BAZALEEL (Bezalel), Aholiab (Oholiab) chachanakajj uta lurañ toqet sum yatipjjäna. Jupanakajja, Egipton esclavonakjam jakasajj walja ladrillonakwa lurapjjpachäna. Ukampis janiw ukhamanak lurjjapjjañapajj wakisjjänti. Jichhajja, jupanakaw tabernáculo lurasiñapatakejj pʼeqtʼapjjañapäna, ukatsti suma artesanoruw tukupjjañapäna (Éxo. 31:1-11). Luratanakap janiw waljanejj uñjapjjañapakänti. ¿Uk yatisajj aynachtʼapjjpachänti? ¿Luratanakap taqenin uñjatäñapajj wakisipunpachänti? Kuntï lurktan uk yaqhanakan uñjapjjañap ¿munapuntanti?

Kunanakatï tabernaculon utjkäna ukanakat yaqhepajj wali suma luratänwa. Ukanakat mayajj arustʼäwi arka patjjan qorit lurat querubines sat angelanakänwa. Ukanakajj “Diosan ukankaskatap” uñachtʼayi sasaw apóstol Pablojj säna (Heb. 9:5). Qorit lurat uka querubines pä angelanakajj wali suma lurtʼatäpachänwa (Éxo. 37:7-9).

Bazaleel, Aholiab chachanakan luratanakapatï jichhürunakan jikjjatasispa ukhajja, jachʼa museonakaruw jaqenakajj uchapjjaspa, walja millón jaqenakaw uk uñjiris sarapjjarakispa. Ukampis luraskäna uka tiemponakanjja jukʼanikiw uñjapjjäna. Tabernaculonsa, templonsa querubines angelanakajj qollanans qollanapa sat cheqan uchatänwa. Uka cheqarusti jilïri sacerdotekiw Juchanak Pampachayasiñ Urojj maran may kuti mantirïna (Heb. 9:6, 7).

Jumatï Bazaleel jan ukajj Aholiab chachasmäna ukat wali sum lurtʼañatak chʼamachasismäna ukhajja, ¿mä qawqhaniki uñjatap yatisajj kunjamakis jikjjatasismäna? Jichhürunakanjja, kusisit jikjjatasiñatakisa, luratanakapajj jan inamayätap yatiñatakisa, jaqenakajj jachʼañchayasiñwa munapjje. Ukampis jiwasajj janiw ukhamäktanti. Jan ukasti Bazaleel, Aholiab chachanakjamarakiw Diosamp sum uñjatäñ muntanjja.

Jesusan urunakapanjja, fariseonakajj jaqenakan uñjkataw Diosarojj mayisipjjerïna. Ukatwa Jesusajj akham säna: “Jumajj mayiskätas ukkhajja, utamar mantam; punkum jistʼantasisinsti mayisirakim Awkimata khititejj jumampïski ukaru. Awkimasti uñjasktamwa jamasan mayisiskirjja,  ukatsti jupajj mayisitamarojj istʼätamwa” sasa (Mat. 6:5, 6). Kunjamtï uñjktanjja, janiw jaqenakamp askit uñjayasiñatakejj mayisiñasäkiti, jan ukasti Jehová Diosamp sum uñjatäñatakiw mayisiñasa. Kun lurañäni ukhasa janiw mayninakan sum uñjatäñatakejj llakisiñasäkiti, jan ukasti Jehová Diosamp askit uñjatäñatakiw llakisiñasa, ukaw jukʼamp wakiskirejja.

Tabernáculo lurañajj tukuyasjjäna ukhajja, “mä qenayaw Tatitumpi Jikisiñ Carpa [jan ukajj tabernáculo] patjjarojj urpjjatäna, ukatsti uka carparojj Tatitun jachʼa kankañapaw phoqtʼäna” (Éxo. 40:34). Ukaw Diosajj uka tabernaculor wali askit uñjatap uñachtʼayäna. ¿Kunjamsa Bazaleel, Aholiab chachanakajj uk uñjasin jikjjatasipjjpachäna? Uka luratanakapajj janiw sutinakapamp qellqjjatatäkänti. Ukampis Diosajj askitwa uka luratanakap katoqäna, uk uñjasajj jupanakajj wal kusisipjjpachäna (Pro. 10:22). Walja maranak qhepatjja, luratanakapajj Diosar yupaychañatakejj apnaqasiskakïnwa, uk uñjasajj jukʼampiw uka pä chachanakajj kusisipjjpachäna. Jiwjjapjjäna uka qhepatsa 500 maranakampiw tabernáculo toqejj Diosar jachʼañchasiskakïna. Uka chachanakajj jaktanipkani ukhajja, ¡uk yatisajj wal kusisipjjpachäni!

Jichhürunakanjja jilat kullakanakajj kunayman toqetwa Diosan markapan yanaptʼapjje, sañäni: dibujonak lurasa, pintasa, musicanak tocasa, fotonak apsusa, qellqatanak lurasa, qellqatanak yaqha arur jaqokipasa. Uka luratanakapanjja, janiw sutinakapajj qellqjjatatäkiti, ukatwa kunsa sapa maynejj lurapjje uk jan yatktanti. Ukatsti, aka Oraqpachan 110.000 jila tamanakan kunanakas lurasi ukanakajj janirakiw uñjatäkiti. Sañäni, taman qollqe toqet uñjañ yanaptʼki ukajja, ¿kunsa sapa phajjsi tukuyajj luri uk uñjtanti? ¿Kunjamsa tamankir secretariojj sapa phajjsi tukuyajj informenak wakichi uk uñjtanti? ¿Khitis Tantachasiñ Uta askichtʼaski uksa uñjaraktanti?

Bazaleel, Aholiab chachanakajj suma artesanopjjänwa, jupanakajj janipuniw premionaksa, medallanaksa, trofeonaksa katoqapkänti. Jan ukasti Jehová Diosampi wali askit uñjatäpjjänwa, ukaw jukʼamp valoranïnjja. Diosajja, jupanakan luratanakapsa, chʼamachasitanakapsa sum uñjaskäna. Jiwasajj jupanakjam altʼat chuymani, Diosatak irnaqtʼiri ukhamäñasarakiwa.