¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼam:

Cristianonakatakejja, ¿jiwatan cuerpop nakhantayañajj walikïskpachati?

Jiwatan cuerpopajj nakhantayasiniti janicha ukajj sapa maynitäjjewa. Kunsa maynejj lurañapa uk Biblianjja janiw sumpach siskiti. Ukampis Saúl reyisa Jonatán yoqapasa jiwapkäna ukhajja, israelitanakajj cuerponakap phichantapjjänwa sasaw Biblianjja qhanañchi (1 Sam. 31:2, 8-13) (6/15, 7 jana).

Jehová Diosajj jan walinak utjatapat janiw juchanïkiti sasajja, ¿kunatsa sistanjja?

Jehová Diosajja, cheqap uñjiri, cheqapa, khuyapayasiri ukhamawa (Deu. 32:4; Sal. 145:17; Sant. 5:11) (7/1, 4 jana).

Yatiyirinakajj munaski uka markanakar saririnakajja, ¿kuna jan waltʼäwinakansa uñjasipjjaspa?

1) Kunatï munaski ukampik jakaña, 2) sinti llakisiña, 3) Amigonak jikjjataña. Ukar saykatirinakajj bendicionanakwa katoqapjje (7/15, 4, 5 jananaka).

¿Kunatsa jilanakapajj Joseyar uñisipjjäna?

Jacob awkipajj wal jupar munasïna, mä suma isi lurayarapïna. Ukatwa jilanakapajj envidiasipjjäna, esclavjam aljantapjjarakïna (8/1, 11-13 jananaka).

¿Kunatsa machaq tratadonakajj wali askejja, ukat apnaqañas jan chʼamäkaraki?

Taqpachajj kikpakïpjjewa. Kawkïr cheqas Bibliat liytʼasiñapa ukajj suma ajlltʼatawa ukat mä jisktʼanirakiwa. Jisktʼarojj utanejj kunjjay sischini, ukarjamaw tratadonkki uka Qellqata uñjjattʼaysna. Wasitampi kuttʼañatakejja, mä jisktʼwa ajlltʼaraksna (8/15, 13, 14 jananaka).

¿Kunas Peshitta siriacajja?

Arameo arut saraqeri siríaco arojja, 100 jan ukajj 200 maranakanjja, wali uñtʼatänwa. Amuyatajja, Griego Arut Qollan Qellqatanakajj siríaco aruruw nayraqatajj jaqokipasïna. Uka Bibliaruw Peshitta sasin uñtʼasïna (9/1, 13, 14 jananaka).

¿Kunjamsa awk taykanakajj wawanakaparu sum uñjapjjaspa?

Istʼapjjañapawa ukhamatwa wawanakaparojj sum uñtʼapjjani. Diosatsa sum yatichapjjañapa, munasiñampirakiw sum irpapjjañapa, yamas Diosar serviñan pächasipjjani ukhajja, yanaptʼapjjañapawa (9/15, 18-21 jananaka).

¿Kunanaksa Diosan Reinopajj chhaqtayani?

Usuntañanaka, jiwaña, trabajo thaqañanaka, guerranaka, manqʼat pistʼañanaka, pisinkañanaka (10/1, 6, 7 jananaka).

¿Bibliarjamajja kawkïr pactorjamas yaqhep jaqenakajj Jesusampi chika apnaqanipjjaspa?

Santa Cena uttʼayasasti, Jesusajj taqe chuyma servir apostolonakapampiw mä pacto luräna, ukasti Reinotak pacto satawa (Luc. 22:28-30). Uka pactowa apostolonakapan alajjpachan Jesusamp chika apnaqanipjjañapatakejj mä garantiänjja (10/15, 16, 17 jananaka).

Supayan utjatapjja, Bibliankir pä yatichäwipampi qhanañchtʼam.

Biblianjja, Jesusaruw Supayajj yantʼañataki parljjayäna sasaw qhanañchi. Job tiemponjja Supayajj Diosampiw parlarakïna. Ukanakaw Supayan utjaskapunitap qhanañchi (11/1, 4, 5 jananaka).

Santiagojj Hechos 15:14 qellqatan mä marka [‘sutipataki’, NM] ajllisi sasinjja, ¿khitinakatsa parlaskäna?

Judionakampi jan judío jaqenakampiruw Diosajj mayachthapïna, ukatjja sarakïnwa: ‘Ajllit jaqenakäpjjtawa Diosan muspharkañ luräwinakap yatiyapjjañamataki’ sasa (1 Ped. 2:9, 10) (11/15, 24, 25 jananaka).

¿Kawkhansa Timgad markajj jikjjatasïna, kunjam amuyunipjjänsa markachirinakapajja?

Timgad cheqajja, romanonakan wali uñtʼat markapänwa, ukasti África cheqat alay toqenkänwa (jichhasti Argelia marka). Ukankirinakajj kunjam amuyunïpjjänsa ukajj mä qellqatanwa jikjjatasi, ukanjja siwa: “Animalanak katjañasa, jareqtʼasiñasa, anattʼañasa, larusiñasa... ¡Ukapï jakañajja!” sasa. Ukham amuyuni jaqenakatarakwa 1 Corintios 15:32 qellqatan parlaraki (12/1, 8-10 jananaka).