1-3. ¿Kuna askinaksa Biblia liytʼatasata ukat ukarjam sarnaqatasat jikjjatsna?

“BIBLIA amuytʼañajataki yanaptʼatapatjja, Jehová Diosarojj sapa alwapuniw yuspärta” sasaw mä jilïr kullakajj säna. Jupasti 40 kutiw Bibljja qalltat tukuykam liytʼatayna, ukat ukham luraskakiñwa amti. Mä tawaqo kullakarojja, Biblia liyiñaw Jehová Diosan cheqpachapuni utjatap amuytʼañataki ukat Jupampi sum apasiñatak yanaptʼatayna. Jupasti akham siwa: “Janipuniw ukham kusisita jikjjatasirïkti” sasa.

² Apóstol Pedrojj akham sasaw taqenir ewjjtʼawayistu: “Asu wawanakjama suma qʼoma [...] leche munapjjarakim” sasa (1 Ped. 2:2). Khitinakatï Biblia liytʼasina ukat ukarjam sarnaqasin ‘qʼoma leche’ umtʼapki ukanakajja, suma conciencianïpjjewa ukat mä amtampirakiw jakapjje. Ukhamarusa Jehová Diosaru yupaychapki ukat munasipki ukanakampejj sumwa apasipjjaraki. Ukat apóstol Pabljamarakiw amuyapjje, jupajj akham sänwa: “Diosan leyiparu wal munta” sasa (Rom. 7:22). ¿Biblia liytʼañajj kunanakansa yanaptʼarakistaspa?

³ Jehová Diosata ukat Yoqapat jukʼamp yatjjatañäni ukhajja, jukʼampiw jupanakarusa ukat jaqe masisarus munasiñäni. Ukat kunjamsa Jehová Diosajj Jupar istʼapki ukanakarojj aka ñanqha pachat qhespiyani uk Biblia toqew yatiraktanjja. Ukat jaqenakarojj suma yatiyäwinakwa yatiyarakiñäni. Ukat Biblia liytʼasin yateqtan uk yaqhanakar yatiyañatak chʼamachasitasatjja, Jehová Diosajj bendicistaniwa.

4. Josué 1:8 qellqatan jikjjataski uka arunakajja, ¿kun lurañatakis ewjjtʼistu?

⁴ Jehová Diosajja janiw yupaychirinakapan Biblia ratuk liyirpayapjjañap munkiti. Nayrajja, akham sasaw Josué chachar säna: “Amtasipunïtaw [jan ukajj liyipunïtaw] kuntï Diosan leyi libropanjja siski uka, ukhamaraki uruy arumarakiw lupʼirakïta” sasa (Jos. 1:8; Sal. 1:2). Uka arunakajja,  kunjamsa liytʼkasajj lupʼsna ukarjam liyiña sañ muni. Kunapachatï Biblia liytʼasin lupʼktan ukhajja, kuna arunakas yanaptʼistaspa ukat chuymachtʼistaspa uk amuyañatakiw yanaptʼistu. Ukat Biblian wali wakiskir tʼaqanaka jan ukajj sarnaqäwinak jikjjattan ukhajja, kʼachitatwa liytʼañasa ukat arunak niyas arsuyksna ukhamwa liytʼañasaraki. Ukhamatwa uka arunakajj chuymar purtʼistani. ¿Kunatsa ukajj wali wakiskiripuni? Kunattejj Diosan ewjjtʼanakap sum amuytʼañajja, ukarjam sarnaqañatakiw yanaptʼistani.

5-7. Kunjamsa Biblia wali amuyumpi liytʼañajj aka toqenakat yanaptʼistaspa uk qhanañchtʼam: 1) Dios nayraqatan qʼoma sarnaqañataki; 2) mayninakaru munasiñampi ukat pacienciampi uñjañataki; 3) jan waltʼäwinakan uñjaskasas Jehová Diosar confiyañataki.

⁵ Ukham liytʼañäni ukhajja, Bibliankir libronakat jan sum uñtʼktan ukanak amuytʼañatakiw yanaptʼistani. Ukjja kimsa jilat kullakanakat amuytʼañäni: mä wayna jilataw Biblia liyiñataki wakichäwiparjam Oseas libron jikjjataski uka profecianak liytʼaski. Ukat Oseas 4:11 tʼaqat 13 tʼaqakam amuyumpi liytʼasajj ukharuw saytʼi (Oseas 4:11-13 liytʼasiñapawa). ¿Kunatsa? Uka arunakajj wali wakiskiriw jupatakejja. Kunattejj yateqañ utanwa, wayna masinakapajj maynimp ikintasiñapatak wal parljjayapjje. Uka qellqatat lupʼisajj akham sasaw amuytʼasi: “Yaqhanakan jan uñjkata juchachasktan uk Jehová Diosajj uñjiwa, nayajj janiw Jupar chuym ustʼayañ munkti” sasa. Uk amuyasajja, Jehová Dios nayraqatan qʼoma sarnaqañatakiw amti.

⁶ Mä kullakat jichhajj amuytʼañäni. Jupajj Joel libron jikjjataski uka profecianakwa wali amuyump liytʼaski ukat 2 jalja, 13 tʼaqäkis ukaruw puri (Joel 2:13 liytʼasiñapawa). Uk liytʼasajja, kunjamsa Jehová Diosat ‘munasiña, khuyapayasiña, paciencia chuymanïña’ yateqasispa ukwa amuykiptʼi. Ukat chachapampi jan ukajj yaqhanakampi parlkasajj jan phiskhasiñataki ukat chuym ustʼayir arunak jan arsuñatakiw amtawayi.

⁷ Jichhajj familiani mä cristiano jilatat amuytʼarakiñäni, jupajj jan trabajoniw uñjasi, ukat warmipasa wawanakapasa sum jikjjatasipjjaspa ukwa muni, ukatwa llaktʼasi. Ukat Jehová Diosajj “arjjatarakiw khitinakatejj jupar confiasipki ukanakarojja” ukat “llakisiñ horasansti arjjatasirirakiwa” siski uka arunakwa Nahúm 1:7 qellqat wali amuyumpi liytʼi. Uka arunakajj wal jupar chuymachtʼi. Ukat kunjamsa Jehová Diosajj wali munasiñap uñjistu uk amuytʼasajja, janiw añch llakisjjeti. Ukatsti 15 tʼaqjja ukhamarakwa liytʼi (Nahúm 1:15 liytʼasiñapawa). Uka jilatajja, jan walinakan uñjaskasasa, suma yatiyäwinak yatiyasaw Jehová Diosarojj cheqpach arjjatiriparjam confiyatap uñachtʼayi. Ukat trabajsa thaqhaskchejja, semananjj yatiyir sararakiwa.

8. Biblia liytʼkasajj kuna askinaksa jikjjatawayta uk qhanañchtʼam.

⁸ Wakiskir jiskʼa tʼaqanakat yatjjatawayktan ukanakajja, Bibliankir libronakapat amuytʼañajj chʼamjamäki ukanakat apstʼatawa. Ukampis wali chʼamachtʼkir arunak jikjjatañäni ukhajja, uka libronak liytʼañ munaskakiñäniwa. Oseas, Joel ukat Nahúm profetanakan qellqatanakapanjja, wali chuymachtʼkiri ukat yatiñkankañ churir arunakwa jikjjatsna. Ukat Bibliankir mayni libronakajj ukhamarakiw yanaptʼistaspa. Diosan Arupajja, qori apsuñ minar uñtatawa. Kunjamtï qori apsuñatakejj wal chʼamachasiñajj wakiskejja, ukhamarakiw Biblia qʼal liysusajj kunanakatï jakäwisan yanaptʼkistaspa ukat iyawsäwis chʼamañchtʼkistaspa uk jikjjatañatakejj chʼamachasiñasa.

9. ¿Biblia sum amuytʼañatakejj kuns lursna?

⁹ Biblia sapüru liytʼañajj wali wakiskiripuniwa. Ukampis liytʼkasajj amuytʼañasarakiwa. Khitinakatsa ukat kuna cheqanakatsa parlaski jan ukajj kunanakas pasäna ukanak sum amuytʼañatakejja, kuna qellqatanaktï Jehová  Diosajj apayankistu ukanakatwa yatjjatañasa. Jan ukajj Biblian mä yatichäwipajj kun sañs muni ukat kunjamsa jakäwisan yanaptʼistaspa uk jan amuykstan ukhajja, mä irpir chuymanimpi jan ukajj yatjjattʼat mä jilatampi jan ukajj kullakampiw yanaptʼayassna. Kunja wakiskiris Biblian yatichäwinakap sum yatiñajj uk amuytʼañatakejja, Bibliajj qellqaskäna uka tiempon jakir Apolos chachat parltʼañäni.

10, 11. 1) Diosan suma yatiyäwinakap yatiyañatakejja, ¿kuna yanaptʼsa Apolos chachajj katoqäna? 2) ¿Kunsa Apolos chachan sarnaqäwipat yateqsna? (“¿Yatichäwimajj machaq qhanañchtʼäwirjamäskiti?” siski uka recuadro uñjjattʼäta.)

¹⁰ Apolos chachajja judío cristianönwa, “qellqatanakatsti sumarakwa yatïna” ukat “ajayunsti aqkiri chuymani[rakïnwa]”, (MT). Jupajja, Juanan bautismopaksa uñtʼkchïnjja, Jesusjjat qhanpachwa yatichäna sasaw Hechos librojj qhanañchistu. Ukampis Apolos chachajj kuntï Jesusajj arkirinakapar bautismo toqet machaqat yatichkäna uk janiw yatkänti. Ukatwa Éfeso markanjja, “Priscilamp Aquilampejj jupar parlir istʼasinjja [...] Diosan thakipjjatjja jukʼamp suma qhana amuytʼayapjjarakïna” (Hech. 18:24-26). ¿Kunjamsa ukajj Apolos chachar yanaptʼäna?

¹¹ Éfeso markan yatiyasajja, Acaya markaruw sarjjäna. “Acayar purisinjja, Apolos chachajj walwa yanaptʼäna, Diosan munasiñap layku iyawsir jilatanakarojja. Jupasti judionakan pantjasïwinakapjja taqe jaqen nayraqatapanwa qhanañchäna. Judionakasti jan aruniw uñjasipjje, jupan parlatanakap istʼasinjja. Jupasti qellqatanakarjamarakiw qhanañchäna, jupanakajj suyapkis uka Jesusajj Cristötapata.” (Hech. 18:27, 28.) Apolojja, cristianjam bautisasiñajj kun sañs muni uk sum qhanañchtʼjjäna. Ukhamatwa waljanirojj cheqa yupaychäwin nayrar sartapjjañapatakejj ‘wal yanaptʼäna’. ¿Kunsa Apolos chachan sarnaqäwipat yateqsna? Jupjamarakiw Biblia liytʼasajj sum amuytʼañatak chʼamachasiñasa. Ukampis maynitï jukʼamp sum yatichañataki  ewjjtʼistani ukhajja, yuspärasa ukat altʼat chuymampiw katoqasiñasa. Ukhamatwa jaqenakarojj sum yatichañäni.

12, 13. Kunjamsa Bibliat yateqerinakarojj Biblian ewjjtʼanakapampejj wali amuyumpi yanaptʼsna uk qhanañchtʼam.

¹² Kunjamtï Priscilampi Aquilampi ukat Apolompejj mayninakar yanaptʼapkänjja, ukhamarakiw yaqhanakar yanaptʼsna. Bibliat yateqañ munirinakaru Diosar yupaychañ toqet nayrar sartañapatak yanaptʼta ukhajja, ¿kunjamsa jikjjatasta? Jan ukajj irpir chuymanïsta ukajja, ¿jan waltʼäwit mistuñapatak Bibliampi ewjjtʼatamat mä jilatasa jan ukajj kullakasa yuspärtam ukhajj kunjamsa jikjjatasta? Cheqansa, Diosan Arupampi mayninakar yanaptʼañasa ukat kunjamsa sum jakasjjapjje uk uñjañas wali kusiskañapuniwa. * ¿Kunjamsa jumajj uk lurasma?

¹³ Eliasajj jakkäna uka tiemponjja, walja israelitanakaw cheqa yupaychäwiruti jan ukajj kʼari yupaychäwiruch sarapjjani uk pächasipjjäna. Kuntï uka profetajj israelitanakar ewjjtʼkäna ukajja, Bibliat yateqkasin Diosar yupaychañ toqet pächasipki ukat jan nayrar sartapki ukanakarojj yanaptʼarakispawa (1 Reyes 18:21 liytʼasiñapawa). Jan ukajj aka toqet amuytʼarakiñäni: Bibliat yateqañ munirinakatï “kamsakinis amigonakajasa jan ukajj familiaranakajasa” sasin ajjsarayasipjjchi ukhajja, Isaías 51:12, 13 qellqatan siski ukarjam amuytʼayasaw Jehová Diosar yupaychañapataki chʼamañchtʼañasa (liytʼasiñapawa).

14. Yaqhanakar yanaptʼañ wakiskani ukhajja, ¿kunas Biblian ewjjtʼanakap amtañ yanaptʼistani?

¹⁴ Biblianjja chuymachtʼkiri, cheqañchtʼkiri ukat chʼamañchtʼkiri arunakaw utji. Ukampis inas jumajj akham jisktʼasta: ‘Kunapachatï wakiski ukhajja, ¿kawkïr qellqatsa liytʼañaja uk kunjamsa yatiristjja?’ sasa. Ukatakejja, sapüruw Biblia liyiñasa ukat liytʼktan uksa lupʼiñasarakiwa. Ukhamatwa kuntï Bibliajj siski uk jukʼampi sum yatiñäni ukat uka arunak amtañ wakiskani ukhasa, Jehová Diosaw qollan ajayupampi amtayistani (Mar. 13:11; Juan 14:26 liytʼasiñapawa).

15. ¿Kunas Diosan Arup jukʼamp sum amuytʼañatakejj yanaptʼätamjja?

¹⁵ Kuna lurañanaktï Jehová Diosajj churkistu uk phoqhañatakejja, Salomón reyjamaw yatiñkankañ Diosar mayisiñasa (2 Cró. 1:7-10). Ukat kunjamtï ‘nayra profetanakajj wali sum yatjjatapkänjja’, ukhamarakiw Jehová Diosaru uñtʼañataki ukat amtanakap yatiñatakejj Diosan Arupat sum yatjjatañasa (1 Ped. 1:10-12). Apóstol Pablojj akham sasaw Timoteor säna: “Chʼamañchasïtawa iyawsäwi arunakampi, suma yatichäwinak arkatamampi” sasa (1 Tim. 4:6). Jumatï uka ewjjtʼarjam lurätajja, Diosar yupaychañ toqet mayninakar yanaptʼañatakejj suma wakichtʼatäyätawa. Ukat iyawsäwimas chʼamañchtʼatarakïniwa.

16. 1) Qollan Qellqatanakat sapüru yatjjatasajja, ¿kuna askinaksa Berea markan jakasir judionakajj jikjjatapjjäna? 2) ¿Kunatsa jichhürunakan Biblia sapüru liytʼañajj wali wakiskirejja?

¹⁶ Berea markan jakasir judionakajja, sapürupuniw Qollan Qellqatanakat yatjjatapjjerïna. Ukat apóstol Pablon suma yatiyäwinakap istʼasajja, kuntï Bibliat jupanakajj yatipkäna ukarjamati janicha uk sum yatjjatapjjäna, ukat Pablon yatichatapajj cheqapunïtap amuyasajja, “waljaniw jupanakatjj iyawsapjjäna” (Hech. 17:10-12). ¿Kunsa ukat yateqsna? Biblia sapüru liyiñäni ukhajja, Jehová Diosar jukʼamp iyawsäwinïñatakiw yanaptʼistani. Uka “iyawsañajja: ‘Katoqäwa’ sas taqe chuymampi suytʼktans  ukawa”, ukat ukarakiw paraisor mantañatakejj yanaptʼistani (Heb. 11:1).

17, 18. 1) Diosaru taqe chuyma iyawsañasa ukat munasiñasa, ¿kunjamsa mä cristianorojj chuymap jarkʼaqe? 2) ¿Kunjamsa suytʼäwisajj jarkʼaqestu?

¹⁷ Ukatwa Pablojj akham säna: “Jiwasanakajj urunkirjamajja, amuyasiñasapuniwa. Jarkʼaqasiñasawa iyawsañampi, ukhamarak munasiñampi, qhespiyasiñataki suytʼañajj mä cascjamawa pʼeqesaru imantañapajja” sasa (1 Tes. 5:8). Kunjamtï mä soldadojj enemigonakapan flechtʼatajj chuymapar jan waktʼayasiñatak jarkʼaqasiñapajj wakiskejja, ukhamarakiw cristianonakajj juchar jan purtʼasiñatakejj chuym jarkʼaqasipjjañapa. Kunapachatï mä cristianojj kuntï Diosajj churapjjämaw siski ukar iyawski ukat Diosarusa jaqe masiparus munaski ukhajja, chuymapwa jarkʼaqasiski. Ukat Jehová Diosampi askit uñjatäñatakisa kuntï wakiski ukwa luraraki.

¹⁸ “Qhespiyasiñataki suytʼañajj mä cascjamawa pʼeqesaru imantañapajja” sasaw Pablojj sarakïna. Biblia qellqaskäna uka tiemponakanjja, jan casconi nuwasir soldadonakarojj jankʼakiw jiwayapjjaspäna. Ukampis mä suma cascompi uchasispäna ukhajja, pʼeqet nuwantatajj janiw añch usuchjapkaspänti. Jiwasajja, Bibliat yatjjatasaw ‘qhespiyasiñataki suytʼäwis’ chʼollqheñchtanjja, mä arunjja, casco uchastanjja. Ukat uka suytʼäwisaw kʼari yatichäwinakaru ukat ‘jan kunataki servir chʼusa arunakar’ jan iyawsañatakejj yanaptʼistu, ukhamat ‘janchir tukjir usjam’ tamar jan tukjañapataki (2 Tim. 2:16-19). Ukat kunatï Jehová Diosatak jan walïki uk mayninakajj lurayañ munistani ukhajja, suytʼäwisarakiw uk jan lurañasatakejj yanaptʼistani.

19, 20. ¿Kunatsa Diosan Arup wali askit uñjtanjja, ukat kunjamsa uk uñachtʼaytanjja? (“Jehová Diosajj kunatï wakiski ukanakwa churitu” siski uka recuadro uñjjattʼäta.)

¹⁹ Akapachan tukusiñap jakʼachasisinkipanjja, jukʼampiw Jehová Diosan Aruparojj confiyañasa. Biblian ewjjtʼanakapaw jan wali lurañanak apanukuñataki ukat jañchin munañanakapar atipjañatak yanaptʼistu. Ukat Biblian utjki uka chuymachtʼkiri ukat chʼamañchtʼkiri arunakapampejj Supayana ukat jupan apnaqat akapachan sipitanakaparojj atipjañäniwa. Ukat Jehová Diosajj Arup toqe yanaptʼkistu ukampejja, wiñay jakañar irpir thakinkaskakïñaniwa.

²⁰ Ak amtapunim: Jehová Diosajj “taqenin qhespiyatäñapwa muni”. Jehová Diosan servirinakapajj uka jaqenak taypinkaraktanwa. Ukat khitinakarutï yatiykasa yatichasa yanaptʼktan ukanakas uka taypinkarakiwa. Ukampis qhespiyasiñ munapki ukanakajja, “kunatejj cheqäki uk uñtʼapjjañapa[wa]” (1 Tim. 2:4). Ukatwa akapachan tukusïwipat qhespiñatakejj Biblia sapüru liyiñasa ukat ewjjanakapar istʼañasaraki. Cheqas Biblia sapüru liyisaw cheqa yatichäwinakar wali askit uñjatas uñachtʼaytanjja (Juan 17:17).