Aka revista liytʼirinakan jisktʼäwinakapa

¿Kunatsa Jesusax mä jucharar warmirux juchanakamat pampachatätaw sasin sispachäna? (Luc. 7:37, 48.)

Kunapachatï Jesusax Simón sutini fariseo jaqin utapankkaskäna ukhaxa, mä warmiw kayupawjar quntʼasïna ukat jachapampiw Jesusan kayup jariqäna ukat ñikʼutapampiw wañsuyarakïna. Ukxarusti, kayunakap jampʼattʼasinxa suma qʼapkir aceitempiw warxatäna. Uka warmirux ‘jan wali sarnaqir warmitwa’ markan uñtʼapxäna, sasaw Bibliax qhanañchi. Chiqansa, pantjasirinakjamax taqiniw juchachastanxa, ukampis Bibliarjamaxa, jachʼa juch lurapkäna jan ukax Diosan kamachinakap sapa kuti pʼakintapkäna ukanakaruw jan wali sarnaqirit uñtʼapxäna. Uka warmix inas qʼañu lurañanakan sarnaqirïchïna. Juparuw Jesusax akham säna: “Juchanakamatxa perdonatätawa” sasa (Luc. 7:36-38, 48). Ukampix ¿kamsañs munäna? Jesusax janïraw juchanakas layku jakäwip luqtaskänti, ukhamasti ¿kunjamarak uka warmir pampachpachänsti?

Uka warmir janïr pampachkasaxa, Jesusax mä uñachtʼäwimpiw mä aski yatichäwit Simonar qhanañchäna. Juchax walja manükaspasa ukat maytʼasirix janis kuttʼayirjamäkaspa ukhamawa sasaw qhanañchäna. Ukatwa akham säna: “‘Pani jaqiw mä qullqi maytʼir jaqir manüpxäna. Maynix phisqa patak denario qullqi maytʼasitayna, maynïristi phisqa tunkaraki. Jan uka manu phuqirjamäxapxïpansti, qullqi maytʼir jaqix panpachaniruw perdonxatayna. Jichhax sita, ¿kawkïris jupanakatx jil munpachax uka qullqi maytʼiriruxa?’ sasa. Simonasti juparux sänwa: ‘Nayan amuyataxatxa, jila manunïkäns ukaw jil munpachaxa’ sasa. Jesusasti sarakïnwa: ‘Walik sasktaxa, ukhampunïskiwa’ sasa” (Luc. 7:41-43). Taqiniw Diosarux istʼañasaxa, Jupar jan istʼktan ukat juchachasktan ukhaxa, kuntï katuqañapäki ukxa janiw churktänti. Ukhamatwa Jupan nayraqatapan manusax wal jilxatti. Ukampis Diosax pampachañatakix jankʼakiwa, kunjamtï qullqi maytʼirix manunak pampachki ukhama. Ukatwa Jesusax arkirinakaparux Diosar akham achiktʼasiñ yatichpachäna: “Juchanakaxatxa pampachapxita, kunjämatix nanakax jan wali lurapkitus ukanakarux perdonapxta ukhama” sasa (Mat. 6:12).

¿Kunjamatsa Diosax nayra tiemponx juchanak pampachäna? Amtapxañäni, Diosan chiqakankañaparjamax juchachasir jaqix jiwayatäñapänwa. Ukatwa Adanax jan istʼasirïtap laykux jiwäna. Jehová Diosax Israel markar Leyinak churkäna ukarjamaxa, juchanakapat pampachayasiñatakix uywanakwa luqtapxañapäna. Kunjamtï Pablox siskänxa, “leyirjamax niya taqi kunanakaw wilampi qʼumachatäñapa; janiw juchat qʼumachasiñax utjkaspati, janitix wilax wartaskaspa ukkhaxa” sasa (Heb. 9:22). Judionakatakixa, ukhamatakwa Diosax juchanak pampachasapäna. Ukatwa Simón chachan utapankkasipkäna uka jaqinakax kuntï Jesusax uka warmir siskän ukxa jan walit uñjapxpachäna. Chiqansa, Jesusamp chika quntʼatäsipkäna ukanakax akham amuyapxpachäna: “¿Khitïpachas aka jaqix, juchanaksa perdonañatakixa?” sasa (Luc. 7:49). Ukhamasti, uka warmin juchanakap pampachatäñapatakix ¿kunas munasïna?

Adanampi Evampix Diosar kutkatasipkäna ukhaxa, Diosax mä profecía tuqiw amtap arsuwayäna. Supayampi ukat wawanakapampix warmin Wawaparuw kayut achjañapäna (Gén. 3:15). Kunapachatï Diosan uñisirinakapax Jesusar jiwayapkäna ukhaw uka Wawax kayut achjatänxa (Gál. 3:13, 16). Ukhamasti Jesusan wilapaw jaqinakarux juchampita jiwañampit qhispiyi. Diosan amtap phuqasiñapatakix janipuniw kunas jarkʼkaspati, ukatwa Génesis 3:15 qillqatankki uka profeciax arsuskäna ukhatpachaw Diosatakix niyas phuqaskaspa ukhamänxa. Ukat Diosan arsutapar taqi chuyma iyawsapkäna ukanakarux ukhatpachaw perdonxäna.

 Cristox janïr aka Uraqir jutkäna ukhaxa, waljaniruw Jehová Diosax askit uñjäna. Jupanakatxa, Enoc, Noé, Abrahán, Rahab ukat Job ukanakäpxänwa, jupanakaw Diosan amtap phuqasiñap wali iyawsäwimp suyapxäna. Ukatwa Santiagox akham qillqäna: “Abrahamax Diosaruw iyawsäna, Diosasti ukatx ‘Walikiw’ sasaw katuqäna”. Ukat saskakïnwa: “Uka pachparakiw lurasïna Rahab sat jan wali sarnaqiri warmimpixa. [...] Diosax aka warmiru askit katuqäna” sasa (Sant. 2:21-25).

Israel markanxa, Davitax jachʼa juchanakwa luräna, ukampis chiqpach Diosaruw iyawsäna ukat taqi chuymarakiw arrepentisïna. Ukat pampachayasiñ tuqit parlkasaxa, Romanos 3:25, 26 qillqatax akham siwa: “Diosasti Jesucristoruw juchan pagopjama uchi, jupan jiwäwip layku qhispiyasiñax utjañapataki, iyawsäwi tuqi. Taqi akanakasti lurasiwa jupan llampʼu chuymapax uñstañapataki nayra juchanakas perdonatapatxa. Lurasirakiwa jiwasanakar uñachtʼayañataki jupax chiqapätapa, jichhasti pachpakïskiwa khitinakatix Jesucristor iyawski ukanakar [...] katuqasinxa” sasa. Ukhamasti, chiqa kankañapar jan pʼakintasaw Jehová Diosax Davitan juchanakap Jesusan luqtasïwipxar pampachpachäna, ukampis Jesusax qhipatwa jakäwip luqtasiñapäna.

Jesusan kayunakap jariqkäna uka warmix Davitjamarakiw jikxatasïna, qʼañu lurañanakan sarnaqchïnsa taqi chuymaw arrepentisïna. Juchanakapat pampachatäñapxa sum amuyasïna ukat khitirutï Jehová Diosax juchanak pampachañapataki khitankäna ukarux wali askirjam uñjatapxa, suma luräwinakampiw uñachtʼayäna. Cristox janïras luqtaskchïnxa, uka luqtasiñapax phuqasiñapapunïnwa, ukatwa juchachasir jaqinakarux pampachasirakisapäna. Ukatpï Jesusax akham sispachänxa: “Juchanakamatxa perdonatätawa” sasa.

Kunjamtï yatiqawayktanxa, Jesusax juchararanakarux janiw yaqhachkänti, jan ukasti khuyapayasiñampiw uñjäna. Ukat taqi chuyma arrepentisipki ukanakarux Jehová Diosax pampachaniwa. Ukanak yatiñax pantjasir jaqinakarux walpun chuymachistu.

[7 janan fotopa]

Aski jaqit katuqatäpxänwa