1. ¿Kunatsa Diosan urup sinti jayas suyksna ukham amuysna?

KUNAPACHATÏ 1914 marat Cristojj Diosan apnaqäwipan apnaqañ qalltkäna ukhatwa Supayan apnaqat akapachajj qhepa urunakar mantawayi. Uka maran alajjpachan mä chʼajjwäwi utjatapatjja, Jesusajj Supayaru ukat sajjranakapampiruw aka Oraqer jaqoqanïna (Apocalipsis 12:7-9 liytʼasiñapawa). Supayan ‘tiempopajj jukʼakiwa’ sasaw Bibliajj qhanañchi (Apo. 12:12). Ukampis uka tiempojj niya 100 maranakäjjewa, ukat Diosan yaqhep servirinakapajj qhepa urunak wali jayas suyapkaspa ukham amuyapjjaspa. ¿Diosan urup suykasajj sinti jayas suyksna ukhamti amuytanjja?

2. ¿Kunsa aka yatichäwin yatjjataskañäni?

² Jan paciencianïñajj janiw walïkiti, kunattejj jan amuytʼasisaw kuns lursna. ¿Kunas pacienciampi suytʼañatakejj yanaptʼistani? Cheqansa, aka yatichäwinwa aka jisktʼanakar qhanañchaskañäni: 1) ¿Paciencianïñ toqet kunsa Miqueas profetat yateqassna? 2) ¿Akapachan tukusiñap kunanakas uñachtʼayani? 3) ¿Kunjamsa Jehová Diosarojj paciencianïtapat yuspärsna?

3. Miqueas profetan tiempopanjja, ¿kunjamansa israelitanakajj uñjasipjjäna?

³ (Miqueas 7:2-6 liytʼasiñapawa.) Acaz reyejj apnaqkäna ukhajj kunjamsa Diosar yupaychañan israelitanakajj jukʼat jukʼat aynachtʼasipkäna ukwa Miqueasajj uñjäna. Diosar jan istʼasir israelitanakajj “chʼaphir uñtat[apjjänwa]” sasaw uka profetajj satayna. Kunjamtï chʼapi alinakajj khitinakatï llamtʼapki ukar chʼapirkejja, ukhamarakiw uka israelitanakajj khitinakatï jupanakar jakʼachasipkäna ukanakar jan waltʼayapkänti. Ukham jan walinakajj jiljjattaskakïnwa, ukat familian sum apasiñas janiw utjjänti. Uka jan walinak jan askichirjam amuyasajj Jehová Diosaruw Miqueasajj taqe chuyma mayisïna ukat jan qarjtasaw uka mayisitap phoqhasiñap suyäna. Ukat wakiskani ukhajj  Diosajj amtap phoqhapuniniwa sasaw taqe chuyma confiyäna.

4. ¿Kuna jan walinakansa uñjastanjja?

⁴ Miqueas profetjamarakiw jiwasajj jupanakatakik kuns munir jaqenak taypin jaktanjja. Jupanakat waljaniw ‘jan yäqasirinakapjje’, aljantasirïpjje ukat jan ‘munasiñanïpjje’ (2 Tim. 3:2, 3). Vecinonakasaru ukat trabajosankiri jan ukajj yateqer masinakasar jupanakatakik kuns munir uñjañajj taqeniruw llakisiyistu. Ukampis Jehová Diosan servirinakapat yaqhepajj jukʼamp llakinakanwa uñjasipjje. Arkirinakajajj familiaranakapampi jan waltʼayataw uñjasipjjani sasin Jesusajj siskäna ukhajja, kuntï Miqueas 7:6 qellqatan siskejja, niya uka pachpa arunakwa arsüna. Jupajj akham sänwa: “Jaqeru awkipampi pitthapiriw jutta, phucharusti taykapampi, yojjchʼarusti taykchʼimpi; ukhamata maynit maynikama familpachan uñisisiñajj utjañapataki” sasa (Mat. 10:35, 36). ¡Diosar jan yupaychiri familiaranakampi phiskasita ukat jan walit uñjatäñajj wali chʼamawa! Ukhamantï uñjastanjja, janipun kuna jan waltï familiaranakasajj lurayañ munapkistu ukampejj apayasiñäniti. Jan ukasti Diosat janipun jitheqtañäniti ukat jan walin uñjasiñäni ukhajj Jehová Diosaw yanaptʼistani sasin pacienciampi suytʼañäni. Ukat jiwasatï yanap Jupar mayiñänejja, chʼama ukat yatiñwa aguantañatak churistani.

5, 6. ¿Kunsa Jehová Diosajj Miqueasar uñjayäna, ukampis kuna profecian phoqhasitapsa jan uñjawaykäna?

⁵ Miqueasan pacienciampi suytʼatapajj janiw inamayäkänti. Jupajj Acaz reyin jiwatapa ukat jan wali apnaqäwipan tukusitapwa uñjäna. Ukat kunjamsa jupa lantejj Ezequías yoqapajj reyit uttʼayasïna ukat cheqa yupaychäwi wasitat uttʼaykäna uks uñjarakïnwa. Ukhamarusa, Jehová Diosajj kuntï Miqueas toqejj Samaria marka contra arskäna ukjja, kunapachatï Israelan tunka tribupar asirionakajj tʼunjkäna ukhaw uk phoqhasir uñjarakïna (Miq. 1:6).

⁶ Ukampisa, Jehová Diosan amuytʼayatajj kunanaktï arskäna ukjja, janiw taqpachpun phoqhasir uñjawaykänti. Amuytʼañataki, jupajj akham sasaw qellqäna: “Qhepa urunakanjja kawkhankkitï Tatitun templopajj uka qollojja suma saytʼayatäniwa. Uka qollusti wali altöniwa, taqe qollunakat sipansa wali altorakïniwa. Taqe markanakaw ukarojj jutapjjarakini, walja markanakarakiw purintanipjjani, akham sasa: ‘Jutapjjam, Tatitun qolluparu makhatapjjañäni’” (Miq. 4:1, 2). Niyakejjay uka profetajj walja maranak nayra jiwjjchïnjja, janiw uka arunak phoqhasir uñjawaykäntï. Ukampisa, mayninakajj kunsay lurapkchïnjja, jupajj Diosat jan jitheqtas jiwañkam serviñwa amtäna. Ukatwa akham säna: “Yaqha markanakajj pachpa diosanakaparuw jaysapjjejja, ukampis jiwasanakajj Tatitu Diosasarupuniw jaysañäni” (Miq. 4:5). Ukham jan wali tiemponakanjja, pacienciampiw Miqueasajj suytʼpachäna, kunattejj taqe kuntï Jehová Diosajj jutïritak arskäna ukajj phoqhasipuniniwa sasaw confiyäna. Cheqas Jehová Diosat jan jitheqtas serviri Miqueas profetajj Jupar wal confiyäna.

7, 8. 1) ¿Kunatsa Jehová Diosarojj confiyañasapuni? 2) Uka urojj sinti jayankkaspas ukham jan amuyañatakejja, ¿kunsa lurañasäspa?

⁷ ¿Jiwasajj ukhamarakti Jehová Diosar confiytanjja? Kunatsa Jupar confiyañasa ukatakejj waljanakaw utji. Kunattejj Miqueasan profeciap phoqhasirwa uñjawaytanjja. Aka “qhepa urunakanjja”, taqe markanakata, kunayman jañchini, ukhamarak taqe kasta parlani millón millón jaqenakaw ‘Tatitun qolluparu makatawayapjje’. Jupanakat waljaniw jupanak pura uñisisir markanakat mistunipjjäna. Ukhamäpkchïnsa, “espadanakapjja aradoruw tukuy[awayapjje]” ukat “janirakiw guerran nuwasiñatakis yatichäwinakjja kato[qawayapki]ti” (Miq. 4:3). ¡Jehová Diosan sumankir markapankañajj kunja askisa!

⁸ Jehová Diosan aka jan wali pacharu tukjañap munañajj janiw jan walïkiti. Ukampisa,  pacienciampi suytʼaskakiñatakejj kunjamtï Jupajj uñjki ukham uñjañasaw wakisi. Jupajj Jesucristo, “kawkïr jaqtejj jupajj ajlliski uka toqe[w]” jaqenakaru juzgañataki, jan ukajj taripañataki mä uru amtawayi (Hech. 17:31). Ukampis janïr uk paskipanjja taqe jaqenakaruw “kunatejj cheqäki uk uñtʼapjjañapa[ta]ki” tiempo churaski, ukhamat ukarjam sarnaqas qhespiyasipjjañapataki. Kunattejj walja jaqenakan qhespiyasiñapaw wakisi (1 Timoteo 2:3, 4 liytʼasiñapawa). Jaqe masisarutï Diosat kunatï cheqäki uk taqe chuyma yatichañäni ukhajja, suyktan uka urojj jankʼakiw purinini. Uka urojj jankʼakwa jan ukajj mä akatjamatwa purinini. Ukham pasani ukhajja, ¡Diosan Reinopat jan tiemponi yatiyatasat wal kusisiñäni!

9-11. ¿Kuntï 1 Tesalonicenses 5:3 qellqatan siski uka profeciajj phoqhasjjeti?

⁹ (1 Tesalonicenses 5:1-3 liytʼasiñapawa.) Akat mä jukʼa tiempot markanakajj akham sapjjaniwa: “Taqe kunas sumakïskiwa, janiw kunas paskaniti” sasa. Kuntï uka arunakajj siski ukampi jan katjayasiñatakejja, Pablon aka ewjjtʼaparjamaw sarnaqañasa: ‘Jan ikjañäniti [...] pʼarjjtatäñasaw taqe amuyumpi’ (1 Tes. 5:6). Ajay toqet jan ikjañasatakejj kunanakatï “taqe kunas sumakïskiwa, janiw kunas paskaniti” sañatakejj apkani uk jichhajj yatjjatañäni.

¹⁰ Pä jachʼa chʼajjwäwinakajj pasawayki ukanakanjja, markanakajj sumankañ utjañapwa munapjjäna. Nayrïr Jachʼa Chʼajjwäwi qhepatjja, Liga de Naciones sat organizacionwa sumankañ utjayañapatak uttʼayapjjäna. Payïr Jachʼa Chʼajjwäwi qhepatjja, Naciones Unidas sat organizacionaruw walja jaqenakajj confiyapjjarakïna. Marka apnaqerinakasa kʼari yupaychäwi pʼeqtʼirinakasa, uka organizacionanakaw jaqenakatakejj sumankañ apanipjjani sasaw confiyapjjäna. Amuytʼañataki, Año Internacional de Paz satäkis uk amtapjjañapatakiw Naciones Unidas ukankirinakajj 1986 maran uttʼayapjjäna. Uka marajj marka apnaqerinakasa ukat kʼari yupaychäwi pʼeqtʼirinakasa, Católica Iglesian pʼeqtʼiripampiw Italia markan Asís sat cheqan tantachasis sumankañ utjañapatak Diosat mayipjjäna.

 ¹¹ Ukampis sumankañ mayipkäna ukansa ni yaqha ukhamanakansa, kuntï 1 Tesalonicenses 5:3 qellqatan siski uka profeciajj janiw phoqhasiwaykiti. ¿Kunatsa ukham sistanjja? Kunattejj janïraw “akatjamata jupanakjjaru tʼunjäwejj” phoqhaskiti.

12. ¿Kunsa “taqe kunas sumakïskiwa, janiw kunas paskaniti” siski uka profeciat yattanjja?

¹² ¿Khitis “taqe kunas sumakïskiwa, janiw kunas paskaniti” sasin sani? Cristianöptwa sirinakan pʼeqtʼirinakapasa ukat yaqha kʼari yupaychäwinakasa, ¿kunsa ukham arsuskani ukhajj lurapjjani? ¿Markanak apnaqerinakajj kunsa ukhajj lurapjjarakini? Bibliajj uka toqenakat janiw kuns qhanañchkiti. Kunjamjjay ukajj phoqhaschini jan ukajj amuyatasarjam cheqjjamäskchini ukasa, janiw cheqpach sumankañäkaniti. Ukat aka jan wali pachajj Supayan apnaqatakïskaniwa. Akapachajj sinti jan walinwa jikjjatasi ukat janiw mayjtʼkaniti. Ukatwa Supayan apnaqat aka pachan jan wali luräwinakapamp apayasiñasa ukat akapachar mitisiñas jan walïkaspati.

13. ¿Kunatsa angelanakajj tukjir thay jarkʼasipki?

¹³ (Apocalipsis 7:1-4 liytʼasiñapawa.) 1 Tesalonicenses 5:3 qellqatan siski uka profecía phoqhasiñap suyañkamajja, angelanakaw jachʼa tʼaqhesïwin tukjir thayanak jarkʼasipki. ¿Kunsa suyasipki? Apóstol Juanajj “Tatit Diosan servirinakapa[jj]” mä arunjja, ajllit cristianonakaw qhep qhep sello katoqapjjani sasaw säna. * Kunapachatï qhep qhepa sello katoqapkani ukhaw angelanakajj tukjir thaya antutanipjjani. ¿Ukatjj kunas pasani?

14. ¿Kunas Jachʼa Babilonian niya tukjatäñap uñachtʼayi?

¹⁴ Oraqpachankir kʼari religionanak apnaqer Jachʼa Babiloniajj qʼala tukjatäniwa. Ukan tukjatäñap niya jakʼankatapwa amuytanjja, ukat niyakejjay “akapacha markanaka, jaqenaka, ukhamarak taqe casta parlani markanaka[s]” yanaptʼasipkchejja, ukanakas janiw kunjamats yanaptʼirjamäjjapjjaniti (Apo. 16:12; 17:15-18; 18:7, 8, 21). Kʼari yupaychäwinakasa ukat pʼeqtʼirinakapasa, televisionansa, periodiconsa, radionsa ukat yaqha ukhamanakansa jan walit unjatäjjapjjewa, ukaw kʼari religionanakan aynachtʼaskatap uñachtʼayi. Ukhamäkchi ukasa, Jachʼa Babilonia pʼeqtʼirinakajj janis kunatsa llakisipjjañapäkaspa ukhamwa amuyapjje. Ukampis ¡pantjasipjjewa! “Taqe kunas sumakïskiwa, janiw kunas paskaniti” sasin arsuskani uka qhepatjja, Supayan apnaqata marka apnaqerinakajj akatjamatwa kʼari religionanak contra sartapjjani ukat jan mayampitakiw chhaqtayapjjani. Ukhamasti, kunanakatï paskani ukanak pacienciampi phoqhasiñap suytʼañajj wali askiwa (Apo. 18:8, 10).

15. ¿Kunatsa Jehová Diosajj jan istʼasir jaqenakarojj jan jankʼak tukjkpacha?

¹⁵ Jaqenakajj wals sutip jiskʼachawayapkchejja, Jehová Diosajj pacienciampiw jan juchañchas jaqenakar suytʼawayi. ¿Kunatsa? Kunattejj janiw suma chuyman jaqenakan tukjatäñap munkiti (2 Ped. 3:9, 10). ¿Ukhamarakti amuytanjja? Janïr tukjañ urup purinkipanjja, kunjamanakatsa Jehová Diosar pacienciapat yuspärsna ukwa jichhajj uñjaskañäni.

16, 17. 1) ¿Kunatsa tamat jitheqtatanakar yanaptʼañasa? 2) ¿Kunatsa tamat jitheqtatanakajj jankʼak Jehová Diosar kuttʼanipjjañapa?

¹⁶ Tamat jitheqtatanakar yanaptʼapjjañäni. Mä chhaqat uwijar jikjjataski jan ukajj katjaski ukhajja, alajjpachan kusisiñaw utji sasaw Jesusajj säna (Mat. 18:14; Luc. 15:3-7). Jehová Diosajja, taqe khitinakatï Jupar munasipki ukanakarojj wal munasi, ukat tamat jitheqtatäpki ukanakarus munasirakiwa. Kunapachatï tamar kuttʼanipjjañapataki yanaptʼtan ukhajja, Jehová Diosaru ukat angelanakaruw kusisiytanjja.

 ¹⁷ ¿Jumajj Jehová Diosar jan servjjapjje ukanak taypinktati? Inas mä jilatana jan ukajj kullakana chuym ustʼayatajj tantachäwinakar jan sarjjstati. ¿Ukhat jichhakamajj walja tiempot pasjje? Ukhamächi ukhajja, akham jisktʼasim: “¿Wali sumti jichhajj jakasjjta? ¿Kusisitätti? ¿Jehová Diosat chuym ustʼayawayitu, jan ukajj pantjasir mä jilatati jan ukajj kullakacha? ¿Jehová Diosat jan walin uñjasiyawayitu?”. Cheqas Jehová Diosajj taqeniruw khuyaptʼayasistu. Ukat pantjaskstansa, kunanaktï Jupajj lurawayki ukanak katoqaskaktanwa (Sant. 1:16, 17). Ukampis Jehová Diosan urupa wali jakʼankatap janipun armañäniti. Jichhaw Jehová Diosaru ukat tamaparu kuttʼañ horasajja, ukanakwa aka qhepa urunakan jarkʼaqatasna (Deu. 33:27; Heb. 10:24, 25).

18. ¿Kunatsa tama sarayirinakarojj yanaptʼañasa?

¹⁸ Tama sarayirinakar yanaptʼapjjañäni. Munasiri awatirjamaw Jehová Diosajj irpistu ukat jan walinakatsa jarkʼaqarakistu. Ukatakejj awatirinakan Jachʼa Jilïriparuw, mä arunjja, Jesusaruw uttʼayawayi (1 Ped. 5:4). Ukat patak waranqa jila tamanaka uñjirinakaw aka Oraqpachan utji (Hech. 20:28). Tama sarayirinakaru taqe chuyma yanaptʼasajja, Jehová Diosaru ukat Jesusar kuntï jiwasatak lurapki ukanakat yuspärataswa uñachtʼaytanjja.

19. ¿Kunjamsa jukʼamp mayachtʼatässna?

¹⁹ Maynit maynikam jakʼachasipjjañäni. ¿Kamsañs ukajj muni? Kunapachatï suma wakichtʼat ejercitojj uñisirinakapampi jan waltʼayat uñjasipjje ukhajja, maynit maynikamaw jitthaptapjje. Ukhamatwa jan walinakat jarkʼaqasipjje. Ukhamarakwa Supayajj Jehová Diosan markaparojj urut urutjam jukʼamp jan waltʼayaski. Ukhamajj janiw jiwas pura chʼajjwañ horasäkiti, jan ukasti jiwaskam jakʼachasiña, pantjasitas jan uñchʼukiña ukat Jehová Diosajj kuna toqetï irpkistu ukar confiyañ horasawa.

20. ¿Kunsa jichhajj lurañasa?

²⁰ Taqeniw ajay toqen jan ikjañasäkiti ukat ‘Tatitur suytʼaskakiñasa’. Ukat “taqe kunas sumakïskiwa, janiw kunas paskaniti” sasin arsuskani ukat ajllit cristianonakajj qhep qhepa sello katoqapkani uk phoqhasir pacienciampi suytʼasipkakiñäni. Ukjjarusti, pusi angelanakaw tukjiri thaya antutanipjjani ukat Jachʼa Babiloniaw tukjatäni. Ukanak pasañap suykasajja, Jehová Diosan markap sarayapki ukanakar istʼasipkakiñäni. Supayata ukat sajjranakapat jarkʼaqasiñatakejj maynit maynikam jakʼachasipjjañäni, ukat kuntï Salmo 31:24 qellqatajj siski uka ewjjtʼar istʼapjjañäni: “Tatitur suytʼirinaka, chʼamañchasipjjam, jan ajjsarir chuymanipjjarakim”.