“¡EUREKA!” arojj “¡jikjjattwa!” sañ muni. 1800 maranakanjja, waljaniw California (Estados Unidos) markar puripjjäna, qori thaqhañataki. Qori jikjjatasajj “¡eureka!” sasaw jachʼat arnaqasipjjerïna. Ukampis Charles Taze Russell jilatampi Bibliat Yatjjatirinakampejja, uka qorit sipansa jukʼamp valorani, Biblian cheqa yatichäwinakapwa jikjjatapjjäna. Uksti yaqhanakar yatiyañ munapjjarakïna.

“Foto-Drama de la Creación” sat dramjja, 1914 chika marakamajj walja millón jaqenakaw jachʼa markanakan uñtjjapjjäna. Uka dramajj kimsaqallq horaw uñachtʼayasïna, uksti Oraqpachankir Bibliat Yatjjatirinakaw wakichapjjäna (IBSA). Uka dramajj wali muspharkañ videonakani, pinttʼat suma dibujonakani, musicanakani ukat arstʼäwinakani wakichatänwa. Ukansti, aka Oraqen qalltapat Jesucristojj Waranqa Maranak Apnaqañ tukuyjjani ukhakamaw uñachtʼayasïna (Apo. 20:4). *

Ukampis janiw jiskʼa markanakarojj uka dramajj purkänti, ukatwa IBSA asociacionajj 1914 agosto phajjsina “Drama Eureka” apsüna, ukhamat waljanir cheqa yatichäwinakampi puriñataki. Ukasti “Foto-Dramar” uñtasitänwa. Ukan janiw videonakajj uñachtʼayasjjänti, janirakiw yaqha cheqar apañas chʼamäjjänti. “Drama Eurekajj” kimsa kastaw walja arunakat utjäna. Mayajj “Eureka Y” satänwa, ukanjja musicanakampi arstʼäwinakampi, pinttʼat suma dibujonakampiw utjäna. “Eureka X” ukansti, musicanakampi arstʼäwinakampiw utjäna. “Familiataki Drama Eurekasti” utatak wakichatänwa, ukanjja ajlltʼat mä qawqha arstʼäwinakani qʼochunakani ukhamänwa. Ukatjja, gramófono sat tocadisconaksa, drama uñachtʼayañ equiponaksa iraqtʼatarukiw churapjjäna.

Janiw ukatakejj jachʼa equipos ni jachʼa pantallas wakisjjänti. Ukhamajj Bibliat Yatjjatirinakajj jayankir markanakaruw Reinon yatichäwipampejj puripjjäna. “Eureka X” sat dramajj istʼañatakikïnwa, ukhamajj urus arumas ukjja istʼapjjakispänwa. “Eureka Y” uñachtʼayañatakejj janiw luzajj munaskapunïnti, fotonak uñachtʼayir equipjja, carburo sat gasampiw awisajj qhantayapjjerïna. Finlandés arut Watch Tower revistanjja, ‘aka dramjja kawkjansa uñachtʼayapjjakiristwa’ sasaw yatiyasïna.

Jachʼa teatronak alquilañat sipansa, Bibliat Yatjjatirinakajja, ukhamaki maytʼapki uka utanakwa thaqhapjjerïna: Yateqañ utanaka, trena puriñ utanaka, aleq jachʼa utanaka, ukat tribunalan jachʼa salanakapa. Awisajj anqanakanwa tantachasipjjerïna,  ‘pantallatakisti’ mä jachʼa perqaruw mä janqʼo tela warkkatapjjerïna. Anthony Hambuch jilatajj siwa: “Jaqenakajj huertaparuw mä teatrjam uttʼayapjjerïna, drama sum uñjañatakisti kʼullunakaruw qontʼasipjjerïna” sasa. Grupopanjja, mä carrow utjäna, ukampiw equiponaksa, qʼepinakapsa, carpanakapsa, phayañ yänakapsa apasipjjerïna.

“Drama Eureka” uñjañatakejj waljaniw tantachasipjjerïna. Estados Unidos markankiri mä jiskʼa markanjja, 150 jaqenakakiw jakapjjäna, ukampis 400 jaqenakaw mä escuelan tantachasipjjäna. Yaqha cheqansti, uka drama uñjañatakejj 8 kilometronakwa sarapjjäna, ukat kuttʼañatakisti mä ukhampiraki. Suecia markanjja, Charlotte Ahlberg sat kullakan jiskʼa utapanwa vecinonakapajj tantachasipjjerïna, grabacionanak istʼasajj “wal chuyms chʼalljjtayasipjjerïna”. Australianjja, minero markanwa 1.500 jaqenakajj drama uñjañatakejj tantachasipjjäna. Watch Tower revistanjja akham yatiyasïna: ‘Colegionakansa universidadanakansa walja yatichirinakampi yateqerinakampiw draman uñachtʼayaski uka dibujonakatsa grabacionanakatsa wali sum parlapjje” sasa. Cine utanakajj utjkäna uka cheqanakansa, “Drama Eurekajj” wali uñtʼatänwa.

Bibliat Yatjjatirinakan clasenakapatjja, mä arunjja, tamanakapatjja arstʼirinakwa yaqha clasenak uttʼayapjjañapatakejj yaqha cheqanakar khitapjjerïna. Ukansti, jilatajj discursonak arstʼirïna, ukat “Drama Eureka” uñachtʼayarakirïna. Qawqhanis uka drama uñjapjjäna ukajj janiw sumpach yatiskiti. Ukampis uka drama uñachtʼayañ equiponakajj walja kutiw apnaqasïna. 1915 maranjja, 86 gruponakaw uka equiponakas aptʼata sarapjjäna, ukampis 14 gruponakakiw informe apayanipjjäna. Uka maran janis informejj taqpach apthapiskchïnjja, mä millonatsa jilaw uka drama uñjapjjäna. Ukat 30.000 jaqenakarakiw Bibliat apstʼat qellqatanak mayipjjäna.

“Drama Eurekajj” janis wali uñtʼatäkchïnjja, walja millón jaqenakaw aka Oraqpachan kunayman markanakan uñjapjjäna. Waljaniw uka dramamp yanaptʼayasisajja, qorit sipansa jukʼamp valorani, cheqa yatichäwinak jikjjatawayapjje. Ukatsti “¡eureka!” sasaw sapjjarakïna.