Inas jumajj divorciasirinakaru uñtʼsta, jichhürunakanjja waljaniw ukhamar puripjje. Sañäni, Polonia markanjja, 30 maraninakaw jilapart jaljtapjje, mä kimsa mara jan ukajj sojjta mara casaratäkasina, ukampis janiw ukha maraninakakejj divorcior puripkiti.

España markankiri Política Familiar sat institucionajj akham siwa: “Europanjja sapa pä matrimoniotjja mayajj jaljtapuniwa” sasa. Yaqha ukham jachʼa markanakansa ukhamarakiw pasi.

Ukham divorciasiñaru purisajja, ¿kunjamas jikjjatasipjje? Casarasirinakaru ewjjtʼiri mä warmejj akham siwa: “Divorcio papelajj akanakwa uñachtʼayi: chacha warmejj janiw sum apasjjapjjeti, janirakiw chikas jakjjapjjarakiti, sapa maynis wali chuyma ustʼatäpjjarakiwa” sasa. Ukat saskakiwa: “Ukjjarojj kunayman llakinakaw maynir aynachtʼayaspa: sañäni, maynejj wal colerasispa, amtasispa, chuyms leqʼesispa ukat phenqʼachatas uñjasirakispawa” sasa. Awisajj yaqhepanakajj jiwañ kunwa amtapjje. ‘Juezajj divorcio papel churjje ukhajja, yaqha jakañaw qalltjje. Inas divorciasirejj llakita jaytanukuta uñjasisajj akham sischispa: “Jichhajj jaljtjjasajja, ¿khitïtsa? ¿Kuns luräjja?”’ sasa.

Eva kullakajja kunjamas jikjjatasïna uk amtasajj akham siwa: “Kunapachatï divorciasjjayäta ukhajja, vecinonakajasa, trabajir masinakajasa ‘jaltat warmi’ sasaw sapjjetäna, ukasti wal chuym usuyirïtu. Ukat wali colerataw jikjjatasirakirïta. Esposojasti pä jiskʼa wawamp jaytawayitu, nayaw awkjam taykjam jupanakar uywañajäna” sasa. * Adam jilatajj tunka payan maranakaw irpir chuymanjam serviskäna, jupasti siwa: “Janiw naya pachpas askit uñjasjjti, ukatwa awisajj wali colerata jikjjatasta, jayaruw sarjjañ munta” sasa.

Jupanakarojj kunanakas jutïrin pasani ukanakaw llakisiyaraki, ukampis jan jukʼamp llakisjjañatakejj walja maranaka pasatatsa chʼamachasisipkakiwa. Janis khitis jupanakat llakiskaspa ukham inas amuyapjjchispa. Ukat kunjamtï mä periodistajj siskejja, “jichhajj kuntï lurirïkäna ukanakjja mayjtʼayapjjañapawa, sapakirakiw kuna jan waltʼäwinakarus saykatapjjañapa”.

Stanisław sat jilatajj akham siwa: “Divorciasipjjta uka qhepatjja, janiw warmijajj pä jiskʼa phuchanakajar uñjayañ munkitänti. Janis  khitis nayat amtasjjetaspa, Jehová Diosas nayat armasjjaspasa ukhamaw amuyasiyäta. Janiw jakañs munjjayätti. Ukampis tiempompikiw ukham amuyatajajj jan walïtap amuyjjta” sasa. Ukhamarakiw Wanda sat kullakajj kunas jutïrin pasani uka toqet llakisïna. Jupasti siwa: “Tiempompejj nayatsa wawanakajatsa janis khitis llakisjjaspa, janis jilat kullakanakas amtasjjapjjaspa ukham amuyayäta. Ukampis jilat kullakanakajj sumpun uñjawayapjjetu, wawanakajaru Diosar serviñ yatichañatak chʼamachasiskayäta ukhas wal yanaptʼawayapjjetu” sasa.

Kunjamtï uñjawayktanjja, yaqhep divorciasirinakajj jan wali amuyunakampiw aynachtʼapjje. Janis kunatakis walïpkaspa, janis jupjjat khitin llakisiñapajj wakiskaspa ukham amuyasipjje. Ukhamarusa, inas tamankirinakan pantjasitanakapak uñchʼukjjapjjchispa, janis jupar munasipkaspa, janis jupat sinttʼasipkaspa ukhama. Ukampis qhepatakwa jilat kullakanakajj jupanakar yanaptʼaskatap amuyasipjjaspa, kunjamtï Stanisław jilatasa Wanda kullakasa sapki ukhama. Inas jupanakajj qalltan jan sum amuyasipkchïnti, ukampis kunayman toqetwa yanaptʼa katoqapjjäna.

Walsay chʼamachaskchiñänejja, divorciat jilat kullakanakasajj awisajj saparstʼat jikjjatasipjjakipuniniwa. Yamas divorciat kullakanakasajj janis khitis jupanakat llakisipkaspa ukhamwa amuyasipjjaspa. Alicja kullakajj akham siwa: “Divorciasitajat kimsaqallqo maranakaw pasawayjje, ukampis awisajj janis kunatakis askïkirista ukham amuyasta. Ukat ukhaman uñjasisajja, janiw khitirus jakʼachasiñ munkti ukat walirak jachta, ‘kunatsa akhaman uñjaspachäta’ sasaw sarakta” sasa.

Ukhampunwa jilapart divorciasirinakajj jikjjatasipjje, ukampis ukhaman uñjasisajj janiw mayninakat jitheqtañasäkiti sasaw Bibliajj ewjjtʼistu, ukhamata ‘yatiñ kankañ’ jan apanukuñasataki (Pro.18:1, NM). Ukampisa, mä kullakatï sapaki jikjjataschi ukhajja, janiw sapa kuti mä jilatan chuymachäwipak thaqañapäkiti, ni mä jilatas ukham lurañapäkarakiti. Ukhamtï luraspa ukhajja, jan wali amuyunakaw chuymapan utj-jjaspa.

Divorciat jilat kullakanakasajja, kunayman llakinakanwa uñjasipjjaspa. Ukatjja, kunas jutïrin pasani uk jan yatisajja, saparstʼata jaytanukuta ukhamaw uñjasipjjarakispa. Divorciasirinakajj ukhamapuniw jikjjatasipjje, nayrar sartañas jupanakatak chʼamarakiwa, ukatwa Jehová Diosat yateqasisa yanaptʼañasa (Sal. 55:22; 1 Ped. 5:6, 7). Ukham lurañäni ukhajja, wal kusisipjjani. Tama taypin suma amigonakanïpjjatapsa amuyapjjarakiniwa (Pro. 17:17; 18:24).