Bibliajj janiw uk jarkʼkiti.

Biblianjja, walja cheqanakanwa kunjamsa yaqhepanakajj jiwatanakan cuerponakap nakhantayapjjerïna uk qhanañchi (Jos. 7:25; 2 Cró. 34:4, 5). Ukham nakhantayasajja, uka jaqenakajj janis suma imatäñapajj wakiskaspa ukwa uñachtʼayäna. Ukampis janiw uka amtampikipunejj ukham lurasirïkänti.

Kunjamsa Saúl reyisa kimsa yoqanakapas jiwapjjäna uk amuytʼañäni. Jupanakasti filisteonakampi nuwasisaw jiwarapjjäna. Maynïr yoqapasti Jonatán satänwa, jupasti Davitan munat amigopänwa. Ukham jiwarapjjatap yatisajja Jabés-galaad cheqankiri israelitanakajj jankʼakiw cuerponakap aptanisin ninampi nakhantayas imtʼjjapjjäna. Davitasti uk yatisin walik ukham lurapjjtajja sasaw säna (1 Sam. 31:2, 8-13; 2 Sam. 2:4-6).

Jiwatanakajj jaktanipjjaniwa sasaw Biblian sistu, mä arunjja Diosajj wasitampiw maynirojj jakañ churjjani. Ukhamasti jiwatan jañchipajj nakhantayatäpas janisa, Diosajj jaktayapuniniwa. Jichhajja, Diosat jan jitheqtir kimsa hebreo waynanakat amtañäni. Jupanakarojj Nabucodonosor reyiw mä parintat hornoru jaqontas jiwayañ munäna. Cuerponakapajj nakhantataw uñjasispäna, ukampis janiw jupanakajj akham sapkänti: ‘Nakhantatäsajj janiw jaktjjañäniti’ sasa, jan ukasti Diosaw jaktayaskistani sasaw confiyapjjäna (Dan. 3:16-18). Nazismo partidonkirinakajj ukhamarakiw jilat kullakanakasar phichantasa jiwarayapjjäna, jan ukajj yaqhep jilat kullakanakasajj jan waltʼäwinakan nakhantataw jiwarapjje. Ukampis Diosajj jupanakar jaktayaniwa (Apo. 20:13).

Jehová Diosajj jaktayañatakejja, janiw pachpa chʼakhanakap apthapkaniti. Kunjamsa alajjpachar sarañatak ajllitanakar jaktayasi, uk amuytʼañäni. Jupanakajj Jesusjam jaktayatäpjjarakiwa, kunjam chuymanïpkänti ukhampachaw jaktayasi, ukampis janiw jiwat cuerpopat mä jukʼas alajjpachar sarkiti (1 Ped. 3:18; 1 Cor. 15:42-53; 1 Juan 3:2).

Jiwat cuerposampejj kunasay luraspan, Jehová Diosajj jaktayistaniwa. Jupasti wal jiwatanakar jaktayañ muni, jaktayañatakis chʼamanirakiwa, ukatwa jupar wal confiytanjja (Hech. 24:15). Ukampisa, kunjamsa nayrajj jaktayirïna jan ukajj kunjamsa jutïrin jaktayani ukanak janis sum yatkstanjja, Jehová Diosar confiyañasawa, jupasti Jesusar jaktayasawa ‘mä garantía’ jaytawayistu (Hech. 17:31; Luc. 24:2, 3).

Cristianonakajja, jiwatan cuerpopampejj kunsa lurapjjani uk sum amtañatakejja, markan costumbrenakapa, leyinakapa ukat jaqenakas kamsapjjanisa ukwa amuyapjjañapa (2 Cor. 6:3, 4). Ukhamajj jiwatan cuerpopajj nakhantayasiniti janicha ukajj sapa maynitäjjewa, jan ukajj familiapaw ukjja amtjjañapa.