¿Diosax may maya parlirïpachati?

DIOSAX janiw jaqinakjam may maya parlirïkiti. Jupapachpaw akham saraki: “Nayätwa [Jehová] Diosaxa, nayasti pachpakïsktwa” sasa. Bibliax akham siwa: “Janirakiw jupanxa sarir chʼiwir uñtatas utjkiti” sasa (Malaquías 3:6; Santiago 1:17). Diosamp sum apasiñatakix kunanak lurañasas uk yattanwa. Ukat Jupax arsuwayki ukxa phuqapuniniw sasin atinisiñasawa.

Yaqhipanakax Biblia liyisaxa, Diosax may maysa arskaspa ukham amuyapxi. Diosax kunanaksa nayrapachan luräna ukat jan jankʼaki askichkäna ukanak inas amtapxchi. Amuytʼañataki, nayrir cristianonaka utjkäna uka tiemponxa (siglo I), milagronak lurapxañapatakiw Diosax chʼam churäna; ukat Israel marka utjäna uka tiemponxa chachanakax janiw mä sapa warminipkänti ukat Moisesar Leyix churaskäna ukanxa samarañ uru (sábado) imapxañapänwa. Jichhax chiqpach cristianonakax janiw ukanak lurxapxiti. Uka kimsa tuqit uñjasaxa, inas akham jisktʼasiñjamächispa, ‘¿Diosax may maya parlirïpachati? ¿Ratukit mayjtʼirïpacha?’ sasa. Ukanakat amuytʼañäni.

Nayraqataxa, munasiñapana ukat chiqa kankañapansa Diosax janipuniw mayjtʼkiti. Ukat mä Apnaqäwiw jaqinakarux walja bendicionanak churani siski uka “wiñay amtäwi[pax]” janirakiw mayjtʼkiti (Efesios 3:11). Ukampis kunapachatï wakiski ukhaxa, Jehová Diosax mayjtʼarakiwa. Chiqas jiwasax ukham lurarakirïtanwa. Sañäni maynitï sapa kuti chuym ustʼayistaspa ukhaxa janiw juparux atinisxnati, ¿janicha?

Kunapachatï wakiski ukhaxa, Diosax luqtirinakaparux yaqha suma yatiyäwinakwa qhanañcharaki. Uk amuytʼañatakix akham sañäni: yaqha markanakat jutirinakaxa (turistas) yaqha chiqanakwa uñtʼir sarañ yatipxi, jichhax khititï jupanakar irpki uka jaqix thakin jan walinak utjatapwa amuyasi. ¿Kamachpachänisa? Yaqha thaknam sarañäni sasaw sani. Jichhax ukham yatiyasaxa, ¿kawkirutï sarapxañapäki ukarux janiw puripkaniti sasmati? Janiwa. Qalltan kimsa tuqit parlkayätan ukarjamaxa, Jehová Diosax uka irpir jaqix lurkäna niya ukham luraraki. Uk sum amuytʼañatakixa, mayat mayat uñakiptʼañäni.

¿Kunatsa milagronak lurañax tukusxi?

Qalltañatakix aka jisktʼar nayraqat qhanañchtʼañäni: ¿kunatsa Jehová Diosax apostolanakar milagronak lurapxañapataki chʼam churpachänxa? Israel markapar qhispiyañatakixa, Diosax milagronak lurapunirïnwa, ukat uka milagronakax Israel markax chiqpach Diosampïskatap uñachtʼayañatakïnwa. Egipto markat israelitanakar irpsuniñataki, wasar pampan jikxatasipxäna ukhax jupanakar yanaptʼañataki ukat Suma Uraqiru irpañatakixa, Diosax Moisés tuqiw chʼamap uñachtʼayäna. Ukampis israelitanakax sapakutiw jan iyasäwinïpxatap uñachtʼayapxäna, ukatwa Diosax jupanakar jaytxäna ukat cristiano tama uttʼayxäna. Ukat apostolanakaru ukhamarak mä qawqha arkirinakampiruw milagronak lurapxañapatak chʼam churäna. Ukatwa apóstol Pedrompi Juanampix nasitatpach cojokän uka jaqir qullapxäna ukat Pablox mä waynaruw jaktayarakïna  (Hechos 3:2-8; 20:9-11). Uka milagronak uñjasax walja jaqinakaw cristianor tukupxäna. ¿Jichhax kunatsa milagronak lurañax tukusxi?

Apóstol Pablox sum amuytʼañatakiw akham säna: “Wawäkasax wawjamaw parläyäta, amtäyätsa, amuytʼäyätsa. Chachäxta ukapachasti, taqi kunatix wawan luräñapäki ukx apanukxtwa” sasa (1 Corintios 13:11). Kunjamtï mä awkix wawapar jiltataparjam suma jaqïñapatak yatichkixa, ukhamarakiw tamax sum uttʼayatäñapatakixa Jehová Diosax yatichäna. Ukhamax Diosan arunakap parltʼañatak chʼam katuqapkäna, milagronak lurañataki ukat jan uñtʼat arunak parlañataki churäwi katuqapkäna ukanakax ‘tukusxänwa’, sasaw Pablox arsuwayäna (1 Corintios 13:8, MT).

¿Kunatsa chachanakax jan mä sapa warminikïpkänxa?

Diosax chacha warmitakix kuna amtanïnsa ukwa Jesusax akham qhanañchäna: “Chachax awkiparu taykaparu jaytanukusin warmipampi mayachasxani, panipasti mayakïxarakiniwa” sasa (Mateo 19:5). Kunjamtï uñjktanxa, mä jaqichäwinx paninikiw jan jaljtasa jakasipxañapäna. Ukampis Diosax janïr Israel mark uttʼaykäna ukat Moisesar janïr kamachinak churkäna ukhaxa, chachanakax janiw mä sapa warminikïpkänti, jan ukasti nayratpachapuniw ukham sarnaqapxirïtayna. Diosax janiw yaqha warminakanïpxam sasax siskänti ni walikïskiw siskarakïnsa, jan ukasti uk jan lurapxañapatakiw askichäna. Ukat kunapachatï cristiano tamax uttʼayasxäna ukhaxa, mä sapa warminikïpxañamaw sasaw Arupan qillqasxäna (1 Timoteo 3:2).

Diosax janis ukanak jankʼak askichkchixa, janiw ukhamak uñchʼukkiti jan ukasti horasaparuw askichi (Romanos 9:22-24). Kunjamtï Jesusax siskänxa, israelitanakax “wali qala chuymanï[pxatap] laykuwa” Diosax mä jukʼa tiempotaki ukham sarnaqapxañapatakix “jaytaway[äna]” (Mateo 19:8; Proverbios 4:18).

¿Kunatsa sábado urun samarañax tukusxi?

Egiptot israelitanakar qhispiykäna uka qhipatxa, Diosax sábado uru imapxäta sasaw säna, ukat Moisesar Ley churkäna ukaruw qillqayarakïna (Éxodo 16:22-30; 20:8-10). Ukampis Pablox akham sasaw Jesusat qhanañchäna, pachpa jañchipanwa “leyix kuntix siskäna ukxa tukuyawayi” ukat ‘leyirjam juchañchkistäna uka qillqatax chhaqtawayxäna’ sasa (Efesios 2:15; Colosenses 2:14, NM). ¿Kawkïr leyinaktix chhaqtayatäkäna ukamp chikat samarañ urux chhaqtxäna? Jïsa, Pablox akham sänwa: “Manqʼapxatamatsa umapxatamatsa jan khitis jumanakarux jiskʼachpati, kuntï machaq phaxsi uñsta urunaka, ukhamarak fiesta urunakansa, samarañ urunakan lurapktas ukanakatxa” sasa (Colosenses 2:16).¿Kunatsa Jehová Diosax Moisesar uka Ley qillqaypachäna qhipat uka samarañ uru chhaqtayañatakixa?

Uka tuqit Pablox akham siwa, uka Leyix “[Criston jutañapkamax] mä wawarjamaw uywawayistu”. Kunapachatï purinxäna ukhaxa, janiw “uywirin amparapankxtanti” sasa (Gálatas 3:24, 25). Ukhamax sábado urun samarañäkäna uka ley chhaqtayxasaxa, Diosax amtäwinakapan mayjtʼkaspasa janiw uk uñachtʼaykänti ukat janirakiw uka leyix wiñayatakikänti. Jan ukasti Israel markax Diosan yatichäwinakapat lupʼipxañapataki ukat Jupamp sum apasipxañapatakïnwa. Ukampis jutirpachanxa, jaqinakax janiw kunatsa tʼaqhisxapxaniti, jan ukasti Diosan markapax taqi ukanakatwa samartʼapxani ukwa uñachtʼayaskarakïna (Hebreos 4:10; Apocalipsis 21:1-4).

Atiniskañ Diosawa

Kunjamtï uka kimsa tuqit uñjawayktanxa, Diosax janiw jaqinakjam may maya parlirïkiti. Jan ukasti markapar sum uñjañataki ukat kunsa Diosax jupanakat suyi ukanak amuyapxañapatakiw Jehová Diosax walja kamachinak uttʼayatayna. Jichhürunakanxa, ukhamarakiw kamachinak uttʼayaraki.

Jehová Diosax janiw ratuk mayjtʼir Diosäkiti ukat kunas Jupamp sum apasiñatakix wakisi uk yatiraktanwa. Kuntï Jupax amtki uk phuqapuniniwa sasin taqi chuymaw atinistanxa, kunattix Jupapachpaw akham sistu: “Taqi kuntix amtkta ukanakxa lurapunïwa [...]. Uka amtanakaxsti phuqarakïwa” sasa (Isaías 46:10, 11).

[28 janan qhanañchäwipa]

Qullan ajayun yanaptʼapamp milagronak lurañaxa ‘tukusxänwa’ sasaw Pablox säna