¿Kusisitati Bibliat yatxataskta?

“BIBLIA liyiñ qalltkayäta ukhaxa, janiw kusisitax liyirïkti, qaritakiw jikxatasirïta. Amuytʼañax wali chʼamïriwa, ukat jankʼakiw yaqha tuqinakat lupʼxirïta” sasaw Lorraine sat kullakax säna.

Walja cristianonakaw ukhaman jikxatasipxäna. Ukampis liyiñax wali askïtap amuytʼasisax wal chʼamachasiwayapxi. Marc sat jilatax siwa: “Qhipat Biblia liyiskä jan ukax yatxataskäxa sasin yaqhanak lurañax facilakiwa. Ukatwa Bibliat sapür liyiñar yatintañatakix Diosat mayisiñajäna ukat chʼamachasiñajarakïna” sasa.

¿Diosan Arupar jukʼamp munasiñatakix kunanaksa lurasma? ¿Biblia kusisit liyiñatakix kunas yanaptʼiristamxa? Uka tuqit iwxtʼanak yatxatañäni.

¿Kunjamsa liytʼasma ukat kunanak lurañsa amtasma?

Janïr qalltkasax Diosat maytʼasim ukat taqi amuyump liytʼarakim. Bibliat taqi chuym yatxatañatakisa ukat yatiñamat amuytʼañatakisa, suma amuyu ukat suma chuyma churita sasin Jehová Diosar maytʼasiñamapuniwa (Sal. 119:34). Jan ukham maytʼaskätaxa, jankʼakiw qarjtasma ukat janiw jukʼamp liyiñ munxasmati. Lynn sat kullakax akham siwa: “Awispachax jankʼak liyirpayasax ukhamakiw wakiskir yatichäwinak pasarpaytxa ukat janirakiw yatiqatas utjiti. Ukatpï Jehová Diosarux sum liytʼañatak yanaptʼita sasin mayistxa, ukaw yaqhanak jan lupʼiskañatakix yanaptʼitu” sasa.

Yatiqatam askirjam uñjam. Amtasipunim, wiñay jakañ katuqañ munstaxa, Biblian yatichäwinakap sum yatxatañamawa ukat ukarjam sarnaqañamarakiwa. Ukhamax Biblian kawkïr jiskʼa tʼaqanakas jakäwiman yanaptʼiristam uk jikxatañatakiw chʼamachasiñama. Chris sat jilatax siwa: “Biblian kawkir yatichäwinakapas suma chuymanïñatakisa, sum sarnaqañatakis yanapitaspa ukanak amuyasaw liytxa. Chiqas Biblia ukat Bibliat apstʼat qillqatanak qillqirinakaparux janis uñtʼkstxa, nayatakjam yatichäwinak jikxatasax wal kusista” sasa.

Kuntï phuqkasma uk lurañ amtañamawa. Biblianxa walja chacha warminakatwa parli, jupanakat sumpach yatxatañatak chʼamachasiñamawa. Jupanakat yatxatañatakix Perspicacia para comprender las Escrituras jan ukax Índice de las publicaciones Watch Tower sat libronakampiw yanaptʼasisma. Ukat kunjam jaqïpxisa kunjam chuymanïpxisa ukanak amuyas liytʼäta ukhaxa, jupanakar uñjkasmas ukhamwa jikxatasïta.

Biblian kawkïr jiskʼa tʼaqampis jaqinakar amuytʼayasma uk thaqtarakisma (Hech. 17:2, 3). Sofía sat kullakaxa, uka amtampiw Bibliat yatxati, jupax siwa: “Kawkïr jiskʼa tʼaqanakatsa jaqinakamp parltʼirista ukanak thaqhasaw Bibliat yatxatta. Ukhamatwa Bibliat sum qhanañcharakta. Yatiyañataki sat revistaw ukham yatxatañatakix yanaptʼitu” sasa (2 Tim. 2:15).

Amuytʼasapuniw liytʼañama. Hebreos 4:12 qillqatanxa, “Diosan arupasti jakaskiwa”  sasaw qhanañchi. Biblian yatichäwinakapatxa uñjkasmas ukham liytʼañamawa. Sañäni, kunjamans jikxatasipxi ukanak istʼkasmas uñjkasmas ukham amuyañamarakiwa. Amuytʼasim: “¿Nayax jupanakjamarakit jikxatastxa? ¿Kunjamsa jupanakat yatiqasisax jan waltʼäwinakar saykatiristxa?” sasa. Ukham lurätaxa, Biblian utjki uka sarnaqäwinakat sumpach amuytʼäta ukat janiw armkarakïtati.

Chʼamäki uka jiskʼa tʼaqanakat yatxatam ukat uka tuqit qhanañchki uka qillqatamp yatxatarakim. Yatxatañatakix tiempo apstʼasiñamawa. Wakiskir yatichäwinakatxa yattxatapunim, ukat chʼamjamäki uka jiskʼa tʼaqanakax kamsañs muni uksa Jehová Diosan Qhanañchirinakapan lurata qillqatanakax utjki ukanakamp yanaptʼasisaw yatxatasma. Bibliat jukʼamp yatiqäta ukat ukarjam sarnaqäta ukhaxa, Diosan arunakap kusisitaw liytʼxarakïta. Ukat salmonak qillqirjamarakiw akham säta: “Arunakamax nayatak wiñay katuqäwiwa, arsutanakamax chuymaxaruw kusisiyi” sasa (Sal. 119:111).

Janiw apur apurakix yatxatañamäkiti. Tantachäwinakatak wakichasiñsa janiw armasiñamäkiti. Raquelax akham siwa: “Llakitäsax janiw taqi amuyumpi yatxatañjamäkiti. Ukatwa jukʼat jukʼat yatxatañ amtawayta, ukhamatwa yatiqatas utjaraki” sasa. Chris jilatax sarakiwa: “Apur apur yatxatasax janiw chuymas chuymäkituti ukat liyitaxatxa janiw kuna yatiqatas utjkiti, janirakiw chuymarus purtʼkituti” sasa. Ukatpï yatxatañatakix tiempo apsusiñasapunixa.

Diosan Arupar munasiñ yatiqañamawa. Apóstol Pedrox akham iwxtʼäna: “Asu wawanakjama suma qʼuma ajayun leche munapxarakim, ukhaman jumanakax suma jiltapxañamataki qhispiyatäpxañamatakiraki” sasa (1 Ped. 2:2). Wawanakax nasipki ukhatpachwa leche wal munapxi, ukampis jiwasax Diosan arunakapat yatxatañ munañatakix chʼamachasiñasawa. Jumatï Bibliat mä jana sapür liytʼañar yatintätaxa, jukʼampwa yatxatañ munxäta. Qalltanxa inas chʼamächispa, ukampis mä jukʼa tiemporux janiw ukhamäxaniti.

Liykta uka tuqit lupʼipunim. Lupʼiñax wali askipuniwa, ukhamatwa Biblian mä yatichäwipat yatiqasax kunansa mayni yatichäwinakampix mayakïpxi uk amuytʼäta. Ukham lurätaxa  tiempompix yatiñan jaqïxätawa (Sal. 19:14; Pro. 3:3).

Bibliat sum yatxatañax janiw inamayäkaniti

Bibliat sapür liytʼañar yatintañax chʼamakiwa, ukampis janiw inamayäkaniti. Ukhamatwa Diosan Arupat sumpach amuytʼxäta (Heb. 5:12-14). Ukatsti sum amuytʼasirïña, yatiñanïña yatiqätaxa, kusisita, chuymas chuym sum jakasiñatakiw yanaptʼätamxa (Luc. 20:34-41).

Diosan Arupat taqi chuyma yatxatasakiw yatiñäni jaqir tukusma (Pro. 15:14). Ukhamatwa mayninakarux Bibliampi iwxtʼarakisma. Diosan Aruparjama ukat ‘Amuyasiri Chiqapa Uywatax’ apayankistu uka qillqatanakarjam taqi kuns amtäta ukhaxa, chʼamañchtʼataw jikxatasïta ukat sum jakasirakïta (Mat. 24:45, MT). Ukat janiw kunans aynachtʼkätati, Dios chuymarakiw sarnaqäta. Ukhamarus Jehová Diosampix jukʼamp sumwa apasxarakïta (Sal. 1:2, 3).

Jehová Diosar wal munasitas laykuw iyawsäwisat parlaraktanxa. Ukham lurañax wali askiwa. Sofía kullakax jaqinakan chuymapar purtʼañatakix Biblian walja jiskʼa tʼaqanak amxäsiña ukat ukanakamp yatichañatakiw amtawayi. Jichhax Diosan Arupat sum yatichaskaraki. “Bibliat liytʼasax kunjamsa jaqinakax jikxatasipxi uk uñjañax wali khusapuniwa” sasaw Sofiax saraki.

Bibliat taqi chuym liytʼasax Jehová Diosampix wali sumrak apasïta, ukaw taqi kunat sipans jachʼa bendicionaxa. Ukat Diosan kamachinakapatsa jukʼamp qhanwa amuyxäta, ukat kunja munasirisa, khuyapayasirisa ukat chiqapar uñjirisa uksa amuyxarakïtawa, ukaw wali askipunixa. Ukhamasti Diosan Arupat yatxatañatakix tiempo apstʼasipunim. Ukham luratamax janiw inamayäkaniti (Sal. 19:7-11).

[5 janan recuadropa/fotonakapa]

KUNJAMSA LIYTʼASMA UKAT KUNANAK LURAÑSA AMTASMA

▪ Janïr qalltkasax Diosat maytʼasim ukat taqi amuyump liytʼarakim

▪ Yatiqatam askirjam uñjam

▪ Kuntï phuqkasma uk lurañ amtañamawa

▪ Biblian kawkïr jiskʼa tʼaqampis jaqinakar amuytʼayasma uk thaqtarakisma

▪ Amuytʼasapuniw liytʼañama

▪ Chʼamäki uka jiskʼa tʼaqanakat yatxatam ukat uka tuqit qhanañchki uka qillqatamp yatxatarakim

▪ Janiw apur apurakix yatxatañamäkiti

▪ Diosan Arupar munasiñ yatiqañamawa

▪ Liykta uka tuqit lupʼipunim

[4 janan fotopa]

Biblia liykasax uñjkasmas ukham amuytʼañamawa