1, 2. ¿Kunatsa waljanejj higo wal manqtʼasiñ munapjje?

¿HIGOS achu manqtʼasiñ munirïtati? Waljaniw wañsuta higo jan ukajj qoqat jichhak apaqtʼata higo wali sum manqtʼasipjje, ukatwa Oraqpachanjja walja cheqanakan yapuchapjje. Biblia qellqaskän uka tiempon jakiri judionakajj wali askitwa higo uñjapjjäna (Nah. 3:12; Luc. 13:6-9). Higojj wali chʼamañchtʼiriwa ukat lloqotakis askirakiwa sasaw waljanejj sapjje.

² Higonakajj jaqenakampi sasiwa sasaw mä kutejj Jehová Diosajj säna. Ukampis janiw kunja wakiskiris higojj uka toqet parlkänti, jan ukasti jaqenakan chuymapajj kunjamas uka toqetwa parlaskäna. Kunas jaqenakan chuymapan utji uka toqetwa Jupajj parlaskäna. Kuntï Jeremías toqejj siskäna ukajj jiwasarusa familiaranakasarusa ukat amigonakasarus yanaptʼaspawa. Uka arunakajj cristianonakatakejj kamsañsa muni ukwa yatjjataskañäni.

3. ¿Jeremías 24 tʼaqan parlki uka higonakajj khitinakampi sasisa?

³ Nayraqatjja, kunsa Diosajj Jeremiasar säna uk amuytʼañäni. Khä 617 nayra pach maranjja, Judá markajj qʼala aynachtʼatäpjjänwa, janiw Jehová Diosar sum yupaychjjapjjänti. Ukat kunas jutïr urunakan pasani uk Diosajj Jeremiasar mä visionanwa yatiyäna, ukatakisti pä kasta higonakampiw amuytʼayäna: wali suma higonakata ukat sinti jan wali higonakampita (Jeremías 24:1-3 liytʼasiñapawa). Sinti jan wali higonakajja, rey Sedequiasampi ukat ukham jan wali jaqenakampi sasinwa, jupanakasti Nabucodonosarampi ukat ejercitopampi katuntataw uñjasipjjañapäna. Ukampis suma higonakar uñtat jaqenakajj utjarakïnwa. Jupanakat mä qhawqhanejj akanakawa: Ezequiel, Daniel, kimsa amigonakapa ukat Babilonia markar apatapkäna uka judionakat mä qhawqhani. Tiempompejja, jupanakat waljaniw Jerusalén marka ukat templop  saytʼayiris kuttʼapjjañapäna. Ukat ukajj ukhamapuniw phoqhasïna (Jer. 24:8-10; 25:11, 12; 29:10).

4. ¿Kunjamsa Jehová Diosajj suma higonakat parlkäna ukajj chʼamachtʼistu?

⁴ Suma higonakatjja Jehová Diosajj akham sänwa: “Mä suma amuyu [jan ukajj chuyma] churarakï nayan Tatitütajja yatipjjañapataki; jupanakasti markajjäniwa” sasa (Jer. 24:7). Uka arunakatwa aka yatichäwin yatjjataskañäni. ¡Diosajj Jupar uñtʼañataki mä suma amuy churañ munistu! Cheqansa, jiwasaw Jehová Diosar uñtʼaña ukat markapankañ muntanjja. Ukatakisti, Bibliat yatjjatasin ukarjam sarnaqañasawa, arrepentisisin jan wali luratanakaswa apanukuñasa. Ukat jakäwis Diosar katuyasisajj Awkina, Yoqana ukat qollan ajayun sutipjjaruw bautisasiñasaraki (Mat. 28:19, 20; Hech. 3:19). Yaqhepajj taqe ukanakwa lurawayapjje, yaqhepasti uk lurañatakiw chʼamachasisipki ukat tantachäwinakarus sarapjjarakiwa.

5. ¿Khitinakan chuymanakapatsa Jeremiasajj parläna?

⁵ Ukanak taqpachsa phoqstan janisa, jan wali amuyunakasjja apanukuñasawa ukat Diosatakjam sarnaqañatakiw chʼamachasiskakiñasa. ¿Kunatsa? Kuntï Jeremiasajj chuyma toqet siskäna ukaw sum amuytʼayistani. Ukat yaqhep jaljanakajj Judá jakʼankir markanakatsa parlkchejja, phesqa reyinakajj mayat maya Judá marka apnaqapkäna uka maranakatwa jilpach parli (Jer. 1:15, 16). Jeremiasajja, Diosar katuyasit chachanakata, warminakata ukat wawanakatwa parlaskäna. Jupanakan nayra awk taykanakapasti taqe chuymaw Diosan markapäñatak iyaw sapjjäna (Éxo. 19:3-8). Ukat Jeremiasan urunakapan jakapkäna uka israelitanakajja, akham sasaw sapjjarakïna: “Akankapjjtwa, jumaruw makhatjjapjjaraksma, jumätaw nanakan [Jehová] Tatitu Diosajjajja” sasa (Jer. 3:22). Ukampis ¿jupanakajj suma chuymanïpjjänti?

6. Diosajj chuyma toqet parlkäna ukajj ¿kunatsa jiwasatakejj wali wakiskirejja?

⁶ Jichhürunakanjja, kunjamakïskis chuymas uk sum yatiñatakejja, doctoranakajj jichhak uñstir maquinanakampiw wali sum uñjapjje. Ukampisa, Jehová Diosajj jukʼamp sumwa chuymas uñakipi, kunjamtï Jeremías tiempon lurkäna ukhama. Diosajj ukham uñjañatakejj wali wakichtʼatapuniwa, ukwa aka arunakan amuysna: “Jaqen chuymapjama ñanqha, kʼarintirejj janiw utjkiti. ¿Khitisa jaqen chuymapjja sum uñjaspa? Naya Tatituwa, jaqen chuymapjja uñjta, chuyma manqhapan amtatanakapsa yatiraktwa; sapa maynirusa wakisitaparjamaw churaraktjja, luratanakaparjamaraki” (Jer. 17:9, 10). Jehová Diosajj chuymas sum uñji, mä arunjja, kunjam jaqëtansa, kuna amuyunakanïtansa, kuna amtanakanïtansa ukat kuna lupʼïwinakanïtansa uk sum uñji. Ukampis kunjamäskis chuymamajj uk juma pachpa uñakiptʼasiñatakiw chʼamachasiñamaraki.

7. Uka tiempon jakiri walja judionakan chuymanakapatjja, ¿kunsa Jeremiasajj säna?

⁷ Ukatakejj sapa mayniw akham jisktʼassna: “¿Jeremías tiempon jakiri walja judionakan chuymanakapajj kunjamänsa?” sasa. Judionakajj circuncidatapkchïnsa, “chuymanakapanjja janiw Diosar uñtʼapk[änti]”, sasaw Jeremiasajj säna (Jer. 9:25, 26). Jïsa, jupanakajj janiw Jehová Diosar taqe chuyma yupaychapkänti.

8, 9. ¿Jila parte judionakajj kunsa chuymanakapan mayjtʼayapjjañapäna?

⁸ Diosajj judionakar akham ewjjtʼäna: “Jan wali sarnaqäwinakamjja apanukupjjam, luräwinakamsa ukhamaraki sarnaqäwinakamsa askichasipjjarakim” sasa (Jer. 18:11). Jupanakan chuymanakapajj jan walïnwa, ukatwa jan walinak lurapjjarakïna (Marcos 7:20-23 liytʼasiñapawa). Kunatsa judionakajj jan walinak lurapjjäna ukjja, Jeremías toqew Jehová Diosajj sum uñjäna. Jupanakasti chuymanakapwa  qalarayasipjjäna ukat amtanakapasa lupʼïwinakapas janipuniw Diosatakejj akchʼas walïkänti (Jeremías 5:23, 24 ukat 7:24-26 liytʼasiñapawa). Ukatwa jupanakar akham säna: “Jumanakajj circuncidasipjjam, ukatsti nayarojj Tatitut uñtʼasipjjarakita, chuymanakamarusti kuna arustʼäwitejj utjki uka unañchäwinak uskusipjjam; ukhamata ñanqha luratanakam laykojj jan colerasiñajjajj ninjam aqtaskañapataki” sasa (Jer. 4:4).

⁹ Cheqpachansa, kunjamtï Moisés tiempon jakir israelitanakajj jan istʼasir chuymanïpkänjja, ukhamarakiw Jeremías tiempon jakir judionakajj jan istʼasir chuymanipjjäna (Deu. 10:16; 30:6). Jehová Diosan kamachinakap pʼakintayir jan wali amuyunakata ukat munañanakatwa judionakajj jitheqtapjjañapäna (Hech. 7:51).

10. ¿Davitat yateqasisajj kunsa jiwasajj lurañasa?

¹⁰ Kunas chuymasar pasaspa uk amuytʼayatapatjja, walpun Jehová Diosar yuspärañasa. Ukampis ¿kunatsa Jehová Diosan Qhanañchirinakapatakejj uk yatiñajj wali wakiskirejja? ¿Cristianonakajj jan walinak lurapjjatapatti, jan ukajj kunjamtï nayra judionakar paskatayna ukham “jan wali higonakar” tukupjjatapatcha? Janiwa. Jupanakat sipansa, Jehová Diosan servirinakapajj taqe chuymaw Jupar yupaychtanjja ukat qʼoma sarnaqaraktanjja. Cheqaparjam sarnaqer Davitas akham sasaw Jehová Diosar mayisïna: “Diosay, uñakipitaya, chuymajjar uñantam, nayarojj yantʼitaya, lupʼitanakajj uñtʼarakim, nayatejj ñanqha thakin sarnaqerïstjja, cheqa thakinjamay irpasita” sasa (Sal. 17:3; 139:23, 24).

11, 12. 1) ¿Kunatsa sapa maynejj chuymas uñakiptʼasiñasäspa? 2) ¿Kunsa Jehová Diosajj jan lurkani?

¹¹ Taqenis Jupar uñtʼsna ukat Jupampi askit uñjatäsajj ukham askit uñjatäskaksna ukwa Jehová Diosajj muni. Jeremiasajj akham sänwa: “Jumajj taqe kunsa cheqaparupuniw uñjtajja, jumajj [aski] jaqen chuymapsa yattawa” sasa (Jer. 20:12). Taqe chʼamani Jehová Diosatï aski jaqen chuymap uñakipchejja, ¿janit sapa maynejj chuymas uñakipasiñajj wakiskaspa? (Salmo 11:5 liytʼasiñapawa.) Uk lurasajja, inas chuyma manqhasan mä jan wali amta, jan wali amuyu jan ukajj ñanqhachasiñanak saphintat jikjjatsna, ukaw chuym qalarayaskistaspa. Ukatwa uka jan walinak chuymasat chhaqtayañasa, ukasti chuymatsa operayasksna ukhamäspawa. ¿Kuna jan wali amtanakasa jan ukajj jan wali amuyunakasa chuymasan utjaspa? ¿Kunjamsa ukanak apanuksna? (Jer. 4:4.)

¹² Cheqas Jehová Diosajj janiw munkir jan munkir uka jan walinaka apanukuykistaniti. Jupasti akham sasaw ‘suma higonakatjja’ säna: “Mä suma amuyu [jan ukajj chuyma] churarakï nayan Tatitütajja yatipjjañapataki” sasa. Uka arunakarjamajja, janiw munkir jan munkir suma chuyma churä siskiti. Jan ukasti, jupanakaw Diosar uñtʼañatakejj suma chuymanïpjjañapäna. ¿Jiwasajj janit ukham chuymanïñ munkaraksna?

13, 14. ¿Kunjamsa pachpa chuymapajj mä cristianorojj jan waltʼayaspa?

¹³ Jesusajj akham sänwa: “Chuyma manqhatwa jan wali amtañanakajj juti, jaqe jiwayañanaka, wachoqa juch lurañanakasa, lunthatasiñanaka,  kʼarisiñanaka, ukhamaraki jaqjjata jan wali parlañanakasa” sasa (Mat. 15:19). Maynitï chuymapan jan wali amtanakanïchejja, wachoq jucharuw purtʼasispa. Jupatï jan arrepentiskanejja, janipuniw mayampis Jehová Diosamp askit uñjatäkaniti. Inas mä cristianojj ukham jachʼa juchar jan purtʼaskchiti, ukampis jan wali munañanakaw chuymapan utjaspa (Mateo 5:27, 28 liytʼasiñapawa). Ukhaw chuymas uñakiptʼasiñasajj wakisispa. Ukham lurañäni ukhajja, ¿kunsa chuymasan jikjjatañäni? ¿Mä jilataru jan ukajj kullakaruti jan wali amtanakampi uñchʼukiskpachätanjja? ¿Jan ukajj kunanakatï Diosatakejj jan walïki ukat apanukuñasäki ukanakach chuymasan utjaskpacha?

¹⁴ Jan ukajj inas mä jilatajj jaq jan jiwaykchiti, ukampis mä jilatampi jan ukajj kullakampi colertʼasisaw chuymapanjja jukʼat jukʼata uñisjjaspa (Lev. 19:17). Uka uñisiñajj chuymwa qalarayaspa, ¿uk apanukuñatakejj chʼamachasiniti? (Mat. 5:21, 22.)

15, 16. 1) ¿Kunjamsa mä cristianojj chuymapan Diosar jan uñtʼkaspa? 2) ¿Jehová Diosajj Jupar jan uñtʼir chuyman jaqenakar uñisiwa sasin kunatsa sissna?

¹⁵ Ukampisa, jila parte cristianonakajj janiw uka jan wali amuyunakampi apayasipkiti. Ukat Jesusajj “jan wali amtañanaka[twa]” parlarakïna, ukanakaw jakäwis mayjtʼayaspa. Amuytʼañataki, taqe kunat sipansa familiaranakar munasiñaw wali wakiskirejja sasin inas amuysna. Niyas cristianonakajj familiaranakapar munasiñapawa, janiw kunjamtï aka ‘qhepa urunakan’ jaqenakajj “jan munasiñanïp[ki]” ukhamäpjjañapäkiti (2 Tim. 3:1, 3). Ukampis yaqhepajj akhamwa amuyapjje: “Familiajj familiapuniwa” sasa, ukatwa taqe kunansa jupanakaruk arjjatjjapjje. Maynitï jupanakat maynimp chuym ustʼayat uñjaschejja, jupanakajj chuym ustʼayasipjjarakiwa. Kunjamtï Dina tawaqon jilanakapajj kullakaparu jan wali lurapjjatapat wal colertʼasipjjäna ukhama, ukatwa jupanakajj walja jaqenak jiwarayapjjäna (Gén. 34:13, 25-30). Ukat Absalonajj Amnón jilapar chuymapan wal uñisitapatwa jupar jiwayäna, jupasti awkip toqet jilapänwa (2 Sam. 13:1-30). Ukham jan walinak lurapjjañapatakejj ¿janit jan wali amtanakajj chuymanakapan utjkpachäna?

¹⁶ Niyas cheqpach cristianonakajj janiw jaqe jiwayktanti. Ukampis inas jilatajja, familiaranakapat mayniru jan wal luratap amuyasin maynimp coleratächispa, ukham luratapajj cheqächi janisa, utar jawstʼatasa jan ukajj kun wajjtʼatas janiw katoqasiñ munkaspati (Heb. 13:1, 2). Ukham lurasajj jan munasiñanïtaswa uñachtʼaysna, ukatwa ukham chuymanïñjja jan ukhamak jaytañasäkiti. Kunatejj chuym uñantir Jehová Diosajj inas Jupar jan uñtʼir chuymanïtas jikjjatchistaspa (Jer. 9:25, 26).  Kuntï Jehová Diosajj judionakar siskäna uk amtapuniñäni: “Jumanakajj circuncidasipjjam, ukatsti nayarojj Tatitut uñtʼasipjjarakita” sasa (Jer. 4:4).

17. ¿Kunjamsa Jehová Diosar ajjsarañajj Jupatakjam sarnaqañ yanaptʼistani?

¹⁷ Kunjamäskis chuymamajj uk uñakipasajja, inas kunjamtï Diosan kamachinakapar istʼañamäki ukham jan jankʼaki istʼasirïtam amuyaschisma. Ukat inas Diosar jan uñtʼir chuymanïtam amuyasirakchisma. Inas jaqer ajjsarirïtama, wali aytatäña jan ukajj suma yänakanïña munatama jan ukajj qala chuymanïtama jan ukajj munañamaruk sarnaqañ munatam amuyaschisma. Ukhamächi ukhajja, janiw jumakejj ukhaman jikjjatasktati (Jer. 7:24; 11:8). Jeremiasajj akham sasaw Diosar jan istʼir judionakarojj säna: “Qhoru jan istʼasiri chuymanïpjjtawa” sasa. Ukat saskakïnwa: “Janiw [...] sapkaraktasa: ‘Tatitu Diosasarojj ajjsartañäni, horasaparuw qhepa, nayra jallsa apayanistu, ukhamaraki cosecha apthapiñ horasas apayanirakistu’” sasa (Jer. 5:23, 24). Jehová Diosarutï ajjsarañänejja, mä arunjja, respetañänejja, jan walinak chuymasat apanukuñäniwa. Ukatjja istʼasir chuymanïñäniwa, ukat kuntï Diosajj lurañas munki ukarjam sarnaqañas janirakiw chʼamäkaniti.

18. Khitinakatï machaq arustʼäwinkapki ukanakarojja, ¿kunsa Jehová Diosajj arsuwayäna?

¹⁸ Jiwasatï ukham sarnaqañataki chʼamachasiñäni ukhajja, Jehová Diosajj Jupar uñtʼañatakejj suma chuymwa churistani. Ukwa ajllit cristianonakar arsuwayäna, jupanakaw machaq arustʼäwinkapjje: “Nayan leyinakajjsti chuymanakaparuw uskü, pʼeqenakaparuw qellqantarakï. Nayasti jupanakan Diosapäyäwa, jupanakasti nayan markajjarakïniwa” sasa. Ukat akham saskakïnwa: “Nayar uñtʼañatakejja janirakiw wakiskjjaniti, yatichasipjjañanakapajj maynit maynikama amigonakaparusa, ukhamarak parientenakaparusa, taqenirakiwa jiskʼat jachʼakama nayarojj uñtʼapjjetani. Nayasti jupanakarojj ñanqha luratanakapatjja perdonarakïwa, jucha luratanakapatsti janiw mayampsa amtaskjjarakïti” sasa (Jer. 31:31-34). *

19. ¿Kuna askinakas cheqpach cristianonakatakejj utji?

¹⁹ Machaq arustʼäwittï alajjpachansa jan ukajj aka Oraqensa askinak katoqañ munstajja, Jehová Diosar uñtʼañwa munañama ukat markapankañamawa. Uka askinak katoqañamatakejja, Jehová Diosajj Criston loqtasïwipjjaruw juchanakam pampachañapa. Niyakejjay Jehová Diosajj juchanakamat perdonchïtamjja, ukhamasti chʼamäkchi ukasa mayninakan juchanakap pampachañamarakiwa. Ukham chuymanïñajj wali askiwa. Ukat ukham lurasajja, janiw Jehová Diosar serviñ munatamak uñachtʼaykätati, jan ukasti Jupar jukʼampi uñtʼatamwa uñachtʼayarakïta. Ukat khitinakattï Jehová Diosajj Jeremías toqe akham siskäna ukhamarakïyätawa: “Nayarusti thaqapjjetätawa, ukatsti jikjjatapjjarakitätawa, taqe chuymampi nayar thaqtapjjatam layku. Jïsa, nayaw jumanakarojj, nayraqatajjaru puriyanipjjäma, ukatsti sarnaqäwinakamjja nayaw uñj-jjarakï” (Jer. 29:13, 14).