Respetomp sarnaqasa Jehová Diosar jachʼañchapxañäni

“[Jehová Diosan] luräwipax kʼajkiriwa, munkañarakiwa.” (SAL. 111:3.)

1, 2. 1) ¿Dignidad siski uka arux kamsañs muni? 2) ¿Kuna jisktʼanakarus aka yatichäwin qhanañchasiskani?

 JEHOVÁ Diosax wali jachʼa munañaniwa ukatwa Bibliax kʼajkir qhapaqkankañampiw isthapitaxa sasaw sixa (Sal. 104:1). Diosan wali jachʼätapxa kunayman tuqitwa uñachtʼaysna. Maynïristi kunjamsa kʼachachtʼastan uk sum amuyasisa. Apóstol Pablox akham sasaw cristiananakar iwxtʼäna: “Kunatix isisiñäki ukak isisipxpan; janirak sinti jiljañampis ñikʼutanakapsa kʼachachasipxpati, ni qurimpisa, perlanakampisa, ni wali jila alan isinakampisa” sasa (1 Tim. 2:9). Ukampisa, sarnaqäwisax sumäñapatakisa ukat Jehová Diosar jachʼañchañatakisa janiw ukak wakiskiti, kunattix Diosan “luräwipax kʼajkiriwa, munkañarakiwa” (Sal. 111:3).

² Biblianxa “dignidad” siski uka arux hebreo arunxa “kʼajkiri”, “jachʼañchäwi” ukat “gloria” sañ munaraki. Aymar arunxa, dignidad siski uka arux mä jaqir sum sarnaqatapat respetompi uñjaña sañ muni. Ukampisa janiw khitisa Jehová Diosat sipansa wali respetompi uñjatäkaspati. Ukatwa luqtirinakapax Diosar wal respetapxi uksti sarnaqäwinakapampi ukat parlatanakapampiw uñachtʼayapxi. Ukhamasti, ¿kunatsa jaqinakax respetomp sarnaqapxaspawa sisnaxa? ¿Jehová Diosan kʼajkir qhapaqkankañapax kunjamsa luratanakapan uñjasi, ukat uka tuqinakat lupʼiñax kunatsa wali askixa? Mayninakar respetompi uñjañatxa, ¿kunsa Jesusax yatichawayistu? ¿Sarnaqäwisampix kunjamsa Diosar jachʼañcharaksna?

Kunatsa respetompi sarnaqsna

3, 4. 1) Niyakixay ukham askit unjatästanxa ¿kun lurañasasa? 2) ¿Salmo 8:5-9 qillqat profecianxa khititsa parlaski? (Qhanañchtʼäwi uñxattʼäta.) 3) ¿Nayra tiemponakanxa khitinakarus Jehová Diosax jachʼar aptäna?

³ Jaqinakax Diosar uñtasit luratätanwa ukatwa respetompi sum sarnaqaraksnaxa. Adán sat nayra chacharu aka Uraqi katuykäna ukhawa Diosax Adanar jachʼar aptäna (Gén. 1:26, 27). Jaqinakax juchararäxapchïnsa, Diosax janiw kuntï churkän uk apaqkänti, ukatwa jupanakarux qhapaqkankañampi ‘pilluntäna’ jan ukax coronampjam uchäna sasiraki (Salmo 8:5-9 liytʼasiñapawa). * ¿Jiwasax kunjam sarnaqañasasa? Kunjamtï Jehová Diosax sarnaqañas munki ukarjamaw sarnaqañasa ukat Diosan sutiparus jachʼañchañasarakiwa.

⁴ Jehová Diosaw luqtirinakaparux jachʼar aptaraki. Sañäni, Abelarux ofrendap katuqasaw jachʼañchäna. Caín jilapan ofrendaparusti jan wal uñjarakïna (Gén. 4:4, 5). Moisesaruxa Josué  chachar “jilïri kankañama” churam sasaw Diosax säna, kunattix Josué chachaw israelitanakar apnaqxañapäna (Núm. 27:20). Davitan Salomón sat yuqapatxa Bibliax akham sarakiwa: “[Jehová] Tatitux Salomonarux taqi jachʼakankañwa churäna Israel jaqinaka nayraqatana, reinoparuxa suma kankañarakwa churäna, ukhamsti janiw khiti reyis Israel markanxa churatäkänti” sasa (1 Cró. 29:25). Alaxpachar sarir ajllitanakaruxa Diosax jachʼancharakiniwa kunattix aka Uraqinkkasax jan jaytasaw taqi chuyma ‘aytkay qhapaq sarayäwipat parlapxäna’ (Sal. 145:11-13). Ukat Jesucriston ‘yaqha ovejanakapa’ satäpkis ukanakax ukhamarakiw Diosar yupaychirinakjamax jachʼanchat uñjasipxi (Juan 10:16).

Jehová Diosan kʼajkir qhapaqkankañapax taqi luratanakapanwa uñjasi

5. ¿Kunjamsa Jehová Diosan qhapaqkankañapax uñachtʼayasi?

⁵ Kunjamsa Jehová Diosax jaqit sipansa taqi kunxar munañanixa uka tuqitwa Salmo 8 qillqatanxa qhanañchasi, Davitax akham sasaw qʼuchüna: “¡[Jehová] Tatay, uywirixay, sutimax taqpach uraqin muspharkayawa! ¡Qhapaq kankañamax alaxpachat jukʼamp khurikamawa!” sasa (Sal. 8:1). Jehová Dios sapakiw taqit sipansa qhapaqkankañani ukat taqi munañanirakixa. ‘Alaxpachsa, akapachsa’ janïr lurkasax munañanipunïnwa, ukat aka Uraqxa paraisoptayani ukat jaqinakax jan juchanïxapxani uka qhipatsa ukhamakïskaniwa; Jupasti wiñay wiñayatakiw qhapaqkankañani (Gén. 1:1; 1 Cor. 15:24-28; Apo. 21:1-5).

6. ¿Salmo qillqtʼirix kunatsa Jehová Diosax qhapaqkankañampi isthapitaw sasax sispachäna?

⁶ Kunapachatï warawaranakan phuqantat alaxpach uñjkäna ukhaxa Diosat jan jithiqtir salmo qillqirix muspharpachänwa. ‘Alaxpacharu isir uñtat janatatatjam’ uñjasa ukat muspharkañ luräwinakap uñjasasa, Diosax qhapaqkankañan isthapitaw sasaw säna (Salmo 104:1, 2 liytʼasiñapawa). Jachʼa chʼamani Diosax jan uñjkayäkchisa, kʼajkir qhapaqkankañapax taqi luratanakapanwa uñjasi.

7, 8. ¿Taqi warawaranakat amuytʼasaxa kunjamsa Jehová Diosan kʼajkir qhapaqkankañanïtap amuytanxa?

⁷ Vía Láctea satäkis uka galaxiasat parltʼañäni. Millón millón warawaranakan phuqantat alaxpachanxa aka Uraqix quta thiyan mä chʼallitakïkaspas ukhamawa. Amuytʼañäni Vía Láctea satäkis uka galaxianxa, 100.000 millón warawaranakat sipansa jilaw utji. Uruy aruma jan saytʼasa jaksna ukhaxa, ¡kimsa waranqa jila maranakanwa jakhuñ tukuysna!

⁸ Vía Láctea satäkis ukanakxay 100.000 millón warawaranakax utjchixa, ¿ukhamax alaxpachanxa qhawqha warawaranakas utjpacha? Astrónomos sat yatxatat jaqinakaxa janiw qhawqha millón millón warawaranakas alaxpachan utji uk jaktʼañ puedipkiti. Ukhamasti, ¿qhawqha warawaranakapunis utjpacha? Jan jaktʼkayawa, jaqix janiw qhawqha warawaranakas utji uk sum amuykaspati. Ukampisa Jehová Diosax “warawaranak jaktʼi, sapa mayarusti suti ucharaki” (Sal. 147:4). Niyakixay Jehová Diosan kʼajkir qhapaqkankañap sum amuyxstanxa, ¿janit chuymasax sutip jachʼañchañatak wiytkistu?

9, 10. ¿Jehová Diosan wali yatiñkankañanïtapatxa kunsa tʼantʼax yatichistu?

⁹ Alaxpachankir wali muspharkañ warawaranakat parlkasaxa, jichhax tʼantʼat parltʼarakiñäni. Jehová Diosax janiw “alaxpach akapach” luririkïkiti; jan ukasti Jupax “manqʼat awtjatanakaruw manqʼañ [tʼantʼa, NM] churaraki” (Sal. 146:6, 7). Diosan kʼajkir qhapaqkankañanïtapax taqi luratanakapanwa amuyasiraki, sañäni tʼantʼa lurañatak alinakana (Salmo 111:1-5 liytʼasiñapawa). Jesusasti arkirinakaparux akham mayisiñ yatichäna: “Sapüru tʼantʼasay jichhüru churanipxita” sasa (Mat. 6:11, MT). Nayra markanakasa, Israelitanakasa tʼantʼpunwa manqʼasipxirïna. Tʼantʼa lurañax janis sinti chʼamäkchixa ukax janiw ukhamakïkiti, kunattix tʼantʼa lurañatak yänakax kitthaptasxi ukhaxa kunarus puri uk amuyañax chʼamakiwa.

¹⁰ Biblia qillqaskän uka tiemponakanxa, israelitanakax trigo jan ukax cebada jakʼumpi, ukat awisax levadurampi ukhamaw tʼantʼa lurapxirïna. Kunapachatï tʼantʼa lurañataki  yänakax kitthaptasxi ukhax kunarus uka yänakax tuku, ukax janiw sum amuyaskiti. Ukat janchisax kunjamsa uka tʼantʼxa alimentor tukuyi ukax janirakiw amuyañjamäkiti. Ukatwa salmo qillqtʼirix akham qʼuchpachäna: “¡[Jehová] Tatay, luräwinakamax waljapuniwa! Yatiñ kankañampiw taqi kuns lurtaxa” sasa (Sal. 104:24). ¡Taqi akanak yatisax wal Jehová Diosar jachʼañchañ muntanxa!

Jehová Diosan kʼajkir qhapaqkankañapat lupʼiñax kunjamsa yanapistu

11, 12. ¿Diosan luratanakapat lupʼisax kuna askinaksa apstanxa?

¹¹ Janis warawaranakat yatxatir (astrónomo) jaqjamäkstansa taqiniw warawaranakan phuqantat alaxpacha uñjasax muspharsnaxa, ukat janisay ingeniero químico sat jaqïkstansa tʼantʼxa sum manqtʼaraktanxa. Ukampis Jehová Diosax wali jachʼa Diosatapxa janiw taqin amuyapkaspati. Kunattix uk amuyañatakix munasiwa taqi luratanakapat lupʼiña. ¿Kunjamsa ukham lupʼiñax yanapistu? Kunjamtï yaqha luratanakapat lupʼisax askinak apstanxa ukhamarakiwa. ¿Kuna luratanakapatsa parlasktanxa?

¹² Jehová Diosax kunjamsa markapar yanaptʼañataki muspharkañ luräwinak luräna ukanakat amuytʼasaxa, Davitax akham qʼuchüna: “Muspharkañ qhapaq kankañamat jupanakarux yatiyasini, nayasti muspharkañ luratanakamat parlarakï” sasa (Sal. 145:5). Bibliat yatxattʼasa ukat kuntï liyktan ukanakat lupʼiñataki tiemp apstʼasisaw taqi luratanakapar askirjam uñjatas uñachtʼaysnaxa. ¿Ukham lurasax kuna askinaksa apsuñäni? Jehová Diosan kʼajkir qhapaqkankañapwa sum amuyañäni, ukat Jupar yupaychañsa jukʼampwa munañäni. Ukhamatwa Davitjam sarakiñäni: “Nayasti jachʼa luräwinakamat parlarakï” sasa (Sal. 145:6). Jïsa, Jehová Diosan taqi muspharkañ luratanakapat lupʼiñänixa, jukʼampwa Jupar jakʼachasiñäni, ukat taqi chuyma, jan axsarasarakiw Jupat yatiyañäni. ¿Suma yatiyäwinak taqi chuymati yatiyaskta, ukat jaqinakaru Jehová Diosan kʼajkir qhapaqkankañapata, wali jachʼa Diosätapata amuyapxañapatakix yanapaskaraktati?

Jehová Diosan qhapaqkankañanïtapxa Jesusaw sum uñachtʼayi

13. 1) Daniel 7:13, 14 qillqatarjamaxa, ¿kunsa Jehová Diosax Yuqapar churäna? 2) ¿Kuna kasta reyis Jesusaxa?

¹³ Jesusax Diosan yuqapjamaxa taqi chuymaw suma yatiyäwinak yatiyirïna ukhamatwa alaxpachankir awkiparux jachʼañchäna. Ukatxa kunapachatï Jehová Diosax sapa yuqaparu ‘reino’ mä arunxa apnaqäwipa katuykäna ukhaw jachʼañcharakïna (Daniel 7:13, 14 liytʼasiñapawa). Ukampisa, Jesusax janiw jachʼa jachʼa tukurïkiti janirakiw jan jakʼachasiñjamäkänsa. Jan ukasti jupan apnaqat jaqinakarux munasiñampi, respetompiw uñji ukat kuntï lurirjamäpki ukakwa mayiraki. Ukampisa janïr Diosan Apnaqäwip katuqkasaxa jaqinakar munasipunirïnwa, ukat khitinakatï jiskʼachata, yaqhachata uñjasipkäna ukanakarux jukʼampi  munasirïna. Uka tuqit mä uñachtʼäwi uñjañäni.

14. ¿Israel markanxa kunjamsa lepra usuninakarux uñjapxäna?

¹⁴ Nayra tiemponakanxa, lepra (llaga) usuninakax janiw jankʼak jiwapxirïkänti jan ukasti kʼachat kachat wali tʼaqhisisaw jiwxapxirïna. Uka ususti jukʼat jukʼatwa taqi janchipar mantirïna ukat kunjamtï mä jiwatarux jan jaktayksnaxa ukhamarakiw lepra usuninakarux jan qullañjamäkanti (Núm. 12:12; 2 Rey. 5:7, 14). Lepra usuninakarux qʼañüpkaspas ukham uñjapxirïna ukatwa jupanakat jithiqtapxirïna. Kunapachatï jaqinakar jakʼachasisipkäna ukhaxa “¡qʼañütwa, qʼañütwa!” sasaw artʼapxañapäna (Lev. 13:43-46). Judionakatakix jiwatäpkaspas ukhamäpxänwa. Rabinonakan qillqatanakaparjamax niya pä metro jaypacharuw jaqinakat jithiqtapxañapäna. Yupaychäwi sarayir mä jaqixa jupar jan jakʼachasiñapatakix lepra usun jaqitxa qalampiw jarkʼaqasirïna sasiwa.

15. ¿Mä lepra usun jaqirux kunjamsa Jesusax uñjäna?

¹⁵ Mä lepra usun jaqix Jesucristoru jakʼachasisin qulltʼitaya sasin achiktʼaskäna ukhaxa kamsänsa Jesusaxa uka tuqit uñjañäni (Marcos 1:40-42 liytʼasiñapawa). Uka jaqin qullasiñ wal munatap amuyasaxa, janiw yaqhachkänti jan ukasti respetompi wali munasiñampiw uñjäna. Chuymap chʼallxtayasisinsti, Jesusax mäkiw amparapampi luqxatasax uka lepra usupat qulltʼäna.

16. ¿Kunjamsa Jesusax jaqinakar uñjäna ukat kunsa jiwasax ukat yatiqassna?

¹⁶ Awkipjamarakiw Jesusax jaqinakar respetompi uñjäna. ¿Cristianonakax kunsa Jesusat yatiqasiraksna? Sañäni, utjirinïpasa janisa, usutäpansa, qhawqha maranïpansa, mä arunxa taqi jaqiw respetompi uñjatäñapa (1 Ped. 2:17). Familiapan pʼiqtʼirinakasa, awk taykanakasa, ukhamaraki irpir chuymaninakasa khitinakarutix uñjapxañapäki ukanakarux respetompiw uñjapxañapa ukhamat chuymanakap jan ustʼayañataki. Ukhamarjamaw taqi cristianox lurañapa sasaw Bibliax akham sas qhanañchi: “Maynit maynikamaw munasipxañama jila purjam taqi chuymampi, suma aytat sarnaqañansti purapat suma axsartañampi uñjasisa” sasa (Rom. 12:10).

Jehová Diosar yupaychkasax respetompi sarnaqapxañäni

17. Diosar luqtkasax wali respetompi sarnaqañasawa, ¿Bibliax kamsis uka tuqitxa?

¹⁷ Kunapachatï Diosar yupaychasktan ukhaxa wali respetompiw taqi kunsa lurañasa sasaw Bibliax qhanañchistu. “Kunapachatï Diosan temploparu saräta ukkhaxa, sarnaqañanxa sum amuyasim” sasaw Eclesiastés 5:1 qillqatanxa amtayistu. Moisés ukat Josué chachanakax janïr qullan uraqi taktʼkasaxa wiskhunakap apsusisaw Jehová Diosar jachʼañchapxatapsa, respetapxatapsa uñachtʼayapxañapäna (Éxo. 3:5; Jos. 5:15). Ukat israelit sacerdotenakax lino hilot lurata calzoncillonakanïpxañapänwa, ukhamat ‘lankhu charanakap imtʼasipxañapataki’ (Éxo. 28:42, 43). Uka kamachir istʼañaxa askïnwa, kunattix altaran luqtkasaxa phinqʼachataw uñjasipxasapäna. Ukhamarakiw  sacerdoten familiapax Diosan mayitanakaparjam sarnaqapxañapäna ukhamatwa sacerdotjam irnaqtʼataparux respeto uñachtʼayapxañapäna.

18. Jehová Diosar yupaychäwisanxa, ¿kunatsa wali askixa respetompipuni sarnaqañasaxa?

¹⁸ Chiqpachansa, Diosar respetañasawa ukat Jupar yupaychkasax respetompiw sarnaqañasaraki. Ukat yaqhanakarus respetompiw uñjañasaraki ukhamatwa jiwasas respetompi uñjatarakïñänixa. Chiqasa ukham respetompi mayninakar uñjatasxa janiw pata chuymäñapäkiti jan ukasti taqi chuymäñapawa. Taqi chuymaw mayninakar respetompi uñjañasa kunattix ukwa Diosax uñji (1 Sam. 16:7; Pro. 21:2). Jiwasatï respetompi sarnaqañatak chʼamachasiñänixa amuyusansa, sarnaqäwisansa ukat jaqi masisarux kunjams uñjañasa ukaruw yanapistani, ukhamaraki jiwas pachpas kunjamsa uñjasiñäni ukarus yanaptʼarakistaniwa. Ukatsti taqi luratanakasansa, parlatanakasansa qhanaw amuyasini. Isthaptʼasisasa kʼachachtʼasisasa respetompipuni sarnaqtan ukhaxa apóstol Pablon aka arunakapar istʼataswa uñchtʼaytanxa: “Janirakiw khitirus kuna jan walsa lurapkti, ukhamata nanakan luräwinakaxat jan walinak parlasipkañapataki. Ukat sipansti taqinirus uñachtʼayañ munapxta chiqpachansa nanakax Diosar servirinakäpxataxa” sasa (2 Cor. 6:3, 4). “Jakäwinaka[sanxa] taqins uñjkata, Qhispiyir Diosan yatichäwipax sumätapa yatipxañapataki.” (Tito 2:10.)

Respetompipuni sarnaqapxañäni

19, 20. 1) ¿Kunjamatsa jaqinakar respeto uñachtʼaytanxa? 2) ¿Kunsa taqi chuyma amtañasa?

¹⁹ Ajllit cristianonakax ‘Criston sutiparu, jupa lanti khitatäpxiwa’ uka luräwiruxa wali respetompipuniw uñjapxi (2 Cor. 5:20, MT). Yaqha ovejanakax ajllit cristianonakaruw taqi chuyma yanaptʼapxaraki, jupanakax jachʼar aptatäpxarakiwa kunattix Mesiasan Apnaqäwipat yatiyapxañapatakiw khitatäpxi. Mä khitataxa jan ukax mä embajadorax taqi chuyma ukat wali respetompiw gobiernopat parli. Jiwasaxa ukhamarakiw Diosan gobiernopat mä arunxa Apnaqäwipat wali respetompi parlañasarakixa (Efe. 6:19, 20). Ukatxa, ¿janit “suma kusiskañ yatiyäwinak” apktan uka jaqinakarux respeto uñachtʼaykaraktanxa? (Isa. 52:7.)

²⁰ Jehová Diosatakjam sarnaqasa sutip jachʼañchañatak taqi chuyma amtapxañäni (1 Ped. 2:12). Diosarusa yupaychäwiparusa ukat jilat kullakanakasarusa wali respetompi uñjapxañäni. Ukhamatwa kʼajkir qhapaqkankañan isthapit Jehová Diosaxa, yupaychäwisampi wali kusisita jikxatasinixa.

[Qhanañchäwi]

¿Kamsasmasa?

• ¿Jehová Diosan kʼajkir qhapaqkankañapat lupʼiñax kunjamsa yanapistu?

• ¿Jesusax mä lepra usun jaqir wali sum uñjatapatxa, kuns yatiqtanxa?

• ¿Jehová Diosar yupayachasaxa kunjamsa respetomp sarnaqsna?

[Jisktʼanaka]

[12 janan fotopa]

¿Kunjamsa Jehová Diosax Abelar wali sum uñjäna?

[14 janan fotopa]

Jehová Diosax wali jachʼa Diosätapax tʼantʼansa uñjasirakiwa

[15 janan fotopa]

Jesusax mä lepra usun jaqir wali sum uñjatapatxa, ¿kunsa yatiqsna?

[16 janan fotopa]

Jehová Diosar respetañasawa ukat Jupar yupaychkasax respetompiw sarnaqañasaraki