Jumanak taypin irnaqirinakarux respetapxam
Jumanak taypin irnaqirinakarux respetapxam
“Jumanak taypina [wal] irnaqapki, sarayapkaraki, ukhamarak Tatitun sutipar iwxapki ukanakarux istʼapxam.” (1 TES. 5:12.)
1, 2. 1) ¿Apóstol Pablox nayrïr cartap qillqkäna ukhax kunjamansa Tesalonicankir tamax jikxatasïna? 2) ¿Kamsasas Pablox iwxtʼäna?
NAYRÏR maranakansa jaksna ukat Tesalónica markankir tamankirïksnas ukham amuytʼañäni. Uka tamax Europa uksanxa nayrïr tamänwa. Apóstol Pablox jilat kullakanakar chuymachtʼañatakisa, chʼamañchtʼañatakisa walja tiempow uka markankäna. Ukat kunjamtï yaqha markanakan lurkänxa, ukhamarakiw jilat kullakanakar uñjañatakix irpir chuymaninak uttʼaypachäna (Hech. 14:23). Ukampis qhipatxa, judionakaw jaqinakar amtayasin Pablompir Silasampir uka markat alisnukupxäna. Tesalónica markankir cristianonakax llaktʼata, saparstʼata ukat wali sustjataw qhiparapxpachäna.
2 Pablox machaq tamat wal llakispachäna. Ukatwa uka markar wal kuttʼañ munäna, ukampis Supayaw jarkʼäna ukatwa Timoteorux tamar chʼamañchtʼañapatak khitäna (1 Tes. 2:18; 3:2). Qhipatxa, suma yatiyäwinakampiw Timoteox kuttʼanïna ukatwa Pablox chʼamañchtʼkir mä carta uka tamar apayäna. Uka cartapanxa akham iwxtʼäna: “Jumanak taypina irnaqapki, sarayapkaraki, [...]ukanakarux istʼapxam [mä arunxa respetapxam]” sasa (1 Tesalonicenses 5:12, 13 liytʼasiñapawa).
3. ¿Tesalónica tamankir irpir chuymaninakax kunatsa ‘suma uñjatäpxañapänxa’?
3 Tesalónica markankir irpir chuymaninakax janiw Pabljamas ni jupamp chika saririnakjamas wali yatxattʼatäpkänti, janirakiw Jerusalenakir irpir chuymaninakjamas mara mar Diosar yupaychapkänti. Jan ukasti, tamjam uttʼayatäpkäna ukatxa mä marakiw pasaskäna. Tama sarayirinakarux kunatsa respetapxañapa ukxa, kimsa tuqitwa Pablox akham sasin qhanañchäna: ‘jumanak taypin irnaqapxi, sarayapxi, ukhamarak iwxtʼapxi’ sasa. Ukatxa, “sum uñjapxañamawa, irnaqatanakapatxa wal munasipxañamarakiwa” sarakïnwa. Ukat “sumankañan jakapxam maynit maynikama” sasaw iwxtʼarakïna. Tesalónica markankasmäna ukhaxa, ¿irpir chuymaninakan luratanakapxa askirjamati uñjasmänxa? Ukhamasti, ¿tamamankir irpir chuymaninakarux Diosan ‘churäwiparjamati’ uñjaskta? (Efe. 4:8.)
‘Jumanak taypin irnaqapxi’
4, 5. ¿Kunatsa Pablox Tesalonicankir irpir chuymaninakax wal irnaqtʼapxi sasin säna, ukat tamasankir irpir chuymaninakat kamsasirakispasa?
4 Tesalónica markat Berea markar Pablomp Silasampix sarxapxäna ukhaxa, irpir chuymaninakax wal Tesalonican irnaqtʼasipkäna. Kunjamtï Pablox Qullan Qillqatanakamp yatichkänxa, ukham yatichañatakiw chʼamachasipxäna. Ukampisa, Bereankirinakatxa Bibliax akham siwa: “Jukʼamp suma chuymanïpxänwa, Tesalonicankir judionakat sipansa. Jupanakasti [...] sapürurakiw Qillqatanaksa yatxatapxäna” sasa (Hech. 17:11). Ukhamasti, ¿Tesalónica tamankirinakax janit Diosan Aruparux askit uñjapkänxa? Janiw jilat kullakanakat parlkiti, jan ukasti taqpach judionakatwa parlaski. Kunattix tesalonikankirinakatxa Pablox akham sänwa: “Janiw jaqinakan arunakapjamti katuqapkäyätaxa, jan ukasti Diosan arunakapjamwa katuqapxta” sasa (1 Tes. 2:13). Ukhamasti, irpir chuymaninakax tamar mantanirinakaru Diosan Arunakap yatichañatakix wal chʼamachasipxpachäna.
5 ‘Amuyasiri Chiqapa Uywatax’ ukhamarakiw Diosan tamaparux “horasapar manqʼanak” churañatakix chʼamachasipxi (Mat. 24:45). Ukat jupanakan yanaptʼataw irpir chuymaninakax tamar chʼamañchtʼasipkaraki. Walja arunakanwa Bibliat apstʼat qillqatanakax utji, ukhamarak Índice de las publicaciones Watch Tower ukat Watchtower Library sat discos utjaraki. Tamar yanaptʼañatakixa, irpir chuymaninakax chʼamachtʼkiri arstʼäwinak churañatakix walja horanakwa wakichasipxi. Yaqhipanakax jachʼa tantachäwinakan kunwa arstʼapxaraki. ¿Taqi ukanakampi phuqañatakix qhawqha tiempsa apsusipxi uk amuyasktanti?
6, 7. 1) ¿Tesalonikankir irpir chuymaninakax kunsa Pablot yatiqasipxäna? 2) ¿Kunatsa irpir chuymaninakatakix Pablot yatiqasiñax chʼamakïspa?
6 Tesalonicankir irpir chuymaninakaxa, Pablot yatiqasisaw tamankirinakar uñjapxäna.Pablox janiw phuqañ laykukix tumptʼir sarkänti. Jan ukasti, kunjamtï nayrïr yatichäwin uñjaniwayktanxa, munasiñ chuymampiw tamar uñjäna, “kunjämatix mä taykax wawanakaparu uywi, uñjaraki ukhama” (1 Tesalonicenses 2:7, 8 liytʼasiñapawa). Ukatxa, jilat kullakanakar yanaptʼañatakikiw jakäna. Ukhamarakwa Tesalónica markankir irpir chuymaninakax tamar uñjapxañapäna.
7 Irpir chuymaninakax Pabljamaw tamarux suma chuymampi ukat munasiñampi uñjapxañapa. Mayninakat sipansa yaqhipax jankʼakiw iwxanak katuqasipxi ukat wali munasirïpxarakiwa, ukampis amuytʼasir mä irpir chuymanixa, sapa maynix kunja suma chuymanisa uk uñjañatakiw chʼamachasi (Pro. 16:20). Ukampis pantjasirïpxatap laykux ukhampun lurañax chʼamakïspawa. Ukhampachasa, Jesucristot yatiqasiñataki ukat taqinir munasiñampi uñjañatakiw chʼamachasipxi. ¿Walpunxay ukham lurapxatapat yuspärtanxa?
8, 9. ¿Irpir chuymaninakax kunjamanakatsa jiwasanakat “llakisipxatap” uñachtʼayapxi?
8 ¿Kunatsa jilat kullakanakax irpir chuymaninakaru “istʼapxañapax” wali wakiskirixa? Kunjamtï apóstol Pablox siskänxa, jupanakax jiwasatwa “llakisipxi” (Heb. 13:17). Amuytʼañäni, kunjamtï mä awatirix paqar arum uywanakap uñjkixa, ukhamarakiw irpir chuymaninakax Diosar yupaychañ tuqit ayñachtʼatäpki, llakitäpki ukat usutäpki ukanakar yanaptʼañatakix jan sums ikipkiti. Sañäni, Comités de Enlace con los Hospitales satäkis ukan irnaqtʼir jilatanakaxa, akatjamat hospitalan uñjasipki ukanakar yanaptʼañatakiw chika arumpachas awisax sartapxi. Ukham yanaptʼasir jilatanakatxa, ¡walpun yuspärtanxa!
9 Comités Regionales de Construcción ukat comités de socorro satäkis ukan irnaqtʼir irpir chuymaninakarux ukhamarakiw taqi chuym yanaptʼañasa. Myanmar (nayrax Birmania satänwa) markan ciclón Nargis sat jan waltʼäwin kunjamsa 2008 maran yanaptʼapxäna uk amtañäni. Irauadi jawir thiyankir chiqaw jukʼamp tukjatänxa. Uka chiqanakankir jilat kullakanakar yanaptʼañatakix qʼala tukjat thaknäm sarapxäna, jiwatanakas waliw utjarakïna. Jupanakamp chikax tamanak tumptʼir jilataw purirakïna. Jupar uñjasasti jilat kullakanakax akham sapxänwa: “¡Uñtapxam tamanak tumptʼir jilatasawa! ¡Jehová Diosapuniw qhispiyistu!” sasa. ¿Jiwasax jupanakjamarakit irpir chuymaninakan arumay uru irnaqtʼapxatap askirjam uñjasktanxa? Ukat yaqhip irpir chuymaninakax wali chʼamäki ukanak jusgañatakiw tantachasipxaraki, ukhamat jilat kullakanakar yanaptʼañataki, ukampis janiw jachʼa jachʼa tukupkiti (Mat. 6:2-4). Ukham yanaptʼatasti jilat kullakanakax wal yuspärapxi.
10. ¿Irpir chuymaninakax kunanaksa lurapxaraki?
10 Jichhürunakanxa, irpir chuymaninakatxa waljaniw taman yaqha lurañanakanïpxaraki. Sañäni irpir chuymaninakat sarayir jilatax sapa seman tantachäwitakiw programa wakichi. Secretario jilatasti, sapa phaxsiw informenak apthapi ukat marpachatwa informaraki. Yatiyañataki Diosan Yatichäwipa sat tantachäwi sarayir jilatax sapa maynin arstʼapxañapatakiw mä programa wakichi. Ukhamarus kunjamsa taman qullqix apnaqasiski ukxa sapa kimsa phaxsix uñjapxi. Ukatxa, taman “taqinis iyawsäwinxa mayakïñaru puri[pxañapataki” yanaptʼañatakis taqi irpir chuymaninakaw sucursalan apayanit cartanakxa liytʼapxañapa, ukat ukarjamas phuqapxañaparaki (Efe. 4:3, 13). Ukhamatwa “taqi kunsa sum lurap[xi], maynit maynita” yanaptʼasisa.
‘Sarayapxiwa’
11, 12. ¿Khitinakas tam sarayapxi, ukat kunjamsa uk phuqapxañapa?
11 Pablox Tesalónicankir tamar qillqasaxa, irpir chuymaninakax ‘sarayapxiwa’ sasaw sarakïna (1 Tes. 5:12). ‘Sarayapxiwa’ siski uka aruxa, Griego arunx mayninak “nayraqatan saytʼata” sañ muni. Kunjamtï Pablox wal “irnaqapxi” siskäna uka pachpa irpir chuymaninakatwa parlaskäna. Ukhamasti janiw maynikïkänti, jan ukasti taqpach irpir chuymaninakaw tamxa sarayapxäna. Jichhürunakanxa, irpir chuymaninakax chiqapuniw tantachäwinak sarayañatakix jilat kullakanak “nayraqatan saytʼatäpxi”. Nayrax “irpir chuymaninakan pʼiqtʼiripa” sasin uñtʼatänwa, jichhax “irpir chuymaninakat sarayiri” sasin uñtʼatäxarakiwa, ukasti taqpach irpir chuymaninakar mä kipkaruk uñjañatakiw yanaptʼistu.
12 Tama sarayañax janiw aliq yatichañakïkiti, jan ukasti kunjamtï Pablox 1 Timoteo 3:4 qillqatan siskixa, “utapxa sum apnaqañapa, wawanakaparus istʼasirïña axsartʼaña yatichañapawa”. Ukhamasti, sarayañax janiw wawanakar yatichañakïkiti, jan ukasti “sum apnaqañapawa”, ukat familiaparus yanaptʼañapawa. Irpir chuymaninakax ukhamarakiw tamar sarayapxañapa ukat familiaparus Diosar istʼañ yatichapxañapa (1 Tim. 3:5).
13. ¿Kunatsa awisax mä amtaruk puriñax irpir chuymaninakatak chʼamakïspa?
13 Tamar sum sarayañatakixa, kunan yanaptʼañas wakisispa ukat kunjamsa yanaptʼapxaspa ukwa irpir chuymaninakax taqini aruskiptʼapxañapa. Inas maynix “¿janit taqi ukanak maynik amtkaspa?” sasin sischispa. Ukampisa, kunjamtï nayrïr maranakan irpir chuymaninakax tam sarayapkänxa ukar uñtasitaw jichhax lurapxaraki. Kunatï tamatakix wakiski uka tuqit aruskiptʼañatak tantachasipki ukhaxa, sapa maynin arstʼatapwa sum istʼapxi ukat Biblian kawkïr yatichäwinakapas tamar yanaptʼaspa ukwa thaqtapxaraki. Uka tantachäwinak sum apasiñapatakixa, Diosan Arupata ukat Amuyasiri Chiqapa Uywatan iwxtʼanakap yatxatanipxi. Chiqas ukham lurañatakix tiempow munasi. Kunjamtï khä nayra maranakan circuncisión tuqit parlakipkasax jan mä amtanikïpkänxa, ukhamanwa awisax jikxatasipxaraki, ukatwa mä amtaruki puriñax chʼamakixa. Jan kipka amtanïpki ukhaxa, Bibliarjam mä amtaruk puriñatakix jukʼampi yatxatasipkaki (Hech. 15:2, 6, 7, 12-14, 28).
14. ¿Irpir chuymaninakan mä wawaki irnaqapxatapax kunatsa wali askixa?
14 Mä irpir chuymanitï taqi kunas aruparjam phuqasiñap munaspa, ukat jukʼampis Diótrefes chachjam tʼaqa tʼaq sarnaqañar wiytaspa ukhax ¿kunas pasaspa? (3 Juan 9, 10.) Tampacharuw jan waltʼaykaspati. Kunjamtï Supayax nayra maranakan tamar tʼaqa tʼaqa sarnaqayañ munkänxa, jichhax ukham lurañ munaraki. Supayax maynitakik taqi kun munañaru, mä arunxa, mayninakat sipans jilirïñ munañaruw wiyti. Ukhamasti, irpir chuymaninakax altʼat chuymanïñataki ukat mä wawaki sarnaqañatakiw chʼamachasipxañapa. Chiqas jilat kullakanakaxa, irpir chuymaninakar mä wawaki irnaqtʼir uñjasax wal yuspärapxi.
‘Iwxtʼapxarakiwa’
15. ¿Kunatsa irpir chuymaninakax tamankirinakar iwxtʼapxi?
15 Ukxarusti, Pablox kunampsa irpir chuymaninakax lurapxañapa ukwa parltʼarakïna, jupanakasti “iwxtʼapxañapänwa” ukamp phuqañax chʼamakïspänwa. “Iwxtʼaña” siski uka aruxa, chiqañchaña, ukampis jan qhuru chuymampi sañ muni (Hech. 20:31; 2 Tes. 3:15). Pablox akham sasaw Corintonkir tamar qillqäna: “Akanaksti janiw jumanakar pʼinqachañatak qillqanipksmati, jan ukasti jumanakar amuytʼayañatakiw qillqanipxsma munat wawanakaxarjama” sasa (1 Cor. 4:14). Kunjamtï amuyaskixa, Pablox munasiñata ukat jupanakat llakisitap laykuw iwxtʼäna.
16. ¿Tamankirinakar iwxtʼkasax kunsa irpir chuymaninakax amtapxañapa?
16 Maynir chiqañchkasax wali amuyumpiw irpir chuymaninakax iwxtʼapxañapa. Kunjamtï Pabljamarakiw suma chuymampi, munasiñampi ukat askirjam iwxtʼapxañapa (1 Tesalonicenses 2:11, 12 liytʼasiñapawa). Ukampis Diosan “yatichatäki uka chiqa arunaka [katxäsipxañapa], ukhamat yaqhanakar wayttʼañapataki uka suma yatichäwimpi” (Tito 1:5-9).
17, 18. ¿Mä irpir chuymanix iwxtʼkistani ukhax kunsa amtañasa?
17 Irpir chuymaninakax pantjasirïpxatap yatipxiwa, ukat awisax kun arsusas pantjasipki ukhax llakisipxiwa (1 Rey. 8:46; Sant. 3:8). Jilat kullakanakax “mutuyäwi [jan ukax chiqañchäwi] katuqasas” janiw walik chiqañchitux sapkaspati uksa yatipxarakiwa (Heb. 12:11). Ukatwa mä cristianor iwxtʼañatakisa, chiqañchañatakis wal lupʼipxi ukat Diosatsa mayisipxi. Ukhamasti, mä irpir chuymani iwxtʼkistani ukhaxa, jiwasat llakisitap uñachtʼayaskistu.
18 Jan uñtʼat mä usunïksnas ukham amuytʼañäni. Wal thaqhasax kuna usunïtansa uk yatir mä doctor jikxataraksna, ukat jan wali usunïtas yatiyistaspa ukhax ¿uka doctoratak colerasnati? Janiwa. ¿Ukat waliptañatakix operasiñamaw sistaspa ukhax kamachsnasa? Askisatakïtap yatisax jankʼakiw ukarjam lursna. ¿Ukampis coleratak parlistaspa ukhax janit qullayasxsna? Inas mayjtʼassna, ukampis janiw tuqituw sakix jan qullayasxsnati. Ukhamasti kunapachatï mä irpir chuymanix iwxtʼkistani ukhax janiw kamisarak ukham sitanisti sakix jan istʼañasäkiti. Amtapuniñäni, jupanak tuqiw Jehová Diosampi Jesusampix yanaptʼasipkistaspa, jan ukax kuna jan walitsa jarkʼaqaskistaspa.
Irpir chuymanix Diosan churäwipawa
19, 20. ¿Diosan aski ‘churäwipat’ kunjamsa yuspäratas uñachtʼaysna?
19 Kunapachatï kuns regalapkistu ukhax ¿kunjamsa yuspäratas uñachtʼaysna? Uka regalxa janiw apanukuñasäkiti. Jehová Diosasti Jesucristo tuqiw irpir chuymaninak ‘churäwinakjam’ churistu. ¿Junjamsa uka regalot yuspäratas uñachtʼaysna? Tantachäwin arstʼapki ukhax taqi amuyumpi istʼasa, ukat ukarjam phuqañataki chʼamasisa, ukhamarak arstʼañatak maykistu ukhas taqi chuym arstʼasa. Ukat Diosan Reinopat yatiyir sarañatak wakichapki ukarjam phuqasa ukat yaqha ukhamanakan yanaptʼasaw yuspärtanxa. Iwxtʼanakapax kunjamsa yanaptʼawayistu ukanakat yuspärasa. Ukat jilat kullakanakar yanaptʼapxañapataki tiempo churatapatsa familiaparux yuspäraraktanxa.
20 Wal irnaqtʼiri, sarayiri ukat iwxtʼasiri irpir chuymaninak utjatapatxa ¡walpun yuspärtanxa! Chiqpachansa, irpir chuymaninakax Jehová Diosan mä suma churäwipäskapuniwa.
¿Amtasktati?
• ¿Tesalónica markankir cristianonakax kunatsa irpir chuymaninakar respetapxañapäna?
• ¿Irpir chuymaninakax kunanaksa jiwas laykux lurapxi?
• ¿Irpir chuymaninakan sarayapxatapax kunjamsa yanaptʼistu?
• ¿Mä irpir chuymanix iwxtʼkistani, jan ukax chiqañchkistani ukhax kun amtañasasa?
[Jiskt’anaka]
[27 janan fotopa]
¿Kunanaktï irpir chuymaninakax taman lurasipki ukanak askirjamati uñjasktanxa?