¿Jumajj amttati?

¿Aka qhepa phajjsinakan mistkäna Yatiyañataki sat revista liytʼtati? Ukhamächi ukhajja, aka jisktʼanakar qhanañchtʼma:

¿Kunsa Salomón chachan sarnaqäwipat yateqsna?

Diosajj Salomón reyirojj bendicïnwa ukat lurañanakwa churarakïna. Ukampisa, Israel marka apnaqkäna ukhajja Salomonajj janiw Jehová Diosan ewjjanakap istʼkänti. Faraonan phuchhapampiw casarasïna, uka warmejj kʼari Diosanakaruw yupaychäna, walja warminakanïnwa ukat kʼari Diosanakaparu serviñaruw apayasïna. Jiwasanjja janipuniw mä jukʼas jan wali amuyunakasa ukat jan wali luräwinakas utjañapäkiti (Deu. 7:1-4; 17:17; 1 Rey. 11:4-8) (12/15, 10 janat 12 janakama).

¿Kunjamäpjjes Dios chuymäpki ukanakajja?

Dios chuymäki ukajja wali askirjamwa Jehová Diosan kamachinakapar uñji. Diosajj amigopäkaspas ukhamwa uñji ukat Jupjamäñatakiw chʼamachasiraki (Efe. 5:1). Ukatwa mayninakarojj wali munasiñampi ukat llampʼu chuymamp uñji (Éxo. 34:6). Chʼamäkchi ukhasa, Diosan kamachinakap istʼapuniwa (Sal. 15:1, 4). (1/1, 11 janat 13 janakama).

¿Jan waltʼayasiñajj utjani ukhajj jaljtapjjañapati?

Mä matrimoniontï jan waltʼayasiñajj utjani ukhajja, panpachaniw munasiñamp uñjasiñatak chʼamachasipjjañapa (1 Cor. 13:4, 5). Jan waltʼäw askichañatakejj jaljtapjjañapaw sasajj janiw Bibliajj siskiti. Ukampisa, sinti jan waltʼäwinak utj-jjaspa ukhajj inas mä cristianojj jaljtañ amtchispa (1 Cor. 7:10-13) (1/1, 16 jana).

¿Kunjamsa awkejj wawapar jupapachpa munasiñapatak chʼamachtʼaspa?

Kuna aski arsutapatsa ukat luratapatsa walik ukham lurtajj sasaw chʼamañchtʼañapa. Ukat jupa pachpa jukʼampi munasiñapatakejj yaqha lurañanak phoqañapataki yanaptʼañaw askirakïspa (1/1, 26 janat 28 janakama).

¿Qollan ajayump ajllit cristianonakajj nayra patak maranakatpach aka Oraqen utjatap kunjamatsa yattanjja?

Jesusajj suma ‘trigota’ ukat ‘qoranakata’ mä uñachtʼäwin parlkäna ukanjja, ‘suma jathajj’ ‘Diosan ajllit wawanakapampi’ sasiwa (Mat. 13:24-30, 38). Qorajj trigomp chikaw cosecha apthapiñkam jilapjjañapäna. Ukhamasti, khitinakas trigor uñtasitäpjjäna uk janis sum yatkstanjja, nayra patak maranakatpachwa ajllit cristianonakajj aka Oraqen utjapunïna (1/15, 7 jana).

¿Kunsa istʼasirïñ toqet wayn tawaqonakajj Esterat yateqasipjjaspa?

Ester tawaqojj janis uywir awkipamp chikäkchënjja ewjjtʼapar istʼapunïnwa (Est. 2:10). Jichhürunakanjja, awk taykanakajj ukham kusisitaw jikjjatasipjjaraki, kunapachatï wayna tawaqonakajj ewjjanakaparjam sarnaqapki ukhajja. Ukham istʼasirinakajj Esterjamaw alajjpachankir Awkisar kusisiyapjjaraki (Pro. 27:11) (1/1, 18 janat 23 janakama).

Maynir ewjjtʼañatakejja, ¿kunanak amtañas wakisi?

Kunatsa jisktʼastam uk sum amuyañamawa. Jan amuytʼasisajj janiw jankʼak ewjjtʼañamäkiti. Diosan Aruparjam ewjjtʼasaw altʼat chuymanïtam uñachtʼayañama. Bibliat apstʼat qellqatanakampi yanaptʼayasiñamawa. Kunsa lurañapa ukjja janiw sañamäkiti (3/15, 7 janat 9 janakama).

¿Jiskʼa wawanakarojj bautisañäspati?

Janiwa. Maynin bautisatäñapatakejj Jesusan arkiripäñapawa, mä arunjja, Jesusaruw uñtʼañapa ukat ukarjamaw sarnaqañaparaki (Mat. 28:19, 20). Mä jiskʼa wawajj janiw uk lurkaspati (1/1, 31 jana).