¿Jumax Macedoniar sarasmati?

APÓSTOL Pablox quta lakankir Troas (Asia Menor) markanwa mä unañchäwi uñjäna, ukanxa Macedoniankir mä jaqiw jupar akham säna: “Macedoniar pastʼanisin yanaptʼapxita” sasa. Ukatwa Pablompi jupamp chik saririnakax “Diosan jawsatapar amuyasina”, Roma tuqinkir markanakar yatiyir sarapxäna. ¿Ukan yatiyasax kuna askinaksa jikxatapxäna? Jupanakar istʼasax waljaniw cristian tamar mantapxäna. Wali mintat Felipos markankir Lidia sat mä warmix familpachaw cristianoptapxäna (Hech. 16:9-15).

Jehová Diosan Qhanañchirinakapax ukhamarakiw Diosan arunakapxa taqi chuym yatiyasipki. Yatiyirinakax kawkinsa munasi uka chiqanakar luqtiriw waljanix qullqipamp sarapxi. Luisa sat mä kullakax ukhamaw jukʼamp yatiyañ munasax Canadá markat Kenia markar saratayna. * Ukat Teofilompi Emilianampix ukhamarakiw Canadá markat Malaui markar sarapxatayna. Ukatsti, Inglaterra markankir Pablompi Margaritampixa, irnaqäwipat jubilasxasinxa, África markaruw inti jalsu tuqir sarapxarakitayna. ¿Jumax ukham sarañ munasmati? ¿Taqi kun jaytawayasin yaqha markar sarasmati? Ukhamasti, Biblian kuna yatichäwinakapas ukat kuna yaqha iwxanakas yaqha chiqan sum luqtañatakix yanaptʼiristam uk jichhax uñjañäni.

¿Kunatsa sarañ munta?

Nayraqatxa, kuna amtampis saraskta uk amuytʼasiñamawa. Jesusax akham sänwa: “‘Tatit Diosamaruw munäta taqi chuymamampi, taqi almamampi, taqi amuyumampiraki’.  Akawa taqit sipansa jachʼa mandamientoxa” sasa. Ukhamasti maynix Jehová Diosar munasiñat ukat Jesusan arkiripar jaqinakar tukuyañatakiw yaqha markar sarañapa. Ukatxa, Jesusax akham sarakïnwa: “Payïri mandamientosti ukar uñtatarakiwa: ‘Jaqi masimarusti juma kipkarjam munarakim’” sasa. Ukhamax munasiñatwa jaqi masisar yanaptʼañ muntanxa (Mat. 22:36-39; 28:19, 20, MT). Jïsa, Jehová Diosar ukat jaqi masisar munasiñatwa yaqha markarux sarañasa. Ukampis yaqha markan Diosar luqtañax chʼamakïspawa; janiw pasiytʼir sarañamp saskiti. Ramirompi Susanampix Países Bajos siski uka chiqatwa Namibia markar sarapxatayna, akham sapxiwa: “Munasiñatwa uka markan qhiparapxta” sasa.

Willie sat mä jilatax Namibia markanwa tamanak tumptʼirjam irnaqaski, ukat akham siwa: “Aka markan qhiparapki uka jilat kullakanakax janiw luqtayasiñ amtani purinipkiti; jan ukasti, jupanakaw jilat kullakanakarux yatiyir sarañ yanaptʼapxi” sasa.

Ukat kuna amtampis yaqha markar sarañ munta uka tuqit amuytʼasisax akham jisktʼasiñamawa: “¿Kuna experiencianakajas uka markan yanaptʼitaspa? ¿Diosan arunakapat suma yatichirïtti? ¿Yaqha aru parlañ yatti? ¿Yaqha aru parlañ yatiqiristti?” sasa. Ukat familianïsta ukhaxa, jupanakampi qhan parltʼañamarakiwa. Maysa tuqitsti, irpir chuymaninakar jisktʼasiñamarakiwa. Ukampis nayraqatxa, Jehová Diosat taqi chuym mayisiñamawa. Ukhamaxa, yaqha markar sarañataki wakichatätati janicha ukat kuna amtampis saraskta uka tuqinakat sum amuytʼasiñamawa ( “¿Juma pachpax sumti uñtʼasta?” siski uk uñxattʼäta).

 ¿Kawkirus sarasma?

Macedoniar sarañatakix mä unañchäwi Pablox katuqäna, ukampis Jehová Diosax janiw ukham yatiyxistuti. Bibliat apstʼat qillqatanak liyisaw kawkinsa yatiyirinakax wal munasi uk yatsna, mayaxa Yatiyañataki aka revistäspawa. Nayraqatxa kawkïr markanakarus sarasma uk qillqtʼasiñamawa. Ukat jumatakix yaqha aru yatiqañax chʼamächi, jan ukax mä qhawqha tiempotakik sarañ amtsta ukhaxa, kawki markantï juman arum parlañ yatipki uka markanakaruw sarasma. Ukatsti, sarañ amtkta uka markat yatxatañamawa. Uka markar mantañatakix kuna papelanakas munasini, juntʼuti jan ukax thayacha, ukan qamañatakix qhawqha qullqis munasini, sapak sarnaqañjamat janicha, markat markarux kunatsa sarapxi ukat yaqha tuqinakampit yatxatañamawa. Ukatakix khitinakatï yaqha markan luqtañ yatipxi ukanakaruw jisktʼasisma. Ukampis Jehová Diosat mayisiñ janipun armasimti. Kawkïr markarus sarasma uk amtañax inas jumatakix chʼamakïchini. Ukampis Macedoniar janïr sarkasax kunas Pablompir masinakapampir pasäna uk amtañamawa, “qullan ajayux [...] janiw Asia markan parlayañ munkänti” ukat janirakiw Bitinia markarus “sarayañ munkänti” (Hech. 16:6-10).

Kawkïr markanakarus sarasma uk inas amtxsta. Ukhamächi ukhaxa, uka markanakan utjir sucursalanakaruw qillqasma. Kunjamsa Diosar luqtaskta ukanak sum qhanañchañamawa, ukat kunanaktï yatiñ munkta ukanak jisktʼañamarakiwa, sañäni: maynix qhawqha qullqimpis sapür sarnaqaspa, qurpachasiñ utax utjaspati, qullayasiñ utanakas utjiti, kuna irnaqäwinakas utjaspa ukanaka. Uka cartxa irpir chuymaninakat pʼiqtʼasipki uka jilatanakaruw churäta. Ukat jupanakaw cartamxa yaqha cartampi qillqtʼasin kawkïr markanakarutix sarañ munkta uka sucursalanakar apayxapxani. Ukat kamsanipxchïtamxay ukarjamaw kawkir sarañsa amtxäta.

Willie jilatat amtañäni, akham siwa: “Kawkinsa luqtapxaspa uk uñjir nayraqat sarapxi ukat ukarjam sum amuytʼasis sarapki ukanakaw wali sum irnaqtʼasipki. Mä chacha warmix ukham uñjtʼir sarasax kawkintix yatinuqtañjamäki ukat ukan yanapax munasiraki uka chiqar sarasaw wali kusisit luqtasipki” sasa.

¿Kuna jan walinakas utjaspa?

Utat jay sarxasin jan uñtʼat yaqha markan qamañax chʼamakiwa ukat yaqha jan walinakaw jumatakix utjaspa. Luisat amtañäni, jupax akham siwa: “Sap sarnaqañax wali chʼamawa” sasa. Ukampis ¿kunjamatsa nayrar sartpacha? Jilat kullakanakamp sum apasiñataki ukat sapa maynin sutinakap amtañatakiw wal chʼamachasi. Ukatwa jilat kullakanakamp parltʼañatakix tantachäwinakar janïr qalltkipan puri, ukat tukuyarus qhipararaki. Ukatxa jupanakampiw yatiyiris sari, utaparus jawstʼaraki. Ukhamatwa walja amigonak jikxati. Ukat akham siwa:  “Chʼamachasitajax janiw inamayäkiti. Jehová Diosaw wal yanaptʼawayitu” sasa.

Pablompit Margaritampit jichhax amtarakiñäni, jupanakax wawanak jilarayasaw yaqha markar sarañ amtapxatayna, utapanxa kimsa tunka maranakaw jakapxatayna. Ukat Pablox akham siwa: “Jan kunakiw yänak jaytjawayapxta. Ukampis familiar jaytañax wali chʼamänwa. Avionanxa walpun jachapxta. ‘Kunatakis familiar jaytañäni’ sañjamänwa. Ukampis Jehová Diosaruw wal atinisipxayäta. Purisax walja amigonak jikxatapxta, ukaw nayrar sartañ yanaptʼapxitu” sasa.

Gregoriompi Cristinampix Canadá markat Namibia markaruw sarapxatayna, uka markanxa inglés aruw parlasi. Ukampis uka markan utjir yaqha aru yatiqañaw wakisispa sasaw sapxäna. Akham sapxiwa: “Awisax uka aru yatiqañax wali chʼamänwa. Ukampis uka jaqinakan sarnaqäwinakap sum amuyañatakix arup yatiqañax wali wakiskirïnwa. Ukatxa jilat kullakanakar jakʼachasisaw uka markan yatinuqtapxarakta” sasa.

Ukhamaw yaqhipax jaya markan jilat kullakanakar altʼat chuymampi yanaptʼasipki. Irlanda markankir Jenny kullakaxa, wali munasiñampiw uka markar sarir jilat kullakanakat amtasi, akham siwa: “Jupanakax wali suma jaqïpxiwa. Janiw luqtayasir jutapkiti; jan ukasti luqtiriw jutapxi. Wali kusisitaw Diosarux taqi chuym luqtapxi, nayax ukham luqtañ munarakiyäta” sasa. Jichhasti chacha warmiw Gambia markan misionerot luqtasipki.

Diosan bendicionapaw qamiriptayi

Apóstol Pablotakix Macedonia tuqinkir markanakar yatiyir sarañax wali askipunïnwa. Niya tunka mara qhipatxa, Filipos markankir cristianonakarux akham sänwa: “Sapa kuti jumanakat amtasta ukkhaxa Diosaruw yuspagarta” sasa (Fili. 1:3).

Ukat Escuela Bíblica de Galaad de la Watchtower siski ukar janïr sarkasaxa, Malaui markanwa Teofilompi Emilianampix luqtasipkäna. Apóstol Pabljamaw jupanakax sapxaraki: “Malaui markar jutatasax walikïskpachati sasaw awisax jisktʼasipxirïta. Ukampis wali kusisitaw luqtapxayäta. Ukham irnaqasax chacha warmjamas wali chʼamañchtʼataw jikxatasipxta ukat Jehová Diosan bendicionapsa katuqapxaraktwa” sasa. Gregoriompi Cristinampix akham sapxarakiwa: “Nanakatakix ukham luqtañax wali askipuniwa, yaqha ukham luräwix janiw utjkaspati” sasa.

Ukampis janiw taqinis Diosar luqtirix yaqha markar sarksnati. Yaqhipax pachpa markapanwa, kawkhantï yatiyirinakax munaski ukar sarapxaraki. Ukat yaqhipasti uta jakʼankir tamanakanwa yanaptʼapxaraki. Ukampis kawkinsay luqtaskañäni, chʼamasarjam Jehová Diosar taqi chuyma luqtañaw wali wakiskirixa (Col. 3:23). Kunjamtï Proverbios 10:22 qillqatan siskixa, Jehová Diosan “bendicionapawa qamiriptayi; janiw kuna llakisiñsa ukampi chikax apayankiti”.

[Qhanañchäwi]

[5 janan recuadropa/fotopa]

 ¿Juma pachpax sumti uñtʼasta?

Jumax yaqha markar sarirjamätati janicha uk sum amuytʼasiñatakix Jehová Diosar mayisiñamawa. Ukat akxankir jisktʼanakaw yanaparakïtamxa. Ukatsti Yatiyañataki (La Atalaya) revistanak uñxattʼarakïta, kunjamtï aka manqhan qhanañchaski ukhama.

• ¿Taqi chuymat Jehová Diosar luqtasktxa? (“Medidas que conducen a la felicidad”, 1997 octubre 15, jana 6.)

• ¿Diosan arunakapat sumti yatichañ yattxa? (“El camino al éxito en el ministerio de precursor”, 1989 mayo 15, jana 21.)

• ¿Familiat ukat amigonakat jayar sarañatakix wakichtʼatätti? (“Cómo enfrentarse a la nostalgia en el servicio de Dios”, 1994 mayo 15, jana 28.)

• ¿Yaqha aru parlañ yatiqiristti? (“El reto de servir en una congregación de habla extranjera”, 2006 marzo 15, jana 17.)

• ¿Yaqha markar sarañatakis ukat ukan luqtañatakis qullqix utjituti? (“¿Puede usted servir en el extranjero?”, 1999 octubre 15, jana 23.)

[6 janan fotopa]

Jaya markar sarasaw altʼat chuymampi yanaptʼasipki

[7 janan fotopa]

Yanaptʼañ amtampi sarki ukaw kusisit luqtaski