Jan inaktʼas taqi chuym luqtapxañäni

KUSISIT jakasiñamwa Jehová Diosax muni (Sal. 100:2). Luqtiripjamax jan tiemponiw sarnaqpachätaxa. Janïr bautisatäkasinxa inas tiemponik sarnaqirïsta, ukampis jichhax Diosar luqtasax waliw lurañanakamax yapxatpacha, ukat inas wali qarit jikxatasta ukat lurañanak jan sum phuqasax llakisiraksta. Ukampis ¿kunjamatsa Jehová Diosar ‘kusisiñampi’ luqtaskakisma? (Neh. 8:10.)

Niyakixay jan wali urunakan jakastanxa, tiempox janiw utjaskiti, ukhamasti kunanak lurañas nayrankañapa uka tuqinakat sum amuytʼasiñamawa. Apóstol Pablox akham sasaw Diosan amuytʼayatäsin qillqatayna: “Sum amuyasipxam. Yatiñ kankañampi jakapxam, janirak jan yatirinakjamaxa. Jan tiempxa ina chʼusaru tukuyapxamti, urunakax jan walïxatap layku” sasa (Efe. 5:15, 16).

¡Uka arunakax wali askipuniwa! Ukat Bibliat yatiqañatakisa familia uñjañatakisa yatiyir sarañatakisa irnaqir sarañatakisa ukat yaqha luräwinakatakisa, ¿kunjamatsa jumax tiempo apstʼasisma?

Diosar katuyasisinxa wali kusisitaw bautisaspachätaxa, ¿uk amtasisktati? Ukampis ¿kunatsa wal kusisiyäta? Jehová Diosampit amtanakapampit yatxatasaw wal kusispachäyätaxa. Chiqansa Dios tuqit yatxatañatakix walja tiempow chʼamachaspachätaxa, ukampis janiw inamay yatxatawayktati, ukaw kusisit jakasiñ yanaptʼawaytamxa.

Ukhamasti Diosar kusisit luqtaskakiñatakix yatxataskakiñamawa. Ukat jan tiemponi sarnaqsta ukhasa, Biblia liyiñatakis yatxatañatakis kunjamatsa tiempo apstʼasiñamapuniwa. Mä qhawqha minutonakakis Diosan Arupat yatxatañataki ukat lupʼiñataki tiempo apstʼasïta ukhax jukʼampiw Jehová Diosar jakʼachasïta ukat kusisitaw jikxatasirakïta.

Jehová Diosan luqtirinakapatxa waljaniw askïki ukanakatakix tiempo jilpach apstʼasipxi ukat jan wakisirïki ukanakatakix jukʼa tiempok apstʼasipxaraki. ¿Jumax ukhamti luraskta? Akham jisktʼasiñamawa: “¿Periodiconaka jan ukax yaqha qillqatanak liyisasa televisión uñchʼukisasa musicanak ischʼukisasa jan ukax yaqha ukhamanak lurasas qhawqha tiempsa aptʼastxa?” sasa. Inas kun lurañas waljamächispa jan ukax munañjamächispa, ukampis janiw ukanakarux walja tiempo aptʼasiñamäkiti (1 Tim. 4:8). Tiempompi taqxatayasisksta ukhaxa, kunas nayrankañapa ukarjamaw tiempxa taqi kunatak apstʼasiñama.

 Kimsa wawan Adam sat mä irpir chuymanix akham siwa: “Kunatix wakiski ukanakampikiw jakasipxta. Kuna kusistʼañanakatï ina chʼusar tiempo aptʼasiykitaspa ukanakxa janiw lurkti, janirakiw tiempo apaqir yänakas utjkituti. Ukampis kunanakatix yanaptʼkitu ukanak lurasaw kusisit jakastxa” sasa.

Kuna askinaktï Diosan markapan jikxatawaykta ukanak amtañaw kusisit chuymampi Diosar luqtañ yanaptʼarakïtamxa. Kimsa wawan Mario sat mä irpir chuymanix akham siwa: “Bibliat yatiqañ qalltawaykta ukat aksarux janiw llakinakampix atipayasxtti, kuna suytʼäwis utji ukxa sum amuyasta. Chiqas walja kutiw jan walinakan uñjasiwayta, ukanakxa Jehová Diosakiw yati. Jupan yanaptʼataw jichhax wali kusisit jikxatasta” sasa.

Kunjamtï Mariox siskixa, suytʼäwinïkasas awisax llakinakan uñjasiskaksnawa, ukampis uka suytʼäwiw kunayman jan walinakar saykatañ yanaptʼätamxa. Proverbios 15:15 qillqatax akham siwa: “Khititix llakitäki ukatakix taqi urunakasa jan walikamakiwa; khititix kusisitäki ukatakisti jan tukuskiri kusisiñawa” sasa. Ukat Jehová Diosax wal jumarux munastamxa, uka tuqit amuytʼasiñamarakiwa, ukhamatwa Juparux jukʼamp munasïta ukat kusisiñapsa katuqarakïta (Mat. 22:37).

Kawkïr familianakatix Diosar nayraqat yupaychapki ukanakaw jukʼamp kusisit jakasipxi. Kunapachatï mä familianxa taqinis cristianjam sarnaqapki ukhaxa, sumakiw mayachtʼat jakasipxi. Ukat familiaman ukham sarnaqapxäta ukhaxa, wali sumaw mayachtʼat jakasipxäta (Sal. 133:1).

Familpach Diosar kunayman tuqit sum luqtapxätaxa, wali kusiskañäniwa. Mariox akham siwa: “Familiajampïñatakiw tiempo apstʼasta, ukax wali wakiskiriw nayatakixa. Warmijax wali yanaptʼasiriwa. Diosat yatiyirix paninpacha sarañatakiw chʼamachasipta ukat jachʼa tantachäwitak qʼumachirisa sarirjamäki ukhax nayamp chikaw sararaki, ukat yaqha tamanakar arstʼir sarta ukhas panpachaniw sarapxarakta. Ukaw wal chʼamañchitu” sasa.

Mä cristianox familiapar uñjañatak irnaqañaparakiwa, kunjamtï Bibliax qhanañchi ukhama (1 Tim. 5:8). Ukampis wal irnaqasin jan tiemponi qarita jikxatasïta ukhaxa, Diosarux janiw kusisiñamp luqtxasmati. Jan ukar puriñatakix Jehová Diosat yanap mayisiñamawa (Sal. 55:22). Yaqhipax Diosar nayraqat luqtaskakiñatakixa yaqha irnaqäwi thaqhasipxi. Jumatï qullqi layku wal irnaqasin Diosar jan sum luqtxasmaxa janiw walïkaspati, chiqpachansa jiwasatakix Diosatak irnaqañaw nayrankañapa (Pro. 22:3).

Ukhamasti, irnaqäwiman kuna askinakas utji, kuna jan walinakas utji ukanak qillqtʼasisin amuytʼasiñamawa, ukat yaqha irnaqäwi thaqkasas ukham amuytʼasiñamarakiwa. Chiqansa taqiniw irxattʼat pagapki ukan irnaqañ muntanxa, ukampis ¿familiamar Diosar yupaychañ tuqit yanaptʼañatakix tiempox utjasktamti? Jan ukhamäkchixa, taqi tuqit sum amuytʼasiñamawa ukatxa ukarjamaw kun lurañsa amtxäta, ukampis uka amtamax Jehová Diosar taqi chuyma luqtañ munatamwa uñachtʼayañapa.

Jehová Diosar jukʼampi luqtañ laykuxa, walja jilat kullakanakaw tiempo apaq luräwinaka jaytanukupxi. Ukat juman irnaqäwimatï walja tiempo apaqaskstam ukhaxa, janiw ukharuki qhiparañamäkiti, kun lurañas wakisispa ukxa jankʼakiw Diosar sum luqtañatakix askichañama. Polonia markankir mä jilatax akham siwa: “Mä irnaqäwijanxa wali jayanakwa negocio lurir khithasipxiri. Ukat Diosar luqtañatakis familiatakis janiw tiempox utjasirïkiti. Ukatwa uka irnaqäwi jaytjawayta” sasa. Jichhax yaqhan irnaqaski, janiw añcha qariñäxisa ni wali tiempo apaqäxisa.

Yaqhanakar yanapañax kusisiñ apani

“Katuqirit sipansa jukʼamp kusisiñaniw khititï churki ukaxa” sasaw Jesusax säna (Hech. 20:35). Cristianonakax kunaymanitwa uk uñachtʼaysna. Inas maynir sum arunttʼasas ampar qʼapirtʼasas jan ukax taman kun sum luripansa “walik ukham lurtax” sasin maynir chʼamañchtʼchisma. Ukham lurasax jumas kusisirakïtawa.

 Ukat “mayjtʼatanakarux chʼamañchtʼapxam, tʼukhanakarusti yanaptʼapxarakim” sasaw Pablox jilat kullakanakar sarakïna (1 Tes. 5:14). Khitinakatix mayjtʼata, llakit sarnaqapki ukanakatakix llakinakar atipañax wali chʼamäspawa. Ukampis ¿kunjamatsa jupanakar yanaptʼasma? Mä cristiano masimatï tʼukhartaskchi ukhax yanaptʼañamawa. Ukham yanaptʼasax juma pachpas chʼamañchtʼataw jikxatasirakïta. Chiqas janiw taqi jan waltʼäwinak askichkaraksnati, ukampis taqi chuymaw chʼamañchtʼasma. “Jehová Diosaw yanaptʼaskätam, jupar atinisiñamawa, janiw apanukkätamti” sasin amtayañamawa (Sal. 27:10; Isa. 59:1).

Ukatxa jupamp chikaw Diosan arunakapat yatiyiris misturakisma. Kunapachatï Jesusax 70 arkirinakapar yatiyir khitkäna ukhaxa, “panin panini” khitäna, ukhamatwa purapat chʼamañchtʼasipxäna (Luc. 10:1). Ukhamasti, llakitäki ukamp chik yatiyir sarasaw chʼamañchtʼkarakisma.

Jichhürunakanxa kunayman llakinakaw utji. Ukampis Pablox akham sistuwa: “Tatitunkasax kusisitäpxapunim taqi urunakana. Wasitat sapxsma, kusisipxam” sasa (Fili. 4:4). Ukat niyakixay Diosan kamachinakap Jupar munasiñat phuqstanxa ukat kunatï lurañasäki ukanak taqi chuyma lurarakstanxa, wali kusisitaw jakastanxa, janiw inamay sarnaqktanti. Ukatxa Jehová Diosaw jan walinakar saykatañ yanaptʼaskistu, ukaw jukʼamp askixa (Rom. 2:6, 7).

Kuntï Diosax churapxämaw siskistu ukax wali jakʼankxiwa. ¡Niyaw mä suma Uraqin wali kusisit jakasxañäni! (Sal. 37:34.) Ukhamasti nayrar sartaskakiñäni. Dios Awkisax kuna bendicionanaksa jichhürunakan churistu ukanakxa janipun armañäniti. Ukhamatwa “kusisit chuymamp” luqtaskakiñäni (Sal. 100:2).

[8 janan diagramapa]

(Sumpach amuytʼañatakix qillqatn mistki uk uñxatañamawa)

Diosar kusisit luqtaskakiñatakix tiempo sum jalanuqasiñamawa

KUSISTʼÄWINAKA

FAMILIA

IRNAQÄWI

TANTACHÄWINAKA

BIBLIAT SAPAK YATXATAÑA

YATIYIR SARAÑA

[10 janan fotonakapa]

¿Llakitanakar yanaptʼasmati?