¿Jiwxtan ukhaxa kawkirus sartanxa?

Teología tuqit yatxatata, Alejandriankir Clementex akham sänwa: “Almax janiw jiwkaspati, ñanqha jaqinakan almapas janirakiw jiwkaspati [...]. Ninan wal tʼaqhisipxani, janipuniw jiwapkaspati, ukhamasti inaw achiktʼasisipki” sasa (jiwatapatxa niyaw 1800 maranakäxi).

KHITINAKATIX Clemente chachjama infiernon tʼaqhisiñaw utji sasin yatichapki ukanakaxa, jaqix jan jiwiri almanïkaspas ukham amuyapxaraki. Ukampis ¿Bibliax kamspachasa? Diosan Arupax aka jisktʼanakar kunjamsa qhanañchi uk jichhax uñjañäni.

Kunapachatï Adanax juchachaskäna ukhaxa, ¿kunaw kamachani sasas Diosax säna? Janiw Adanarux mä infiernon tʼaqhisiñapataki Diosax khitkänti. Jan ukasti, Kunjamtï mä aymar Biblian siskixa, “sapüru manqʼañamsti jumpʼimampirakiw jikxatäta, kuna laqʼata luratäktatix ukar kuttañamkama, laqʼätawa, laqʼarurakiw kuttäta” sasaw Diosax satayna (Génesis 3:19). Ukhamasti Adanax janiw jan jiwir mä almanïkänti, ukhamwa aka arunakax amuytʼayistu, mä arunxa jiwxäna ukhaxa, jakäwipax ukharukiw tukusxäna.

¿Jiwasax jan jiwir almanirakïpachätanti? Uka tuqitxa Eclesiastés 3:20 jiskʼa tʼaqax akham siwa: “Taqinis mä tukuyawirukiw sarapxi; taqinis laqʼata luratäpxiwa, ukhamarakiw taqinis laqʼaru tukxapxani” sasa. Ukatsti akham sasaw apóstol Pablox qullan ajayumpi amuytʼayatax saraki: “Kunjämatix mä sapa jaqi tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi juchachasitap layku” sasa (Romanos 5:12). Ukhamasti niyakixay taqinis juchanïstanxa, taqi almanakaruw jiwañax waktʼistu.

¿Jiwatanakax kunjamasa jikxatasipxi? Diosan Arupax akham siwa: “Khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti” sasa (Eclesiastés 9:5). Ukat jaqinakax “jiwxapxi ukapachaxa, laqʼaruw tukxapxi, ukürpachaw amtatanakapax tukusxi” sasaw Salmo 146:4 jiskʼa tʼaqax qhanañcharaki. Ukhamasti jiwatanakax ‘janiw kuns yatxapxiti’, ukat ‘amtanakapas tukusxarakiwa’, mä arunxa janiw uñjapkisa, istʼapkisa ni kunsa lurapkaspati, ukhamasti, ¿kunjamaraki infiernon tʼaqhisipxaspasti?

Maysa tuqitxa janirakiw Jesucristox jiwatanakax yaqha chiqansa jakasipkaspa ukham yatichkänti; jan ukasti jiwatanakax ikisipkiwa sasaw säna (Juan 11:11-14). * Ukampis yaqhipax janiw ukham amuyapkiti, Jesusax chiqapuniw infiernot parlaskäna, ukat juchararanakax ukan tʼaqhisipxani sasaw yatichäna sasaw parlapxi. Kunjamsa Jesusax infierno tuqit yatichpachäna uka tuqit jichhax yatxatañäni.

[Qhanañchäwi]