Walja maranak apaskäna uka juiciow atipasiwayi

KHÄ 1995 maranwa uka juiciox qalltawayäna ukat 15 maranakaw apasiraki. Uka tiemponxa, yaqha religionanakan jan utjañap munirinakaw Jehová Diosan Qhanañchirinakapar tʼaqhisiyapxäna. Ukat Diosan arunakap jan yatiyasiñapatakis wal chʼamachasiwayapxi, ukampis jilat kullakanakax Moscú markansa ukat yaqha chiqansa janipuniw Jehová Diosat jithiqtapkiti, ukatwa juicionak atipjawayapxi. Ukhamarus ¿kunjamatsa jan waltʼäwinakax qalltäna?

JAN WALTʼÄWIN JANÏR QALLTKIPANA

Khä 1917 maranxa, jilat kullakanakax Rusia markan jarkʼatapxänwa, ukampis 1990 maranak qalltanxa, janiw ukhamaxänti. Ukat 1991 maransti mayni religionanakjam katuqatäxarakïnwa. Ukat Unión Soviética siski ukan tukusitaparuxa, Federación Rusa ukar qillqatäxapxänwa. Nayra maranakanxa, Jehová Diosan Qhanañchirïpxatap laykuw tʼaqhisiyapxäna sasaw gobiernonkirinakax qhanañchapxäna. Ukat 1993 maranxa, Departamento de Justicia de Moscú uksankirinakaxa, “Comunidad de los Testigos de Jehová de Moscú” sat sutimpiw katuqapxarakïna. Uka pachpa maranwa Rusia markanx machaq leyinakapax apsusiwayäna, ukansti, sapa mayniw kawkir religionankañsa ajllisispa sasaw qhanañchasïna. Ukatwa mä jilatax akham säna: “Jan khitins jarkʼata Diosan Arup yatiyañxa [...] janipuniw amuyapkayätti” sasa. Ukxarux sarakïnwa: “Phisqa tunka maranakaw jan khitins jarkʼata Diosan Arup yatiyañatakix suyapxta” sasa.

Uka maranakax Rusiankir jilat kullakanakatakix ‘wakiskir’ tiemponakänwa (2 Tim. 4:2). Ukatwa Diosan arunakap taqi chuyma yatiyapxäna, ukham lurasax walja askinakwa jikxatapxäna. “Religión tuqitxa jaqinakax wal yatiñ munapxäna” sasaw mä misioner kullakax sarakïna. Ukat yatiyirinakasa, precursoranakasa, tamanakas wal jilxattäna. Ukat 1990 marat 1995 marakamaxa, Jehová Diosan Qhanañchirinakapax 300 ukhanitxa, 5.000 ukharuw jilxattäna. Uk yatisaw uñisirinakax wasitampi sartasipxäna. Ukat 1990 maranakanxa, Diosan markap contraw tribunalanakan juicio qalltapxäna. Chiqas walja maranakaw uka jan waltʼäwinakax utjawayi.

JANIW KUNA JAN WALSA JIKXATAPKÄNTI

Nayrïr juiciox junio phaxsin 1995 maranwa qalltäna. Moscú markankir mä qhawqha jaqinakaxa, Iglesia Ortodoxa Rusa ukankirinakampiw mayachasipxäna ukat jan walinaksa lurapkaspa ukhamwa jilat kullakanakar juchañchapxäna. Ukat kawkïrintix warmipasa, chachapasa, jan ukax wawapas Jehová Diosan Qhanañchiripar tukupxi ukanakax coleratäpxiwa, ukanakan sutipxaruw sartasipxta sasaw sapxäna. Ukatwa junio phaxsin 1996 maranx fiscalanakax uka tuqit yatxatañ qalltapxäna, ukampis janiw kuna jan walinaksa jikxatapkänti. Ukhampachasa uka jaqinakax payïri juicio jilat kullakanak contra qalltapxäna. Ukhamarus wasitat yatxatasax janirakiw kuns jikxatapkänti. Ukhampachasa uka uñisirinakax kimsïr juiciomp qalltasipkakïnwa. Ukat janirakikiw kuna jan walinaks jikxatapkänti. Ukhamarus pusïr kutimpis kʼari denuncianak uskusipkakïnwa, ukat janirakiw kuns jikxatapkänti. Ukampis uka jaqinakax janiw qaripkänti, jukʼampi yatxatasiñapawa sasaw sapxäna. Ukhamaruw yaqha yatxatirix uka juicio abril 13, 1998 maran tukuyäna.

Uka juicio uñjir mä abogadoxa “jan suykayätan ukaw lurasiwayi” sasaw säna. Phisqïr kutin yatxatasiñapataki uñjkäna uka fiscalaxa, Jehová Diosan Qhanañchirinakapan jan wali luratanakapax janiw utjkiti sasaw qhanañchäna,  ukhamarus qhipatxa, jilat kullakanakas contraw saytʼasxäna. Moscú markankir Jehová Diosan Qhanañchirinakapax markansa ukat yaqha markanakan kamachinakapsa pʼakintapxiwa sasaw juchañchäna. Ukat Circuito Administrativo Norte de Moscú ukankir fiscalanakax uka demandapar istʼapxänwa. * Ukat septiembre 29, 1998 maranxa, Moscú markana, Golovinsky sat chiqan tribunalapanwa mä audienciax qalltasïna. Ukhamatwa payïr juiciox qalltäna.

TRIBUNALAN BIBLIAX LIYTʼASIWAYI

Moscú markankir mä jachʼa utanwa, Tatyana Kondratyeva sat fiscalax jilat kullakanak contrax saytʼasïna. Ukat 1997 maran apsuta leyirjamaxa, Iglesia ortodoxa, islam, judaísmo ukat budismo uka iglesianakakiw utjañapa sänwa. * Chiqas uka leyirjamax janiw yaqha religionanakax Rusia markan katuqatäpkaspati. Ukat uñisiñar aptʼir iglesianakax janirakiw uka leyirjamax uñtʼatäpkaspati. Ukhamasti, uka leyir atinisitaw fiscalax Jehová Diosan Qhanañchirinakapax uñisiñaruw apapxi ukat familianaks tʼunjapxi sasin kʼarintäna, janiw markan leyiparjam uñtʼasxañapäkiti sarakïnwa.

Jilat kullakanakasar arxatir mä abogadoxa akham jisktʼäna: “¿Moscú markankir tamankirinakatxa, khitinakas leyinak pʼakintapxatayna ukanakan sutinakap aytasmäti?” sasa. Fiscalasti janiw ni mays aytkänti. Ukatsti, Jehová Diosan Qhanañchirinakapan Bibliat apstʼat qillqatanakapax religión pur chʼaxwañaruw api sasaw arsuskakïna. Arsutapax chiqaw sañatakixa, Yatiyañataki, ¡Despertad! ukat yaqha qillqatanakampitwa liytʼäna (alayankir fotonak uñxattʼäta). Ukat kunjamarak chʼaxwañar apapxisti sasin jisktʼatax akham sänwa: “Jehová Diosan Qhanañchirinakapax jupanakakis chiqa religionäpkaspa ukham yatichapxi” sasa.

Abogadot irnaqir mä jilataxa, juezampir fiscalampiruw mä Bibliakam churäna, ukat Efesios 4:5 qillqatatxa: “Mä sapa Tatitukiw utji, mä sapa iyawsaña, mä bautismokiraki” sasaw liytʼäna. Ukhamatwa juezampi, fiscalampi ukat abogadompixa, Juan 17:18 ukat Santiago 1:27 qillqatanakampit yatxatapxäna. Ukatwa tribunalax fiscalar akham jisktʼäna: “¿Biblian aka jiskʼa tʼaqanakapax religionanak pur chʼaxwañarut api?” sasa. Fiscalax Bibliat parlañatakix janiw yatxatatäkti sakiw sisxäna. Ukxarusti jilat kullakanakar arxatir abogadox kunjamsa Ortodoxa Iglesian qillqatanakapax Jehová Diosan Qhanañchirinakapar jiskʼachapxi, ukwa liytʼarakïna, ukat akham jisktʼäna: “¿Aka arunakax leyinak pʼakintapxiti?” sasa. Fiscalasti ukxarux sänwa: “Teología tuqit parlañatakix janiw yatxattʼatäkti” sasa.

FISCALANAKAX AYNACHTʼAPXIWA

Jehová Diosan Qhanañchirinakapax Navidad ukat yaqha fiestanakamp jan fiestachapxatapatxa, familianakarus tʼunjapkaspa ukhamwa fiscalax juchañchäna. Ukampis fiscal pachpaw Rusian leyinakapax janiw Navidad fiestachañar waytʼkiti sasin sarakïna. Ukhamax markachirinakasa jilat kullakanakasa kuns lurapxani uk amtañatakix derechonïpxiwa. Ukatsti, Jehová Diosan Qhanañchirinakapax wawanakarux samarañatsa, kusistʼañatsa jarkʼapxiwa sasaw sarakïna. Ukampis uka wawanakapamp parltati sasin jisktʼataxa, janiw parlkti  sakiw sisxarakïna. Ukat Jehová Diosan Qhanañchirinakapan tantachäwinakapar sartati sasin jisktʼataxa, “janiw sarañax wakiskänti” sasaw säna.

Ukatsti, jilat kullakanakar juchañchirinakaxa, psiquiatría tuqit mä yatichiriruw testigot apapxäna. Ukat Jehová Diosan Qhanañchirinakapan qillqatanakapax jaqin amuyuparuw mayjtʼayi sasaw uka yatichirix säna. Ukxarux jilat kullakanakar arxatir abogadox sarakïnwa, uka yatichirix tribunalar churki uka cartax Moscú markan documentompix kipkakiwa sasa, ukxarux uka yatichirix jïsa arunakax kipkakïpxiwa sarakïnwa. “Computadorar uchañ pachpa jiskʼa discompiw irnaqapxta” sasaw arsusirakïna. Chiqas jilat kullakanakasatxa, janiw maynis uka yatichirimp qullayasir sarapkataynati. Uka yatichirit sipansa, psiquiatría tuqit yaqha yatichirixa, Moscú markankir Jehová Diosan Qhanañchirinakapatxa 100 ukhaniruw yatxatapxta sasaw tribunalan qhanañchäna. Ukat amuyunakapax janiw kamachatäkisa, walikïskiwa, ukat Jehová Diosan Qhanañchiripar tuküpkäna ukhaxa antisaw yaqha religionanakar suma chuymamp uñjxapxäna sasaw sarakïna.

ATIPJÄWIX JANIW TUKUYKITI

Marzo 12, 1999 maranxa, Bibliat apstʼat qillqatanak yatxatasiñapatakixa, yatxattʼat phisqa jaqinakaruw magistradox uttʼayäna. Ukañkamax juiciox saytʼayasiniwa sasaw qhanañchäna. Maysa tuqitxa, Rusia markankir Ministerio de Justicia uksankirinakaxa, yaqha yatxattʼat jaqinakarurakiw yatxatapxañapatakix uttʼayapxäna. Ukat abril 15, 1999 maransti janiw kuna jan walis uka qillqatanakan utjkiti sasaw uka yatxattʼatanakax qhanañchapxäna. Ukhamatwa abril 29, 1999 maranx Ministerionkirinakax Jehová Diosan Qhanañchirinakaparux wasitampi markan qillqantapxäna. Ukhampachasa, Moscú markankir tribunalax wasitamp yatxatasiñapatakiw mayïna. Ukhamasti janiw askirjam luraskänti. Sañäni, Rusia markan ministeriotakixa, Jehová Diosan Qhanañchirinakapax leyinak respetirinakjam uñtʼatäpxänwa, ukampis Moscú markankir Departamento  de Justicia uksankirinakaxa, liyinak pʼakintapxi sasaw juchanchasipkakïna.

Wasitamp juicio qalltañapatakixa, niya paqallq maranakaw pasawayxäna. Febrero 23, 2001 maransti, Yelena Prokhorycheva sat juezaw uka juicio tukuyxäna. Taqi yatxatäwinakat uñakiptʼasinxa akham sänwa: “Jehová Diosan Qhanañchirinakapar chhaqtayañatakisa ukat luräwinakap jarkʼañatakis janiw kuna juchas utjkiti” sasa. Ukat taqi juchañchäwinakatxa janiw kuna juchanïpkisa sasaw tribunalanakan qhanañchasïna. Ukampis juezan arsutapax janiw fiscalatakix walïkänti. Ukatwa Moscú markankir Tribunalar yanaptʼayasir saräna. Kimsa phaxsitsti, mayo 30, 2001 maranxa, juezan arsutapax janiw walïkiti, yaqha juiciow lurasiñapa, ukat pachpa fiscalampi, yaqha magistradompiw uka juiciox apasiñapa sasaw Moscú markankir cortex qhanañchäna. Ukhamat kimsïri juiciox qalltäna.

JANIW QʼAL ATIPJATÄPKÄNTI

Octubre 30, 2001 maranxa, Vera Dubinskaya sat juezax machaq juicio qalltayäna. * Fiscalasti, Jehová Diosan Qhanañchirinakapax uñisiñaruw apapxi sasaw wasitamp juchañchäna. Ukat Moscú markantï Jehová Diosan Qhanañchirinakapax jan utjanixa, uka yupaychäwinkirinakar jarkʼaqañatakiniwa sasaw sarakïna. ¿Ukham jan wali parlatapatx kunsa jilat kullakanakax lurapxäna? Uka markankir 10.000 jilat kullakanakaw mä documento firmapxäna, ukat fiscalax janiw “arxatapkituti”, arsutanakapar jan istʼapxamti sasaw tribunalar mayipxäna.

Jehová Diosan Qhanañchirinakapar jan wali luratanakapat juchañchañatakix janiw pruebanakax munaskiti sasaw fiscalax qhanañchäna. Kunattix janiw luräwinakap contrax juiciox apaskiti, jan ukasti Bibliat apstʼat qillqatanakapa ukat iyawsäwip contraw juiciox apasiski sasaw qhanañchäna. Ukatxa, Rusiankir Ortodoxa Iglesiankirinakat mä pʼiqtʼiriw testigjam saytʼani sasaw qhanañcharakïna. Chiqas Jehová Diosan Qhanañchirinakapan uka markan jan katuqatäpxañapatakixa, Rusiankir Ortodoxa Iglesiankirinakaw ukham amtayasipkäna. Ukat mayo 22, 2003 maranxa, yatxattʼat jaqinakampiw juezax wasitampi Bibliat apstʼat qillqatanakat yatxatayäna.

Febrero 17, 2004 maranxa, yatxatäwinakat uñakiptʼañatakix wasitampiw juiciox qalltasïna. Jehová Diosan Qhanañchirinakapan qillqatanakapaxa, “familianakarusa, matrimonionakarus maychtʼat jakasiñaruw chʼamañchi” sasaw uka yatxattʼat jaqinakax qhanañchapxäna, ukat uñisiñaruw api sapki ukanakax “inamayaw parlapxi” sapxarakïnwa. Ukat walja yatxattʼatanakaw ukham sapxarakïna. Sañäni, Jehová Diosan Qhanañchirinakapax kunatsa yatiyapxi sasaw historia tuqit mä yatichirir jisktʼapxäna, jupax akham sasaw tribunalan sarakïna: “Cristianonakax yatiyapxañapapuniwa. Ukhamwa Evangelionakax yatichi, ukhamwa Cristos arkirinakaparux taqi chiqan yatiyapxañapatakix khitarakïna” sasa. Ukhampachasa, marzo 26, 2004 maranxa, Jehová Diosan Qhanañchirinakapax Moscú markan jan kun lurapxañapatakiw jarkʼantapxäna. Ukat junio 16, 2004 maranxa, Moscú markankir tribunalax ukhamwa lurarakïna. * Juezan arsutapat parlkasaxa, chuymankipstat mä jilatax akham siwa: “Soviética tiemponxa, Diosax janiw utjkiti sirinakakiw Rusia markan katuqatäpxana, ukampis jichax Ortodoxa Iglesiankirinakakiw katuqatäpxi” sasa.

¿Ukham jarkʼatäsax jilat kullakanakax kamachapxänsa? Nehemiasatwa yatiqasipxäna. Uñisirinakapax janiw Jerusalenan pirqanakap saytʼayasiñap munapkänti, ukampis janiw Nehemiasas ni markapas uñisirinakapar axsarapkänti. Antisaw “pirqxa saytʼayasipka[kïna]” ukat “taqi chuymawa lurapxäna” (Neh. 4:1-6) Ukhamarakiw Moscú markankir jilat kullakanakax uñisitpachas lurañanakap phuqasipkakïna, jïsa, suma yatiyäwinak jaqinakar  yatiyasipkakïnwa (1 Ped. 4:12, 16). Jehová Diosaw uñjaskistani sasaw atinisipxäna, ukat pusïri juicio qalltañatakix wakichatäpxarakïnwa.

JUKʼAMP JAN WALTʼÄWINAKA

Agosto 25, 2004 maranxa, Vladimir Putin sat Rusiankir presidenteruw jilat kullakanakax mä documento tuqi mayipxäna. Uka documentompi, ukat 315.000 firmanakampixa, 76 libronakänwa. Ukatxa, Rusiankir Ortodoxa Iglesiankirinakax sartasipxänwa. Moscú markankir wali munañan mä jaqix akham sänwa: “Jehová Diosan Qhanañchirinakap contrapxtwa” sasa. Musulmananakan mä pʼiqtʼiripaxa, ukham jarkʼañax “markatak wali askïniwa” sasaw sarakïna.

Yaqhip jaqinakaxa uka kʼari jaqinakampiw apayasipxäna, ukat jilat kullakanakasaruw jan walinak lurapxäna. Moscú markan yatiyaskiriruw yaqhip jilata kullakanakarux nuwjapxäna, takjapxäna. Ukat uñisir mä jaqixa, mä kullakarux utat jaqsusaw wali chʼamapamp jikhanit takintasin uraqir jaqunukutayna, ukat pʼiq kunwa usuchjayäna. Ukat hospitalansa qullayaskchïnxa, uka jan wali jaqirux policiax janiw kamskänsa. Yaqhip jilat kullakanakarux carcelaruw jistʼantapxäna, lukʼananakampiw papelar sellayapxäna, fotonak apsupxäna, ukat paqar arumaw carcelar llawintapxäna. Tantachäwinak apañatak utanak alquilapkäna ukanakaruxa, Jehová Diosan Qhanañchirinakapar alquilasïpkakïtax alisnukupxämaw sasaw sapxäna. Walja tamanakaw akatjamat callen uñjasipxäna. Chiqas 40 tamanakaxa, pusi tantachasiñ utanakan tantachasipxäna. Mä tamax paqallqu alwa horasaruw Taqinitaki Tantachäw apapxäna. Tamanak tumptʼir mä jilatax akham siwa: “Tantachäwir sarañatakix phisqa alwa horasaruw jilat kullakanakax marpach sartapxäna, ukampis wali kusisitaw uk lurapxäna” sasa.

DIOSAN ARUPAT QHANAÑCHASI

Jehová Diosan Qhanañchirinakapar jarkʼantasax janipuniw Rusia markan wal lurapkiti sasin qhanañchañatakixa, diciembre phaxsina 2004 maranxa, Tribunal Europeo de Derechos Humanos ukaruw jiwasan abogadonakasax sarapxäna.  (“¿Kunatsa Rusia markan amtapax Francia markan uñakiptʼasiwayi?” siski 6 janankir recuadro uñxattʼäta). Suxta maranak qhipat junio 10, 2010 maranxa, uka tribunalankirinakaxa, Jehová Diosan Qhanañchirinakapax janiw kuna juchanïpkisa sasaw qhanañchapxäna. * Ukat juchañchäwinakat uñakiptʼasaxa, janiw kuna jan wali luratanakas utjkiti sasaw qhanañchapxarakïna. Ukatsti leyiparjamax Rusia markaw “tribunalan jan wal luratapat askichañapa” ukat kunatï chiqäki uksa uñachtʼayañapa sasaw qhanañchapxarakïna (“Tribunalan amtatanakapa” siski 8 janankir recuadro uñxattʼäta).

Convenio Europeo de los Derechos Humanos ukarjamaxa, Jehová Diosan Qhanañchirinakapax luräwinakap jan khitins jarkʼata lurasipkaspawa sasaw tribunalankirinakax qhanañchapxäna. Ukampis janiw Rusia markakix Convenio Europeo de los Derechos Humanos ukarjam phuqañapäkiti, jan ukasti, Consejo de Europa siski ukar mayachatäpki uka 46 yaqha markanakas phuqapxañaparakiwa. Chiqas leyinakatsa, derechonakatsa wal yatxatasiwayi. Ukhamax aka Uraqpachankir leyinakat yatxattʼatanakasa, juezanakasa, kamachinak apsurinakasa, derechos humanos tuqit yatxattʼatanakasa, tribunalan amtanakap taqi chuyma yatxatapxañapatakiw yanaptʼani. ¿Kunatsa ukham sistanxa? Jehová Diosan Qhanañchirinakapar arxatañatakixa, tribunalax janiw paqallq kuti atipjat uñjaskayätan uka sentencianakak yatxatapkänti, jan ukasti, kunjamsa Argentina, Canadá, España, Estados Unidos, Japón, Reino Unido, Rusia ukat Sudáfrica markanakankir jachʼa tribunalanakan atipjawayktan ukanaksa yatxatapxarakïnwa. Taqi uka qhanañchäwinakasa ukat kunjamsa Moscú markankir fiscalan juchañchäwinakaparux atipjasiwayi taqi ukanakasa, jilat kullakanakan iyawsäwip arxatapxañapataki ukat luräwinakap arxatapxañapatakiw yanaptʼani.

Jesusax akham sänwa: “Marka apnaqirinakan ukhamarak reyinakan nayraqataparus apapxarakïtamwa nayan sutix layku, ukhamatwa nayatxa jupanakar parlapxätaxa ukhamarak jan judiöpkis uka jaqinak nayraqatansa” sasa (Mat. 10:18). Tunka phisqani maranak apaskäna uka juicioxa, Rusia markansa, yaqha markansa, nayrat sipans jukʼamp sum Diosan Sutip yatiyapxañapatakiw jilat kullakanakar yanaptʼawayi. Ukat yatxatäwinakasa, juicionakasa, Gran Cámara del Tribunal Europeo de Derechos Humanos uksankirinakan amtatanakapasa, Jehová Diosan Qhanañchirinakapan jukʼampi uñtʼatäpxañapatakiw yanaptʼawayi. Chiqas Diosan arupat ‘parlañataki’ ukat “qhispiyasiñ yatiyäwix jukʼampi” yatiyasiñapatakiw yanaptʼawayi (Fili. 1:12). Jichhürunakanxa, kunapachatï Jehová Diosan Qhanañchirinakapax Moscú markan Diosan Arup yatiyapki ukhaxa, jaqinakax akham jisktʼasipxi “¿janit jumanakan luräwinakamax jarkʼatakänxa?” sasa. Ukhamatwa jilat kullakanakax iyawsäwipat wali sum qhanañchtʼapxi. Chiqas Diosan reinopat suma yatiyäwinakaxa, janipuniw jarkʼatäkaniti. Ukhamasti, Rusia markankir jilat kullakanakar yanaptʼañapataki ukat bendiciñapatakiw Jehová Diosar mayipxta, uka jilat kullakanakax jan axsarirïpxatap uñachtʼayapxaraki.

[Qhanañchäwinaka]

[6 janan recuadropa/fotopa]

¿Kunatsa Rusia markan amtapax Francia markan uñakiptʼasiwayi?

Febrero 28, 1996 maränwa Convenio Europeo de los Derechos Humanos siski ukan Rusia markax firmatayna. Ukarjamax Rusia markachirinakax aka derechonïpxiwa:

‘Kawkïr religionankañsa; mä religionat yaqhar sarañatakis derechonïpxiwa ukat uñjkatasa, jan ukax jamasansa, religionapatsa ukat amuyunakapat parlañatak derechonïpxiwa’ (Artículo 9).

‘Jan jarkʼata parlañatakisa ukat yatiyäwi jan ukax amuytʼäwinaka mayninakat katuqañatakisa yaqhanakar yatiyañatakis derechonïpxiwa’ (Artículo 10).

‘Tantachasiñatakis derechonïpxiwa’ (Artículo 11).

Mayninsa, jan ukax mä organizacionan derechonakapas pʼakintaschi, ukat markapan utjki uka leyinakarjamax jan derechunïpkchi ukhaxa, Tribunal Europeo de Derechos Humanos ukaruw sarapxaspa, ukasti Francia markankir Estrasburgo sat chiqankiwa (foto uñxattʼäta). Ukanxa 47 juezanakaw irnaqapxi, ukat Convenio Europeo de los Derechos Humanos satäkis uk firmir markanakas ukjanïpxarakiwa, ukat kawkir markanakatï uka convenior qillqatäpki ukanakaxa, uka tribunalan arsutaparjamaw phuqapxañapa.

[8 janan recuadropa]

Tribunalan amtatanakapa

Tribunalan amtatanakap uñxattʼañäni.

Jehová Diosan Qhanañchirinakapax familianak tʼunjapxi sasin juchañchapkäna uka tuqitxa akhama sasaw tribunalan qhanañchasïna:

“Chiqas familiax kawkir religionankañatakis derechonïpxiwa, khitinakatï familiapan religionap jan respetapki, ukanakan kawsapaw jan waltʼäwinakax utji” (111 tʼaqa).

Jehová Diosan Qhanañchirinakapax kunaymanitwa jaqinakan “amuyunakap apnaqapxi” sasin juchañchirinakax janiw pruebanïpkänti ukatwa tribunalax jan istʼkänti:

“Jehová Diosan Qhanañchirinakapax aka jaqinakan ‘amuyunakap apnaqapxi’ sañatakixa, Rusia markankir tribunalankirinakax janiw ni mä sutsa aytapkänti” (129 tʼaqa).

Jehová Diosan Qhanañchirinakapax wila jan uchayasiñ munasaxa, arkirinakapan kʼumara jakasipxañapx janiw munapkiti sasaw juchañchapxäna, ukampis tribunalax janiw uka juchañchäwix walïkiti sasaw qhanañchäna:

“Janiw khitis maynirux apnaqkaspati, jan ukasti sapa mayniw kuns lurani uk amtañapa, ukhamax sapa mayniw kunjamsa jan ukax kunanakampis qullayasini uk amtañatakix derechonïpxi. Maynitï jilïrïxchi ukhamarak amuyupankaskchi ukhaxa, kunjamsa qullayasini ukat operayasiniti janicha, wilsa uchayasiniti janicha uk amtañatakix derechonïpxiwa” (136 tʼaqa).