‘Akapachankir ajayumpix’ jan atipayasiñäniti

“Janiw akapachankir ajayu katuqtanti, jan ukasti Diosan ajayupwa katuqapxtanxa.” (1 COR. 2:12.)

1, 2. 1) Gran Bretaña markanxa, ¿kunatsa mineronakax pä canario jiskʼa jamachʼinakanïpxañapänxa? 2) ¿Kuna jan waltʼäwinsa cristianonakax jikxatastanxa?

 GRAN BRETAÑA markanxa, 1911 maran autoridadanakax mä ley uñstayapxäna, mina manqhan irnaqir mineronakax jan jiwapxañapataki. Uka leyirjamaxa, taqpach minanakaw pä jiskʼa canario jamachʼinakanïpxañapäna. ¿Kunatakïnsa uka pä jamachʼixa? Akatjamat mina manqhan ninax aqtaspa ukhaxa, yanapirinakax jamachʼinakas aptʼasitaw mantapxañapäna. Canario jamachʼinakarux ratukiw monóxido de carbono sat jan wali jiqʼix mayjtʼayi, kunapachatï samanax uka jan wali jiqʼinïxi ukhaxa jamachʼitunakax jaulanakapat liwiqtxapxaspänwa. Jan waltʼäwi utjatapat yatiñatakixa ukax wali wakiskiripunïnwa. Monóxido de carbono uka jiqʼixa janiw coloranïkiti, ni qʼapkarakisa, ukat ratukirakiw maynirux jiwayaspa, kunattix wilasan glóbulos rojos satäkis ukanakax janiw suma saman apxapxiti. Janitï uka jamachʼinakäkaspaxa, mineronakar yanapirinakax akatjamatwa jiwapxaspa ukat janiw kunat jiwatapsa yatipkarakispati.

² Cristianonakax niya uka mineronakjamarakiw Jehová Diosar luqtäwisanxa jikxatastanxa. Kunatäpachas uk uñjañäni. Kunapachatï  Jesusax arkirinakaparu, aka Uraqpachan suma yatiyäwinak yatiyapxañama siskäna ukhaxa, akapachax Supayan munañapankatapa ukat akapach ajayupampi arkirinakapax jan waltʼayata jikxatasipxañapxa yatïnwa (Mat. 10:16; 1 Juan 5:19). Jesusax arkirinakapax kunjamansa jikxatasipxani uka tuqitxa wali llakitaw uñjasïna, ukatwa Awkipar akham sas mayïna: “Janiw mayksmati akapachat apsuñamataki, jan ukasti maysmawa Supayat imañamataki” sasa (Juan 17:15).

3, 4. ¿Kuna tuqitsa Jesusax arkirinakapar iwxtʼaskänxa, ukat kunatsa jiwasatakix wali wakisirixa?

³ Diosar yupaychäwipanxa, arkirinakapax janiw ikipxañapäkänti, ukham ikiñax jiwañaruw apaspänxa, uka tuqitwa Jesusax yatiyañ munäna. Khitinakatï akapach niya tukusiñap urunakan jakasktan ukanakatakixa aka arunakapax wali wakiskiripuniwa: “Uñchʼukipxamaya [...] taqi kunatix jutkani ukanaka jan tʼaqhisipxañamataki, jaqin Yuqapa nayraqatana saytʼatäpxañamatakiraki” (Luc. 21:34-36, MT). Jesusax sarakïnwa, Awkixaw qullan ajayu khitanini, jumanakar yanapañapataki, ukhamat taqi kun yatichapksma uk amtapxañamataki, ukat jan ikipxañamataki ukhamarak thurtʼatäpxañamataki sasaw säna (Juan 14:26).

⁴ ¿Jiwasanakasti? ¿Qullan ajayun yanaptʼap katuqaraksnati? Ukhamäspa ukhaxa, ¿qullan ajayun yanaptʼap katuqañatakix kuns lursna? Ukat akapachankir ajayut parlkasaxa, ¿kunas uka ajayuxa, kunanakansa uñjasi, ukat kunjamsa ukar saykatsna? (1 Corintios 2:12 liytʼasiñapawa.)

Qullan ajayu ukat akapachankir ajayu

5, 6. ¿Kun lurañatakis qullan ajayux yanapistu, ukat uka qullan ajayu katuqañatakix kun lurañasäspasa?

⁵ Qullan ajayuxa janiw nayrïr cristianonakatakikïkanti. Jichürunxa uka yanap katuqaraktanwa. Diosan qullan ajayupax sum sarnaqañasatakiw chʼam churistaspa ukat Diosar yupaychäwisanxa janiw jayraskañäniti (Rom. 12:11; Fili. 4:13). Ukatxa munasiña, suma chuymanïña, suma jaqïña ukhamäñwa yanapistaspa ukasti “qullan ajayun luräwipa[wa]” (Gál. 5:22, 23). Qhanpachäskiwa, Jehová Diosax janiw khitirus qullan ajayu katuqapxañamapuniwa sasax siskiti.

⁶ Qullan ajayu katuqañatakix kun lurañasäspasa ukxa sapa mayniw jisktʼasiñasäspa. Bibliax akanak lurañaw sistuwa. Mayasti wali wakiskiri ukat janirakiw chʼamäkiti, ukaxa Diosar mayiñawa (Lucas 11:13 liytʼasiñapawa). Yaqhasti akarakïspawa, Diosan qullan ajayupampi amuytʼayat Arupat yatiqaña, ukat uka iwxanakarjam sarnaqaña (2 Tim. 3:16). Chiqpachansa, Biblia liytʼirinakatxa janiw taqini Diosan qullan ajayup katuqapkaspati. Ukampis chiqpach cristianox wali sum yatiqtʼki, kunjam qillqatasa uk sum amuytʼaraki, ukat kuna amtampi qillqatas uk amuyarakiwa. Yaqha wakiskiri lurañax akarakïspawa, Jesusar Jehová Diosax khitanitapa ukat jupan sutipxaru qullan ajayu khitanitapatxa janiw payachasiñasäkaspati (Juan 13:20). Ukhamax Jesusat yatiqasiñasäspawa ukat yatichäwinakaparjam sarnaqañasäspawa (1 Ped. 2:21). Cristjam sarnaqañataki chʼamachasiñänixa, qullan ajayu jukʼampwa katuqañänixa.

7. ¿Akapach ajayux kunjamsa jaqinakar apnaqi?

 ⁷ Akapach ajayuxa, jaqinakarux Supayjam sarnaqapxañapatakiw wiyti (Efesios 2:1-3 liytʼasiñapawa). Uka ñanqha ajayun luräwipax kunayman tuqitwa uñjasiraki. Jehová Diosan mayitanakap contra saytʼapxañapatakiw wiyti, sañäni: “Janchin jan wali luräwinakapa, kuntix nayrax uñjki ukansa munañanakapa, jachʼa jachʼa tukuñanaka” (1 Juan 2:16). Jañchin munañanakapwa lurayaraki, ukanakasti akanakawa, wachuqa jucha lurañanaka, idolonakaru yupaychañanaka, layqasiñanaka, celasiñanaka, colerasiñanaka, ukat machañanaka (Gál. 5:19-21). Ukat khitinakatï Diosar luqtapkän ukanakax Diosat jithiqtasin jan kunatak askïki ukanakwa parlapxi, ukat kunatï qullanäki ukaruw qʼañuchapxi (2 Tim. 2:14-18). Ukhamax khitinakatï akapach ajayumpi irpayasipki ukanakaxa, Supayar uñtatäpxiwa.

8. Taqiniw mä amtar puriñasaxa, ¿kawkirïspasa?

⁸ Qullan ajayumpiti jakäwisan apnaqayasiñ muntan jan ukax akapach ajayumpich apnaqayasiñ muntan ukax sapa maynitäxiwa. Khitinakatï akapach ajayumpi irpayasipki ukanakax akapachatxa jithiqtapxaspawa ukat Diosan qullan ajayupampiw irpayasipxaspa. Ukampisa maysaruw tuqstarakispa. Khitinakatï walja tiempo qullan ajayumpi irpayasipki ukanakaxa, akapach ajayun sipitaparuw jalantapxarakispa (Fili. 3:18, 19). Ukhamaxa, kunjamsa akapach ajayur saykatsna uka tuqit uñjañäni.

Yupaychäwisan aynachtʼaskatas amuyasipxañäni

9-11. ¿Akapach ajayumpi irpayasiskatasxa kunanakas amuytʼayistaspa?

⁹ Qalltanxa mineronakatwa parlaskayätanxa jupanakax canario jiskʼa jamachʼinakwa apnaqapxirïna ukhamat ratuki venenon jiqʼi utjatapat amuyasiñataki. Mä minerotï jiskʼa jamachʼir jaulapat jalaqtir uñjaspänxa, jan jiwañatakix ratukiw kuns lurañapäna. Ukhamax cristianonakjamaxa, ¿akapach ajayumpi irpayasitasxa kunanakas amuytʼayistaspa?

¹⁰ Qalltanxa, kunapachatï Diosan Arupat chiqpach yatichäwip yatiqaskayätan ukat Jehová Diosar katuyaskayätan ukhaxa, inas wali sum Bibliat liytʼirichiyätan ukat taqi chuyma mayisirichiyätana. Tantachäwinakar sarañasa kusiskañarakïchïna. Taqi ukanakax jan akapach ajayumpi irpayasiñatakiw yanapistänxa.

¹¹ ¿Sapüru Biblia liyiñatakix chʼamachasisktanti? (Sal. 1:2.) ¿Jan armtʼasisati Diosat mayisisktanxa? ¿Taqpacha tantachäwinakar sarañatakix chʼamachastanti? (Sal. 84:10.) ¿Janikich ukanak lurxtanxa? Chiqas jakäwisan taqi kun lurañaw utjistu ukaw tiempsa chʼamsa apaqistuxa, ukatwa Jehová Diosar luqtañatakix tiemp apsusiñax wali chʼamäspa. Ukampis kuna lurañanakti aynachtʼayistaspa uk amuyastan ukhaxa, ¿akapach ajayumpiti irpayasisktanxa? Ukhamächi ukhaxa, ¿kunjamtï Jehová Diosar nayrax luqtkayätan ukham luqtañatakix chʼamachtʼasiñäniti?

Janipun chuymanakamax “phuqtʼatäpati”

12. ¿Jesusax kuns arkirinakapar iwxtʼäna, ukat kunatsa?

¹² ¿Akapach ajayur saykatañatakix kunamp lurañasäspasa? Kunapachatï Jesusax arkirinakapar “uñchʼukipxamaya” siskäna ukhaxa, jan walinakat amuñasipxañapatakiw yatiyänxa. Iwxtʼarakïnwa: “Amuyasipxam jumanakata, janiy chuymanakamax thathañanakampi, machañanakampi, aka jakaña sarnaqäwinakampisa phuqtʼatäpati, inampi yaqha urux jumanakxaru akatjamata jutaspa” sasa (Luc. 21:34, 35, MT).

13, 14. Manqʼaña ukhamarak umañ tuqitxa, ¿kunanakas jisktʼasiñasäspa?

¹³ Jesusan arunakapat amtañäni. ¿Janiw manqʼapxañamäkiti, umapxañamäkiti sasati Jesusax sänxa? Janiwa. Salomonan aka arunakapxa sum yatïna: “Nayax amuytwa, jaqitakix askiwa jakañapana kusisiñapaxa, ukhamarak suma sarnaqañapaxa. Diosaw churistuxa ukatwa jiwasax manqʼtansa, umastansa, ukhamarak luratanakasatsa kusistanxa” (Ecl. 3:12, 13). Ukampis Jesusax yatirakïnwa manqʼampi jiljasiñaru, machjasiñaru akapach ajayun wiytatapxa.

¹⁴ ¿Kunjamatsa akapach ajayux venenonjam aynachtʼayaskistuti janicha uk yatsna, ukat manqʼañansa umañansa jiljatassa jan amuyasxsna?  Jisktʼasiñasäspawa: “Biblia jan ukax Bibliat apstʼat qillqatanak liyiskta ukhaxa, ¿manqʼa thathunäñat parlki ukhax kamachtsa? ¿Sintikirakiw parlxi sistcha? ¿Ukax walikïskiwa, nayax janiw kuna jan walsa lurkti sistanti? * Mä jukʼsa umirïstanxa, ¿janiw sinti jiljañäkiti, janiw machjasiñäkiti siski uka iwxanakxa kunjamsa katuqtxa? ¿Uka iwxtʼax janiw nayatakïkiti sistti? Maynitï alcohol umatamax llakisiyituw sitaspa ukhaxa, ¿janiw ukhamäkiti sistti jan ukax colerasjaktcha? ¿Biblian iwxanakapar jan istʼapxañapatakit mayninakar wiyttxa?” sasa. Kunjamtï uñjawayktanxa, sarnaqäwisax amuytʼayistaspawa akapach ajayumpit apayasisktan janich ukxa (uñxattʼarakismawa Romanos 13:11-14).

Llakinakampix jan atipayasiñäniti

15. ¿Kunar atipañatsa Jesusax parlarakïna?

¹⁵ Akapach ñanqha ajayur atipañatakixa llakinakasar atipañaw wakisiraki. Jucharar jaqjamaxa kunatsa llakisiktanwa, Jesusax uk yatïnwa. Ukatwa wali munasiñampi arkirinakaparux akham säna: “Jan llakisipxamti” sasa (Mat. 6:25). Maynix kunatï askïki uka tuqit llakisirakispawa, sañäni Diosar kusisiyañata, taman irnaqäw luräwinakata ukat familiapatak irnaqañata (1 Cor. 7:32-34). Ukhamaxa, ¿kunatsa Jesusax parlaskäna?

16. ¿Akapachan yänakap munañax kunjamtʼayisa jaqinakaruxa?

¹⁶ Taqi kuntix akapach ajayux churañataki uñachtʼayki ukaxa, jan walinakwa jaqirux lupʼiyi. Ukat qullqikis jakäwitakix wali wakiskirïspa, ukat mä jaqiruxa Diosampi sum apasiñat sipansa, walja yänakanïtapataki wali askirjam uñjatäspa ukhamwa jaqirux amuytʼayi. Khitinakatï uka amuyumpi sallqjayasipxi ukanakaxa qullqi jikxatañatakixa esclavoruw tukupxi, mä arunxa wal irnaqapxi, ukat kunatï machaqäki, jachʼäki ukat jichhak uñstaski ukpunwa munapxi (Pro. 18:11). Ukham jan wali amuyunakaxa, yänak tuqitxa maynirux  llakisiyiwa ukat Diosampis janiw sum apasiyxiti (Mateo 13:18, 22 liytʼasiñapawa).

17. ¿Kunjamatsa llakinakampix jan atipayaskna?

¹⁷ Janitï llakimpi apayasiñ munkstanxa, Jesusan aka iwxaparuw istʼañasa: “Ukhamasti, nayraqatax Diosan reinopa munapxam, ukhamarak kunatix chiqäki jupan nayraqatapanxa ukanaka”. Jesusax arsuwayiwa jiwasatï phuqañänixa, kunatï wakiski ukanakax churatakïñäniwa (Mat. 6:33). ¿Arsutaparu atinisitasxa kunjamsa uñachtʼaysna? Mä tuqitxa ‘muntanwa kunatix chiqäki Jehová Dios nayraqatapanxa ukanaka’, qullqi tuqitxa Diosan mayitaparjam sarnaqañ muntanxa. Amuytʼañataki, impuestonak pagasax janipuniti mä jukʼsa kʼarisktanxa. Kunatï churañasäki ukampix phuqtanti. Ukat kunapachatï manunïktan ukhaxa, Jesusan aka arunakaparux istʼtanti: “Jumanakan arsuñamaxa akakiñapawa, ‘jisa’” (Mat. 5:37; Sal. 37:21). Ukham jan kʼarisisaxa janiw qamiriptkañäniti, jan ukasti Diosampix sum apasiñäni, mä suma conciencianirakïñäniwa ukat janiw kunat llakisiñasas utjkaniti.

18. ¿Jesusax jakäwipampix kunsa uñachtʼayistu, ukat kunjamsa jupat yatiqasiñax yanaptʼistaspa?

¹⁸ Diosan Reinop nayraqat thaqhañatakix jakäwisan kunanakas wakisi uk uñjañasawa. Jesusat amuytʼañäni. Awisaxa, mä suma isi uchasirïna (Juan 19:23). Jesusax amigonakapampix manqʼañataki, umañatakisa janiw janiw siskänti (Mat. 11:18, 19). Ukhamaxa, Jesusatakix yänakanïñasa, kʼuchirtʼäwinakasa jakäwitakix sumänwa, kunjamtï mä manqʼax condimenton sumäkixa ukhamänwa, ukampis chiqpach manqʼapaxa Jehová Diosan munañapa lurañänwa (Juan 4:34-36). Kunapachatï Jesusan jakäwipat yatiqastan ukhaxa, kusisitaw jikxatastanxa: Biblian chuymachäwi arunakampiw llakitanakarux yanaptʼtanxa, tama taypit yanaptʼapa, munasiñapwa katuqtanxa, ukat jukʼampixa Jehová Diosan chuymapwa kusisiytanxa. Kunatï wakiski uk sum amuyktan ukhaxa janiw akapachan yänakaparu ni kusistʼañanakapan esclavop tuktanti. Jan ukasti, ukanakax Jehová Diosar sum yupaychañasatakiw yanapistu. Ukat kunapachati Diosan Apnaqäwip tuqi saytʼastan ukhaxa, janiw akapach ajayumpix ratuk atipayaskañäniti.

“Ajayun jakañat” amtanïñasawa

19-21. ¿“Ajayun jakañat” amtanïñatakix kunas lurañasäspa, ukat kunatsa uk lurañax wakisispa?

¹⁹ Kuntï maynix lupʼki ukwa luraraki. Jan wali luräwinakaxa janchin munañanakaparjama jan amuytʼan luräwinakawa. Ukatwa apóstol Pablox amtayistuxa kunanakansa lupʼiñasaspa uka tuqinakata. Akham qillqatayna: “Khitinakatix janchin munañaparjam jakasipki ukanakaxa akapachan jakañapatwa llakisipxi, ukampis khitinakatix ajayump jakapki ukanakax ajayu tuqin jakañatwa llakisipxaraki” sasa (Rom. 8:5).

²⁰ ¿Luräwinakasansa amuyunakasansa kunjamatsa akapachan ajayupampix jan atipayasksna? Lupʼïwisan jan pantjasiñasatakixa, kunanaktï uñjktan liyktan ukanakxa sum ajlliñasäspawa. Sañäni, janiw qʼañu luräwinakanïki ukat nuwasiñanakanïki ukanak uñchʼuktanti, kunattix ukanakax amuyusaruw qʼañuchi. Amtapuniñäni, qʼuma qullan ajayuxa janipuniw qʼañu lupʼïwinakanirux yanapkaspati (Sal. 11:5; 2 Cor. 6:15-18). Ukhamarusa, kunapachatï Biblia liyiñata, mayisiñata, lupʼiñata ukhamaraki tantachäwinakaru sarañatsa jan armasktan ukhaxa, mä punksa Diosan qullan ajayupar jistʼarksna ukhamawa. Ukat kunapachatï Dios tuqit yatiyir sarapuntan ukhaxa, qullan ajayumpiw irpayasisktanxa.

²¹ Akapach ajayuru ukhamarak kunanaktï uñachtʼayi ukanakarux saykataskakiñäni. Chʼamachtʼasiñax wali askipuniwa, kunjamtï apóstol Pablox qillqki ukhama: “Akapachankkis ukanakat llakisiñaxa jiwañar irpiriwa, ukampis ajayun jakañat llakisiñaxa wiñay jakañaru, ukhamarak sumankañaruw api” (Rom. 8:6).

[Qhanañchäwi]

¿Amttati?

• ¿Qullan ajayu katuqañatakix kunas lurañasäspa?

• ¿Akapach ajayux kunjamanakatsa aynachtʼayistaspa?

• ¿Kunjamsa akapach ajayurux saykatsna?

[Jisktʼanaka]

[21 janan fotopa]

Irnaqäwiru jan ukax escuelaru janïr sarkasaxa, qullan ajayun yanaptʼap mayipxañäni

[23 janan fotonakapa]

Lupʼïwinakasax qʼumäñapawa, manunakasxa phuqañasawa ukat umañansa manqʼañansa janiw jiljañasäkiti