamajja, aka oraqpachan 3.600 millón wali pobre jaqenakajj qhawqha qollqenïpkitï uk jakthapsna ukhajja, aka oraqpachan kimsaqallqo wali qollqen jaqenakajj qhawqha qollqenïpkitï ukampejj pachpakïspawa. Uka yatiyäwejj akham sarakiwa: “Qollqejj janiw sum apnaqaskiti, qollqeninakajj pobrenak toqew (ukanakat jilapartejj warminakäpjjewa) jukʼamp qollqenir tukupjje” sasa. Qollqe toqet jan mä igualakïñajj jiltaskakiwa, ukajj jan walinakwa utjayaspa sasaw yaqhepajj ajjsarayasipjje.

• GUERRANAKAMPI, ARKNAQAT UÑJASIÑAMPI. 2018 maranjja, Agencia de las Naciones Unidas para los Refugiados ukajj akham sänwa: “Jichha tiemponjja, waljaniw markapan jan walinak utjipan yaqha markanakar escapjjapjje, janipuniw ukhamajj uñjasirïkiti. Sapa pä segundonjja, mä jaqew escapañatak obligat uñjasi” sasa. Cheqas 68 millón jila jaqenakaw guerranak utjipansa, arknaqat uñjasisas yaqha markanakar escapjjapjje.

• AKA ORAQEJJ QʼAÑUCHATAWA. Informe Global de Riesgos 2018 ukajj akham sarakiwa: “Walja plantanakasa animalanakas sintipuniw chhaqtaski, [...] aka oraqesa, umasa, samanas wali qʼañuchatäjjewa, ukanakaw jaqenakarojj jan waltʼayaski”. Maysa toqetjja, laqʼonakajj yaqhep markanakan jukʼakiw utj-jje, ukajj wali llakkañawa. ¿Kunatsa? Niyakejjay laqʼonakajj plantanak utjañapatak yanaptʼchejja, jan laqʼonakampejj janiw plantanakajj utj-jjaspati sasaw cientificonakajj sapjje.

Aka oraqen sum jakasiñ utjañapatakejj ¿kun lurañasäspasa? Yaqhepajj suma yatjjatatäñaw yanaptʼistaspa sasaw sapjje. Ukhamäspa ukhajja, ¿kuna toqet yatjjatatäñas wakisispa? Akjjar jutki uka yatichäwinakanwa ukanakar qhanañchasiskani.