Bibliat jukʼamp yatxatañataki

1. Diosaruw yanaptʼa mayiñasa

Italia markan jakasiri Ninfa sat warmix akham siwa: “Nayrax janïr ikintkasaw Biblia liyiriyäta. Diosan amuytʼayatätap yatiyätwa ukat uka qillqatan kunas utjpacha uk yatiñ munarakiyäta. Janis liytʼañ munirïkstxa, qalltat tukuykam Biblia liytʼañwa amtawayta. Qalltañax janiw chʼamäkänti ukampis jukʼat jukʼatxa jan amuyañjamäxänwa, ukatwa ukharuk jaytawayxta.” sasa.

JÏSA, walja jaqinakaruw Ninfarjamax pasarakispa. Ukampis kunjamtï pasir yatichäwin uñjawaytanxa, Bibliax Jehová Diosan amuytʼayatawa ukat Jupax amuytʼañaswa munaraki. ¿Kunjamats uk lursna? Qalltañatakix Diosan yanaptʼap mayisiñasawa.

Jesusan apostolanakapat amuytʼañäni. Jupanakax escuelas rabínicas sat jachʼa yatiqañ utanakarux janiw sarapkänti, ukatwa yaqhipanakax jupanakar ‘jan yatiñani ina jaqinakat’ uñjapxäna (Hechos 4:13, MT). Ukampis jupanakatakix Diosan Arup yatxatañax janiw chʼamäkänti. ¿Kunjamats uk yattanxa? Jesusax arkirinakaparux akham sänwa: “Awkixaw nayan sutixaru Qullan Ajayu khitanini [...]. Jupaw jumanakar taqi kuns yatichapxätam” sasa (Juan 14:26). Qullan ajayux Jehová Diosan jan inaktʼir chʼamapawa ukat uka chʼamampirakiw aka Uraq luratayna (Génesis 1:2). Uka chʼamampirakiw pusitunk chachanakan Biblia qillqapxañapatak amuytʼayäna (2 Pedro 1:20, 21). Jichhaxa, Diosax uka qullan ajayumpirakiw Jupan Arup yatxatañ munirinakarux yanaptʼi.

Qullan ajayump yanaptʼatäñatakixa, wali iyawsäwimpiw mayiñasa. Ukhamax mayamp mayampi mayiñaw wakisispa. Jesusax akham sänwa: “Mayipxam, Diosasti churapxätamwa” sasa. Ukat saskakïnwa: “Jumanakatix [...] wawanakamarux sumanak churirïpxstaxa, ¡qawqha jukʼamps alaxpachankir Awkimax Qullan Ajayxa churanixa mayipki ukanakaruxa!” sasa (Lucas 11:9, 13). Jïsa, khitinakatï taqi chuym mayipki ukanakarux Jehová Diosax qullan ajayup churapuniniwa. ¿Kunjamsa qullan ajayux yanaptʼistani? Mayax akäspawa, Bibliax waranq waranqa nayra maranakan qillqatäkchisa sumpach amuyañwa yanaptʼistani. Ukxaruxa, suma iwxanakaparjam sarnaqañatakix yatiñkankañanïñwa churistani (Hebreos 4:12; Santiago 1:5, 6).

Ukhamax sapa kuti Biblia liytʼkasaxa, yatichäwinakapat sum amuyañatakix Diosat qullan ajayup mayisiñamapuniwa.