Yatjjatatarjamajja, Diosan alajjpachankir wawanakapänwa. ¿Kunjamatsa uk yattanjja?

Génesis 6:2 qellqatajj akham siwa: “Diosan wawanakapasti uka warminakan sumapjjatapwa uñjapjjäna. Ukatsti uka warminakwa katuntasipjjäna, ukanakampiw mayachasipjjarakïna”.

Hebreo Arut Qollan Qellqatanakan ‘cheqpach Diosan wawanakapa’ ukat ‘Diosan wawanakapa’ sasin jaqokipaski uka arunakajja, Bibliajj kuna arutti qellqaskäna ukanjja, Génesis 6:2, 4; Job 1:6; 2:1; 38:7 ukat Salmo 89:6 qellqatanakanwa uñsti. Aymara Biblianjja, Génesis 6:2, 4 qellqatanakwa uka pachpa arunakajj uñsti. ¿Uka qellqatanakajj kamsapjjes ‘Diosan wawanakapatjja’?

Job 1:6 qellqatan ‘alajjpachankir Diosan servirinakapa’ siski ukajja, alajjpachan jakirinakajj Dios nayraqatan tantachasipkäna ukanakatwa parlaski. Jupanakamp chikajj Supayaw tantachasïna. Jupaw oraqe maysat maysa muytaskatayna (Job 1:7; 2:1, 2). Ukat Job 38:4-7 qellqatanjja, Oraqer ‘jachʼa qalajj uskuskäna’ ukhajj ‘alajjpachankir Diosan servirinakapajj’ ‘wal kusisipjjäna’ sasaw qhanañcharaki. Jupanakajj angelanakäpjjpachänwa, kunattejj janïraw jaqejj utjkänti. Ukat ‘Diosan wawanakapa’ sasin Salmo 89:6 (NM) qellqatan qhanañchki ukajja, alajjpachan Diosamp chik jakapki uka angelanakawa, janiw jiwasjam jaqëpkiti.

Ukhamajja, ¿Génesis 6:2, 4 qellqatan ‘Diosan wawanakapa’ siski ukanakajj khitinakäpjjesa? Bibliarjamajja, Diosamp chik jakapkäna uka angelanakajj aka Oraqer jutapkäna ukanakawa.

Kamisarak angelanakast warminakamp ikintasinisti sasaw yaqhepajj sapjje. Mateo 22:30 qellqatanjja, alajjpachan janiw jaqechasiñajj utjki sasaw Jesusajj säna. Ukampis awisajja, angelanakajj jaqeruw tukupjjerïna ukat jaqenakampiw manqʼapjjerïna ukat umapjjerïna (Gén. 18:1-8; 19:1-3). Ukhamasti, angelanakajj jaqer tukusajj warminakamp ikintasipjjaspänwa.

Ukajj cheqapunïskatapjja Bibliaw qhanañchi. Judas 6, 7 qellqatarjamajja, Sodoma markan jakir jaqenakan juchanakapajj “kawkïr angelanakatejj jan sum imapkäna lurañanakapjja, jan ukasti utjäwinakapjja jaytanukupjjän” ukanakan “kunayman jan amuytʼkañ vicionakampi” sarnaqapkäna ukanakampi sasiwa. Uka angelanakasa ukat Sodomankirinakasa, “wachoqa jucha lurañar[uw] katuyasipjjäna. Ukatsti kunayman jan amuytʼkañ vicionakampi apayasi[pjjäna]”. Ukat niya uka toqet parlkasajja, 1 Pedro 3:19, 20 qellqatanjj jan istʼasir angelanakarojj “kunapachatï Noé chachajj arca luraskän” uka tiemporuw uñtayi (2 Ped. 2:4, 5). Ukhamajja, jan istʼasir angelanakajj kuntï Noen tiempopan lurapkäna ukajja, Sodoma ukat Gomorra markanakan juchanakaparuw uñtayasispa.

Taqe ukanak amuytʼasajja, Génesis 6:2, 4 qellqatan ‘Diosan wawanakapata’ parlki ukajja, kawkïr angelanakatï jaqer tukusin warminakamp wachoq jucha lurapkäna ukanakawa.

Uka ajayunakatjja akham sasaw apóstol Pedrojj säna: “Jan istʼasiriw tukupjjäna kunapachatï Noé chachajj arca luraskän ukkhajj janiw jaysapkataynati, Diosajj jupanakar suytʼaskchïna ukasa” sasa (1 Ped. 3:20). Ukhamajja, Diosar jan istʼasisa Supayamp apayasipkäna uka angelanakatwa parlaskäna. Judas chachajj akham sarakïnwa: “Kawkïr angelanakatejj jan sum imapkäna lurañanakapjja, jan ukasti utjäwinakapjja jaytanukupjjän ukanakarojj Diosajj preso katjjäsiski jachʼa taripäwi urutaki, chʼamakanakan jan tukuskir wiñay cadenanakamp ñachʼanta[ñataki]” sasa (Jud. 6).

Noé chachan urunakapanjja, ¿uka angelanakajj kunsa Diosar jan istʼasisajj lurapjjäna? Uma Juicio janïr purinkipanjja, yaqhep angelanakajj jaqeruw tukupjjäna, ukampis jupanakarojj Diosajj janiw uka amtampi lurkänti (Gén. 6:2, 4). Ukampis janiw ukakïkänti, jupanakajj warminakampiw wachoq jucha lurapjjäna. Jehová Diosajj janiw angelanakarojj warminakamp ikintasipjjañapatak lurkänti (Gén. 5:2). Uka jan istʼasiri ukat jan wali angelanakajja, Diosajj tukjañ amtki uküruw tukjatäpjjani. Ukañkamajj kunjamtï Judas chachajj siskejja, ‘chʼamakanwa’ jikjjatasipjje, mä arunjja, carcelan jistʼantatäpkaspas ukhamawa.

¿Kunapachasa ukat kunjamsa Jesusajj “katuntatäpkis uka ajayunakar Diosan arunakap parl[äna]”? Jiwatat ‘jaktjjäna’ uka qhepatänwa sasaw Pedrojj qhanañchi (1 Ped. 3:18, 19). Uka arunakajja, Jesusajj angelanakar yatiykäna uka qhepat Pedrojj nayrïr cartap qellqaskatap amuytʼayistu. Ukhamasti Jesusajj jiwatat jaktjjäna uka qhepatwa jan wali angelanakarojj kuna taripäwtï katoqapkani uk qhanañchäna. Ukhamajj janiw mä suytʼäwi churkänti, jan ukasti taripatäpjjañapwa yatiyäna (Jon. 1:1, 2). Jesusaw Diosar confiyatapa, Jupat jan jitheqtatapa uñachtʼayäna ukat jiwatat jaktäna. Ukhamatwa Supayajj jupjjar jan munañanïtap uñachtʼayäna, ukatwa Jesús sapakejj ajayunakaru, mä arunjja jan wali angelanakar juchañchañatakejj wakichtʼatäna (Juan 14:30; 16:8-11).

Jutïrinjja, Jesusaw Supayarusa ukat jan wali angelanakarus ñachʼantani ukat manqhapacha chʼamakar jaqontani (Luc. 8:30, 31; Apo. 20:1-3). Uka uru puriniñapkamasti jan istʼasiri jan wali angelanakajj ajay toqen chʼamakansa jikjjatasipjjaspa ukhamawa. Ukat jupanakar tʼunjäwi urojj purinipuniniwa (Apo. 20:7-10).