Jesusat yatiqasisa munasiñampi yatichapxañäni

“¡Janiw kunapachas khitis uka jaqjamax parlkiti!” (JUAN 7:46.)

1. ¿Jesusan yatichäwinakap istʼasax kunjamsa jaqinakax jikxatasipxäna?

 JESUSAR istʼañax wali sumapunïpachänwa, ¿uk jumax amuyasmati? Kunjamsa jaqinakax jupar istʼasin jikxatasipxäna ukwa Bibliax qhanañchistu. Amuytʼañataki, Nazaretankir jaqinakax “muspharasipxarakïnwa jupan ukkha suma arunak jupanakar parltʼatapata” sasaw Lucas libron qhanañchi. Ukat Jesusan Wali Uñtʼat Arstʼäwipa istʼapkäna ukhaxa, “taqi jaqinakaw uka suma yatichäwinak istʼasax muspharapxäna” sasaw Mateo libronx saraki. Ukatxa, Jesusar katuntir sarapkäna ukanakax janiw jupar katuntapkänti, jan ukasti ukhamakiw kuttʼapxäna ukat akham sapxarakïnwa: “¡Janiw kunapachas khitis uka jaqjamax parlkiti!” sasa (Luc. 4:22; Mat. 7:28; Juan 7:46).

2. ¿Kunanakampis Jesusax wali amuytʼkaya yatichirïna?

² Uka jaqinakax chiq parlasipkäna. Kuna laykutix janipuniw Jesusjam mä suma yatichirix utjkaspati. Jupax jan kamskañwa wali qhana ukat amuytʼkäña wali sum yatichäna. Wali sumwa uñachtʼäwinakampi ukat jisktʼanakampiw amuytʼayäna. Kunjamsa jaqinakax jikxatasipxäna ukarjamaw yatichäna. Qamirinakarus pisinkirinakarus chuymar purtʼkirwa yatichäna. Wali chʼama yatichäwinaksa wali qhanwa amuytʼayirïna. Ukampis janiw ukham yatichasakix mä suma yatichirit uñtʼatäkänti.

Munasiñax wakiskiripuniwa

3. Yupaychäw sarayirinakan yatichirinakapat sipansa, ¿kunatsa Jesusax wali suma yatichirïnxa?

³ Ley yatichirinakatsa fariseonakatsa wali yatxattʼata yatichirinakax utjarakpachänwa. Ukampis ¿kunatsa Jesusax jan jupanakjamäpkpachäna? Nayraqatxa, jupanakax janiw jaqinakar munasipkänti, jan ukasti uñisipxänwa; ‘maldecita’ jan wali jaqinakjamaruw uñjapxäna (Juan 7:49). Ukampis Jesusax janiw ukhamäkänti, jan ukasti jaqinakat wal sinttʼasirïna, kunjamatï jupax siskänxa, llakita, tʼaqhisita ukat jan awatirin uwijanakarjamaw uñjäna. Chiqas wali munasiri ukat khuyaptʼayasiri ukham suma jaqïnwa (Mat. 9:36). Ukatsti, yupaychäw sarayirinakax janiw Diosarux munasipkänti (Juan 5:42). Ukampis Jesusax taqi chuymaw Awkiparux munasïna, ukat wali kusisitaw kuntï lurañapäkäna uk phuqarakïna. Ukxarusti, ley yatichirinakampi fariseonakampix munañanakaparuw Qullan Qillqatanak apnaqapxäna, Jesusax janiw ukham lurkänti, jan ukasti “Diosan arunakap” taqi chuymaw munäna; ukatwa yatichäna, amuytʼayäna, arxatäna ukat ukarjam jakarakïna (Luc. 11:28). Chiqansa, Jesusax jaqinakar wali sum uñjäna, yatichäna  ukat suma arunakampirakiw parläna, ukhamatwa chiqpach munasiñanïtap uñachtʼayäna.

4, 5. 1) ¿Kunatsa munasiñampi yatichañax wali aski? 2) Yatichktan ukhaxa, ¿kunatsa yatiñanïñasa chʼikhi amuyunïñas wakisirïpacha?

⁴ Ukhamasti jiwasax Jesusat yatiqasisaw yatiyir sarañ munaraktanxa, ukat ukarjamaw sarnaqañ muntanxa (1 Ped. 2:21). Janiw aru mayakix jaqinakar Bibliat yatichktanti, jan ukasti Jehová Diosan munasiñapa, yatiñkankañapa ukat khuyaptʼasiñapwa uñachtʼayañ munaraktanxa. Inas wali yatiñani jan ukax jukʼa yatiñanikïstan ukat inas wali sum yatichirïstan jan ukax jan sum yatichirïkstanti. Ukampis munasiñaw jaqin chuymapar purtʼañatakix yanaptʼistani. Ukhamasti, suma yatichirïñatakixa, Jesusat yatiqasisaw munasiñampi yatichañasa.

⁵ Chiqansa, yatiñanïñasa suma yatichirïñasa wali askiwa. Uka pä tuqitwa Jesusax arkirinakapar yanaptʼäna, ukat Jehová Diosax markapampirakiw jichhax yanaptʼarakistu (Isaías 54:13; Lucas 12:42 liytʼasiñapawa). Ukat yatichktan ukhaxa, janiw kuntï yatktan ukak yatichañasäkiti, jan ukasti taqi chuymaw yatichañasa. Kunapachatï, yatiñampi, chʼikhi amuyumpi ukat munasiñampi yatichktan ukhaxa, luratasax janiw inamayäkiti. Ukhamaxa, ¿kunjamatsa munasiñampi yatichsna? ¿Kunjamsa Jesusampi arkirinakapampix yatichapxäna?

Jehová Diosar munasiñasawa

6. Khitinakarutï wal munastan ukanakatxa, ¿kunjams parltanxa?

⁶ Kuntï wal munktan uka tuqitpunwa jilpach parlañ yattanxa. Ukat kunatï jiwasatakix wali wakiskirïki ukhaxa, wali kusisitaw uka tuqit parltanxa. Yämas maynir munastan ukhaxa jukʼamp kusisitaw jupat parltanxa. Jïsa, kunja suma jaqisa uk taqinin yatipxañapwa muntanxa, ukat maynitï jupat jan wal parlki ukhax arxattanwa. Chiqansa, kunjamtï jiwasax jupar munktanxa ukham munapxañapwa munaraktanxa.

7. Jehová Diosar munasitapatxa, ¿kunsa Jesusax luräna?

⁷ Ukhamasti, mayninakar Diosar munasiñ yatichañatakixa, nayraqat jiwasaw Alaxpachankir Awkisar sum uñtʼañasa ukat taqi chuyma munasiñasa. Chiqas munasiñatwa Diosar taqi chuym yupaychtanxa (Mat. 22:36-38). Uka tuqitwa Jesusat yatiqasiñasa, jupax taqi chuymapampi, almapampi, amuyupampi ukat chʼamapampiw Jehová Diosar munasïna. Jupax millón millón maranakaw alaxpachan Awkipamp chikax jakäna, ukatwa sum uñtʼäna ukat wal munasïna. Ukatwa akham säna: ‘Awkijarux munastwa’ sasa (Juan 14:31). Jïsa, uka munasiñaw arsutanakapansa luratanakapans uñjasïna, ukat ukarakiw Diosan munañap phuqañatak yanaptʼäna (Juan 8:29). Ukat uka munasiñapaw kʼari chuyman pʼiqtʼirinakar jan wali lurapxatapat qhankatañatak yanaptʼarakïna, jupanakax chiqpach Diosarus yupaychapkaspa ukhamwa sarnaqapxäna. Jesusax munasiñatwa jaqinakar yaticharakïna, ukhamata Jehová Diosar uñtʼapxañapataki ukat munasipxañapataki.

8. Diosar wal munasitap laykuxa, ¿kunsa Jesusan arkirinakapax lurapxäna?

⁸ Nayrïr cristianonakax taqi chuymaw Jehová Diosar munasipxarakïna, ukatwa jan axsarayasisa wali kusisita suma yatiyäwinak yatiyapxäna. Yupaychäw pʼiqtʼirinakax janis yatiyapxañap munapkchïnxa, jupanakax taqiniruw Jerusalenan yatiyapxäna. Chiqas kuntï uñjapkäna ukat istʼapkäna ukanakatx parlapxapunïnwa, janiw amuktʼapkänti (Hech. 4:20; 5:28). Kunjamsa Jehová Diosax jupanakar yanaptʼäna bendicïna ukxa wali sum amuyapxäna. Ukat Jesusan jiwatapatxa, niya kimsa tunka maranak pasxäna ukhaw apóstol Pablox akham säna: “Aka qhispiyasiñ arunakasti taqi chiqanwa parlasi” sasa (Col. 1:23).

9. ¿Jehová Diosar jukʼamp munasiñatakix kun lurañasasa?

⁹ Suma yatichirïñatakixa, sapürutjamaw Jehová Diosar taqi chuym munasiñataki chʼamachasiñasa. ¿Kunjamatsa uk lursna? Diosar mayisktan ukhaw Jupampi parltʼastanxa. Ukatxa, Arupsa ukat Bibliat apstʼat qillqatanaksa liyiñasapuniwa ukat tantachäwinakarus sarañasarakiwa, ukhamatwa Jehová Diosar jukʼamp munasiñäni. Jiwasatï Jupar sum uñtʼañäni ukhaxa,  jukʼampwa Jupar munasiñäni. Ukat arsutanakasampisa luratanakasampisa Diosar munasitas uñachtʼayañäni ukhaxa, mayninakax uk uñjasax Diosar yupaychañ munapxarakiniwa (Salmo 104:33, 34 liytʼasiñapawa).

Kuntï yatichktan ukax wali wakiskiriwa

10. ¿Mä suma yatichirix kunjamäñapasa?

¹⁰ Mä suma yatichiritakix kuntï yatichki ukax wali wakiskiriwa, chiqas kuntï yatichki ukax kunja askis jupatakix uk sum yati ukat ukarux atinisirakiwa. Ukat taqi chuyma yatichani ukhaxa, yatiqirinakax jukʼampwa yatiqañ munapxani. Ukampis kuntï yatichki ukar jan yäqas yatichkani ukhaxa, yatiqirinakax janiw yatiqañ munapkarakiniti. Ukhamasti, Diosan Arupat yatichirinakjamaxa, kunjamsa yatichasktan uk janiw armañasäkiti, kunattix sum yatichani ukhaxa yatiqirix yatichiripjamäniwa, sasaw Jesusax säna (Luc. 6:40).

11. ¿Kuntï yatichkäna ukax kunatsa Jesusatakix wali wakiskirïnxa?

¹¹ Jesusax alaxpachankir Awkipatsa, ‘Diosan arunakapatsa’ ukat ‘wiñay jakañ arunakatsa’ wali sum yatïna. Chiqas ukanak yatiñax Jesusatakix wali askïnwa (Juan 3:34; 6:68). Kuntï yatichkäna ukax mä qhanjamaw jaqinakataki qhantʼäna. Ukhamata walïki jan walïki uk sum amuyasipxañapataki. Ukhamatwa Supayan jan ukax yupaychäwi pʼiqtʼirinakan tʼaqhisiyat altʼat chuymaninakarus chuymacharakïna ukat mä suytʼäwi churarakïna (Hech. 10:38). Chiqansa, kuntï yatichkäna ukaxa, Jesusatakix wali askïnwa, ukatwa ukarjamas yatichäna ukat sarnaqarakïna.

12. ¿Kunatsa Pablotakix Diosan arunakapat yatiyañax wali askïnxa?

¹² Nayra cristianonakax Jehová Diosan ukat Jesusan chiqa yatichäwinakapxa wal munapxarakïna, chiqas jupanakatakix wali wakiskirïnwa. Ukhamatwa uñisirinakan amuktʼayañ munatas yatiyasipkakïnxa. Pablox akham sasaw Roma markankir cristianonakarux säna: “Nayax jankʼakïtwa qhispiyasiñ suma arunak yatiyañatakixa, [...]. Janiw nayax evangeliotx pʼinqaskti, ukasti Diosan chʼamapawa taqi iyawsir jaqinakar qhispiyañataki” sasa (Rom. 1:15, 16). Pablotakix ukham yatiyañax wali askïnwa, ukatwa akham qillqäna: “Jupaw akkha suma yatiyañ churitu, jan judiöpkis ukanakaru Criston jan jaktʼkañ qamir kankañapat suma yatiyäwinak yatiyañataki” sasa (Efe. 3:8). Kunjamsa Pablox Jehová Diosampita amtanakapampita taqi chuym yatiyäna ukax qhana amuytʼkayawa.

13. ¿Diosan yatiyäwinakapax kunatsa jiwasatakix wali wakiskiri?

¹³ Kuntï Bibliax yatichki ukanakaxa, Jehová Diosar sum uñtʼaña ukat Jupampi sum apasiñwa yanaptʼistu. Ukatsti, kuntï yatiñ munktan ukarux sum qhanañcharakistu ukat sum jakañasatakisa mä suytʼäwinïñatakisa ukat jan waltʼäwinakar saykatañatakisa wal yanaptʼarakistu. Ukatxa, kunjamsa wiñay jakañ jikxatsna uksa yaticharakistuwa. Chiqas ukanak yatisax wal kusistanxa. Wali suma yatiyäwinakapuniwa, janiw kawkinsa ukham suma yatiyäwinakxa jikxatksnati. Ukat mayninakar ukanak yatiyañax wali askirakiwa (Hech. 20:35).

14. ¿Diosan suma yatiyäwinakapar munañatakix kun lurañas wakisispa?

¹⁴ ¿Diosan suma yatiyäwinakapar jukʼamp munañatakix kuns jumax lurasma? Kunapachatï Diosan Arupa liyïta ukhaxa, sum amuykiptʼas liyiñamawa. Sañäni, Jesusamp chikas yatiyir sarkasma jan ukax apóstol Pablomp chikas sarkasma ukham amuyañamawa. Jan ukax niyas machaq Uraqinkkasma ukat kunjamsa ukan jakasisma uksa amuytʼarakismawa. Ukat kuna bendicionanaksa Jehová Diosar istʼasax katuqawayta uka tuqitsa lupʼiñamarakiwa. Jiwasatï suma yatiyäwinakar taqi chuym munatas uñachtʼayañäni ukhaxa, yatiqirinakasax uk amuyapxaniwa, uk janiw armañasäkiti. Ukatwa kuntï yatiqktan ukanakat lupʼiñasa ukat kunjamsa yatichasktan uk sum amuyañasa (1 Timoteo 4:15, 16 liytʼasiñapawa).

Jaqi masisar munasiñasawa

15. ¿Kunatsa yatichirix yatiqirinakapar munasiñapa?

¹⁵ Mä suma yatichirixa, kunjamsa yatiqirinakapax sum yatiqapxaspa ukat jan axsartʼas  arstʼapxaspa ukatakiw chʼamachtʼasi. Chiqansa, yatiqirinakapax kawkhakamas yatiqapxaspa, kunjamsa jikxatasipxi ukat kunjamsa jakasipxi taqi ukanakwa amuyi. Ukat kunapachatï, yatichirix jupanakar taqi chuyma munasi ukhaxa, yatiqirinakax amuyapxarakiwa. Ukham lurasaxa, yatichirix kusisitaw yatichi ukat yatiqirinakas sum yatiqapxaraki.

16. ¿Kunjamsa Jesusax jaqinakar wal munasitap uñachtʼayäna?

¹⁶ Jesusax taqi chuymaw jaqinakar munasïna. Ukat jiwas laykurakiw jan juchan jakäwip aptʼasiwayi, ukhamatwa wali munasiñanïtap uñachtʼayawayi (Juan 15:13). Aka Uraqinkkäna ukhaxa, kunatix jaqinakataki munaskäna ukarjamaw yanaptʼäna, ukatxa Diosan yatichäwinakapwa nayraqat yaticharakïna. Janiw jupar jaqinakax jutapxañap suykänti, jan ukasti jupaw Diosan qhispiyasiñ arunakap yatiyañatakix wali jayanakar kayuk saräna (Mat. 4:23-25; Luc. 8:1). Ukatxa, wali amuytʼani ukat llampʼu chuyman jaqïnwa. Amuytʼañataki, kunapachatï arkirinakapar chiqañchañax wakiskäna ukhaxa, wali munasiñampiw chiqañchäna (Mar. 9:33-37). Maysa tuqitxa, kunja suma yatiyirinakäpxanis uk yatisaw jupanakar atinisirakïna, uk amuyasarakiw arkirinakapax wali chʼamachtʼata jikxatasipxpachäna. Chiqansa, Jesusjam suma yatichirix janipuniw utjkaspati. Jupax wali suma jaqïnwa, ukatwa arkirinakapax jupar munasipxäna ukat kamachinakapsa phuqapxarakïna (Juan 14:15 liytʼasiñapawa).

17. Jesusan arkirinakapaxa, ¿kunjamsa mayninakar munasitap uñachtʼayapxäna?

¹⁷ Arkirinakapax Jesusjamarakiw khitinakarutï yatiyapkäna ukanakarux wal munasipxäna. Ukat jupanakar yanaptʼañ laykusa ukat suma yatiyäwinak yatiyañ laykusa kunayman jan waltʼäwinakar saykatañ janiw axsarayasipkänti, ukat jakäwipsa aptʼasirjamäpxänwa. ¡Chiqas khitinakarutix yanaptʼapkäna ukanakarux walpun munasipxäna! Kuntï apóstol Pablox qillqkatayna uka suma chuymachtʼkir arunakapat amuytʼañäni, akham sänwa: “Jumanakarux munasiñ chuymampiw uñjapxsma, kunjämatix mä taykax wawanakaparu uywi, uñjaraki ukhama. Walja munasiñanakaxaw jumanakataki utjapxitu. Janiw Diosan arunakapakti churañ munapkiriskäyätxa, jan ukasti nanakan pachpa jakañanakaxsa churapxarakiriskäyätwa wal jumanakar munasipxatanakax layku” sasa (1 Tes. 2:7, 8).

18, 19. 1) ¿Kunatsa yatiyir sarañatakix wal chʼamachastanxa? 2) Jaqinakax jupanakar munasitasxa amuyapxiwa, ¿kunjamatsa uk yattanxa? Mä uñachtʼäwimp qhanañchtʼma.

¹⁸ Jichhürunakanxa, Jehová Diosan Qhanañchirinakapax ukhamarakiw khitinakatï Diosar uñtʼaña ukat luqtañ munapki ukanakar Uraqpachan thaqhasipktanxa. Chiqas aka qhipa tunka paqallqun maranakanxa, waranq waranqa horanakwa sapa mara yatiyasktanxa ukat Jesusan arkirinakap tukuyasktanxa. Ukat tiempo, chʼama, qullqi apstʼasisaw Diosatakjam taqi chuyma  lurtanxa. Jaqinakax kunatï chiqäki uk uñtʼapxañapa ukat wiñay jakañ jikxatapxaspa ukwa Alaxpachankir wali munasir Awkisax muni, ukxa jiwasax Jesusjamarakiw yattanxa (Juan 17:3; 1 Tim. 2:3, 4). Chiqansa, munasiñatwa Jehová Diosar uñtʼtañxa chiqa chuyman jaqinakar yanaptʼtanxa, ukhamatwa jiwasjam Jupar wal munasipxañapataki.

¹⁹ Ukat jupanakar munasitasxa amuyapxarakiwa. Amuytʼañataki, Estados Unidos markan jakasir mä precursorat parltʼañäni, jupax khitinakantï mä munat familiarapax jiwki ukanakaruw chuymachtʼañataki cartanak qillqañ yati. Mä urusti juparuw mä carta qillqanipxatayna, uka cartansti akham sänwa: “Khitirak ukha suma chuymachtʼkir arunak mä jan uñtʼatar qillqaspasti sasaw wal muspharayäta. Ukampis jumax jaqi masimaru ukat kawkïr Diosati jakäwisan sum uñjkistu ukar munasitamwa amuyta” sasa.

20. ¿Kunatsa munasiñampi yatichañax wali wakiskirixa?

²⁰ Munasiñampi sum yatichapxañäni ukhaxa, wali sum yatiqapxani. Ukhamasti, yatiqirinakasarux Jehová Diosar sum uñtʼapxañapataki ukat munasipxañapataki yanaptʼañäni. Ukat kunjamtï yatiqawayktanxa, suma yatichirïñatakix Diosaru, chiqa yatichäwiru ukat jaqi masisaru munasiñasawa. Chuymasantï uka munasiñax utjani ukat ukarjam yatiyir sarañäni ukhaxa, janiw yanaptʼatas laykukix kusiskañäniti, jan ukasti Jesusat yatiqasitasa ukat Jehová Diosar kusisiyatas yatisaw kusisirakiñäni.

¿Amttati?

• Biblian chiqa yatichäwinakap yatichkasaxa, ¿kunatsa wali wakiskirïpacha . . .

Diosar munasiñaxa?

kuntï yatichktan ukar wali wakiskirit uñjañaxa?

jaqi masisar munasiñaxa?

[Jisktʼanaka]

[15 janan fotopa]

¿Kunatsa Jesusax ley yatichirinakat sipansa fariseonakat sipansa wali suma yatichirïnxa?

[18 janan fotopa]

Suma yatichirïñatakixa, yatiñani, sum yatichiri ukat munasiri ukhamäñasawa