Diosamp sum apasisaw wiñay jakañ katuqsna

“[Jehová Dios] Jumaw iyawsir jaqirux askinak churtaxa, khuyapayasiñamax jarkʼaqasiñar uñtataw muyuntaski.” (SAL. 5:12.)

1, 2. ¿Kunsa Elías profetax Sareptankir viuda warmirux mayïna, ukat kunsa qhipat sawayäna?

 SAREPTA markankir viuda warmimpi ukat wawapampix wali manqʼat awtjataw jikxatasipxäna, Eliasax ukhamarakiw jikxatasïna. Kunapachatï uka pobre warmix phayañatak nin naktayaskäna ukhaw Elías profetax tʼantʼamp umampi waxtʼita säna. Ukatwa jankʼakix um waxtʼäna, ukampis janiw manqʼañanïkänti ‘mä jachʼi jakʼukiw tinapan utjäna, ukhamarak chatupans mä jukʼa aceitekiraki’. Ukatwa jukʼa manqʼanïtap Eliasarux yatiyäna (1 Rey. 17:8-12).

² Profetax akham sasaw mayiskakïna: “Nayraqatxa nayataki mä jiskʼa torta lurtʼanirapita uka jakʼumata, ukatsti apanirapita, ukatxa jumataki, wawamataki ukxarux lurtʼasinirakim. Israelan Tatit Diosapasti akham siwa: ‘Janiw tukuskaniti tinajana jakʼumax utjki ukaxa, ni chatuman aceites utjki ukasa’” sasa (1 Rey. 17:13, 14).

3. ¿Kun amtañas sapa maynir waktʼistu?

³ Jukʼa manqʼap tukuntañat sipansa, Jehová Diosan Arupar atinisiniti janicha ukwa amuytʼasiñapäna. ¿Diosax nayarus wawajarus qhispiyapxitaniw sasat atinisini? ¿Manqʼa jikxatañatakti, jan ukax Diosamp sum apasiñatcha jukʼamp llakisini? Jiwasax niya ukhamanwa uñjastanxa. ¿Diosamp sum apasiñatakiti, jan ukax jukʼamp yänak jikxatañatakich chʼamachastanxa? Chiqas Jehová Diosar serviñatakisa, atinisiñatakisa janiw pächasktanti. Ukat Dios pachpaw Jupampi sum apasiñatakix kunanak lurañasasa uk yaticharakistu.

Jehová Diosarukiw yupaychañasa

4. ¿Kunatsa Jehová Diosarukix yupaychasiñapa?

⁴ Jehová Diosax kunjam yupaychayasiñsa muni ukxa Jupakiw amtaspa. Alaxpachankir wawanakapax akham sasaw mayachtʼat yupaychapxäna: “Tata, nanakan Diosaxa, jumax askïtawa jachʼañchäwi, gloria, ukhamarak munañanïña katuqañatakixa. Jumaw taqi  kuns ina chʼusat lurtaxa, munañamatarakwa taqi kunas jakaskaraki, juman uskutarakiwa” sasa (Apo. 4:11). Chiqas Diosaw alaxpachsa Uraqsa Luririxa, ukatwa Juparuk yupaychañasa.

5. ¿Diosan munasiñapax kunatsa yupaychañasatak wiytistu?

⁵ Diosax wali munasirïtapwa uñachtʼayistu, ukatwa Juparukix yupaychañasaraki. Kunjamtï Biblian siskixa, “Diosax jaqi uskkäna ukapachax jupar uñtasitwa usküna; chacha, warmi” (Gén. 1:27). Ukat taqi kunsa chuymasarjam amtañasatakiw lurawayistu, ukatwa amuytʼasiri ukat kuns lurañäni uk amtaraktanxa, ukax suma regalowa. Diosaw jakañ churawayistu ukatwa Awkisaxa (Luc. 3:38). Suma awkjamax kunatï kusisita jakasiñatak munaski uksa churarakistuwa. “Jupasti taqinitakiw intsa jalsuyani, ukhamarak [...] jallsa puriyaniraki”, ukhamatwa yapunakan manqʼañanakas wal achuqaraki, ukanak uñjañax kusiskañawa (Mat. 5:45).

6, 7. 1) ¿Kunjamatsa Adanax wawanakapar jan walinakar aptʼawayi? 2) Diosamp sum apasiñatak chʼamachasirinakax ¿kuna bendicionanaksa Criston jiwatapxarux katuqapxani?

⁶ Chiqas kuna jan walinakantï jucha laykux uñjasktan ukanakatxa, Jehová Diosaw qhispiyarakistu. Kunjamtï mä awkix familiapat qullq aparasin ina chʼusar aptʼkixa, ukhamarakiw Adanax Dios contra saytʼasisin luräna. Adanan wawanakapjamax wiñayatakiw kusisita jakasisäna, ukampis Diosar jan istʼatapatwa taqi ukanak aptʼawayi. Ukham jupatakik taqi kuns munasinxa, taqi jaqinakaruw juchar aptʼawayistu. Ukatpï usunttansa, tʼaqhistansa, llakistansa ukat jiwaraktansa. ¡Kunja wakiskiris maynin qhispiyatäñaxa! Kunjamtï mä esclavor kutsuyañatakix pagaskixa, ukhamarakiw Jehová Diosax jiwas laykux pagawayi (Romanos 5:21 liytʼasiñapawa). Ukatwa Wawapar khitanïna “jakañap churiri walja jaqinakar qhispiyañataki” (Mat. 20:28). Diosamp sum apasiñatak chʼamachasipki ukanakaxa, akat mä jukʼa tiemporux kuna bendicionanaktï Criston jiwatapxarux utjki ukanak phuqatpach katuqapxani.

⁷ Janipuniw khitis Jehová Dios Awkisjamax wali kusisita suma jakasiñxa churkistuti. Ukhamax jiwasatï Jupamp sum apasiñäni ukhaxa, kunjamsa jaqinakan tʼaqhisiñanakap askichani ukanaksa uñjarakiñäniwa. Ukat “Jupar thaqirinakarux bendecirïtap[sa]” sapa mayniw uñjañäni (Heb. 11:6).

‘Markamax taqi chuymaw luqtañatakix sartani’

8. Isaiasat yatxatasaxa, ¿kunsa Jehová Diosar yupaychañat yatiqsna?

⁸ Jehová Diosax janiw khitirus munams janis yupaychitätaw sasin waytʼkiti. Ukatpï sapa maynix sum amuytʼasisin Diosar yupaychañ amtawayixa. Isaías profetan tiempopanxa, Diosax akham sasaw jisktʼäna: “¿Khitirus khitäxa? ¿Khitis nayat arsur sarani?” sasa. Ukham jisktʼasax, Diosax Isaiasar respetatapwa uñachtʼayäna, kunattix jupa pachpaw kuns lurani uk amtxañapäna. Ukat Isaiasax wali kusisitarakiw “akankasktwa nayax, nayar khitasita” säna (Isa. 6:8).

9, 10. 1) ¿Kunjam chuymampis Diosar yupaychañasa? 2) ¿Kunatsa Diosar taqi chuym yupaychañax wali askixa?

⁹ Chiqas sapa mayniw Diosar yupaychanit janicha ukxa amtañapa. Jehová Diosax taqi chuyma yupaychañaswa muni (Josué 24:15 liytʼasiñapawa). Jiwasatï jayrasisjama, jan ukax maynir kusisiyañ laykuk yupaychañäni ukhaxa, Diosax janipuniw yupaychatas katuqkistaniti (Col. 3:22). Diosar yupaychañat sipans aka pachan yänakap thaqhaskañänixa, janiw “taqpach chuymamp” Diosar yupaychxsnati ukat janirakiw Diosampis sum apasksnati (Sal. 119:2). Taqi chuyma yupaychatasax jiwasan askisatakïtapxa Diosax sum yati. Ukatwa Moisesax “jakaña ajllisipxam” sasin israelitanakar iwxtʼäna. ¿Kunjamsa jakaña ajllisipxañapäna? Jehová ‘Diosar munasa, istʼasa, suma iyawsañampi arkasaraki’ (Deu. 30:19, 20).

 ¹⁰ Nayra tiemponxa, David reyix akham sasaw Diosatak qʼuchüna: ‘Atiptʼañ urumanxa markamax taqi chuymaw luqtañatakix sartani. Sullar uñtataw waynanakax jumamp chika sarantapxani’ sasa (Sal. 110:3, NM). Jichhürunakan jila part jaqinakax qullqimpita ukat kusistʼañampitak llakisipxi. Ukampis Jehová Diosar munasirinakatakix taqi kunat sipans Jupar yupaychañaw nayranki. Uksti Diosan arunakap taqi chuyma yatiyasarakiw uñachtʼayapxi. Kunatï jakañatak munaski ukanakxa, Jehová Diosaw churistani sasaw taqi chuyma atinisipxi (Mat. 6:33, 34).

Diosan katuqat sacrificionaka

11. Diosar sacrificio luqtasaxa, ¿kuna bendicionanaksa Israelitanakax suyapxäna?

¹¹ Moisesax Diosat katuqkäna uka Leyirjamaxa, Diosamp askirjam uñjatäñatakix chuymapar purtʼkir ofrendanakwa luqtapxañapäna. Levítico 19:5 qillqatarjamaxa, Israelitanakax “sumankthapiña sacrificionak” luqtapxañapäna, ukhamat jupanakar Diosax “katuqañapataki”. Uka pachpa Levítico librorjamaxa, “mä ofrenda yuspagarasa” churapxañapänwa, ukhamat Diosampi “suma katuqatäñapataki” (Lev. 22:29). Kunapachatï Israelitanakax altaran mä suma uywa naktʼayas sacrificiot luqtapkäna ukhaxa, alaxpachar makhatir jiqʼixa Diosatakix “suma qʼapki[rïnwa]” (Lev. 1:9, 13). Mä arunx ukham munasiñampi sacrificionak luqtapxatapaxa, Diosan chuymaparuw purtʼäna ukat katuqarakïnwa (Gén. 8:21). Jiwasatï Diosan chuymapar purtʼkir suma sacrificionak luqtañänixa, ukhamarakwa katuqasini, ukwa Moisesan katuqat Leyix yatichistu. Ukampis ¿kunas uka suma sacrificionakaxa? Ukatakix luräwinakasampit ukat arunakasampit amuytʼañäni.

12. Diosar kusisiyir ‘jakkir ofrendjam luqtasiñatakix’ ¿kuna jan wali luräwinaksa apanukuñasa?

¹² Apóstol Pablox akham sasaw Roma markankir cristianonakarux qillqäna: “Jumanakax Diosarux jakkir ofrendjamay luqtasipxam, Diosar kusisiykiri luqtata. Ukawa Diosatakix ajayu tuqin chiqpach Diosar serviñaxa” sasa (Rom. 12:1). Ukhamax jiwasatï Diosamp askirjam uñjayasiñ munstanxa, cuerposax qʼumäñapawa, mä arunx qullanäñapawa. Jiwasatï alcoholamp jiljasa, cigarronak pitasa, nueces de betel ukat coca akullisa cuerpos qʼañuchañäni ukhaxa, Diosax janiw mä suma sacrificiot katuqkistaspati (2 Cor. 7:1). Ukat qʼañu luräwinakan sarnaqañax janirakiw Diosatakix walïkiti, kunattix “wachuqa jucha lurañax pachpa janchimpi jucha lurañawa” (1 Cor. 6:18). Chiqpachansa, khitinakatï Diosan chuymap kusisiyañ munapki ukanakaxa qullanäpxañapawa ukat “qʼuma jakañanpun jakxapxa[ñapa]” (1 Ped. 1:14-16).

13. ¿Kunatsa Jehová Diosar lakasampi yupaychañax wali askixa?

¹³ Ukat arunakampiw Jehová Diosarux mä  sacrificiot luqtaraksna. Chiqas Diosar munasirinakax kunatï askïki ukpunwa jaqinak taypinsa ukat utapansa Diosat parlapxi (Salmo 34:1-3 liytʼasiñapawa). Salmos 148 jaljat 150 jaljakam qillqatanxa, walja kutiw Diosax Jupar yupaychañasatak jawsistu. Chiqas Jehová Diosatakix “aski jaqinakan yupaychäwipax askipuniwa” (Sal. 33:1). Arunakapat yatiyasaw Diosarux jachʼañcharaksna, Jesús pachpatakis uka luräwi phuqañax wali wakiskirïnwa, jupat yatiqasiñasawa (Luc. 4:18, 43, 44).

14, 15. ¿Kuna kasta sacrificionak luqtapxañapatakis Oseasax iwxtʼäna, ukat kunjamsa Diosax katuqasïna?

¹⁴ Utat uta taqi chuyma yatiyir sarasaxa, Jehová Diosar munasitasa ukat Jupamp sum apasiñ munataswa uñachtʼaytanxa. Amtañäni, israelitanakax kʼari diosanakar yupaychasaxa, Diosampix janiw askirjam uñjayasxapxänti, ukatwa Oseas profetax iwxtʼäna (Ose. 13:1-3). Ukat akham sasin Diosat mayisipxam sänwa: “Perdonapxit taqi ñanqha luratanakaxata, suma chuymampirak katuqapxita, nanakan jumaru yupaychatanakaxxa” sasa (Ose. 14:1, 2).

¹⁵ “Nanakan jumaru yupaychatanakaxxa” sasinxa, taqi chuyma ukat suma amuytʼat arunakampi Diosar yupaychañatwa parlaskäna. ¿Uka kasta arunakampi yupaychäwinak Diosax kunjamsa katuqasïna? Jupa pachpaw akham säna: “Jupanakarusti munasirakïwa” sasa (Ose. 14:4). Kunjamtï amuyktanxa, lakanakapampi yupaychapki ukanakaruxa, Diosax chuymatpachwa juchanakap perdoni, wawapjam katuqxi ukat sum apasxapxaraki.

16, 17. Diosar iyawsasin yatiyañ qalltapki ukhaxa, ¿kunjamsa Diosax uka sacrificio katuqasi?

¹⁶ Diosan chiqa yupaychirinakapax taqin uñjkat yupaychirit uñtʼatäpxiwa. Salmonak qillqiritakix Diosar jachʼañchañax wakiskirïnwa, ukatwa akham sasin maytʼasïnxa: “Tatay, arsutanakaxax jumatak askïpanaya” sasa (Sal. 119:108). ¿Jichhürunakatxa kamsaraksnasa? Diosar luqtir walja jaqinakat parlkasaxa, Isaisax akham sänwa: “Tatitun suma luräwinakapwa yatiyapxarakini” ukat “Tatitun altaraparu luqtañamataki mä suma ofrendar uñtata” sasa (Isa. 60:6, 7). Jichhürunakanxa, ‘suma sacrificiot churasa, lakanakasampi yupaychasaw’ millón millón cristianonakax uka arunak phuqtanxa (Heb. 13:15).

¹⁷ ¿Jumasti? ¿Diosan chuymapar purtʼkirti sacrificionak luqtaskta? Jan ukhamäkchi ukhaxa, ¿utat uta yatiyasin Diosar jachʼañchañatakix chʼamachasïtati? Ukham lurätaxa, Jehová Diosar iyawsatamaw amuyasini, ukat “mä toro luqta[ñat]” sipansa Diosax “jukʼamp kusisini” (Salmo 69:30, 31 liytʼasiñapawa). “Suma qʼapkiri ofrenda” luqtañänixa, Diosarux puriniwa ukat katuqasirakiniwa (Eze. 20:41). ¡Ukhapï wali kusisit jikxatasïtaxa!

Diosaw chiqa jaqinakarux bendicini

18, 19. 1) ¿Kamsapxis jaqinakax Diosar yupaychañatxa? 2) ¿Diosamp jan sum apasxasax kunsa aptʼassna?

¹⁸ Malaquías chachan tiempopanxa, israelitanakax akham sasaw jan wal amuyapxäna: “Diosaru serviñax inamayakiwa. ¿Kunaraki jiwasasti apsuñäni jupan mandamiento arunakaparjam sarnaqasaxa[?]” sasa (Mal. 3:14). Jichhürunakanx waljaniw ukham amuyapxaraki. Yänak jikxatañaru chuym churasaxa, Diosan arunakapax janiw kunapachas phuqaskiti, ukat leyinakapas nayra tiempotakïnwa  sapxiwa. Diosan arunakap yatiyañax tiempo apaqakiwa, jaqinakarus colerayiwa sapxarakiwa.

¹⁹ Edén huertanx ukhamarak amuyapxäna. Amuytʼañäni ¿khitis Evarux Diosan suma jakäw churatapax janis kunäkaspa ukham amuyayäna? ¿Alaxpachankir Awkipampi sum apasiñax janis wakisirïkaspa ukhamax khitis amtayarakïna? Jïsa, Supayänwa. Jichhürunakanxa, ukhamarakiw Diosar serviñax inamayakiwa sasin jaqinakar amtayaski. Ukampis Adanampi Evampixa, Diosamp jan sum apasiñax wiñay jakañ aptʼasiñätapwa yatiqapxäna. Ukat khitinakatï jupanakjam jan wal sarnaqasipki ukanakaxa, ukhamarakiw akat mä jukʼarux jan walin uñjasipxani (Gén. 3:1-7, 17-19).

20, 21. 1) ¿Sareptankir viuda warmix kuns luräna ukat kuna askinaksa katuqäna? 2) ¿Kunatsa uka viuda warmit yatiqasiñasa, ukat kunjamsa uk lursna?

²⁰ Nayrir awk taykasat sipans Sareptankir viuda warmiw sum amuytʼasïnxa. Profetan arunakap istʼasinxa, jankʼakiw tʼantʼa lurtʼasin mä jukʼa waxtʼäna. Ukat Diosax Elías tuqi arskäna ukxa phuqapunïnwa, kunjamtï Biblian siskixa: “Jupasa, wawapas, ukhamarak Eliasas manqʼañanïpxänwa walja urunakataki. Janiw tinajänkkäna uka jakʼuxa tukuskänti, ni chatunkki uka aceitesa, kuntï Tatitux siskäna Elías tuqi ukhamapunïnwa” (1 Rey. 17:15, 16).

²¹ Millón millón jaqinakatxa, jukʼanikiw Sareptankir warmjam lurañatakix jankʼakïpxi. Uka warmisti qhispiyir Jehová Diosaruw atinisïna, ukat Diosax chiqapuniw yanaptʼäna. Kunjamtï uñjawayktanxa, Biblian utjki uka sarnaqäwinakax Jehová Diosar atinisitasax jan inamayätapwa yatichistu (Josué 21:43-45 y 23:14 liytʼasiñapawa). Jichhürunakanxa, Jehová Diosamp sum apasipki ukanakarux janirakiw jaytjkiti, ukwa qhan uñjtanxa (Sal. 34:6, 7, 17-19). *

22. ¿Kunatsa Diosamp sum apasiñatakisa ukat katuqatäñatakis jichhpach chʼamachasiñasaxa?

²² Diosan taripäwi urupax jakʼankxiwa ukat jutapuniniw “taqi uraqpachan jakirinakxaru” (Luc. 21:34, 35). Uka urunx qamirïñax inamayakïniwa. Jehová Diosan ajllita Juezar akham sir istʼañax wali askïniwa: “Jutapxam, jumanakax Awkixan bendecitanakapa, katuqapxarakimay wiñay jakañxa jumanakataki wakichatäkis uka” sasa (Mat. 25:34). Uka uruw aka arunakap phuqasir uñjañäni: “Tatay, jumaw iyawsir jaqirux askinak churtaxa, khuyapayasiñamax jarkʼaqasiñar uñtataw muyuntaski” (Sal. 5:12). Ukhamasti jichhaw Diosamp sum apasiñatakisa ukat katuqatäñatakis chʼamachasiñasa.

[Qhanañchäwi]

¿Amtasisktati?

• ¿Kunatsa Jehová Diosarux taqi chuyma yupaychañasaxa?

• ¿Kuna kasta sacrificionaksa Jehová Diosax jichhürun katuqi?

• ¿“Nanakan jumaru yupaychatanakaxxa” siski ukax kamsañsa muni, ukat kunatsa Jehová Diosaruki ukham yupaychañasaxa?

• ¿Kunatsa Diosamp sum apasiñsa ukat katuqatäñsa thaqhañasa?

[Jisktʼanaka]

[13 janan fotopa]

¿Elías profetan arunakaparjamax kunsa mä Pobre warmix amtañapäna?

[15 janan fotopa]

Jiwasatï arunakasampi sacrificionak Diosar luqtañäni ukhaxa, ¿kuna askinaksa jikxatañäni?

[17 janan fotopa]

Diosar taqi chuyma atinisitasax janiw inamayäkaniti