Munasiñan mayachtʼata sapa mara tantachäwi

PASÏR 2009 maran octubre phaxsit 3 uru alwaxa, Jersey City siski ukanwa niya phisqa waranqa jilat kullakanakax wali kusisita tantachasipxäna. Uka jachʼa tantachäwinak apañ utax Nueva Jersey (Estados Unidos) markankiwa. Ukampixa 125 ukha kutiw maran mä kuti apañäki uka tantachäwxa Watch Tower Bible and Tract Society of Pennsylvania ukankirinakax apxapxi. Ukatxa, Estados Unidos markan utjki uka Betel utanakansa, Canadá markan utjki uka sucursalansa waranq waranqa jilat kullakanakaw video tuqix uñtapxäna ukat istʼapxäna. Taqpachanix 13.235 jilat kullakanakaw Jehová Diosan munasiñapan mayachtʼatax kimsa hora tantachasipxäna.

Geoffrey Jackson jilataw uka tantachäwi sarayäna, jupax Uraqpachan Jilïr Irpirinak taypinkiwa. Qalltañatakix Betel utan luqtapki uka jilat kullakanakaw machaq qʼuchuñ librot mä coro qʼuchupxäna. Uksti David Splane jilataw sarayäna, jupax Uraqpachan Jilïr Irpirinak taypinkarakiwa. Ukat kunatsa wali askipuni Diosar qʼuchumpi jachʼañchañaxa uka tuqitwa qhanañchtʼäna. Ukatxa, ukarjam kimsa machaq qʼuchunak qʼuchupxañäni sasaw uka jilatax säna. Ukham qʼuchuñax aka tantachäwitakikiwa, janiw tantachäwinakansa ni jachʼa tantachäwinakansa ukham qʼuchuñax wakiskiti sasaw säna.

Sucursalanakan yatiyäwinakapa

Ukatxa, yaqha sucursalanakan pʼiqtʼir phisqa jilatanakaw markanakapat yatiyapxarakïna. Nayraqatxa, Canadá markankïr Kenneth Little sat jilataw akham säna: “Estados Unidos ukat Canadá markampitakiw revistanak jichhax apsupxäxa, nayrax lurapkayäta ukatxa, tunkampis mayar yaptʼapkirista ukhamäniwa. Ukatakisti tunka suxtan horanakaw sapürus irnaqasini, chikatax uruw irnaqapxani ukat chikatasti arumarakiw irnaqapxani” sasa.

Ukatsti, Reiner Thompson jilatax kunjamas República Dominicana markan yatiyasiski uka tuqitwa qhanañchtʼäna, ukatsti Albert Olih jilatax Nigeria markat parltʼarakïna. Ukxarusti Mozambique markankir Emile Kritzinger jilatax akham sänwa: “Jehová Diosan Qhanañchirinakapax 1992 marakamax janiw markan kamachinakaparjam qillqatäkänti, ukhakamax arknaqataw uñjasipxäna” sasa. Uka kimsa markanxa jukʼampiw aka qhipa maranakan jilxattawayi. Tukuyañatakix Viv Mouritz jilataw Australia markat arstʼäna, “Timor Oriental marka uñjapkta, ukanxa Diosat yatiyirinakax walipuniw jiltaski” sasaw säna.

Uraqpachan Jilïr Irpirinakax kunjam uttʼayatäpxisa

Jehová Diosan Qhanañchirinakapax kunjamas aka Uraqpachan yatiyasipki uk uñjapxañapatakixa suxta uñjirinakaw 1976 marat aksarux uttʼasiwayi, jupanakax Uraqpachan Jilïr Irpirinak taypinkapxiwa. Ukat yaqha uwijanakatxa 23 jilatanakaruw jupanakar yanaptʼapxañapatak uttʼayasiwayi. Uka jilatanakatxa suxtaniruw entrevistasiwayi, jupanakax 341 ukha maranakas suxtanpachax Jehová Diosataki sapürjam irnaqapkaspa ukhamawa.

Don Adams jilataruw nayraqat entrevistasïna, jupaxa 1943 maratwa Betelan irnaqaski. Khitinakas Uñjirinakar Pʼiqtʼapxi, ukat jupanakax kunjamsa irnaqapxi ukwa qhanañchtʼäna, ukhamatwa taqinis mä wawaki irnaqtʼapxi. Uka pʼiqtʼirinakax kamachinak tuqita ukat Jehová Diosan Qhanañchirinakapax akatjamat kuna jan waltʼäwinakan jikxatasipxaspa, arknaqatas uñjasipxchispa uka tuqinakat jankʼaki yanaptʼañatak wakichatäpxiwa, sasaw säna.

 Ukxarux Dan Molchan jilataw arstʼarakïna. Kunjamsa Betelankirinakar Uñjirinakax Diosar yupaychañ tuqitsa ukat sum sarnaqasiñ tuqitsa 19.851 betelitanakar uñjaski ukwa qhanañchtʼäna. Ukatsti David Sinclair jilatax akham sarakïnwa: “Qillqatanak tuqit Uñjirinakaxa, yaqha Betel utanakan kunanakas munasi uka tuqitwa uñji” sasa. Ukatxa, Yatiyañ tuqit Uñjirinakaxa, “kunjamsa yatiyañatakisa ukat taman kunanakas lurasini ukanak wakichapxi” ukwa Robert Wallen jilatax arstʼarakïna, jupaxa suxta tunka maranakaw Betel utan irnaqtʼaski. Ukxaruxa, William Malenfant jilatax akham sarakïnwa: “Yatichañ tuqit Uñjirinakaxa, jachʼa tantachäwinaka apasiñapatakiw wakichapxi” sasa. Tukuyañatakisti, John Wischuk jilataw akham arstʼarakïna: “Qillqirinakan Uñjirinakapaxa, Diosan arunakapat yatichasiñapatakiw qillqatanak sum wakichapxi ukat lurasiñapatakis uñjapxi. Ukhamat taqinis ukham qillqatanak katuqapxäñapataki” sasa. *

Bibliat apstʼat jiskʼa tʼaqax munasiñatwa 2010 maratak parli

Uraqpachan Jilïr Irpirinakatxa kimsaniw arstʼapxäna. Gerrit Lösch jilatax akham sasaw qalltäna: “¿Munasitäñti munta?” sasa. Ukatsti, nayrar sartañatakix taqiniw munasitäñ muntanxa. Ukat Jehová Diosax munasiñatwa jiwasar luristu. Ukat jiwasax Jupar munasiñatwa arunakapat yatiyiris yatichiris sartanxa sasaw qhanañchtʼäna.

Cristianonakax jaqi masiparus ukat uñisirinakaparus kuntï Biblian yatiqapki ukarjamaw munasipxi (Mat. 5:43-45). Jesusax uñisirinakapan jiskʼachatasa, jawqʼjatasa ukat kunayman jan walinak luratasa ukat chʼakkatapkäna ukanakatakis Diosatwa mayirapïna. Jïsa, jiwas laykux walpun tʼaqhisiwayi, ukatwa jiwasax jupar wal munastanxa sasaw amuytʼayäna. Chiqansa, 2010 maratakix Bibliat apstʼat jiskʼa tʼaqax ukarjamaw 1 Corintios 13:7, 8 qillqatat ajllisiwayi sasaw qhanañcharakïna, ukanxa akham siwa: ‘Munasiñax taqi kun aguanti. Munasiñax janipuniw tukuskiti’ sasa. Ukatxa, janiw wiñay jakañak suyktanti, jan ukasti wiñayaw munasiñan sarnaqasiñ muntanxa.

¿Gasolinax pistʼirjamati?

Samuel Herd jilatax akham sasaw qalltäna: “Amigomampi 50 kilometronak autopat viajesma. Ukat medidor uñjasin niyaw gasolinax tukusiski sasma, ukat jupax jan llakisimti pusi litrow utjaski siristam. Ukat autox chika thakir saytʼxaspa. ¿Jukʼa gasolinan apnaqañax askïnti? Janiwa, jan ukar puriñatakix tanques phuqha sarañaw askïnxa. Ukhamarakiwa, Jehová Diosar luqtasax Jupan yatichäwinakapampi ‘tanques’ phuqantayañasawa” sasa.

Jiwasax pusi tuqitwa tanques sapa kuti phuqantayañasa. 1) Sapüru Bibliat liyisaxa kuna tuqittï parlki ukxa sum amuyañasawa ukat yatxatañasawa. 2) Familiana Diosar Yupaychañataki Aruma satäki uka tantachäwinxa sum yatiqañasawa. Jiwasaxa, ¿sapa semanati tanques phuqantañataki  tantachastan jan ukax jukʼitakcha waranttanxa? 3) Tantachäwinakar sarasaw Bibliatxa jukʼamp yatxattanxa. Ukat 4) Diosan yatichäwinakapat lupʼiñasarakiwa. Ukhamatwa salmonak qillqirjam sañäni: “Nayra pachanakat amtasta, taqpach luräwinakamat lupʼta” sasa (Sal. 143:5).

“Diosan munañap phuqhirinakasti [...] qhanapxarakini[wa]”

Tukuyañatakix John Barr jilataw trigompit jan wali qurampit Jesusax mä uñachtʼäwipan parlkäna uka tuqit qhanañchtʼäna (Mat. 13:24-30, 38, 43). Uka uñachtʼäwinxa, apthapiñ horasat parli, ukhaw ‘Diosan ajllit wawanakapar’ apthapisini, ukat qurarux phichantañatakiw jaljasirakini sasaw säna.

Mateo 24:34 qillqatax akham siwa: “Taqi akanakasti pasaniwa janïr jichha pacha jaqinakax jiwarkipana” sasa. Uka arunakarjamaxa, janiw walja tiempo apthapiskaniti sasaw Barr jilatax qhanañchtʼäna. Ukat “Jesusax Apnaqäwipan jiwasampïñxa 1914 maranwa qalltawayäna, ukhamax uka tiempon jakir ajllit cristianonakax jachʼa tʼaqhisïwi urunak uñjir ajllit cristianonakampix uñtʼasipxañapänwa” sasaw pay kuti liytʼäna. Ukat “jichha pacha jaqinaka[x]” kuna pachay tukuschini ukxa janiw yatktanti, ukampis jupanakkam uñtʼasisin mä tiempon jakawayapki uka ajllit cristianonakax janis mä mitanïpkchixa, aka qhipa urunakan uñtʼasiwayapxiwa. Ukhamax ¡wali kusiskañawa, khitinakatï 1914 maran alaxpachar sarañataki ajllitäpkäna ukanakampi uñtʼasiwayapki ukanakax janiw jiwapkaniti jachʼa tʼaqhisïwi qalltkani ukhakamaxa!

‘Diosan ajllit wawanakapax’ alaxpachan bendicionanak katuqañwa suytʼasipki. Ukampis jupanakasa, aka Uraqin jakañ suyirinakas qhipakamaw Diosan taqi chuym luqtirinakapjamax qhanañasa. ¡Jiwasatakix ‘trigo’ apthapiñ urunakan jakañax wali askipuniwa!

Qʼuchu tukuyatatxa, Theodore Jaracz jilataw mä oracionampi tukuyxäna, jupax Uraqpachan Jilïr Irpirinak taypinkiwa. ¡Wali chʼamañchkir tantachäwipunïnwa!

[Qhanañchäwi]

[5 janan recuadropa]

IRPIR CHUYMANINAKATAKI

Anthony Morris sat jilataxa, sapa taman utjki uka irpir chuymaninakaruw wakichtʼasini sasaw uka tantachäwin säna, jupaxa Uraqpachan Jilïr Irpirinaka taypinwa luqtaski. 2008 maranwa Estados Unidos markan irpir chuymaninakar wakichañ qalltasiwayi, Patterson (Nueva York) utana. Ukhat jichhakamax 6.720 ukha irpir chuymaninakaruw wakichtʼasiwayi. Ukat jichhakiw 72 tantachäwir saririnakax tukuyasipki. Ukampis janiw ukakïkiti, Estados Unidos markanxa 86.000 irpir chuymaninakaw utji, ukhamax waliw lurañanakax utjaski sasaw sarakïna. Ukatwa Uraqpachan Jilïr Irpirinakax 2009 marat diciembre phaxsit 7 urunak saraqatatxa yaqha escuelampiw utjani sasaw amtawayapxi, Brooklyn (Nueva York) markan apasini.

Ukat irpir chuymanakar wakichtʼañatakixa, tamanak tumptʼir pusi jilataruw pä phaxsin wakichasini Patterson markana, ukatsti Brooklyn markanwa yatichañ qalltapxaspa. Ukatxa, uka pusi tamanak tumptʼir jilatanakar yanaptʼapxañapatakixa, yaqha pusi jilatanakaruw wakichasirakispa, jupanakaxa Tantachasiñ Utanakanwa yatichapxani, ukat jachʼa tantachäwinak apañ Utanakansa yatichapxarakispawa, ukhamaw tunka payani yatichirinakan utjañapkamax yatichasini. Uka jilatanakax sapa semanaw Estados Unidos markanxa inglés arut suxta escuelanak apapxaspa. Ukatsti español aru parlir irpir chuymaninakar wakichañatakix pusi jilataruw yatichasirakispa. Uka wakichäwixa janiw Escuela del Ministerio del Reino sat tantachäwi lantïkaniti, jan ukasti, irpir chuymaninakar jukʼamp chʼamañchtʼañatakiwa. Ukatxa, 2011 maran septiembre phaxsi qalltaruw Uraqpachan utjki uka Betel utanakan sarayir jilatanakaxa, ukham tantachäwinak apañ qalltapxani, ukax Tantachasiñ Utanakanwa apasini.

[4 janan fotopa]

Tantachäwixa, machaq qʼuchuñ librot qʼuchtʼasaw qalltäna