¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼam:

¿Kunapachas Jesusajj ‘katuntatäpkis uka ajayunakarojj Diosan arunakap parläna’? (1 Ped. 3:19.)

Jesusajj jiwatat jaktjjäna uka qhepat jan wali angelanakarojj kuna taripäwtï katoqapkani uk qhanañchpachäna (6/15, 23 jana).

¿Kuna kimsa jan waltʼäwinakas mayamp jaqechasipki ukanakatak utjaspa?

Akanakawa: nayrïr jaqechasïwit sint parlaña, warmimar jan ukajj chachamar jan uñtʼapki uka amigonakamp sum apasiña, qhepa chachamaru jan ukajj warmimar confiyaña (7/1, 9 ukat 10 jananaka).

¿Kunapachas Jesusajj jaqenakar uwijanakarjama ukat cabritonakarjam jaljani? (Mat. 25:32.)

Jesusajj jachʼa tʼaqhesïwi tiempon taqe markanakar uwijanakarjama jan ukajj cabritonakarjam taripir jutkani ukat kʼari yupaychäwejj tukjatäkani uka qhepatwa jaljani (7/15, 6 jana).

Jesusajj jan wali qorampita, trigompit parlkäna uka uñachtʼäwirjamajja, ¿kunapachas jan walinak lurapki ukanakajj wararipjjani ukat laka chʼaksa tʼurusipjjani? (Mat. 13:36, 41, 42.)

Jachʼa tʼaqhesïwinwa ukham lurapjjani, kunapachatï jan kawkhar imantasiñanakap utjatap amuyasipjjani ukha (7/15, 13 jana).

Jesusajj amuyasiri cheqapa uywatat parlkäna ukajja, ¿kunapachas phoqasi? (Mat. 24:45-47.)

Jesusan arunakapajj janiw Pentecostés 33 maran phoqasiñ qalltkänti, jan ukasti 1914 mara qhepatwa phoqhasïna. Ukat 1919 maranjja, amuyasiri cheqapa uywatajj utapankirinakjjar uttʼayatänwa, ukanakajj taqe khitinakatï Diosar yupaychañ toqet manqʼa katoqapki uka cristianonakäpjjewa (7/15, 21 janat 23 janakama).

¿Kunapachas Jesusajj amuyasiri cheqapa uywatarojj utapankirinakjjar uttʼayäna?

Ukajj jachʼa tʼaqhesïwinwa pasani, kunapachatï amuyasiri cheqap uywatajj alajjpachan kuntï Diosajj arsuwaykäna uk katoqapkani ukha (7/15, 25 jana).

Yaqhep jaqenakan sutipajj Biblian janiw uñstkiti, ¿ukampejj jan wali jaqenakäpjjewa jan ukajj jan wakiskirïpjjewa sañt munpacha?

Janiw ukhamäkiti. Kunattejj Biblian yaqhep qhoru jaqenakan sutipa ukhamarak yaqhep suma chuyman jaqenakan sutinakapsa janiw aytkarakiti (Rut 4:1-3; Mat. 26:18). Ukampis Diosat jan jitheqtir pä angelan sutipwa ayti (8/1, 10 jana).

Sachsenhausen sat cheqan 230 jilat kullakanakasajj katuntataw uñjasipjjäna, ukat Jehová Diosas chʼam churkchïnjja, ¿kunas kayuki wali jaya sarañatak yanaptʼäna?

Jan manqʼata, usuntata uñjasisajj janis chʼamanëjjapjjchïnjja, saraskakiñatakejj maynit maynikamaw chʼamañchtʼasipjjäna (8/15, 18 jana).

Israelitanakajj Jordán jawir Suma Oraqer mantañatak paskatapkäna uk yatiñajja, ¿kunatsa chʼamañchtʼistu?

Uka jawirnam walja umas mantaskchïnjja, Jehová Diosaw markapan paskatañapatakejj uma wañtʼayäna, uk uñjasaw jupanakajj Diosar jukʼamp confiyapjjäna. Uk yatiñajj wal chʼamañchtʼistu (9/15, 15 jana).

¿Biblian coloranakat sapa kuti parlatapajj kunsa uñachtʼayi?

Biblian coloranakat parlki ukajja, kunjamsa jaqerojj chuymapan mayjtʼayaspa uk Diosan sum yatitapwa uñachtʼayi, ukat yatichäwinak amtañatakis yanaptʼarakistuwa (10/1, 14 ukat 15 jananaka).

Miqueas 5:5 qellqatan awatirinakata ukat wali aytat jaqenakat parlki uka profeciajja, ¿kunjamsa phoqasiski?

‘Paqallqo jilïrinaka [jan ukajj “awatirinaka”, NM] ukat kimsaqallqo wali aytat jaqenakampita’ Miqueas 5:5 qellqatan parlki ukajja, tamankir irpir chuymaninakawa, jupanakaw Diosan markap contra sartapkani ukatak markapar wakichtʼasipki (11/15, 20 jana).

¿Kunatsa Diosamp yanaptʼatäñ muntanjja?

Suma yanaptʼatäña ukat kunatsa jan walinakan uñjastan ukwa yatiñ muntanjja, ukanaksti Diosakiw churistaspa. Jupaw suma ukat kusisit jakasiñatak yanaptʼistu. Ukat kuntï arski uksa phoqarakiniwa (12/1, 4 janat 6 janakama).