Jan walinakax niyaw chhaqtayatäxani

KUNJAMTÏ nayrïr yatichäwin uñjawayktanxa, kunatsa jaqix jan walinak luri ukxa, Diosax Arupanwa qhanañchistu. Ukampisa, chuymasarjam amtxañasatakiw jaytarakistu, ukhamasti kunatï walïki jan walïki uk lurañax jiwasatäxiwa (Deuteronomio 30:15, 16, 19). Chiqpachansa, kunas jan walïki uk amuyasiñatakisa ukat askirjam sarnaqañatakisa walja yanapanakaw utjistu. Kunatï walïki ukarjam lurañäni ukhaxa, wali kusiskañäniwa jiwasatakisa ukat mayninakatakisa (Salmo 1:1).

Ukampisa, sapa maynis kunatï walïki uk lurañatak chʼamachasiskchisa, janiw jan walinakxa chhaqtaykaspati. Bibliax akham sasaw qhanañchistu: “Yatiñamarakiwa, qhipa  urunakanxa jan wali tiemponakaw jutani” sasa. Kunatsa ukhamäni ukxa, akham sasaw qhanañcharaki: “Jaqinakax michʼaw tukupxani, qullqi chuymaraki, jachʼa jachʼaw tukupxani, jilamp parlirinakaraki. Diosat jan wali parlapxani, awkinakaparus janiw istʼkxapxaniti, jan yäqasirïnakäpxaniwa, Diosar arkañarus janirakiw jayskxapxaniti. Jan munasiñanïpxaniwa ukhamarak jan khuyapayasiñani, arunak apnaqirinaka, jan wali luräwinakapxa janiw apanukupkaniti, wali qhurunakäpxaniwa, aski luräwinakan uñisirinakaparakïniwa. Aljantasirïpxarakiniwa, jan axsarasaw kuna jan walsa arsupxarakini, jachʼa jachʼa tukuñampi phuqhantatäpxarakiniwa, jupanakan pachpa munañanakapakwa thaqapxani Diosan munañap thaqañat sipansa. Suma Dios chuymäkaspas ukhamaw tukupxani, ukampis chiqpach Diosar arkañan chʼamapxa apanukupxaniwa. Uka casta jaqinakampix jan kunans mayachasimti” sasa (2 Timoteo 3:1-5).

Kunatï niya tukusiñampïxi ukhaw ‘qhipa urunakapäxiw’ sasin sistanxa. Ukhamasti uka profeciarjamaxa, ¿kunas niya tukusiñampïxi? Biblian aka arunakapaw uk amuytʼayistu.

Ñanqha lurir jaqinakax wiñayatakiw chhaqtayatäpxani

“Akat mä jukʼa urunakarux ñanqha lurir jaqinakax chhaqtxaniwa; jupanakar thaqkätasa, janiw jikxatkätati; llampʼu chuymaninakasti uraq katuqapxani, jilarkir sumankañampiw kusisipxarakini.” (SALMO 37:10, 11)

“Tatitux jupar munirinakarux imiwa, ñanqha luririnakarusti tʼunjiwa.” (SALMO 145:20)

Tʼaqhisiñanakax tukusxaniwa

“Jupaw artʼasir jan kunan jaqirux antutayani, yanap jan jikxatir llakit jaqirus yanapani. Jupaw tʼaqhisiñ taypit waysuni.” (SALMO 72:12, 14)

“Uraqix librëxa[niwa] tukusiña esclavöñata, Diosan wawanakapan qhispiyat jakäwipana.” (ROMANOS 8:21)

Janiw manqʼa pistʼayasiñax utjxaniti

“Taqinis jan axsarasaw jakasipxani, sapa maynirakiw samartʼasirakini uva, ukhamarak higo alin chʼiwipana.” (MIQUEAS 4:4)

“Jaqinakasti utanak utachasipxani, ukan jakasipxarakini, uvanak yapuchasipxani, uka yaputxa manqʼasipxarakini. Janiw ukanxa maynix yaqhan jakasiñapataki utachkaniti, janirakiw maynix yapuchkaniti mayninakan askipatakikixa. Markaxasti mä quqar uñtataw walja maranaka jakarakini; ajllitanakaxasti kuntix amparapampi lurasipki ukwa manqʼasipxani.” (ISAÍAS 65:21, 22)

Aka Uraqinxa taqi kunas chiqapäxaniwa

“Ukhamasti Diosax ¿janit arxatkarakispasti jupar arumay uru arnaqasipki uka ajllitanakaparusti? [...] Jumanakarusti sapxsmawa, jankʼakiw arxatani.” (LUCAS 18:7, 8)

“Tatitux aski kankañar muniriwa, arkirinakaparux janiw jaytanukkiti.” (SALMO 37:28)

“Jaqinakax yatiqapxaniwa kunatix chiqapäki ukxa.” (ISAÍAS 26:9)

“Jiwasax arsutaparjamaw suytʼasktan mä machaq uraqi, mä machaq alaxpachampi, kuntix Diosax: ‘Churapxämaw’ siskistu uka. Ukansti taqi kunasa chiqapapunïniwa.” (2 PEDRO 3:13)

Niyaw Biblian kamachinaparjam sarnaqxapxi

Taqi kuntï liytʼawayktan ukanak phuqasiñapxa taqiniw uñjañ munsnaxa. Ukampisa, ¿kunatsa ukax phuqasipuniniw sissna? Kunattix Diosan arsutanakap phuqasirxa qhanaw  uñjasiski. Khitinakatï jan walinakan sarnaqapkäna ukat qhurupkäna ukanakaxa, khuyaptʼayaña, sumankañana ukat kunatï chiqäki ukarjam sarnaqañwa yatiqawayapxi. Jehová Diosan Qhanañchirinakapaxa, Uraqpachan paqallqu millonat sipans jiläxapxiwa, ukat mayachtʼataw jakasipxi. Janiw kunayman jañchinïpxatap layku, kunayman markankirïpxatap layku ukat qullqinïpxatap jan ukax jan qullqinïpxatap laykus yaqhachasipkiti, janirakiw politicarus mitisipkiti. * Taqi ukanakaw qalltatpach jichhürunakkamax uñisisiñanakaru, chʼaxwäwinakaru ukat jaqinak jiwayañar aptʼawayi. Kunjamsa jaqinakax Diosar uñtʼasax sum jakasiñ yatiqawayapxi uk uñjasaxa, kunjamsa jutïrin Diosan arunakapax sum phuqasini ukwa qhan amuytanxa.

Ukampisa ¿kunas ukham sum sarnaqapxañapatakix yanaptʼawayi? Kuntï Isaías profetax arsuwaykäna uka arunakaw jupanakar yanaptʼawayi, ukanxa akham siwa:

“Ukapachaw qamaqimpi ovejampix suman jakasipxani, tigrempi, cabritompisti mayakiw samartʼapxarakini, vaca qallumpi leonampisti jakʼapuran jilasipxarakini, mä jiskʼa yuqall wawarakiw jupanakarux awatini. [...] leonasti mä vacjamaw pasto manqʼarakini. Wawasti cobra sat katarin putupanwa anatasini, asirunakan tapaparus amparapxa luqantarakiniwa. Nayan qullan qulluxansti janiw khiti kuna ñanqha luriris utjkaniti, kunjämatix umax qʼal phuqhantixa ukhamarakiw Tatitun yatiñapax taqi markpacharu [jan ukax Uraqpacharu] phuqhantani” (Isaías 11:6-9).

Ukanak arsusax Isaías profetax janiw jaqinakampi ukat animalanakampi suman jakasipxani sasakix siskänti, ¿kunats ukham sistanxa? Kunattix uka qillqatarjamaxa, Jehová  Diosan yatiñapax Uraqpacharuw phuqantani, ukatwa ukham sum jakasxapxani. Diosar uñtʼañax jaqinakarux Biblian kamachinakarjam sarnaqañ yanaptʼi, ukampis animalanakarux janiwa. Ukhamasti uka profeciarjamaxa, khitinakatï jan amuytʼasisa animalanakjam sarnaqapxäna ukanakaruw Biblian yatichäwinakapax Diosatakjam sarnaqañ yanaptʼi.

Pedrot amuytʼañäni. * Kunatï chiqäki uk arxatañatakiw terroristanakamp chikachasïna. Jupar yatichsupxäna uka qhipatxa, policiäpxañapataki yatichaski uka cuartelar mä bomba apantaniñapatakiw khitapxatayna. Ukampisa janïr uk lurkipanwa, katuntapxatayna ukat carcelar jistʼantapxatayna. Ukanx tunka kimsaqallquni phaxsis jistʼantatäkchïnxa, amtanakapxa arxataskakïnwa. Ukäñkamasti warmipax Jehová Diosan Qhanañchirinakapampiw Bibliat yatiqaskäna. Pedrox carcelat mistxäna ukhax Bibliat yatiqañ qalltxarakïnwa, ukaw sum sarnaqañataki ukat nayra amtanakap armañsa yanaptʼatayna. Pedrox akham siwa: “Terroristäkayät uka maranakan jaqi jan jiwayatajatxa, walpun Jehová Diosar yuspärtxa. Jichhaxa, kunatï chiqäki ukat sumankañäki ukanak yatiyañatakiw Diosan Arup mä espadar uñtat apnaqxta” sasa. Jupax janiw nayrjamäxiti  ukat kawkïr cuartelarutï bombampi phallayañ munkäna ukar kunaw suma yatiyäwinak yatiyir saräna. 

¡Jaqir yanaptʼañatakixa, Bibliax wali chʼamanipuniwa! Jan walinakak lurki uka jaqinakaruxa, suma jaqïpxañapatakiw yanaptʼaspa. Ukhamasti jan walinak chhaqtayañatak arski uka arunakapxa Diosax phuqapuniniwa. Ukat qʼal chhaqtayañatakixa, Supayaruw tukjani, kunattix Supayaw taqi jan walinak utjayi ukat aka uraqpachs apnaqi. Kunjamtï Bibliax siskixa, ‘taqi aka uraqpachax Supayan munañapankiwa’ (1 Juan 5:19). Ukampis niyawa Supayax tukjatäni ukat jupamp chikasti, jan wali luräwinakap jan apanukuñ munapki ukanakaw tukjatarakini. Uraqin jan walinakax chhaqtxani ukhaxa, ¡jakañax wali kusiskañapunïniwa!

¿Uk phuqasir uñjañatakix kun lurañas wakisispa? Amtapuniñäni, Jehová Diosan yatiñapaw jaqin sum jakasipxañapataki yanaptʼaski, ukat jutïrinxa Uraqpachanwa ukham suman jakasxañäni. Jumatï Bibliat yatiqäta ukat yatiqatamarjam kunjamtï Pedrox lurkäna ukham sarnaqäta ukhaxa, inas mä suma “machaq uraqin” jakasirakchisma (2 Pedro 3:13). Ukhamasti, tiempo utjkipan Diosaru ukat Jesucristor uñtʼañatak chʼamachasim, ukhamatwa wiñay jakañ jikxatarakïta (Juan 17:3).

[Qhanañchäwinaka]

[9 janan qhanañchäwipa]

Jumax mä suma “machaq uraqin” jakasirakismawa (2 PEDRO 3:13)