DIOSARUX kunjamsa nayratpach yupaychasïna uk qillqañax waljaw utjaspa. Ukat Bibliat apstʼat qillqatanakat sipansa, fotonaka, cartanaka, experiencianaka ukat Diosar yupaychañatakisa ukat arunakap yatiyañatakisa kunanakas apnaqasïna ukanakas utjarakistuwa. ¿Ukanak imañasa ukat nayra maranakat yatxatañas kunansa yanaptʼistaspa? Amtañäni, Biblia qillqaskäna uka tiemponxa, israelita familianakan pʼiqtʼirinakax Diosan leyinakapa ukat kunanaktï Diosax jupanakataki lurkäna ukanakwa wawanakapar yatichapxañapäna, ukhamat “Diosar taqpach chuymapamp iyawsapxañapataki” (Sal. 78:1-7).

Jehová Diosan amtap phuqañatakixa, nayra archivonakat jan ukax imatanakat sum yatxatañax nayratpach wali askïnwa. Amtañäni, Jerusalenan Diosan templop wasitat lurasiskän ukhaxa, Diosan markapar uñisirinakax janiw lurasiñap munapkänti. Ukatwa Media markan Ecbatana sat capitalan nayra archivonakap thaqapxäna, ukanwa mä rollo jikxatapxatayna. Uka documentonsti Ciro sat reyiw templox wasitat lurasiñapataki permiso churäna (Esd. 6:1-4, 12). Ukat kunjamtï Jehová Diosax munkäna ukhamar templox lurasiskakïna. Lucas qillqirixa, ukhamarakiw “wali amuyumpi [...] qalltatpacha” uka tiempon utjkäna ukanak sum yatxatarakïna (Luc. 1:1-4).

Uraqpachankir Jilïr Irpirinakax ukhamarakiw kunanakas Diosar yupaychäwisan lurasiwayi ukanak wali wakiskirit uñjapxi. Ukat nayra maranakatpach  utjkistu ukanakax kunjamsa imasini uka tuqit parlkasaxa, maynïr jilatax akham sänwa: “Nayrax lurasiwayki ukanakat yatxatañax jan pächasisa nayrar sartaskakiñatakiw chʼamachtʼistu” sasa. Uka amtampiw Brooklyn (Nueva York) markanx Qillqirinakan Archivonakapa sat mä machaq departamento jichhak uttʼayasiwayi. Ukxa, Qillqirinakan Uñjirinakapa (Comité de Redacción) satäkis ukaw pʼiqtʼaski.

WALI MUNAT NAYRA YÄNAKAW IMATÄSKI

Tiempompix kunatï paski ukanakax armatakïxiwa, ukatwa familiasan fotonakapsa, suma yänaksa wal imasiñ muntanxa. Qillqirinakan Archivonakapa departamentonxa, uka amtampirakiw nayrat jichhakamax kuna suma luratanakas utji ukanak jan chhaqhañapatak imañ amtapxi. ¿Kunanakas imasiski? Bibliat apstʼat nayra qillqatanaka, fotonaka, sarnaqäwinakasa ukat ukham yaqhanakas imasiskarakiwa. Taqi ukanakax kunjamsa Diosan markapax qalltawayi ukat jutïrinsa kunjamarakïnisa ukar confiasiñatakiw yanaptʼistu.

Ukhamasti Qillqirinakan Archivonakapa satäkis ukar “visittʼañamatakiw” invittʼapxsma, ukaxa aka pachpa Yatiyañataki sat revistanwa “¿Kunanakas imatäski?” siski uka chiqan maran pusi kuti mistuni. Ukat jutïri phaxsinxa aka jisktʼanakaruw qhanañchasiskani ¿“Auroramóvil” ukax kunäpachänsa? ¿Khitinakas apnaqapxäna? ¿Kunapachasa ukat kunatakisa apnaqasïna?

Kunjamtï familiasan fotonakap uñxattʼasax jupanakat amtastanxa, ukhamarakiw Qillqirinakan Archivonakapa siski ukan imatäki ukanakax jiwasanakatsa ukat nayra cristianonakatsa akanak amtayistani: iyawsäwipa, Diosar jan axsartʼas yupaychapxatapa, kusisiñansa jan waltʼäwinakansa Jehová Diosar yupaychañan nayrar sartasipkakitapa ukat kunjamsa Diosax markapar irpi, yanaptʼaraki uksa qhanañcharakistaniwa (Deu. 33:27). Chiqansa, kuntï lurasiwayki ukanakat yatxatasin imañ amtasiski ukarux Jehová Diosax bendiciniwa. Kunattix amtanakap mä wawaki sum phuqaskakiñatakiw yanaptʼistani.

[31 janan recuadropa/fotopa]

Jukʼamp uñtʼañäni

Mä DVD apsuñatakisa ukat machaq qillqatanaka ukat yaqhanak wakichañatakisa, qillqirinakasa, dibujirinakasa (artistas), yatxatir jilatanakasa, ukat yaqhanakasa taqi archivonaka uñakipapxi. Ukatwa Qillqirinakan Archivonakapa satäkis ukan trabajirinakax kunanakatï nayra maranakatäki ukanakxa copianak apsusin sum imapxi, ukanakax sucursalanakata, tamanakata, istitucionanakata ukat yaqha chiqanakata apayanitawa. Kunanaktï lurapki uk mä qhawqha uñjañäni:

¿Kunjamsa uka yänak jikxatapxi ukat yatxatapxaraki? Jukʼat jukʼatwa yapxatasi. Jila partex Jehová Diosar nayaratpach yupaychapki uka familianakaw donapxi jan ukax maytʼapxaraki. Ukanakat yatxatasa ukat mayninakampi igualtʼayasaw kunjamsa qalltawaytan ukat kunanakas pasäna ukanakax jukʼamp yatxatasi, ukat khitinakasa uka tiempon jakapxäna ukas yatisirakiwa.

¿Kunjam jaljatasa? Jiskʼan jachʼani walja suma yänakaw utjaraki, ukat yaqhipax patak jila maranakaniwa. Niyakixay ukham walj utjchixa, fasilaki jikxatañatakix wali suma ukat yäpar uskutarakiwa.

¿Kunjams askichasi ukat imasxi? Wali cuidadompi apnaqañ yänakasa ukat libronakasa wali sum imasxi. Ukat documentonaka, fotonaka, periodicot apsutanaka, peliculanaka ukat grabacionanakasa computadoraruw imasxi. Ukhamatwa jan thanthasxiti, jan ukasti computadoratakwa thaqtasxi.

¿Kunjam imatasa ukat kunjam cuidatasa? Jan qurwantañapataki ukat lupis qhanas jan tuntsuñapatakixa, utjkistu ukanakax suma imatawa. Ukat facila katjañatakix mä programaw computadoran lurasiski, ukhamat kunanakatï jiwasan wali munatäki ukanak jan chhaqayañataki.

[32 janan fotonakapa]

1) “Foto Drama de la Creación” siski ukan fotopa. 2) Suscripcionan registropa. 3) Parlanten auto. 4) Abril 15, 1912, Watch Tower (Yatiyañataki) revistan tapapa. 5) J. F. Rutherford jilatax carcelankkäna uka tuqit yatiyäwi. 6) WBBR radion microfonopa. 7) Fonógrafo. 8) Libronak apañ maleta. 9) Qillqtʼasiñataki papela. 10) J. F. Rutherford jilatataki telegrama.