1. ¿Kunjamsa sum parltʼasiñajj yaqhep chacha warminakarojj yanaptʼawayi?

CANADÁ markankir mä jilatajj akham sänwa: “Yaqha jaqenakampïñat sipansa warmijampïñwa jukʼamp muntjja. Jupampïsajja, kusisitäkt ukhajj jukʼampiw kusista ukat llakitäkt ukhajj janirakiw añch llakiskti” sasa. Australia markankir mä chachajj akham sarakïnwa: “Warmijampejj 11 maranakaw jakasjjapjjta, jupampejj sapürupuniw parltʼasipjjta. Ukat chacha warmjam jakasiñarojj kunas jan waltʼaykaspa uka toqet llakisiñajj janiw utjapkituti. Kunattejj saparatuw sum parltʼasipjjta” sasa. Costa Rica markankir mä kullakajj akham sarakiwa: “Sum parltʼasiñajja, janiw panijaruk mayachtʼapkituti, jan ukasti Jehová Diosar jukʼamp jakʼachasiñatakiw yanaptʼapjjetu, ukat jan wali lurañanakatsa jarkʼaqapjjarakituwa. Ukhamarus jukʼamp sum apasiñataki ukat jukʼamp munasipjjañajatakiw yanaptʼapjjetu” sasa.

2. ¿Kunatsa yaqhep chacha warmitakejj sum parltʼasiñajj chʼamäspa?

² ¿Jumajj warmimampi jan ukajj chachamampejj sumti parltʼasipjjta jan ukajj sum parltʼasiñajj chʼamakicha? Cheqas parltʼaskasin jan waltʼayasiñajj utjakipunispawa, kunattejj panpachaniw pantjasirïpjjta, ukat mayj mayja amuyunïpjjaraktawa (Rom. 3:23). Ukat inas mayj mayja saräwinïpjjsta jan ukajj mayja uywatäpjjsta, ukatwa jan mä kikpaki parltʼasipkasmati. Ukatwa John M. Gottman ukat Nan Silver yatjjatirinakajj akham sapjjpacha: “Chacha warmjam jakañatakejj jan ajjsarirïña, mä amtanïña ukat aguantañaw wakisi” sasa.

3. ¿Kunas walja chacha warminakarojj sum apasipjjañapatak yanaptʼawayi?

³ Cheqpachansa, chacha warmjam sum jakasiñatakejj wal chʼamachasiñaw wakisi, ukhamatwa wali kusisit jakasiñajj utjaraki. Ukham maynit mayni munasir chacha warminakajj kusisitaw jakasipjjaspa (Ecl. 9:9). Isaacampit Rebecampit amuytʼam. Walja maranakas jaqechatäjjapjjchïnjja munasisipkakïnwa (Gén. 24:67). Jichhürunakanjja walja  chacha warminakajj ukhamarakiw jakasipjje. ¿Kunatsa ukham kusisit jakasipjje? Kunattejj amuyunakapsa ukat chuymapan utjki ukanaksa munasiñampi qhan arsuñwa yateqawayapjje. Ukatakejj suma amuytʼasirïña, munasirïña, wali respetasirïña ukat altʼat chuymanïñwa uñachtʼäwayapjje. Taqe ukanak uñachtʼayañajj kunjamsa chacha warminakarojj sum parltʼasiñatak yanaptʼaspa ukwa jichhajj yatjjataskañäni.

4, 5. ¿Kunjamsa suma amuytʼasirïñajj chacha warmjam sum apasipjjañapatak yanaptʼi? Uk experiencianakamp qhanañchtʼam.

⁴ “Khititejj Diosan arunakapar [suma amuyumpi] istʼi ukajja, kusisiñwa jikjjatani” sasaw Proverbios 16:20 qellqatajj qhanañchi. Uka arunakajja, chacha warmjam jakasiñana ukat familianwa phoqhasi (Proverbios 24:3 liytʼasiñapawa). Chacha warmjam kusisit sum jakasiñatakejja, suma amuytʼasiñsa ukat yatiñanïñsa Biblianwa jikjjatsna. Génesis 2:18 qellqatanjja, warmirojj chachan yanapiripäñapatakiw Diosajj luräna janiw chachjamäñapatak lurkänti sasaw qhanañchi. Ukajj warmin parlatapanwa qhan amuyasi. Cheqansa janiw taqe warminakajj mä kikpäpkiti, ukampis jilapartejj kunjamsa chuymapan jikjjatasipjje uka toqetwa parlañ munapjje, jan ukajj jaqenakata ukat kunjamsa jupanakajj apasipjje ukanakata. Jupanakajja, munasiñampi ukat chuymatpach qhan parltʼasiñjja wali askit uñjapjje, ukhamatwa wali munatäpjjatap amuyasipjje. Maysa toqetjja, chachanakajj kunjamsa chuymapan jikjjatasipjje uk janiw parlañ munapki, jan ukasti kuns lurapjje, kuna jan walinakas utji ukat kunjamsa askichasispa uka toqenakatakwa parlañ munapjje. Ukat respetompi uñjatäñwa munapjjaraki.

⁵ Gran Bretaña markankir mä kullakajj akham siwa: “Nayar istʼañat sipansa chachajajj jankʼakiw jan walinak askichañ muni. Ukajj nayatakejj janiw walïkiti nayajj sum istʼitaspa ukat kunjamtï jikjjataskta uk amuyitaspa ukakwa munta” sasa. Mä chachajj akham sarakïnwa: “Qalltanjja, kuna jan walinakantï jupajj jikjjatasirïkän ukhajj jankʼakiw askichañ munirïta. Ukampis nayamp istʼatäñaki munatapwa amuyasta” sasa (Pro. 18:13; Sant. 1:19). Mä amuytʼasir chachajja, kunjamsa warmipajj chuymapan jikjjatasi uk sum amuyi ukat munasiñamp uñjañatakiw chʼamachasi. Ukat jupan amuyunakapsa ukat kunjamsa jikjjatasi uk wali askirjam uñjatapwa uñachtʼayi (1 Ped. 3:7). Maysa toqetjja, chachapajj kuntï amuyki uk amuyañatakiw warmejj chʼamachasi. Ukat kunjamtï Bibliajj siski ukarjam panpachan phoqhapjje ukhajja, wali sumaw jakasipjje. Panipajj wali amuyumpiw mä amtar puripjjaspa ukat ukarjamaw lurapjjarakispa.

6, 7. 1) Eclesiastés 3:7 qellqatajja, ¿kunjamsa chacha warminakarojj sum amuytʼasirïpjjañapatak yanaptʼaspa? 2) ¿Kunjamsa warmejj amuytʼasirïtap uñachtʼayaspa ukat kun lurañatakis chachajj chʼamachasiñaparaki?

⁶ Suma amuytʼasir chacha warmejja, “amuktʼañ horasa, parlañ horasa” utjatap yatiwa (Ecl. 3:1, 7). Tunka maranak jaqechat mä kullakajj akham siwa: “Awisajj janiw jankʼak taq parlañajj wakiskiti ukwa amuyasta. Kunapachatï chachajajj walja lurañanakanïki ukhajja, kuntï sañ munkta uk qhepatwa sista. Ukhamatwa sumat parltʼasiñajj utji” sasa. Amuytʼasir warmejj munasiñampiw arstʼaraki, suma ajlltʼat aru ‘horasaparu arsutajja’ munkañawa ukat wali askirakiwa (Proverbios 25:11 liytʼasiñapawa).

⁷ Mä cristiano chachajja, kunatï phoqhañapäki ukjja, janiw warmipar istʼasakejj phoqhañapäkiti, jan ukasti kunatï chuymapan utjki uk qhanwa arsuñaparaki. 27 maranak jaqechat mä irpir chuyman jilatajj akham siwa: “Kunjamas chuymajan jikjjatasta uk warmijar sañajj chʼamakiwa” sasa. Ukat 24 maranak jaqechat mä jilatajj akham sarakiwa: “Nayajj janiw jan walinak toqet parlañ munirïkti, jan parlkä ukhajj armasjjäwa sasaw amuyirïta. Ukampis ukanakat arsuñajj janiw llaythakiristsa ukham tukuykituti ukwa amuyasta. Kunapachatejj nayatakejj parlañajj chʼamäki ukhajja, Jehová Diosaruw horasaparu ukat suma arunakampi arsuñataki mayista. Ukatjja, sum samstʼasaw parlañ qalltta”  sasa. Kuna horasas jan waltʼäwinak toqet parlapjjasma uk sum amuytʼapjjañamawa, inas sapürutak Bibliat apstʼat qellqat liyipkta, jan ukajj Biblia liyipkta ukhanak parlapjjchisma.

8. ¿Kunanakas chacha warmirojj sum parltʼasipjjañapatakejj yanaptʼarakispa?

⁸ Chacha warmitakejj sum parltʼasiñajj chʼamakïspawa. Ukampis Diosaruw yanap mayisipjjañapa ukat sum parltʼasiñatakiw amtapjjañapa. Ukhamarusa jupanakatï Jehová Diosar munasipjjani, qollan ajayup mayipjjani ukat chacha warmjam jakasiñ qollanätap amuyapjjani ukhajja, sum parltʼasiñajj janiw chʼamäkaniti. 26 maranak jaqechat mä kullakajj akham siwa: “Kuntï Jehová Diosajj jaqechasiñ toqet amuyki ukjja chachajampejj wali askit uñjapjjta, ukat jaljtañ toqet janipuniw parlapjjerïkti. Ukatwa kuna jan waltʼäw utjipansa sum parltʼasis askichañatak chʼamachasipjjta” sasa. Jehová Diosajj ukham lurir chacha warmir uñjasajj kusisiwa ukat bendicirakiwa (Sal. 127:1).

9, 10. ¿Kunsa chacha warminakajj jukʼamp munasiskakiñatakejj lurapjjaspa?

⁹ Chacha warminjja munasiñaw utjañapa, uka “munasiñasti mayaruw tukuyi” (Col. 3:14). Chacha warmejj respetasipjje ukat sumankkasasa jan walinkkasas chikäsipkaki ukhajja, cheqpach munasiñapajj jukʼampiw jiljjatti. Ukat wali sumwa apasipjje, janipuniw jaljtañ munapkiti. Ukham mayachtʼatäñjja, janiw kunjamtï televisionan uñjaski ukhamanak lurasakejj jikjjatapkiti, jan ukasti, qhomanttʼasa, suma arunakampi parltʼasa, munasiñamp lartʼasis uñkattʼasa, jan ukajj “¿kunjamakis jichhürojj irnaqtʼta?” sasin taqe chuyma jisktʼasaw uk jikjjatapjje. Ukham mä jukʼa lurasakiw walja askinak jikjjatasispa. Wali kusisita ukat 19 maranak jaqechat mä chacha warmejja, urunjj telefonotwa parlasipjje jan ukajj mensajenakwa qellqasipjje. Chachajj akham siwa: “Kunjamäsipktsa uk yatiñatakiw ukham lurapjjta” sasa.

¹⁰ Munasiñarakiw purapat jukʼamp sum uñtʼasisipkakiñapatakejj yanaptʼi (Fili. 2:4). Ukat pantjasirïpkchisa, ukham sum uñtʼasisajj jukʼampiw munasipjje. Kusisit mä chacha warmejj janiw ukharuk qheparkiti, jan ukasti marat maratjamaw jukʼamp munasipjje. Jumatï jaqechatästajja, akham jisktʼasiñamawa: “¿Chachajarojj jan ukajj warmijarojj sumti uñtʼtjja? ¿Kuntï amuyki ukat kunjamsa chuymapan jikjjatasi uk sumti amuytjja? ¿Uñtʼasipkayät ukhajj kunjam chuymanïtapas nayatakejj wali askïna uka toqenakat qhawqsa lupʼtjja?” sasa.

11. ¿Kunatsa jaqechatanakajj respetasipjjañapa? Uk mä uñachtʼäwimp qhanañchtʼam.

¹¹ Kusisit chacha warminakasa pantjasirïpjjewa, ukatwa jan mä amtaruk puripkaspati, wal munasisipkchi ukasa. Ukaw Abrahamamp Sarampirojj pasäna (Gén. 21:9-11). Janis pachpa amtanïpkchïnjja, chacha warmjamajj sum apasipjjäna. ¿Kunatsa? Kunattejj respetompi ukat sumwa uñjasipjjäna. Amtañäni, Abrahamajj ‘mirä amp suma’ sasaw Sararojj säna (Gén. 12:11, 13). Ukat Sarajj istʼasipunirïnwa, “tatay” sasaw sirïna (1 Ped. 3:6). Chacha warminakan jan respetasipjjatapajj qhanaw parlatapana jan ukajj arsutapan amuyasi (Pro. 12:18). Jupanakatï jan respetasipkanejja, jan waltʼañaruw puripjjani (Santiago 3:7-10, 17, 18 liytʼasiñapawa).

12. ¿Jichhak jaqechatäsipki ukanakajj kunatsa respetompi parltʼasipjjañapatakejj jukʼamp chʼamachasipjjañapa?

¹² Jichhak jaqechatäpki ukanakajj munasiñampi ukat respetompi parltʼasipjjañapatakejj jukʼampiw chʼamachasipjjañapa. Kunjamatsa jan ajjsartʼasa ukat qhan parltʼasipjjaspa ukwa amuyapjjañapa. Mä chachajj akham sasaw qhanañchi: “Jaqechasipki uka qallta maranakanjja, kusisitäkasasa, awisajj aynachtʼataw jikjjatasipjje. Ukat panipajj kunjamsa chuymapan jikjjatasipjje, kunjam sarnaqäwinïpjjesa ukat kunanaksa munapjje ukar yatinoqtañkamajj awisajj aynachtʼañajj utjakipuniwa. Ukatwa sum amuytʼasirïña, altʼat chuymanïña, kusisit chuymanïña, paciencianïña ukat Jehová Diosar confiyañajj wali askejja” sasa. ¡Ukajj ukhamapunïskiwa!

13. ¿Kunatsa chacha warmjam sum apasiñatakejj altʼat chuymanïñajj wali wakiskirejja?

¹³ Chacha warmitï ‘llampʼu chuymanïchi’ ukhajja, munasiñampi ukat suma chuymampiw parltʼasipjjaspa (1 Ped. 3:8). “Altʼat chuymanïñajja jan walinak jankʼak askichañatakiwa, kunattejj perdón mayisiñatakiw yanaptʼi” sasaw 11 maranak jaqechat mä jilatajj säna. Ukat 20 maranak jaqechat mä irpir chuyman jilatajj akham sarakiwa: “Awisajja, ‘munasmawa’ sañat sipansa ‘pampachtʼita’ sañaw jukʼamp wakiskirejja” sasa. Ukat akham saskakiwa: “Altʼat chuymanïñatakejj oración mayisiñaw wali askejja. Panpachan Jehová Diosar oración mayisipjjta ukhajja, pantjasirïpjjataja ukat Jehová Diosajj wali khuyaptʼayasirïtapwa amtayapjjetu ukat ukaw kunjamtï lurapjjañajäki uk sum amuyañatak yanaptʼitu” sasa.

14. ¿Kunjamansa jachʼa jachʼa tukuñajj chacha warminakarojj uñjasiyaspa?

 ¹⁴ Ukampis jachʼa jachʼa tukuñajj janiw kunäkipansa sum apasiñatakejj yanaptʼkiti. Antisakiw sum parltʼasiñ jarktʼistu ukat “pampachita” sañatakis chʼams apaqestuwa. Altʼat chuymanïñata ukat “pampachita, pantjastwa” sañat sipansa, jachʼa jachʼa tukurejj kunaymanikwa parljje. Jan ajjsariri ukat pantjasitanakap amuyasiñat sipansa, warmipana jan ukajj chachapan pantjasitanakapakwa thaqhe. Ukat chuyma ustʼayat uñjasi ukhajja, janiw sumankthapiñatakejj chʼamachaskiti. Ukat qhoru arunakampiw parli jan ukajj janiw parlañs munjjeti (Ecl. 7:9). Cheqansa jachʼa jachʼa tukuñajj chacha warmirojj jan walinwa uñjasiyaspa. Ak amtapuniñäni: “Diosajj jachʼa jachʼa tukuri jaqenakarojj janiw yanapkiti, ukampis munasiñapanjja llampʼu chuymaninakaruw yanapi” (Sant. 4:6).

15. Jaqechat chacha warmirojja, kunjamsa Efesios 4:26, 27 qellqatajj jan waltʼayasiñanak askichañatak yanaptʼaspa uk qhanañchtʼam.

¹⁵ Janiw jachʼa jachʼa tukkäti sasajja, jan amuytʼasir jaqjamaw amuyasksna. Jachʼa jachʼa tukuskatas amuyastan ukhajja, jankʼakiw uk chhaqtayañatak chʼamachasiñasa. Pablojj akham sasaw cristianonakar qellqäna: “Colerasiñanakamajj jan jornalpachäpati. Janirak Supayarus jakʼachayasipjjamti” sasa (Efe. 4:26, 27). Mä chacha warmitï Biblian ewjjanakapar jan istʼkaspa ukhajja, ¿kunas pasaspa? Mä kullakajj akham sasaw amtasi: “Awisajja chachajampejj janiw Efesios 4:26, 27 qellqatan ewjjanakapar istʼapkti. ¡Ukat arumanakas janiw sum ikirïkti!” sasa. Sumankthapiñ amtampiw kunatsa jan waltʼayasipjje uk jankʼakiw qhanstayapjjañapa. Cheqansa, janïr mä jan waltʼäwit parlkasajj inas panpachanejj coler apjtayasiñatak mä jukʼa suytʼapjjañapajj wakischispa. Ukat suma chuymanïñataki ukat altʼat chuymanïñatakejj Jehová Diosar mayisiñajj wakisirakiwa. Ukaw chachan jan ukajj warmin chuymap ustʼayatap lupʼiskañat sipansa, jan waltʼäw askichañatak yanaptʼapjjätam. Janitï ukham lurapkätajja, jukʼampikiw jan waltʼayasipjjasma (Colosenses 3:12; Efesios 4:32 liytʼasiñapawa).

16. ¿Altʼat chuymanïñajj kunjamsa chacha warmirojj suma luratanakap askit uñjañatak yanaptʼaspa?

¹⁶ Altʼat chuymanïñajja, maynin aski luräwinakap uñjañatakiw yanaptʼistu. Sañäni, mä warmejj inas familiapar yanaptʼañatakejj kuns sum lurtʼañ yatchi. Chachapatï altʼat chuymanïchejja, janiw aynachtʼaykaspas ukham amuyaskaniti, jan ukasti kuntï yatki ukanakamp yanaptʼaskakiñapatakiw chʼamañchtʼani. Ukhamatwa munasitapa ukat wali askirjam uñjatap uñachtʼayani (Pro. 31:10, 28; Efe. 5:28, 29). Ukat maysa toqetjja, warmitï altʼat chuymanïchejja, janiw chachapat sipan jukʼamps yatkaspa ukham tukkaniti ni jiskʼachkarakinisa. Cheqansa jupanakajj ‘mayakïpjjewa’, ukhamajj kunatï maynir jan waltʼayki ukajj panpachaniruw jan waltʼayi (Mat. 19:4, 5).

17. ¿Jehová Diosar jachʼañchañataki ukat chacha warmjam kusisit jakasiñatakejj kunas yanaptʼaspa?

¹⁷ Jumanakajj chacha warmjamajja, kunjamtï Abrahamampi Sarampi jan ukajj Isaacampi Rebecamp Jehová Diosar jachʼañchasa ukat jan jaljtas kusisita jakasipkänjja, ukham jakasiñwa munapjjarakpachätajja. Ukham jakasiñatakejja, kunjamtï Jehová Diosajj chacha warmjam jakasiñar uñjki ukhamwa uñjapjjañamaraki. Suma amuytʼasiñsa ukat yatiñanïñsa Bibliatwa thaqhapjjañama. Panpachaniw suma chuymamp uñjasipjjañama ukat munasiñanakamas jiljjattañaparakiwa (Cant. de Cant. 8:6). Ukat altʼat chuymanïñatak chʼamachasipjjam. Chachamarusa jan ukajj warmimarusa respetompi uñjam. Taqe ukanaktï lurapjjätajja, jukʼamp kusisitaw jakasipjjäta ukat Jehová Diosarus kusisiyapjjarakïtawa (Pro. 27:11). Ukat inas 27 maranak jaqechat jilatjam akham sapjjarakchïta: “Jan warmijampïkirista ukhajja, kunjamakis jakasirista uk janiw amuytʼirjamäkti. Sapürutjamaw chacha warmjamajj jukʼamp sum apasipjjta. Ukatakejj Jehová Diosar munasiña ukat sum parltʼasiñaw yanaptʼapjjetu” sasa.