Taqinis kusisit jakasiñäni

AKA urunakanxa llakitakiw sarnaqtanxa. Yaqhipax chuymas kawkstʼata, pʼiqis alintat ukhamaw sarnaqxapxi. Yaqhanakampi parltʼasiñatakix janiw kuna askinakas awisax utjirjamäkiti, Yamas jachʼa markanakanxa waljaniw sapaki jikxatasipxi, janiw khitimpi parltʼasiñas utjkiti.

Albert Oliverio sat yatichir mä jaqix akham siwa: “Jaqix sapakiw sarnaqxi. Ukat jachʼa markanakanxa jukʼampi saparstʼañjamawa. Irnaqir masix kunjamsa jakasi, uta jakʼankirinakas kunjamas sarnaqasipki ukat tiendan aljasir tatas jan ukax mamas kunjamas jikxatasi ukanakax armatakïxiwa” sasa. Ukax chiqäskapuniwa, ukhamatwa saparstʼañax utji.

Jehová Diosan markapanxa janiw ukhamäkiti. Jumanakax “kusisitäpxapunim” sasaw apóstol Pablox säna (1 Tes. 5:16). Jiwasax wali kusisitaw jikxatastanxa ukat wali kʼuchikiw jilat kullakanakampis parltʼasiraktanxa. Nayraqatxa, taqi kunxar Munañani jachʼa Jehová Diosaruw yupaychtanxa ukat Biblian yatichäwinakapsa sum amuyaraktanxa, ukhamatwa mä suma uraqin wiñay jakañ suyasktanxa. Ukat wali kusisitaw jaqinakarus uka tuqinakat yatichtanxa (Sal. 106:4, 5; Jer. 15:16; Rom. 12:12).

 Jiwas taypinxa chiqpach kusisiñaw utji. Ukatwa Pablox Filipos markankir cristianonakar akham sispachäna: “Nayax kusistwa, jumanakampi chikarakiw kusisiraktxa. Kusisipxarakimay jumanakaxa nayan kusisiñaxansa” sasa (Fili. 2:17, 18). Pablox maynit maynikam kusisiñ tuqitwa mä qhawqha arunakamp parli.

Ukhamasti, cristianonakax janiw saparstʼañasäkiti. Jilat kullakanakat jayarstʼasax llakissnawa ukat janirakiw jupanakampi kusisit parltʼasiñas utjxaspati. Ukatwa Pablox akham sispachäna: “Munat jilatanakaxa, Tatitunkxasinxa kusisipxam” sasa (Fili. 3:1). ¿Kunjamatsa uka arunakarjam phuqatas uñachtʼaysna?

Jilat kullakanakampi kusisipxañäni

Kunapachatï Pablox Filipos markankir jilat kullakanakar carta qillqkäna ukhaxa, Roma markan carcelan katuntatäskpachänwa (Fili. 1:7; 4:22). Ukampis janiw llakisiñat aynachtʼkänti, jan ukasti kusisit chuymampiw Jehová Diosar luqtäna, ukat jupa kikpas Diosatak mä sacrificiükaspa ukham amuyäna (Fili. 2:17). ¿Kunsa yatiqsna? Janiw sumankkasakix kusisiñ jikxatksnati. Ukatwa jupax carcelankkasas akham säna: “Jichhas jukʼampi kusisiskakïwa” sasa (Fili. 1:18).

Filipos markankir tamax Pablon yanaptʼataw uttʼasitayna. Ukatwa jupax uka tamar wal munasïna. Ukat Diosar luqtasin kusisiñ jikxatasaxa, janiw uka kusisiñxa jupatakik imxäskänti. Jan ukasti, jankʼakiw jilat kullakanakar yatiyäna, ukhamata jupanakas kusisipxañapataki. Ukatxa akham sasaw sarakïna: “Jilatanaka, munaraktwa ak yatipxañama: Kunanakatix nayar paskitu ukanakaxa, chiqpachansa mä yanapjamaw juti, ukïpanrakwa qhispiyasiñ yatiyäwix jukʼampi sarti. Palacionkir taqpach soldadonakasa, ukhamarak mayninakas yatirakiwa, nayan Cristor arkatax laykuki preso katuntatätaxa” sasa (Fili. 1:12, 13). Jïsa, Pablox ukhama experienak pasasaw jilat kullakanakar chʼamañchäna. Ukat jilat kullakanakax jupamp chikaw kusisipxäna. Maysa tuqitxa, Diosar kusisit chuymampi luqtañwa Pablox jilat kullakanakar yatichaskäna. ¿Kunjamsa? Kunjamtï nayax jan walinsa kusisit jikxatastxa ukhamaraki jumanakax kusisipxam sasaw saskäna (Fili. 1:14; 3:17). Ukat ¿Filipos markankir jilat kullakanakax kunsa Pablo layku lurapxäna? Jehová Diosar mayisisax jupat amtasipxapunïnwa ukat kunatix munaski ukanaksa apayapxarakïnwa (Fili. 1:19; 4:14-16).

Jan walinakan uñjasisax Diosar kusisit chuymampi luqtatas uñachtʼayañasawa. Ukatakixa, kuna askinakasa utji uk sum amuyañasawa, kunjamtï Pablox askinak thaqkäna ukhama. Ukatxa, jilat kullakanakampi parltʼasisax uka askinakat  kusisit chuymampi parltʼasiñasawa. Janiw wali muspharkañ experiancianak thaqañasäkiti. Amuytʼañäni, inas yatiyir sarkasax jan istʼañ munirinakampis suma arunakamp qalltasax istʼayasstan, ukat yaqhampix mä jiskʼa tʼaqat wali sum parltʼasstan, ukanakampiw jilat kullakanakar chʼamañchsna. Ukat jan arxaykatasa, yaqhipax Jehová Diosan Qhanañchiripätas sum amuyapxi, ukat kamsapxisa uka tuqinakatsa jilat kullakanakampix parltʼasiraksnawa. Ukhamatwa jiwas taypin kusisiñax jukʼampi utjani.

Walja jilat kullakanakaw Diosar sapür luqtañatakix wal chʼamachasipxi ukat wali kusisitaw luqtasipki. Precursorjam jan ukax misionerjam irnaqtʼirixa waljaniw utji. Yaqhipax Betel utan luqtapxaraki. Yaqhipasti Diosan markapan khitataw yaqha markanakar sarapxi, ukanwa yupaychañ utanak lurapxaraki. Ukat walja jilatanakaw tamanak tumptʼirjam irnaqtʼapxaraki. ¿Janit jupanakamp parlañax wali askïkaspa? Jïsa, wali kusiskañäspawa. Walikpun “Tatitun luräwipanxa” ukham irnaqtʼasipktaxa sasin chʼamachañasawa (Col. 4:11). Ukat niyakixay tantachäwinakansa ukat jachʼa tantachäwinakansa uka jilat kullakanakampix jikistanxa, jupanakar jakʼachtʼasisin yuspärañasawa. Ukatsti, jupanakat yatiqasiñatakis jan ukax chʼamañchkir arunakap istʼañatakisa utaruw jawstʼaraksna, ukanwa kun phaytʼasas jupanakampi wali sum parltʼassna (Fili. 4:10).

Llakitanakar chuymachapxañäni

Pablox jan walinak aguantasaw Diosar jukʼampi luqtañatakix chʼamañchasïna (Col. 1:24; Sant. 1:2, 3). Ukat Filipos markankir jilat kullakanakar chʼamañchasax wali kusisitaw jikxatasirakïna. Uka jilat kullakanakax jan walinakar saykatañatakix kunjam wakichatäpxisa uk sum jupax amuyäna. Ukatwa jupanakar akham sarakïna: “Cristo laykuw jumanakarux jupar iyawsañax churatäpxtaxa, ukhamarak jupa layku tʼaqhisiñasa. Jumanakas ukhamarak nayasa uka kipka nuwasiñankapxtanwa, uñjapxaraktawa kunjämtix nayas nuwaskta ukxa, jichhasti yatipxaraktawa nayan nuwasiskataxsa” sasa (Fili. 1:29, 30).

Jichhürunakanxa ukhamarakiw walja jilat kullakanakax Diosar luqtatap laykux tʼaqhisiyat uñjasipxi. Awisax nuwasiñampiw uñisirinakax axsarayapxistu, awisasti jan amuykañakwa maysar uñtayañ munapxarakistu. Diosan markap contra saytʼirinakasa, pachpa familiaranakas jan ukax yatiqir ukat irnaqir masinakas ukhamaw Diosat apaqañ munapxistu. Ukampis ukanak uñjasax jan llakisipxamti, amuyasipxam sasaw Jesusax qhan säna: “Kusisipxam kunapachatix jaqinakax taqi jan wali arunakampi, ukhamarak janchiru chhuxriñchañanakampi uñisipxätam, sapxarakïtam taqi jan walinaka nayar arkapxatam layku ukkhaxa. Kusisitaki jakasipxam, jumanakasti alaxpach markanxa churäwinak katuqapxäta” sasa (Mat. 5:11, 12).

Ukhamasti, kunapachatï jilat kullakanakax yaqha markanakan wali tʼaqhisiyata ukat arknaqata uñjasipxani ukhaxa, janiw llakisiñasäkiti ni sustjasiñasäkisa. ¿Kunatsa? Ukham jan walinakan uñjasisax kunjam chuymampis Jehová Diosar luqtasipki ukwa uñachtʼayasipki. Ukat jupanakar yanaptʼañ munasax alaxpachankir Awkisat chʼama mayirapiñasawa, ukhamat aguantapxañapataki (Fili. 1:3, 4). Ukatxa, janiw pachpa tamasankir jilat kullakanakat armasiñasäkiti, yaqhipax wali jachañanakan uñjasipxi. Ukhamasti, yanaptʼirjamäsax jupanakar yanaptʼañasawa. Inas Diosan arunakapat yatiyiris jupanakamp chik sarsna ukat familiasampi Diosar yupaychañatakis jawsaraksna. Ukhamatwa chʼamañchtʼatax jikxatasipxaspa. Ukat jupanakamp kusistʼäwinakar sarañsa janirakiw armañasäkiti.

Kunjamtï yatiqawayktanxa, jiwaskamax wali kusisit sarnaqasiñasawa, jilat kullakanakar wal chʼamañchañasawa, janiw akapachan amuyunakapampi apayasisax saparstʼañasäkiti. Ukham chʼamachasiñäni ukhaxa, tamanxa wali munasiñaw utjani ukat mä wawakiw sarnaqasiñäni (Fili. 2:1, 2). Jïsa, sapürus wali kusisit luqtapxañäni, Pablox akham saskakiwa: “Wasitat sapxsma, kusisipxam” sasa (Fili. 4:4).

[6 janan fotopax khitin apsutasa]

Uraqi: Replogle Globes jupanakat maytʼatawa