¿Kunjamtï Jehová Diosax mayninakar uñjki ukhamti uñjaraktanxa?
¿Kunjamtï Jehová Diosax mayninakar uñjki ukhamti uñjaraktanxa?
‘Cuerposanxa janiw jaljtañanakax utjañapäkiti, jan ukasti cuerposanxa maynis maynita llakisiñapawa.’ (1 CORINTIOS 12:25.)
1. ¿Diosan markapar makatxasaxa kunjamas jikxatasiwayta?
AKA ñanqha pachat mistxasin Jehová Diosan markapar makatxayätan ukhaxa, ¿kunjamas jikxatasiwaytan uk amttanti? Jilat kullakanakan wali munasiñampi suma katuqatäsinxa wali kusisitaw jikxatasirïpachätanxa. Ukampis ¡Supayan apnaqata akapachanxa, qhuru, jan wali amtanakani ukat nuwasiri ukham jaqinakäpxiwa! Ukhamasti Diosan markapar makatxasaxa, mä paraisorjamaw mantxtanxa, ukansti sumankaña ukat mayachtʼat sarnaqañaw utji (Isa. 48:17, 18; 60:18; 65:25).
2. 1) ¿Kunas awisax mayninakar jan sum uñjayistaspa? 2) ¿Kamachañas wakisispa?
2 Ukampis tiempompixa, janiw kunjamtï nayrax uñjkayätan ukham jilat kullakanakasar uñjxsnati. Juchan jaqïtas laykuxa, inasa pantjasitanakapxa mä lupampjam jichhax uñchʼukxsna, awisax janiw kunjamäkitix uk sum amuyxsnati. Ukham uñjasaxa, janiw kunjamtï Jehová Diosax uñjki ukham uñjxsnati. Jiwasarutï awisax ukham pasistaspa ukhaxa, kunjamtï Jehová Diosax uñjki ukham uñjañataki chʼamachtʼasiñasawa (Éxo. 33:13).
¿Kunjamsa Jehová Diosax jilat kullakanakasar uñji?
3. Qillqatanakanxa, ¿cristiano tamax kunamp sasiw sisa?
3 1 Corintios 12:2-26 qillqatanxa, kunjamatï mä cuerpox ‘taqi kunanixa’ ukhamäpkaspas alaxpachar sarir ajllit cristianonakax ukhamaw sasaw apóstol Pabloxa säna. Kunjamatï amparas kayus jan kikpäkixa, ukhamarakiw tama taypin jilat kullakanakax jan kikpäpkiti, jan ukasti sapa mayniw mayj mayjäpxi. Ukampis Jehová Diosatakix ukax askiwa. Jupax taqiniruw tama taypinxa askit uñji ukat munasi. Ukatpï Pablox ‘maynit maynix llakisipxañamawa’ sasax iwxistuxa. Ukampis qhanakiw aruxa, awisax uka iwxarjam arkañax chʼamakiwa, chiqpachansa kunapachatix mä jilatax jan ukax mä kullakax jan jiwasjamäki ukhax jukʼamp chʼamawa.
4. ¿Kunatsa chʼamachasiñasax wakisispa jan jilat kullakanakasan pantjasitanakapak uñchʼukiskañatakixa?
4 Kunjamtï sasiwaykänxa, jilat kullakanakasan pantjasitanakap uñchʼukiñaw chuymasar jutistaspa. Ukax mä jachʼa foto uñkasax mä chiqaksa uñasksna ukhamäspawa. Ukampis Jehová Diosax fotxa maypachsa uñjkaspa ukhamawa. Awisax jilat kullakanakasan pantjasitanakapakwa uñchʼukiskna, ukampis Jehová Diosax mä jaqix kunjam jaqisa kunjam chuymanisa ukanakxa sum uñtʼi. Ukhamasti, kunjamtix Jehová Diosax uñjki ukham jilat kullakanakasar uñjañatak chʼamachtʼasipxañäni, ukhamatwa tama taypinxa munasiñampi mayak sarnaqañampi utjañapatakix yanaptʼañäni (Efe. 4:1-3; 5:1, 2).
5. ¿Kunatsa mayninakarux jan taripañasäki?
5 Jucharar jaqinakan chuymapax mayninak contra parlañ tuqirux wayusipuniwa ukxa Jesusax sum yatïna. Ukatwa akham iwxäna: “Jan taripapxamti, jan taripatäpxañamatakixa” sasa (Mat. 7:1, MT). “Jan taripapxamti” sasaw säna, janiwa “janiw taripapxätati” sasax siskänti. Kunattix yaqhipanakax taripañar yatintatäpxänwa uk Jesusax yatïna. ¿Jiwasax ukham yatintatarakïtanti? Ukhamästan ukaxa, chʼamachasipxañäni, ukhamat jan taripatäñasataki. Chiqasa, Jehová Diosan uttʼayat luqtiriparu taripañatakixa, ¿khitïtansa? Uka jilatax jan ukax uka kullakax janiw Diosan markapankañapäkiti sañatakixa, ¿khitïtansa? Mä jilatax jan ukax mä kullakax kuna tuqitsa pantjasispawa, ukampis Jehová Dios nayraqatan askit uñjatäskchi ukhaxa, janiw jiwasanakax khitïktansa uñamnukuñatakixa (Juan 6:44). Jehová Diosaw markapxa irpaski, askichañ wakisini ukhaxa jupaw horasapar askichaskani, ¿jan ukax janiw ukhamäkanit sasach amuyta? (Romanos 14:1-4 liytʼasiñapawa.)
6. ¿Jehová Diosax luqtirinakapatxa kuns yati?
6 Kunjamsa sapa maynix jichhakam Jehová Diosar yupaychaski ukxa jupax sum yati. Ukat Jehová Diosax jutïrin jupar luqtirinakax kunjamänis uksa yatirakiwa, mä arunxa, kunapachatï maynix paraison jan juchanïxani ukhax kunjam jaqirus purispa uksa yatirakiwa. Ukhamasti janiw pantjasitanakas mayak uñchʼukkiti. Kunjamtix Salmo 103:12 siskixa, “kamisatix inti jalsut inti jalantkam wali jayaxa, ukhäm jiwasanakat juchanakas jayarstʼayistu”. ¡Walpun ukhamätapat yuspärtanxa! (Sal. 130:3.)
7. Kunjamtix Jehová Diosax Davitar uñjkäna ukatxa, ¿kuns yatiqtanxa?
7 Mä jaqix kuna askinaksa luri ukanak mayaki uñjañ munaspa ukhaxa, Jehová Diosax ukhamwa uñjaspa sasaw qhanpach Bibliax uñachtʼayistu. Amuytʼañataki, kamsänsa Diosax David tuqitxa uk uñjañäni: “[Davitasti] mandamiento arunakaxaruxa phuqhawayiwa, ukhamarak taqi chuymaw arkarakitäna, jupan luratanakapasti chiqapänwa nayan nayraqataxanxa” sasa (1 Rey. 14:8). Kunjamtix yatktanxa, Davitax walja juchanakaruw purtʼasïna. Ukampis Jehová Diosatakix chiqa chuymanïnwa ukat Davitan suma sarnaqatapwa uñjäna (1 Cró. 29:17).
Kunjamatï Jehová Diosax jilat kullakanakasar uñjki ukham uñjapxañäni
8, 9. 1) ¿Kunsa Jehová Diosat yatiqassna? 2) ¿Kuna amuytʼäwimpis sum amuytʼsna, ukat kunsa yatichistu?
8 Jehová Diosax maynin chuymapxa yatiwa, ukampis jiwasax janiwa. Ukatwa jaqi masisarux jan taripañasäkiti. Mayninakax kunjam amtanisipkchisay ukxa janiw jiwasax yatktanti. Ukhamasti, Jehová Diosat yatiqasiñasatakiw chʼamachasiñasa, janiw jilat kullakanakasan pantjasitanakap uñchʼukiskañasakiti, kunattix tiempompix chhaqtxaniwa. ¿Ukhamax janit ukham lurañax wali askïkaspa? Ukhamatwa jilat kullakanakasan sum sarnaqasipxañapatakix wal yanaptʼañäni (Efe. 4:23, 24).
9 Uk amuytʼañatakix mä mirqʼi utat parltʼañäni. Uka utan canaletapas jalaqtata, ventananakas qʼal tʼuxsuta, ukat uta techotsa inak umax chʼaqaniski. Ukham uñjasaxa waljanix uka utax allinuqañäxaspaw sasaw sapxaspa. Ukampis yaqha jaqix purinisinxa, janiw ukham amuykarakiti. Kunattix jupax janiw anqatak uñkatkiti jan ukasti manqhax kunjam lurtʼatas uk amuytʼi ukat kunjamatsa wasitampi sumaptayaspa ukwa amuytʼaraki. Ukatxa, uka ut alañ amti, ukat chʼamachtʼasisax uka utwa wasitat askichsu ukhamat suma utaptayi. Ukhamäxipanxa uka uta jakʼa pasirinakax wali suma utaw sasaw jichhax sisxapxi. Uka uta sumaptayañatak chʼamachtʼaski uka jaqit yatiqasiñaxa, ¿janit askïkaspa? Jilat kullakanakasarux janiw patxatak uñjañasäkiti, jan ukasti kuna askinakas jupanakan utji ukanakwa amuyañasa, kunjamsa jutïrin Diosar luqtaspa uk amuytʼañasawa. Ukhamatwa, kunjamtï Jehová Diosax askinak luratap laykux munaski, ukham jiwasax munasirakiñäni (Hebreos 6:10 liytʼasiñapawa).
10. ¿Kunjamsa Filipenses 2:3, 4 jikxataski uka iwxax yanaptʼistu?
10 Tama taypin sum sarnaqapxañapatakiw apóstol Pabloxa Filipos markankir cristianonakar suma iwxa churäna. “Jan kunsa lurapxamti purapat chʼaxwasaxa, ni jachʼa jachʼa tukuñ munasasa, jan ukasti altʼat chuymampi lurapxam, maynit mayniru uñjasipxam, maynix jupat jukʼamp sumäkaspas ukhama. Janiraki khitis thaqpati jupatakiki askïkis ukxa, jan ukasti kunatix mayninakataki askïki uka thaqarakpan” sasaw säna (Fili. 2:3, 4). Jilat kullakanakasar sum uñjañatakixa altʼat chuymanïñaw yanaptʼistu. Jupanakat llakisiñäni ukat kuna askinaktï lurapki ukanak nayraqat uñjapxañäni ukhaxa, kunjamtï Jehová Diosax uñjki ukham uñjañax janiw chʼamäkaniti.
11. ¿Jichhax yaqhip tamanakaxa kunjamäxisa?
11 Aka qhip qhipa urunakan kuna jan waltʼäwinakatix pasaski ukanakax yaqha markar sarxapxañapatakiw waljanir wiyti. Ukhamasti yaqhip jachʼa markanakaruw taqi markanakat aywthapisipki. Ukham yaqha markat jutirinakaxa chiqa yatichäwinakatsa yatiqasipkarakiwa ukat jiwasjamarakiw Jehová Diosar yupaychasipkaraki. Chiqpachansa jupanakax “taqi markanakata, kunayman janchini, ukhamarak taqi casta parlani” ukhamäpxiwa (Apo. 7:9). Ukhamasti walja tamanakanwa yaqha markat jutir jilat kullakanakax utji.
12. ¿Kunjamsa jilat kullakanakasar uñjañasa, ukat kunatsa awisax chʼamäspaxa?
12 Ukhamïpanxa, jilat kullakanakasar sum uñjañatakixa jichhax jukʼampi chʼamachasiñasaw wakisispa. Janipun Pedron iwxapxa armapxañäniti, ‘jilat kullakanakamaru chiqpach munasipxam’ ‘maynit maynikam taqi chuyma munasipxam’ sasaw säna (1 Ped. 1:22). Ukampis ukham taqi markat mistsusin maynit maynikam munasiñax awisax chʼamakïspawa, kunattix janiw kikpa markasatäkaspati, janiw jiwasjam jakasirïkaspati, escuelar sarañ tuqitsa, qullqi tuqitsa janirakiw jiwasjamäkaspati. ¿Awisax kunatsa jan nayjam amuyapki sirïtati? ¿Jan ukax kunatsa mayj luri sirïtacha? Jupanakax inas ukham jumat sapxarakchi. Ukhamïpansa taqiniw aka kamachirux phuqañasa: “[Taqi] jilatanakarusti munapxarakim” sasa (1 Ped. 2:17).
13. ¿Kunatsa wakisispa jilat kullakanakasat sum amuyxañasaxa?
13 Jan sum amuykstan ukhaxa, inas taqi jilat kullakanakasar munasiñatakixa sum amuyxañax wakischispa. “Janiw nanakanxa kʼullkʼthapitäpktati [nanakax munasipxsmawa], jan ukasti jumanakan chuymanakamanwa kʼullkʼthapitäpxtaxa [jumanakkamaw jan munasipktati]. Ukhamasti ukhamat ukhama kuttayañatakisti (wawanakarjamaw parlapxsma) jumanakax chuymanakamxa jitjayasipxarakim [“taqinir munasipxarakim”, NM]”, (2 Corintios 6:12, 13, MT). Yaqhipanakax akham sapxiwa: “Jupanakarux suma nayrampiw uñjaskta, ukampisa...”, ‘akham akhamäpxchixaya’ sasaw uka yaqha janchini jan ukax yaqha markat jutir jilat kullakanakasatxa arsupxi. ¿Jiwasax ukham sarakirïtanti? Ukhamax janïraw uñchʼukisiñanakxa jakäwisat apanukpachätanti. Walïspawa akham jisktʼasiña: “¿Yaqha markat jutirinakaru sum uñtʼañatakix chʼamachassti?” sasa. Ukham amuykiptʼasiñäni ukhaxa, yaqha markat jutir jilat kullakanakasarux kunjam munasiñasäkitix ukhamwa munasxarakiñäni.
14, 15. 1) Nayrax mayjsa amuyasipkchïnxa, ¿khitinakas jan wali amuyunakapxa apanukxapxäna? 2) ¿Kunjamatsa jiwasax ukham luraraksna?
14 Kunjamsa yaqhip jaqinakax chiqañchatax sum amuyxapxäna uka tuqitwa walja chiqanakan Biblianx parli. Apóstol Pedrot amtapxañäni. Jupax nayrax judío jaqjamax janiw yaqha markankir jaqin utaparux kunäkipansa mantkasapänti. Ukampis amuytʼapxañäni, jan circuncidata Cornelio chachan utapar sarañataki jupar mayiskän ukhax kunjamakis jikxataspachäna. Ukat Diosan munañap amuyasaxa, janiw nayrjam amuyxänti, kunattix yaqha markankir jaqinakas cristiano tuqirux makatxapxañaparakikïnwa (Hech. 10:9-35). Sauloxa ukhamarakiw nayra amuyunakapxa apanukxäna, janiw nayrjam jiskʼachirïxänti. Jupa pachpaw kunjamsa cristianonakarux nayrax uñisïna uka tuqit arsüna, nayax ‘wali qhurukankañampiwa Diosan tamapar arknaqayäta, tukjañ munayäta’ sasaw säna. Ukampisa, Jesusax chiqañchäna ukhaxa, janiw nayrjam amuyxänti ukat nayrax uñiskäna uka jilatanakatwa kunjam lurañapasa uksa katuqxäna (Gál. 1:13-20).
15 Jehová Diosan qullan ajayupan yanaptʼapampix jan wali amuyxa apanuksnawa. Ukhamasti, jan wali amuyunaka jan ukax jiskʼachasiñanaka utjaskakchistu ukaxa, apanukxañataki chʼamachasipxañäni ukhamatwa ‘tʼaqanuktañasa’ jan utjkaniti, ‘jan ukasti mayakïpxañäniwa’ (Efe. 4:3-6). Bibliax “wali munasiñanïpxam —sistuwa—, munasiñasti mayaruw tukuyi, taqi kunsa phuqharakiwa” sasa (Col. 3:14).
Yatiyir sarkasax Jehová Diosat yatiqasipxañäni
16. ¿Jaqinakan kun lurapxañapsa Jehová Diosax muni?
16 Apóstol Pablox akham sänwa: “Diosax janiw yaqha yaqha uñjkiti jaqiruxa, jupatakix taqi jaqis mayakiwa” sasa (Rom. 2:11). Taqi markankir jaqinakax mayaki jupar yupaychapxaspa ukwa Jehová Diosan muni (1 Timoteo 2:3, 4 liytʼasiñapawa). Ukatwa, “taqi jaqinakaru yatiyañataki, taqi markanakaru, taqi casta jaqinakaru, kunayman parlani jaqinakaru” suma yatiyäwinak yatiyasiñapatakix khiti (Apo. 14:6). Ukat Jesusax akham sarakïnwa: “Yapusti aka uraqiwa” sasa (Mat. 13:38). ¿Jumatakisa familiaranakamatakisa ukax kamsañs muni?
17. ¿Kunjamatsa taqi kasta jaqinakaru yanaptʼsna?
17 Diosan Apnaqäwipat yatiyañatakixa janiw taqinix yaqha jaya markanaka sarksnati. Ukampisa jaya markat jutirinakax markasan utjasipki ukanakaruw yatiysnaxa. ¿Taqi kasta jaqinakaruti yatiyasktan, jan ukax mara mara yatiyatäxi ukanakarukicha? Khitinakatix Diosan arunakap janïr istʼapki ukanakaru yatiyañaxa wali askïspawa (Rom. 15:20, 21).
18. ¿Kunjamsa Jesusax jaqinakat llakisitapxa uñachtʼayäna?
18 Jesusax taqi jaqinakar yanaptʼañwa munäna, ukatwa taqi chiqan yatichänxa. Biblianxa mä chiqan akham siwa, Jesusax “ukapachax taqi uka markana, jiskʼa markanakansa yatichasaw sarnaqäna” sasa. Ukat “walja jaqinak uñjasinsti, Jesusax jupanakatxa khuyaptʼayasïnwa” ukat uka jaqinakarux yanaptʼapxañasawa sasaw sarakïna (Mat. 9:35-37).
19, 20. Kunjamtï Jehová Diosampi Jesusampix taqi kasta jaqit llakiski, ukham llakisitasxa, ¿kunjamatsa uñachtʼaysna?
19 ¿Kunjamatsa jiwasax Jesusjam llakisitasxa uñachtʼayaraksna? Yaqhip yatiyirinakaxa, territoriopan kawkjanakantix jan sum yatiyaski uka chiqanakar yatiyañatakiw amtapxatayna. Sañäni, mercadonakana, qhatunakana, plazanakana, terminal satäkis uka chiqanakana jan ukax jan mantañjamäki uka jachʼa altus utanak nayraqatanwa yatiyapxatayna. Ukat yaqhipanakax yaqha aru parlañ yatiqañatakiw chʼamachasipxatayna, ukhamat yaqha markanakat jutir jaqinakaru yatichañataki, jan ukax pachpa markapan yaqha aru parlapki uka jaqinakar Diosan arupat parltʼañataki. Uka jaqinakax kuna arutti parlasirïpki uka arut aruntataxa, jupanakat llakisitaswa amuyapxani. Chiqpachansa janiw taqinix yaqha aru parlañ yatiqksnati, ukampis khitinakatix yatiqasipki uka jilat kullakanakarux chʼamañchtʼañasawa. Janiw uka jilat kullakanakasarux chʼam laqʼayañasäkiti, ukat jan wali amtampis yaqha markankir jaqinakarux yatiyaskaspa ukhamsa janiw amuyañasäkiti. Taqi jaqinakan jakäwipax Jehová Diosatakix wali munatawa, ukhamwa jiwasax uñjañasaraki (Col. 3:10, 11).
20 Ukat jiwasatix kunjamtï Jehová Diosax uñjki ukham jaqinakar uñjarakiñäni ukhaxa, kunjamsay uka jaqinakax jakasisipkpan jiwasax yatiyaskakiñäniwa. Janis utanïkpan, janis sum isthapitäkpan, jan ukax qʼañu sarnaqirit uñtʼatäskpansa janiw yaqhachañasäkiti. Ukham yaqha markankiritix tuqjistani jan ukax jan sum uñjkistani ukhaxa, janiw taqinis ukhamäpxaspa ukham amuyañasäkiti. Pablorux tʼaqhisiyapxänwa, ukampis uka pachp markankirinakarux yatiyaskakïnwa (Hech. 14:5-7, 19-22). Yaqhip jaqinakax yatiyäwinakarux istʼapxaniw sasaw säna.
21. Kunjamtï Jehová Diosax mayninakar uñjki ukham uñjañaxa, ¿kunjamsa jumar yanaptʼätamxa?
21 Ukhamaxa, jilat kullakanakasax yaqha markatäpasa janisa, kunjamtï Jehová Diosax uñjki ukham jupanakar uñjapxañäni. Ukhamarjam lurañäni ukhaxa, tama taypin mayachtʼata suma sarnaqasiña utjañapatakiw jukʼamp yanaptʼañäni. Ukat yaqha jaqinakarusa kunjamtix Jehová Diosax uñjki ukham uñjañasarakiwa. Ukhamatwa wakichatäñäni Jehová Diosar munasiña yanaptʼañatakixa, Jupax janiw khitirus yaqhachkiti. Jupax taqi jaqinakatwa llakisi, kunattix “jupaxaya taqi jaqirusa uskusirakchixa” (Job 34:19).
¿Kamsasmasa?
• ¿Jilat kullakasat kunjam amuyañas utjaspa?
• ¿Kunjamatsa jilat kullakanakasarux kunjamtï Jehová Diosax uñjki ukham uñjsna?
• ¿Kunjamsa yaqha markat jutir jilat kullakanakasar uñjañasa?
• Kunjamtï Jehová Diosax yaqha jaqinakar uñjki ukham uñjatasxa, ¿kunjamatsa uñachtʼaysna?
[Jisktʼanaka]
[28 janan fotopa]
¿Kunjamatsa yaqha markat jutir jaqinakar sum uñtʼsna?
[30 janan fotopa]
¿Taqi jaqinakar suma yatiyäwinak yatiyañatakix kamachsnasa?