Wawanakar yatichañataki

Rahab tawaqux wali amuyumpiw istʼäna

KIMSA waranqa phisqa patakani maranak jittʼañäni, ukat cananeonakan Jericó markapansa jikxatasksna ukham amuytʼarakiñäni. Uka markanxa Rahab sat sutini tawaquw jakasïna. Kunapachatï Moisesax israelitanakar Egipto markat qhispiykäna uka qhipatwa uka tawaqux yuritayna. ¿Kunjamatsa egipcionakat qhispipxpachäna uk amtastati? ¡Jehová Diosax israelitanakan pasapxañapatakiw Wila lamar quta jaljäna! Ukax wali jaya markans paskchïnxa Rahab tawaqux sum ukanakat yatïna. Uka tiemponxa radiosa televisionasa Internetasa janiw utjkänti. ¿Ukhamax kunjamatsa uk yatpachäna? *...

Chiqas yaqha markanakat sarapkäna ukat jutapkäna uka jaqinakaw kuntï Wila lamar qutan paskatayna ukanak yatiyapxpachäna. Jïsa, ukhamatwa kunjamsa Jehová Diosax israelitanakar yanaptʼäna uk wawatpach Rahab tawaqux istʼatayna. Jichhax wasitatwa israelitanakat parlir istʼaraki. Pusi tunka maranak wasar pampan sarnaqasinxa, jichhax Canaán markaruw mantapxi, ukat Diosan yanaptʼapampix walja chʼaxwanakanwa atipapxäna. Jïsa, ¡Janipuniw khitis jupanakar atipjkiti! Jichhax Jericó marka uñkatasin Jordán jawira khurkatankapxiwa.

Mä arumax pä jan uñtʼatanakaw Jericó markar mantapxi ukat Rahab tawaqun utapar puripxi kunattix jupax qurpachtʼapunirïnwa. Uka arumax Jericó marka apnaqirin khitatanakapaxa, uka pä chachar utamat irpsunim sasaw Rahab tawaqur sapxäna. Kunattix israelitanakan uñaqirinakap uka markar mantanipxatap yatipxänwa. ¿Kunsa Rahab tawaqux lurpachäni uk yattati?...

Utapar qurpachasirinakax israelitanakan uñaqirinakapätapxa Rahab tawaqux amuyänwa, ukatwa uta patar imantäna. Kunapachatï reyin khitatanakapax puripkäna ukhax Rahab tawaqux akham sänwa: jïsa akankapxänwa ukampis chʼamakthapiw sarawayxapxi sasa. Ukat akham sarakïnwa. “Arktapxma, katjapxätawa” sasa.

¿Rahab tawaqux kunatsa israelitanakar imantpachäna uk yattati?... Kunapachatï reyin khitatanakapax sarxapxäna ukhax akham sasaw israelitanakar säna: “Nayasti yattwa Diosan jumanakaru aka uraqi churatapa [...]. Nanakasti  yatipxaraktwa kunapachatï Egipto markat mistunipkta ukkhaxa, Diosasti uka Mar Rojo sat qutsa wañtʼayatapa jumanakan pasapxañamataki” sasa. Ukat Diosan yanaptʼapampi kuna chʼaxwanakansa atiptʼapxatayna uksa yatiyarakïnwa.

Hebreos 11:31 qillqatarjamaxa, Rahab tawaqux uñaqanakar imantatapatxa Jehová Diosax kusisïnwa. Ukat ‘Nayax jumanakar yanaptʼapxsmawa, ukat mirä amp suma, nänakarux khuyaptʼayapxarakitaya. Awkijaru, taykajaru, jilanakajaru, kullakanakajaru jiwañat qhispiyapxitaya’ siskäna aka arunakaparus Diosax istʼarakïnwa. Ukat pä israelitanakax akham sapxänwa: qhispiñamatakix kuntï sapkäma ukarjam phuqañamawa sasa. ¿Jichhax Rahab tawaqux kuns lurpachäna uk yatiñ munasmati?...

‘Aka wila wiskhampiw aka ventanar chinkatäta, ukat utamarux familiam jawsthapïta. Ukhamtï lurätaxa qhispipxätawa’ sasaw uñaqirinakax sapxäna. Ukat Rahab tawaqux uka arunakarjamaw phuqhäna. ¿Ukat kunas paspachäna uk yattati?...

Israelitanakax Jericó markaruw puripxi ukat israelit soldadonakax mark muytapxi. Suxta uruw amuk muytapxi, sapür mä kuti, ukampis paqallqu urunxa paqallq kutiw muytapxi ukat jachʼatwa artʼapxi. ¡Ukat markan jachʼa perqanakapax allthaptiwa! Ukampis kawkhantï wila wiskhax chinkatatäki uka chiqax janiw allthaptkiti. Jïsa: Rahab tawaqux familiapampix qhispiyasipxiwa (Josué 2:1-24; 6:1-5, 14, 15, 20-25).

¿Kuntï Rahab tawaqux lurkatayna ukanakat kunsa yatiqsna?... Jehová Diosax markap laykux kuns luräna, uka sarnaqäwinakarux sum jupax istʼäna. Ukat yanaptʼañjamäna ukhax Diosan luqtirinakaparux yanaptʼarakïnwa. Ukat Israel markamp chikaw Jehová Diosar luqtxäna. ¿Jumax Jehová Diosar luqtarakïtati?...

[Qhanañchäwi]

Jisktʼanaka:

○ ¿Rahab tawaqux kunsa wawatpach israelitanakat istʼäna?

○ ¿Uñaqir israelitanakarux kunjamsa katuqäna?

○ ¿Uka pä uñaqirinakarux kuns mayïna?

○ ¿Kuntï Rahab tawaqux lurkäna ukax Diosaruw kusisiyi sasax kunatsa sissna? ¿Kunjamsa jupat yatiqasisma?