Kunsa Jesusax Diosat yatichäna

“Janiw khitisa [Awkirux] uñtʼkarakiti, jan ukasti Yuqawa, khitirutix Yuqax uñachayañ munki ukarakiwa.”(LUCAS 10:22, MT)

JANÏR jaqjam yurkasaxa, Diosan jilïr Yuqapax wali jaya tiempow Awkipamp chika jakäna (Colosenses 1:15). Ukhawa, Awkipax kunjam amuyunisa, kunjam chuymanisa, ukat kunjamsa mayninakarux uñji ukanak sum uñtʼäna. Ukatwa aka Uraqinkkasaxa, Awkipar uñtʼapxañapatakix wal chʼamachasïna. Jiwasax Jesusan yatichäwinakapar istʼsna ukhaxa, Diosarux sum uñtʼaraksna.

Diosan sutipa Jaqinakax Diosan, Jehová sat sutip uñtʼapxaspa ukat aytapxaspa ukaw Jesusatakix wali wakiskirïnxa. Jesusan sutipax “Jehová Diosaw Qhispiyasiñaxa” sañ muni. Ukatwa, janïr jiwkäna uka arumax akham sasa Awkipat mayisïna: “Nayasti sutimxa jupanakarux yatiytwa” sasa (Juan 17:26, MT). Chiqansa, Jesusax Diosan sutipxa aytapunirïnwa ukat jupar istʼapkäna ukanakarus yatiyarakïnwa. Diosan sutipa ukat kuntï uka sutix sañ munki uk jan yatisasti, ¿kunjamaraki istʼirinakapast Jehová Diosat kunatï chiqäki uk yatiqapxasapänsti? *

Diosan jachʼa munasiñapa Mä kutixa, Diosat mayiskasinxa, Jesusax akham sänwa: “Awkiy, [...] jumasti janïra akapachax utjkipanwa munasista” sasa (Juan 17:24). Jesusax Diosan munasiñapatxa sum yatïna; ukatwa aka Uraqir jutkäna ukhax Diosax kunayman tuqit munasiñapa jaqinakar uñachtʼayki uk wali askirjam uñjapxañapatak chʼamachasïna.

Nayraqataxa, Jehová Diosax taqi jaqinakaruw munasi sasaw yatichäna. “Diosax akapachar wal munatap laykuw mä sapa Yuqapar khitani, taqi khitinakatix jupar iyawsapki ukanakax jan chhaqañapataki, jan ukasti wiñay jakañanïñapataki” sasaw qhanañchäna (Juan 3:16). Griego arut jaqukipatäki ‘akapacha’ siski uka aruxa janiw aka Uraqit parlkiti, jan ukasti jaqinakatwa parli. Jaqinakar wal munasitap laykuw munat Yuqapar luqtasiwayi. Ukhamatakwa jan jithiqtas luqtirinakaparux juchatsa, jiwañats qhispiyasapäna ukat wiñay jakañ suytʼäwsa churarakisapäna. Diosan munasiñapax qhawqchʼakitix ukxa janiw sumpach amuyksnati (Romanos 8:38, 39).

Ukampis Jesusax janiw ukak yatichkänti: Jehová Diosax sapa mayni luqtirinakaparus munasirakiwa sasaw yatichäna. Kunjamatix mä uwij awatirix sapa mayni uwijanakapar uñjkixa, ukhamarakiw Awkijax uñji sasaw säna (Mateo 18:12-14). Ukatxa janiw ni mä jiskʼa jamachʼis Jupan jan yatitax uraqir liwiqtkaspati sasaw qhanañchtʼarakïna. Ukat akham saskakïnwa “jumanakatxa taqi ñikʼutanakamasa mayat mayat suma jaktʼatawa” sasa (Mateo 10:29-31). Ukhamasti, Jehová Diosax mä jiskʼa jamachʼin jan tapapankataps sum yatchi ukhasti, ¿janit sapa mayni luqtirinakapat llakiskarakpacha? Ukat taqi ñikʼutanakas jaktʼchi ukhasti, ¿jan waltʼäwinakasata llakinakasata ukat kunanaktï munktan ukanakatx kunjamaraki jan yatkaspasti?

Alaxpachankir Awki Kunjamtï yatxatktanxa, Jesusax Diosan mä sapa Yuqapawa. Ukatwa, jupax “Awki” sasin sapunirïna. Bibliana, Jesusan nayrïr arunakapax jikxataski ukanxa  ‘Awkija’ sasaw qillqata, 12 maranïkasïna templonkkän ukhaw ukham säna (Lucas 2:49). Mateo, Marcos, Lucas, Juan qillqatanakanxa, Jehová Diosat parlkasinx 190 kutiw uka arux uñsti. Jesusax sapa kutipuniw akham arunak aytirïna “jumanakan Dios Awkimaru”, “nanakan Awkixa” ukat ‘Awkixa’ sasa (Mateo 5:16; 6:9; 7:21). Jucharar jaqinakas Jehová Diosampix sum apasipxaspa, ukwa ukax uñachtʼayistu.

Khuyaptʼayasiri ukat juchanak pampachiri Jucharar jaqinakjamax Diosax khuyaptʼayasistaspa uk muntanxa, Jesusax uk sum yatïna. Ukatwa, herencia tukjir waynat parlkäna ukhaxa, Diosax mä khuyaptʼayasir awkix wawapar kuttʼanitapat qhumanttʼas katuqtʼkixa ukamp sasiw sänwa (Lucas 15:11-32). Ukhamawa, Jehová Diosax kuna juchanakasats arrepentisipxañaswa muni, ukhamatwa khuyaptʼayasistaspa. ¿Kunatsa? Kunattix arrepentisirinakarux taqi chuymaw perdonañ muni. Jesusax akham sänwa: “Sapxsmawa, uka pachpawa alaxpachanx jukʼamp kusisiñax utji mä juchararan arrepientisitapatxa, llätunk tunka llätunkani aski jaqinakax jan kunats arrepientisipxañapax utjki ukanakat sipansa” sasa (Lucas 15:7). ¿Ukham khuyaptʼayasir Diosarux janit luqtañ munkasma?

Mayisïwinakas istʼiriwa Alaxpachankkän ukhaw Jesusax Jehová Diosax ‘mayisitanakar istʼirïtapa’ yatïna ukat taqi chuyma luqtirinakapax mayisipki ukhax kusisiwa (Salmo 65:2). Ukatwa aka Uraqir jutkäna ukhax Diosat mayisiñ yatichäna. “Jan inamaya arunakxa arsumti”, sasaw iwxtʼäna. Ukatxa kunanaksa Diosar mayisipxaspa uks sarakïnwa: Munañamasti luratäpan “akapachanxa, kunjämatï alaxpachana luratäki ukhama”, kunatï sapürutaki munaski uk churapxita, juchanakajatxa pampachapxita ukat yantʼanakar atipjañatakis yanaptʼapxita sasin mayisipxañapatakiw yatichäna (Mateo 6:5-13). Jehová Diosax mä munasir awkjamax Jupat jan jithiqtas luqtirinakapan mayisitanakaparux istʼiwa, sasaw sum qhanañchtʼäna (Mateo 7:7-11).

Chiqäskapuniwa: Jesusaw Jehová Diosat kunatï chiqäki ukat kunjam Diosasa uk qhanañchäna. Ukampis Jesusax janiw ukak yatiykänti, jan ukasti Uraqitakisa jaqinakatakis kuna tuqnämas Diosax amtap phuqani uks yatiyarakïnwa. Diosan Arupat yatiykäna ukhax ukatpun yatiyirïna.

[Qhanañchäwinaka]