1, 2. Apóstol Juanan arunakaparjamajja, ¿kunjamsa Diosajj munasiñap uñachtʼayistu?

AWK taykanakajja, wawanakaparojj sarnaqatanakapampiw yatichapjje. Apóstol Juanajj akham sänwa: “Diosaw nayraqat jiwasanakar munistu, ukatwa jiwasajj juparojj munaraktanjja” sasa (1 Juan 4:19). Kunjamtï uñjktanjja, kunjamas munasiñajja ukjja Jehová Diosaw nayraqat uñachtʼayistu. Ukarakiw Jupar munasiñatakejj yanaptʼistaspa.

² ¿Kunjamatsa munasiñap ‘Diosajj nayraqat jiwasar’ uñachtʼayistu? Apóstol Pablojj akham sänwa: “Diosajj munasiñapwa uñachtʼayistu, kunapachatejj jiwasanakajj juchanïskäyätan ukapachaw Cristojj jiwasanak layku jiwawayi” sasa (Rom. 5:8). Jehová Diosajja, munat Yoqaparu juchanakasat qhespiyañataki khitanisaw munasiñap uñachtʼayawayistu. Ukaw Diosamp sum apasiñatakisa, Jupar munasiñatakis yanaptʼistu. Ukham lurasarakiw Jehová Diosajj kunja munasirisa uk yatichistu (1 Juan 4:10).

3, 4. ¿Kunjamsa Diosar munasitas uñachtʼaysna?

³ Jehová Diosajj wali munasiri Diosawa, ukaw Jupatakejj taqe kunat sipans nayranki. Ukatwa Jesusajj akham sasin sispachäna: “Dios Tatitumaruw munäta taqe chuymamampi, taqe almamampi, taqe amuyumampi, taqe chʼamamampiraki” sasa (Mar. 12:30).  Jesusan uka arunakaparjamajja, Jehová Diosarojj taqe chuymasampiw munasiñasa. Jiwasatï taqe chuyma Jupar jan munasksna ukhajja, janiw kusisiyksnati. Ukampis janiw taqe chuymasampiki Diosar munasiñasäkiti, jan ukasti ‘taqe almasampi, taqe amuyusampi, taqe chʼamasampiw’ munasiñasaraki. Miqueas profetan arunakaparjamajja, Jehová Diosajj ukhama Jupar munasiñaswa muni (Miqueas 6:8 liytʼañataki).

⁴ ¿Kunjamsa alajjpachankir Awkisar cheqpachapuni munasitas uñachtʼaysna? Jehová Diosaru jakäwisan nayrar uchasaw Jupar munasitas uñachtʼaysna. Pasïr yatichäwinjja, kunjamsa Jehová Diosajj jiwasar munasitap uñachtʼayistu ukwa pusi toqet yatjjatawaytanjja. Aka yatichäwinsti, kunjamsa Jupar jukʼamp munasitas uñachtʼaysna ukwa yatjjatarakiñäni.

5. Kunanaktï Jehová Diosat katoqktan ukajja, ¿kunatakis chʼamañchistu?

⁵ Mä regalo katoqasajja, ¿kunsa uka regalompejj lurtanjja? Wali askitwa uñjtanjja, ukhamarus janiw ukhamak jaytktanti, jan ukasti apnaqasipuntanwa. Jesusan Santiago discipulopajj akham sänwa: “Taqe kunatejj askïki ukhamarak cheqäki ukajj alajjpachatwa juti, khititejj alajjpach qhananak lurki uka Diosawa churistu. Diosajj pachpakipunïskiwa, janirakiw jupanjja sarir chʼiwir uñtatas utjkiti” sasa (Sant. 1:17). Kunatï jakasiñatakisa, kusisitäñatakis munaski uk Jehová Diosaw churistu. Ukaw Jupar munasiñatak chʼamañchistu.

6. Diosan bendicionanakap katoqaskakiñatakejja, ¿kunsa israelitanakajj lurapjjañapäna?

⁶ Israelitanakajj walja maranakaw Jehová Diosamp wali suma uñjatäpjjäna, bendicionapsa katoqapjjarakïna. Diosajj leyinaka, kunanakatï jakasiñatak munaskäna ukanakwa jupanakar churäna (Deu. 4:7, 8). Ukampis Diosan leyinakaparjam sarnaqasaw Jupar yuspärapjjatap uñachtʼayapjjañapäna. Amuytʼañataki, ‘yapunakapat nayrïri suma achunakapwa’ Jehová Diosarojj sacrificiot churapjjañapäna (Éxo. 23:19). Israelitanakajj uk lurasaw Jehová Diosan munasiñapata, bendicionanakapata yuspärapjjatap uñachtʼayapjjañapäna (Deuteronomio 8:7-11 liytʼañataki).

7. Kunanakatï utjkistu ukanak churasajja, ¿kunjamsa Jehová Diosar munasitas uñachtʼaysna?

⁷ ¿Jiwasat kamsasirakispasa? Jichhürunakan janis animalanaka sacrificiot churañajj wakisjjchejja, kunanakatï utjkistu ukanak churasaw Jehová Diosar munasitas uñachtʼaysna (Pro. 3:9). ¿Kunjamsa uk lursna? Diosan Reinopat Oraqpachan yatiyasiñapatakiw qollqemp yanaptʼsna, tamasansa ukhamarakwa yanaptʼsna. Utjirinïstansa janisa, ukham lurasaw Jehová Diosar munasitas uñachtʼaysna (2 Cor. 8:12). Janiw ukakïkiti, Diosar munasitasjja yaqha toqenakatwa uñachtʼayaraksna.

8, 9. ¿Kunjamsa Jehová Diosar munasitas uñachtʼayaraksna? Uk mä experienciamp qhanañchtʼam.

⁸ Jesusajja, manqʼañata, isita llakisiñat sipansa, Diosan Reinopa nayraqat thaqhapjjañapatakiw arkirinakapar ewjjtʼäna. Ukatsti, ‘alajjpachankir Awkimajj yatiwa kuntï munapkta ukjja’ sasaw sarakïna (Mat. 6:31-33). Jiwasajj Jesusan uka arunakapar confiyasaw Jehová Diosar munasitas uñachtʼaytanjja. Kunapachatï mayniru cheqpachapuni munastan ukhajja, juparojj confiytanwa. Ukhamajja, Jehová Diosaru confiyasajj Jupar jukʼampi munasitaswa uñachtʼaytanjja (Sal. 143:8). Akham sas jisktʼasipjjañäni: ‘Sarnaqatajampisa, kuntï lurañ amtkta ukampisa, ¿Jehová Diosar munasitajti uñachtʼaytjja? ¿Taqe kunansa Jehová Diosaw yanaptʼitani sasat confiytjja?’ sasa.

⁹ Mike sat jilatajja, Diosar munasitapa ukhamarak confiyatapwa uñachtʼayäna. Waynäkäna ukhajja, yaqha markar sarasina Diosar jukʼamp serviñwa munäna. Qhepatjja, jaqechasjjänwa,  pä wawanëjjarakïnwa. Ukampis yaqha markar sarañ munaskakïnwa. Diosan arunakap yatiyirinakajj munaski uka cheqanakar saririnakan experiencianakap liytʼasajja, Mike jilatasa familiapasa kunatï munaskäna ukampik jakañwa amtapjjäna. Utap aljasajj yaqha utaruw jakir sarjjapjjäna. Ukatsti Mike jilatajj janiw nayrjam trabaj-jjänti. Qhepatjja, familiapampejj yaqha markaruw sarjjapjjäna. Yaqha markan pä mara Diosar kusisita servisajja, Mike jilatajj akham siwa: “Mateo 6:33 qellqatan Jesusan arunakapajj jikjjataski ukajj cheqäskapuniwa” sasa.

10. Diosan luratanakapata, leyinakapata lupʼiñajja, ¿kunjamsa David reyirjam yanaptʼistaspa?

¹⁰ Khä 3.000 maranak nayrajja, David reyejj alajjpach uñtasajj wal muspharäna. Jupasti sänwa: “Alajjpachajj Diosan qhapaq kankañap [jan ukajj ‘jachʼa kankañapwa’, Aymar Biblia] yatiyi, alajjpachajj amparanakapan luratap qhanañchi” sasa. Diosan leyinakapat amuytʼasajja akham sarakïnwa: “Tatitun arsutanakapajj cheqapawa, jaqen chuymapar machaqaptayiriwa; Tatitun arunakapajj askiwa, jan yatiñan jaqer yatiñan tukuyiriwa” sasa. Jehová Diosan luratanakapata, leyinakapata lupʼisajja, ¿kunjamas Davitajj jikjjatasïna? Jupasti sänwa: “Tatay, arsutajjajj jumar kusisiykirïpan, chuymajjan lupʼitapajj nayraqatamkam purinpan, jumaw imantasiñ qarqajjätajja, qhespiyirejjätasa” sasa (Sal. 19:1, 7, 14). Kunjamtï uñjktanjja, Davitampi Jehová Diosampejj wali sumaw apasipjjäna.

11. ¿Kunjamsa Diosan leyinakapat yatjjatasajj Diosar munasitas uñachtʼaysna? (23 janankir foto uñjjattʼam.)

¹¹ Jichhürunakanjja, Jehová Diosan taqe luratanakapat sumwa yattanjja, ukatsti amtanakapajj kunjamas phoqasiski uksa amuyaraktanwa, taqe ukanak yatiñajj mä bendicionapuniwa. Akapachanjja, jachʼa yateqañ utanakar mantañatakiw jaqenakar chʼamañchasi. Ukampis ukar sarasinjja, yaqhepajj janiw Diosar confiyjjapjjeti ni munasjjapjjarakisa. Bibliajja, janiw taqe kun yatjjatañasak maykistuti, jan ukasti yatiñ kankañanïñasatakiw chʼamañcharakistu. ¿Kunjamsa yatiñanïtas uñachtʼaysna? Jehová Diosan leyinakap yateqasinjja, ukarjamaw sarnaqañasa, ukatsti uka leyinakarjam sarnaqapjjañapatakiw mayninakarus yanaptʼañasaraki, ukhamatwa yatiñanïtas uñachtʼaysna (Pro. 4:5-7). Diosajja, “taqenin qhespiyatäñapwa muni, kunatejj cheqäki uk uñtʼapjjañaparaki” (1 Tim. 2:4). Ukhamajj ¿kunjamsa Jehová Diosar munasitas uñachtʼaysna? Jaqenakar Diosan Reinopata ukhamarak kuntï Diosajj jutïr urunakan lurkani ukanakat yatiyasaw munasitas uñachtʼaysna (Salmo 66:16, 17 liytʼañataki).

12. Jehová Diosat regalo katoqasajja, ¿kunjamsa mä kullakajj jikjjatasïna?

¹² Wayn tawaqonakajja, kunanaktï Diosajj churkistu uk wali askit uñjasaw Jupar munasipjjatap uñachtʼayapjjarakispa. Shannon kullakat parltʼañäni, kunapachatï 11 maranïskäna ukhajja, awk taykapampi ukhamarak 10 marani sullka kullakapampiw mä jachʼa tantachäwir sarapjjäna. Uka jachʼa tantachäwejj “Devoción Piadosa” sasin pʼeqeñchatänwa. Ukansti taqe wayn tawaqonakaruw yaqha cheqar qontʼasipjjañapatak mayisïna. Shannon kullakajj ajjsarayaskchïnsa, saränwa. Lo que los jóvenes preguntan. Respuestas prácticas sat libro katoqapjjäna ukhajja, Shannon kullakajj walpun muspharäna. ¿Kunjamsa ukajj Jehová Diosar jukʼamp munasiñatak yanaptʼäna? Kullakajj siwa: “Ukapachaw Jehová Diosan cheqapuni utjaskatapa ukhamarak nayar wal munasitap amuyasiyäta [...]. Jehová Diosat taqe uka suma regalonak katoqasajja wali kusisitapuniw jikjjatastanjja” sasa

13, 14. Jehová Diosan cheqañchatajj ¿kunjamsa jikjjatasiñasa?

¹³ Bibliajj akham sistuwa: “[Jehová] Tatitusti khitirutï munaski ukarojj cheqachiwa, kunjämatejj mä awkejj munat wawaparojj cheqachki ukhama” sasa (Pro. 3:12). ¿Kunjamsa ewjjanak katoqasiñasa? Apóstol Pablojj akham sasaw qellqäna: “Janipunirakiw kuna mutuyäwi katoqasas ‘Walik mutuyitojj’ sisktanti, jan ukasti usustuwa” sasa. Ukham sasinjja, ewjjanak katoqasiñajj janis wakiskaspa ukham janiw Pablojj sañ munkänti. ¿Kunatsa? Jupajj ukjjarojj saskakïnwa: “Khitinakatejj uka mutuyäwi toqe yateqapjje ukanakajj mä suma askin samarañanrakwa jakapjje” sasa (Heb. 12:11). Jiwasatï Jehová Diosar munasstan ukhajja, ewjjtʼanakap katoqasiñäniwa, janiw chuyma ustʼata jikjjataskañäniti. Ukampis yaqhepanakatakejj ewjjtʼanaka katoqasiñajj chʼamakïspawa. Ukhamajja, ¿kunas ewjjtʼanak katoqasiñatakejj yanaptʼistaspa? Jehová Diosar munasiñaw yanaptʼistaspa.

¹⁴ Malaquías profetan urunakapanjja, judionakat waljanejj janiw Diosan leyinakap sum uñjapkänti. Diosar sacrificio loqtañ toqet leyinakajj kamsänsa uk sum yatipjjäna, ukampis janiw ukarjam lurjjapjjänti, ukatwa Diosajj jupanakar cheqañchäna (Malaquías 1:12, 13 liytʼañataki). Diosajj walja kutis uka judionakar ewjjtʼkchïnjja, janiw istʼapkänti. Ukatwa Diosajj jupanakar akham säna: “Nayasti maldecipjjämawa. Kunjamatï jan taqe chuymampi jachʼañchapkistajja, ukhamarakiw nayajj maldecinï kuntï [...] katoqapkta ukanaksa” sasa (Mal. 2:1, 2). Ukhamajja, jiwasatï Diosan leyinakap yatkasin sapa kuti jan istʼksna ukhajja, jan walinakanwa uñjassna.

15. ¿Kunjamsa ewjjtʼanak katoqasiñasa?

¹⁵ Jichhürunakanjja, jaqenakajj jupanakatakikiw taqe kuns munapjje, janiw ewjjtʼanaksa, cheqañchäwinaksa katoqasirjamäpkiti. Yaqhepanakajj ewjjtʼanak katoqasipjjchi ukasa, janiw taqe chuyma katoqasipkiti. Ukampis cristianonakarojja akham sasaw Bibliajj ewjjtʼistu: “Janiy jumanakajj akapacha saräwinakarjamajja jakjjapjjamti” sasa. Ukhamasti  kunas ‘Diosan munañapajj’ ukwa amuyañasa, ukatsti ukarjamaw sarnaqañasaraki (Rom. 12:2). Jehová Diosajja, markap toqew wakiski ukarjamajj walja ewjjtʼanak churistu. Sañäni: chachanakajj janiw warminakarojj jan wali amtampejj uñchʼukipjjañapäkiti, warminakas ukhamäñaparakiwa sasaw ewjjtʼistu. Amigonak ajlliñatsa, kusistʼäwinak ajlliñatsa ewjjtʼarakistuwa. Jiwasatï uka ewjjtʼanaka taqe chuyma istʼañäni, ukarjamarak sarnaqañäni ukhajja, Jehová Diosar taqe chuyma munasitasa, yuspärataswa uñachtʼayañäni (Juan 14:31; Rom. 6:17).

16, 17. 1) Janïr kun lurañ amtkasasa ¿kunatsa Jehová Diosan yanaptʼap thaqhañasa? 2) Jehová Diosan yanapap thaqhañat sipansa, ¿kunsa israelitanakajj lurapjjäna?

¹⁶ Jiskʼa wawanakajja, jan walin uñjasisajj awk taykapan yanapapwa thaqhapjje. Ukampis marat maratjam jilsjjasinsti janiw uk lurjjapjjeti, jan ukasti jupanak pachpaw kun lurañsa amtjjapjje. Taqeniw jilsjjasin ukham lurtanjja. Ukampis khitinakatï awk taykapamp sum apasipki ukanakajja, janïr kun lurañ amtkasas awk taykaparojj jisktʼasipjjapuniwa. Jehová Diosampi jiwasampejj niya ukhamarakiwa. Jehová Diosajja, qollan ajayupampiw munañaparjam sarnaqañatak yanaptʼistu. Ukhamajja, jiwasatï Jehová Diosan yanaptʼapa thaqhañäni, munañaparjamarak kuns lurañäni ukhajja, Jupar munasitasa ukhamarak confiyataswa uñachtʼayañäni (Fili. 2:13).

¹⁷ Samuel profeta tiemponjja, israelitanakajj filisteonakamp tukjataw mä kutejj uñjasipjjäna. Ukhamajja, Jehová Diosan yanaptʼapaw wakisïna. ¿Kunsa israelitanakajj lurapjjpachäna? Jupanakajj akham sapjjänwa: “¡Jichhajj Silo sat uka cheqaru sarañäni, ukatsti Arustʼäwi Arca aptasinjjañäni, ukhamat Tatitojj jiwasampi chikäñapataki, uñisirinakasatsa arjjatañapatakiraki!” sasa. Ukham lurasajj ¿kunjamansa uñjasipjjäna? “Filisteonakasti sintipuniw jiwarayapjjatayna, israelitanakan soldadonakapasti uka urojj kimsa tunka waranqa jaqenakaw jiwarata uñjasipjjäna. Diosan Arustʼäwi Arcapsa katuntapjjarakïnwa.” (1 Sam. 4:2-4, 10, 11.) Arustʼäwi Arca apasisinjja, Jehová Diosan yanapapsa thaqhapkaspa ukhamwa israelitanakajj amuyapjjpachäna. Ukampis janiw Jehová Diosan cheqpach yanaptʼap thaqhapkänti. Jan ukasti amtanakaparjamakiw lurasipkäna, ukatwa jan walin uñjasipjjäna (Proverbios 14:12 liytʼañataki).

18. ¿Kunsa Bibliajj Jehová Diosar confiyañ toqet yatichi?

¹⁸ Salmonak qellqerejj taqe chuymaw Jehová Diosar munasïna ukhamarak confiyäna. Ukatwa akham sasin qellqäna: “Diosaruk suytʼam, wasitat jachʼañchjjäta: ¡Jupaw qhespiyirejjasa, Diosajjasa! Almajjajj llakiski ukapachajj jumat amtassma” sasa (Sal. 42:5, 6). Uka arunakajja, qawqsa salmo qellqerejj Jehová Diosar munasïna ukwa uñachtʼayi. Jumajj ¿jupjamarakit Jehová Diosar confiyta? Jumajj Diosar confiyjjpachätawa, ukampis jukʼamp confiyañatak chʼamachasiskakismawa. Bibliajj akham siwa: “Tatitur taqe chuymamampi katuyasim; juman chʼikhi kankañamarukejj jan alkatasimti. Taqe luräwinakamanjja Tatitutjja amtasipunim, ukatsti jupajj cheqa thakinjamwa irpaskätam” sasa (Pro. 3:5, 6).

19. ¿Kunjamsa Jehová Diosar munasitam uñachtʼayasma?

¹⁹ Jehová Diosaw jiwasar nayraqat munasistu, ukhamatwa kunjamsa Jupar munasiñasa uk uñachtʼayistu. Uk janipun armapjjañäniti. Ukhamajj Jehová Diosarojj ‘taqe chuymasampi, taqe almasampi, taqe amuyusampi, taqe chʼamasampi’ urut urutjam jukʼamp munasiskakiñäni (Mar. 12:30).