1, 2. ¿Kunatsa jichhürunakan kʼarisiñanakajj sint utji, ukat ukajj kunjamanakansa uñjasi? (Aka janankir foto uñjjattʼam.)

JICHHÜRUNAKANJJA, sallqjañanakasa jan ukajj engañjañanakasa ukat kʼarintasiñanakas sapüruw uñjasi. Ukanak uñjasajj janiw mayjtʼasiñasäkiti. Kunattejj Supayajj jachʼa sallqawa ukat juparakiw akapach apnaqerejja sasaw Bibliajj qhanañchi (1 Tim. 2:14; 1 Juan 5:19). Akapachan tukusiñap niya jakʼachasisinkipanjja, Supayajj jukʼamp coleratawa kunattejj ‘tiempopan jukʼakïtapwa yatisi’ (Apo. 12:12). Ukhamajj khitinakatï Supayamp apnaqayasipki ukanakajj jukʼamp kʼarisirïpjjaniwa, yamas Diosan servirinakaparojj pantjasiyañ munapjjani.

² Awisajja, radionsa, televisionansa, periodiconsa ukat Internetansa Jehová Diosan servirinakapata ukat yatichäwinakapatsa jan walinaka ukat kʼarinakwa parlapjje. Ukatwa yaqhep jaqenakajj ukanakajj cheqäkaspas ukham amuyasajj mayjtʼat jikjjatasipjje, awisajj yamas wal colerasipjje.

3. ¿Kunas Supayan sipitapar jan jaltʼañatakejj yanaptʼistaspa?

³ Supayan uka sipitanakapar jan jaltʼañatakejja, Diosan Arupaw utjistu, ukasti “askirakiw [...] cheqachañataki” uk utjatapatwa yuspärtanjja (2 Tim. 3:16). Tesalónica markankir yaqhep cristianonakajj kʼari yatichäwinakampiw apayasipjjäna sasaw apóstol Pablojj säna. Ukatwa jupanakarojj akham sas ewjjtʼäna: “Jan jankʼaki amuyunakamjja mayjtʼayap[jjamti]” sasa (2 Tes. 2:1, 2). ¿Kunsa Pablon ewjjtʼapat yateqsna? Ukat ¿kunjamsa uka ewjjtʼarjam sarnaqsna?

4. ¿Kunjamsa Pablojj Jehová Diosan ‘urupat’ amuyasipjjañapatakejj Tesalónica markankir cristianonakarojj ewjjtʼäna, ukat kunjamsa jiwasar ewjjtʼapjjarakistu?

⁴ Pablojj Tesalónica tamar nayrïr cartap qellqkäna  ukanjja, Jehová ‘Tatitun urupatwa’, (MT) jilpach qhanstayäna. Janiw jilat kullakanakan chʼamakankapjjañapsa ni jan wakichtʼatapjjañapsa munkänti, jan ukasti ‘qhanankirinakan’ wawanakapjamajj jan ikjapjjañapataki ukat ‘amuytʼasipjjañapatakiw’ ewjjtʼäna (1 Tesalonicenses 5:1-6 liytʼasiñapawa). Jichhürunakanjja, oraqpachankir taqpach kʼari religionanak apnaqer Jachʼa Babilonian tukjatäñapwa suyasktanjja. Ukaw Jehová Diosan Jachʼa urup qalltasitap uñachtʼayani. Diosajj kunjamsa amtap phoqani uk jichhaw sum amuytanjja. Ukhamarus tamap toqew kunanakas sum amuytʼasiskakiñatakejj yanaptʼistaspa uka ewjjtʼanak katoqtanjja. Uka ewjjtʼanakar istʼañajj taqe chuyma ‘cheqpach Diosar serviñatakiw’ yanaptʼistaspa (Rom. 12:1).

5, 6. 1) Apóstol Pablojj payïr cartap Tesalónica tamar apaykäna ukanjja, ¿kuna toqetsa qhanañchäna? 2) ¿Kunsa Jehová Diosajj Jesús toqejj lurani, ukat kunsa jisktʼasiñasa?

⁵ Tesalónica markankir cristianonakar nayrïr cartap apaykäna ukat mä jukʼa tiempo qhepatjja, Pablojj payïr cartap apayarakïna. Ukanjja, jachʼa tʼaqhesïwin kunjamsa Jesucristojj Diosar jan uñtʼirinakarusa ukat ‘qhespiyasiñ arunakapar jan istʼapki’ ukanakarus Diosan juicio urupan juchañchani uka toqetwa parläna (2 Tes. 1:6-8). Payïr Tesalonicenses paya jaljapanjja, kunjamsa uka tamankir yaqhep jilat kullakanakajj Jehová Diosan urupat yatisajj sustjasipjjäna, ukat jankʼakis purinkaspa ukham amuyapjjäna ukwa qhanañchi (2 Tesalonicenses 2:1, 2 liytʼasiñapawa). Uka tiempon cristianonakajj Diosan amtapajj kunjamas phoqasini uk janiw sum amuyapkänti, ukatwa Pablojj profecianakat amtasajj akham säna: “Uka yatiñanakasa, profecía arunak parlañanakasa jan cheqätap laykojj, tukusikiniwa kunapachatejj cheqa kankañajj jutkani ukapachajja” (1 Cor. 13:9, 10). Ukampis apóstol Pablona, Pedrona ukat uka tiempon yaqha ajllit cristianonakan Diosan amuytʼayat qellqatanakapaw iyawsäwin jan aynachtʼapjjañapatakejj yanaptʼpachäna.

⁶ Uk sum amuytʼayañatakejj Jehová Diosan Jachʼa urup janïr purinkipanjja, kʼari yatichirinaka ukat ‘ñanqha jaqew’ utjani sasaw apóstol Pablojj qhanañchäna. * Qhepatjja, Jesusajj tiempoparuw taqe khitinakatï sallqjjayasipki  ukanakarojj ‘tʼunjarakini’. Ukat “Tatitun qhespiyasiñ arunakap jan katoqañ munapjjatap layku[w]” juicio katoqapjjani sasaw Pablojj qhanañchtʼarakïna (2 Tes. 2:3, 8-10). Ukhamajj akham jisktʼasiñasäspawa: “¿Qawqsa cheqa yatichäwirojj munastjja? Ukat ¿aka revistana ukat Bibliat apstʼat yaqha qellqatanakan Diosan markapajj machaq qhanañchtʼäwinak taqe tamanakatak apski ukarjamat amuyasktjja?”.

7, 8. 1) ¿Kuna jan walinakarus nayrïr cristianonakajj saykatapjjäna? 2) Jichhürunakan cheqpach cristianonakajja, ¿kuna jan walirus saykataraktanjja?

⁷ Diosan markap contra saytʼirinakata ukat kʼari yatichäwinakapat sipansa, cristianonakajj yaqha jan walinakaruw saykatapjjañapäna. Pablojj akham sasaw Timoteor qellqäna: “Qollqeru munañajja taqe jan wali luräwinakan saphipawa” sasa. Ukat akham saskakïnwa: “Mayninakajj jukʼampi munapjjatap layku iyawsañatjja maysaru saranukupjje, pachpa jakäwinakaparuw tʼaqhesiñampi yapjjatasipjje” sasa (1 Tim. 6:10). Yaqha jan waltʼayirejj ‘jañchina luräwinakapäspawa’, (MT) (Gál. 5:19-21).

⁸ Ukampis Pablojj kunatsa Tesalónica markankirinakarojj jan waltʼayir chachanakata, mä arunjja, ‘kʼari apostolonakat’ amuyasipjjañapatak qhan ewjjtʼpachäna uk amuysnawa. Ukanak taypitjja, “kʼarinak yatichasa, cheqäkaspas ukhama, iyawsirinakar jupanak toqer apaña” munir chachanakaw utjäna (2 Cor. 11:4, 13; Hech. 20:30). Qhepatsti Jesusajj Éfeso markankir tamaruw ‘ñanqha jaqenakar jan katoqapjjatapata’ jachʼañchäna. Kunattejj uka jilat kullakanakajj kʼari apostolonakäpjjatapwa ‘yantʼapjjäna’ (Apo. 2:2). Pablojj Tesalónica markankirinakarojj payïr cartapan akham ewjjtʼäna: “Jilatanaka, ewjjtʼapjjsmawa Tatit Jesucristosan sutiparu, jitheqtapjjam kawkïr jilatatejj jan irnaqañ munki ukatjja” sasa. Ukjjarojj jan ‘irnaqañ munapki’ uka cristianonakaruw jukʼamp säna (2 Tes. 3:6, 10). Ukhamajj jan irnaqañ munirinakattï ukham sischïnjja, ¡kunja cheqansa Diosan markap contra saytʼirinakamp jan chikachasipjjañapajja! Cheqas uka tiempon uka jaqenakamp chikachasiñajj janipuniw walïkänti, jichhürunakan ukhamarakiwa (Pro. 13:20).

9. Taman maynitï amuyuparjamaki jan ukajj Diosan markapar jiskʼachas parlaspa ukhajja, ¿kunatsa jupanakat amuyasiñasäspa?

⁹ Nayra patak maranakan Diosan amuytʼayatäsin kunanakatï ewjjtʼaskäna ukanakajj jiwasakejj wali askiwa, kunattejj jachʼa tʼaqhesiñ uru ukat Supayan ñanqha pachan tukusïwipaw jakʼachasisinki. Ukhamajj janipuniw Jehová Diosan khuyapayasiñap ‘ina chʼusaru aptʼañ munktänti’ ukat “kuna khuyapayasiñtï Diosajj” churkistu uk jan phoqkañäni ukhajja, alajjpachana jan ukajj aka Oraqen wiñay jakañ suytʼäwinïktan uk aptʼassnawa (2 Cor. 6:1). Maynitï tantachäwinakan kuntï Bibliajj jan yatichki uk amuyunakaparjam parlaspa jan ukajj Diosan markapar jiskʼachaspa ukhajja, jupanakat amuyasiñasäspawa (2 Tes. 3:13-15).

10. ¿Kuna yatichäwinakarjamas Tesalónica markankir cristianonakajj sarnaqapjjañapäna?

¹⁰ Pablojj Tesalonicankir jilat kullakanakarojj “nayraru sarantasipkakim” ukat kuna yatichäwinaktejj yateqapkta uk jan armasipjjamti sasaw ewjjtʼäna (2 Tesalonicenses 2:15 liytʼasiñapawa). Yateqapkän uka ‘yatichäwinakajj’ ¿kunansa? Cheqas Qollan Qelltarjamäkaspas ukham kʼari religionanakajj yatichapkän uka toqet janiw Pablojj parlkänti, jan ukasti kuntï Jesusajj yatichkäna ukat Pablos ukat mayninakas Diosat yatichapkäna ukanakatwa parlaskäna, ukanakat waljajj Qollan  Qellqatanwa uñsti. Ukat Pablojj Corinto tamankir jilat kullakanakarojj akham sasinwa chʼamañchtʼäna: “Jumanakajj nayatjja amtasipjjapunistawa ukhamaraki kuntejj yatichapkäyäsma ukarjamarakiw sarnaqasipkta” (1 Cor. 11:2). Cheqas uka yatichäwinakajj confiykañänwa.

11. ¿Kunjamanakatsa sallqjjayasipki ukanakajj Diosat jitheqtapjjaspa?

¹¹ Kunapachatï Pablojj Hebreo jilat kullakanakar qellqkäna ukhajja, kunas iyawsäwir aynachtʼayaspa ukat Diosar taqe chuyma serviñat apaqaspa ukwa pä toqet qhanañchtʼäna (Hebreos 2:1; 3:12 liytʼasiñapawa). Jupajj ‘maysar saranukuñata’ ukat Diosat ‘jitheqtañatwa’ parläna. Bote apnaqer mä jaqejj qota lakat maysar saranukuskatap qalltan janiw amuyaskaspati, kunattejj jukʼat jukʼatwa jayar jitheqtaskaspa. Maysa toqetjja, bote apnaqeritï amanut bote nuktʼaspa ukhajja, jupa pachpaw uka luratapampejj qota lakat jitheqtaskaspa. Uka uñachtʼäwinakajja, khitinakatï sallqjjayasipki jan ukajj engañjayasipki ukat cheqa yatichäwir jan taqe chuyma confiyapki ukanakarojj kunas pasaspa ukwa uñachtʼayi.

12. Diosar yupaychañanjja, ¿kuna luräwinakas aynachtʼayistaspa?

¹² Tesalónica markankir yaqhep cristianonakajj ukhamanwa uñjasipjjpachäna. ¿Jichhürunakat kamsasirakispasa? Kunayman tiempo apaqanakaw utji. Sañäni: redes sociales satäkis uka toqnam parlasasa, mensajenak liyisasa ukat qellqtʼasasa ukat kuntï lurañ wal munirïktan uk lurasasa, jan ukajj pelota anatirinak uñchʼukisasa qawqha tiempsa aptʼassna uk amuytʼam. Taqe ukanakaw tiempo apaqestaspa ukat Diosar yupaychañan aynachtʼayistaspa. Ukatjja, Diosarojj janiw taqe chuyma oración mayisjjsnati, Diosan Arupat janiw sum yatjjatjjsnati ukat janirakiw tantachäwirusa ni yatiyiris sarjjsnati. ¿Kun lurañasäspasa jan jankʼaki amuyunakas mayjtʼayañatakejja?

13. ¿Profeciarjamajj walja jaqenakajj kunjamäpjjesa, ukat kunas iyawsäwis jan aynachtʼañapatakejj yanaptʼistani?

¹³ Iyawsäwis jarkʼaqasiñasatakejja, kuna tiemponsa jakasktan ukwa amuyasiñasa ukat khitinakatï ‘qhepa urunakan’ jakaskatas jan amuyañ munapki ukanakamp chikachasisajj kunjamansa uñjassna uksa amuyañasarakiwa. Apóstol Pedrojj uka tiempot akham sasaw qellqäna: “Tatitun yänakapat phiskasiri jaqenakaw sartapjjani, jan wali amtatanakaparjamarakiw sarnaqapjjani, ukatsti jisktʼapjjarakiniwa: ‘¿Kawkirak Criston “jutäw” satapasti? Awkinakasas jiwarawayjjewa, taqe kunas pachpakïskarakisä, aka oraqes utjkis ukkhatpacha’” sasa (2 Ped. 3:3, 4). Kuna tiempontï jakktan uk sum amuyasiñasatakejj Biblia sapür liyiña ukat Bibliat sapak yatjjatañaw yanaptʼistani, cheqas ‘qhepa urunakanwa jaktanjja’. Khä nayra pacha maranakanwa kʼari yatichäwinakajj uñstawayi ukat jichhürkamas ukajj utjaskakiwa. ‘Ñanqha jaqet’ Bibliajj parlki ukajj utjaskakiwa ukat Diosan servirinakap contraw saytʼi. Ukhamajj Jehová Diosan urup jakʼankkipanjja, janiw ikjañasäkiti (Sof. 1:7).

14. Diosan Arup jan tiempon yatiyañajja, ¿kunjamsa jarkʼaqestu?

¹⁴ Ukat jan ikjañatakisa ukat amuyus jan jankʼak mayjtʼayañatakis jan qheparasaw Diosan Reinopat yatiyir sarañasa, ukaw jichhakamajj uñjasi. Kunapachatï tama Pʼeqtʼiri Jesucristojj jaqenakar nayan arkirejj tukuyapjjam, yatichapjjarakim taqe kuntejj jumanakar yatichapksma sasin siskäna ukampejja, kunatï arkirinakaparojj jarkʼaqkaspäna uk ewjjtʼaskäna (Mat. 28:19, 20). Diosan arunakap yatiyir sarapjjam siskistu uk phoqañatakejj kusisit chuymanïñasawa. ¿Tesalónica markankir  jilat kullakanakajj Diosan arunakap yatiyirisa ukat yatichirisa pata chuymakit jariyat sarapjjerïpachäna? Pablojj akham sänwa: “Ajayun chʼamapjja jan jiwtʼayapjjamti. Jan jiskʼachapjjamti Diosan amuytʼayata arunakaparojja” (1 Tes. 5:19, 20). Profeciat jaqenakar yatiyañasa ukat yatichañas ¡kunja kusiskañasa!

15. ¿Kuna toqenakatsa familjam Diosar yupaychkasajj yatjjatsna?

¹⁵ Familiasan Diosan arunakap yatiyañan suma yatichirjam wakichtʼatäpjjañapwa muntanjja. Yaqhep jilat kullakanakajj familjam Diosar yupaychkasajj Diosan arunakap yatiyañatakiw wakichtʼasipjje. Bibliat yateqañ munirinakar jukʼamp yateqañ munapjjañapatak kunjamsa yanaptʼasispa uk inas familjam amuykiptʼsna: ¿Kuttʼasajj kuna toqetsa parlañäni? ¿Kuna toqet parltʼañas Bibliat jukʼamp yatjjatañ munañapatak yanaptʼaspa? ¿Kuna rat visittʼañas wakisispa? Yaqhep jilat kullakanakajj familjam Diosar yupaychkasajj tantachäwitaki ukat arstʼañatakiw wakichtʼasipjje. ¿Jiwasajj ukham luraraksnati? Ukanakan arstʼañaw iyawsäwisan jan aynachtʼañataki ukat jan jankʼaki amuyunakas mayjtʼayañasatakejj yanaptʼistani (Sal. 35:18). Ukhamajj familjam Diosar yupaychañaw jan pächasiñasataki ukat amuyusarjam jan parlañataki jarkʼaqestani.

16. ¿Kunas ajllit cristianonakarojj sum amuytʼasisipkakiñapatakejj yanaptʼi?

¹⁶ Kunjamsa Jehová Diosajj marat maratjama markaparojj Biblian profeciap amuytʼayawayi uka toqenakat lupʼsna ukhajja, kuna bendicionanaksa jutïrin katoqañäni uka toqenakatwa sum amuytʼsna. Ajllit cristianonakajj alajjpachan Jesucristompiñwa suyasipki. ¡Ukajj kunjaki suma amuytʼasirïpjjañapatak chʼamañchki! Tesalónica markankirinakar Pablojj qellqäna uka arunakajj jupanakatakjamawa, ukan akham siwa: “Ukampis nanakajj jumanakatjja Diosar yuspagarañajj wakisipjjapunituwa, Tatitun munat jilatanaka, jupaw jumanakarojj chhijllapjjtam [...], ajayojj qʼomachapktamsa uka toqe, ukhamarak Diosan arunakapar iyawsapjjatamata” sasa (2 Tes. 2:13).

17. ¿Kunjamsa 2 Tesalonicenses 3:1-5 qellqatajj chʼamañchtʼistu?

¹⁷ Khitinakatï aka Oraqen wiñay jakañ suyasipki ukanakajja, ukhamarakiw jan jankʼaki amuyunakap mayjtʼayasipjjañapatak chʼamachasipjjañapa. Jiwasatï aka Oraqen jakañ suytʼäwinïstanjja, kuntï Tesalónica markankir ajllit cristianonakar Pablojj qellqkäna uk amuytʼam (2 Tesalonicenses 3:1-5 liytʼasiñapawa). Sapa mayniw uka chuymachtʼäwi arunak wali askit uñjañasa. Tesalónica tamar carta apaykäna ukajja, amuyunakaparjam parlirinakata jan ukajj Bibliarjam jan wali amuyunakäki ukanakat amuyasiñatakiw yanaptʼistu. Niyakejjay qhepa arunakan jakstanjja, uka ewjjtʼanakarojj wali askitwa uñjtanjja.