Wawanakar yatichañataki

Jeremiasax Diosar luqtaskakïnwa

¿LLAKIMP aynachtʼata, kun lurañatakis jan chʼamanjamat awisax jikxatasta? *... Waljaniw ukham jikxatasipxäna. Jeremías waynax ukhamarakiw jikxatasïna. Jaqinakax jupat jan walinakwa parlapxäna ukat jan walinakwa lurapxarakirïna, ukampis Diosar luqtaskakïnwa. Kunatsa Diosax Jeremiasarux wal munasïna, ukat kunatsa llakimp niya aynachtʼirjamarakïna, uk jichhax uñjañäni.

Jeremiasarux janïr yurkipanwa Jehová Diosax profetäñapataki ajllitayna. Diosan markapax jan istʼasirïtap laykux janiw Diosampix suma uñjatäpkänti, ukwa Jeremiasax yatiyañapäna. Mä qhawqha maranak pasatatxa, ¿Jeremiasax kamspachänsa Diosarux uk yattati?... “¡Nayax wawasktwa, janiw parlañsa yatkti!” sasaw satayna.

Ukxarusti, ¿Jehová Diosax kamspachänsa?... Wali munasiñampiw Jupax akham sas chʼamañchtʼäna: “Jan jumax ‘wawäsktwa’ samti. Kawkirutix nayax khitkäma ukaruw jumax saräta. Kuntix nayax siskäma ukwa parlarakïta. Jan khitirus axsaramti” sasa. ¿Kunatsa Jeremiasax jan axsarañapäkäna? Kunattix Jehová Diosax akham sasaw jupar säna: “Nayaw jumampi chiktʼatäskä jumar imañataki” sasa (Jeremías 1:4-8).

Ukampis kunjamtï qalltan sisktanxa, tiempompix llakimpiw Jeremiasax aynachtʼäna, kunattix Diosar luqtatap laykuw jaqinakan jiskʼachat uñjasïna. Sapa kutiw jaqinakax nayat larusipxitu ukat jiskʼachapxitu sasaw Jeremiasax säna. Ukatwa jupax Diosat jan yatiyañ munxänti. Jupax akham sänwa: “Janiw jukʼampi Tatitut amtkxäti, janirakiw jupan sutipatsa parlkxäti” sasa. Ukampis ¿chiqpachapunit Diosat jan yatiyxäna?

Qhiparux jupax akham sänwa: “Arunakamax chuymaxanxa ninjamaw nakhantitu chʼakhanakamppacha [...]. Nayax uka ninxa pachparu imtʼañ munta, ukampis janiw imtʼañjamäkiti” sasa (Jeremías 20:7-9). Awisax axsarayaskchïnsa, Diosar wal munasitap laykux Jeremiasax Diosan munañap luraskakïnwa. Kunjamsa Diosat jan jithiqtas luqtatapat jarkʼaqatäna uk jichhax uñjañäni.

Jumanakatï jan wali luräwinakam jan apanukupkäta ukhaxa, Jerusalén markaw tʼunjatäni sasaw Jehová Diosax markapar säna, ukwa Jeremiasax yatiyañapäna. Ukat jaqinakax Jeremiasar ukham yatiyir istʼasax wal colerasipxäna, ukat akham sasaw sapxäna: “Aka jaqix jiwayatäñataki juchañchatäñapawa” sasa. Ukampis Jeremiasax akham sasaw jupanakarux achiktʼasïna: “Tatitu Diosamaruraki istʼapxam” sasa. Ukxarux jiwayapxitäta ukhax jan juchan jaqiruw jiwayasipkäta, kunattix Diosaw ukanak  yatiyañatakix jumanakan ukar khitanitu sasaw säna. Ukatxa, ¿kunas paspachäna uk yattati...?

Bibliax akham siwa: “Jilïrinakampi, jaqinakampisti sacerdotenakarux sapxarakïnwa, ukhamaraki profetanakarusa: ‘Janiw kuna juchas utjkiti aka jaqiru jiwayatäñapataki katuyañaxa, Tatitu Diosan sutipxarurakiw jiwasarux parlistu’” sasa. Jeremiasax janiw jaqinakar axsarañampix atipayaskänti, ukatwa Diosax jarkʼaqäna. Jichhax Urías sat Diosan yaqha profetapat parltʼarakiñäni, jupax janiw Jeremiasjamäkänti.

Bibliarjamaxa, Urías profetax Jeremiasjamarakiw Jerusalén contra Diosan arunakap yatiyäna. Ukampis kunapachatï Joacim reyix jupatak walpun colertʼasina ukhaxa, ¿kunsa uka profetax lurpachäna, uk yattati?... Jupax axsarayasïnwa, Diosax kuntï luram siskatayna uk janiw lurxänti, jan ukasti Egiptoruw tʼijtxäna. Ukatwa reyix Egiptot irptanipxañapatak jaqinak khitäna. Irptayanxasaxa, ¿kunsa uka qhuru reyix lurpachäna uk yattati?... ¡Mä espadampiw Urías profetarux jiwayxäna! (Jeremías 26:8-24.)

Jehová Diosax Jeremiasarux jarkʼaqänwa, ukampis ¿kunatsa Uriasarux jan jarkʼaqpachäna?... Inas Jeremiasax axsarayaskchïna, ukampis Jehová Diosar luqtaskakïnwa, janirakiw imantasir tʼijtkänti. Diosar luqtaskakiñatakiw chʼamachasïna. Ukampis Urías profetax janiw ukham lurkänti. ¿Kunsa Jeremiasat yatiqassna?... Awisax kuntï Jehová Diosax maykistu uk phuqañax chʼamäspawa, ukampis Jupar atinisiñasawa ukat istʼañasarakiwa.

[Qhanañchäwi]

Jisktʼanaka:

○ ¿Diosax kun lurañapatakis Jeremiasar ajllpachäna?

○ ¿Kunatsa Jeremiasax Diosat jan yatiyañ munxpachäna?

○ ¿Kunatsa Jehová Diosax Jeremiasarux jarkʼaqpachäna, ukat Uriasarux jan jarkʼaqpachäna?

○ ¿Kunsa Jeremiasat yatiqawayta?