¿Adanamp Evampin juchachasiñap Diosax yatpachänti?

WALJA jaqinakaw uka tuqit yatxatañ munapxi. Kunatsa Diosax tʼaqhisiñanak utjaypächa, ukat juchax kawkhatsa jutpacha uka tuqinakat parlkasaw ukham jisktʼasipxi. “Diosax niyakixay taqi kuns yatchixa, ukhamax Adanamp Evampin juchar puriñapxa yatpachänwa” sasaw sapxi.

Ukax chiqäkaspas ukham jichhax amuytʼañäni. Adanampir ukat Evampir juchar puripxañapataki lurasaxa, jan sinttʼasiri, qhuru ukat kʼari chuyman Diosätapwa uñachtʼayaspäna. Chiqansa, nayra awk taykasar jan walir puripxañapataki luraspäna ukhaxa, jan wali amtanïkaspas jan ukax jan amuyasir Diosäkaspas ukham amuyañjamäspänwa. Ukatxa, jaqinakax jupan juchapatsa kunayman jan walinakan tʼaqhisksna ukhamäspänwa.

Ukampis ¿ukax chiqäpachati? ¿Jan wali amtampit Diosax jaqinakar lurpachäna? Qullan Qillqatanakax Dios Awkisatsa luratanakapatsa kamsisa uk yatxatañäni.

“Taqi [kunan] sumätapwa uñjäna”

Taqi kun lurañ tuktʼayxasasa ukat Adanampir Evampir lurxasasa, ¿kamsänsa Jehová Diosaxa? Génesis librox akham siwa: “Diosasti taqi kuntix lurkän ukanakan sumätapwa uñjäna” sasa (Génesis 1:31). Ukhamasti nayra awk taykasax aka Uraqin jakasiñapataki wali suma lurtʼatäpxänwa, janiw juchanïpkänsa. Jupanakax kunjamtï Jehová Diosax munkäna ukhamarjama jakañapatak luratäpxänwa. Ukatxa, “jupar uñtasitwa usküna” (Génesis 1:27). Niyakixay Jehová Diosar uñtasitäpxchïnxa, jupanakax yatiñani, chuymatpach munasiñani, chiqapar taqi kun uñjiri ukat khuyaptʼayasiri ukham luratäpxänwa. Jupanakatï askirjam sartapxaspänxa, Jehová Diosar yuspäratanakapwa uñachtʼayapxaspäna. Ukat suma amtanakar purisaw kusisit jakasipxasapäna, alaxpachankir Dios Awukirus kusisiyapxarakispänwa.

Ukatxa, amtanakaparjam sarnaqirwa Diosax Adanampir Evampir lurarakïna. Janiw yaqhan apnaqañ maquinar uñtasitäpkänti. Ukhamasti, chuymanakaparjam sarnaqir luratäpxänwa. Jïsa, janiw khitis pä chuymakix yaqhanakampi istʼayasiñ munktanti. Jan ukasti, munasiñata jan ukax taqi chuym istʼayasiñ muntanxa. ¿Janit Jehová Diosax ukham istʼayasiñ munkarakpacha? Sapa maynis chuymaparjam amuytʼasisin jupar istʼapxaspa ukwa muni (Deuteronomio 30:19, 20).

Diosax chiqapawa ukat askirakiwa

Jehová Diosat Bibliaw sum qhanañchistu, Jupax juchatsa jan walinakatsa wali jayankiwa sasaw saraki. Salmo 33:5 qillqatax akham siwa: “Tatitux askimpir chiqapampiruw munasi” sasa. Ukhamarus Santiago 1:13 qillqatax akham sarakiwa: “Janiw [khitis] amuyañapäkiti Diosas yantʼkaspa ukhamxa. Diosasti janiw kuna jan walimpis yantʼkiti, ni khitirus yantʼar puriykarakiti” sasa. Ukhamarus jupax munasiñatwa ukat chiqapa Diosätapatwa akham iwxäna: “Aka huerton taqi quqanakat manqʼasïta, ukampisa aski ukhamarak ñanqha yatiñ churir quqatxa janiw manqʼätati. Uka quqan achunakapxa jan manqʼamti, manqʼäta ukapachasti chiqpachan jiwäta” sasa (Génesis 2:16, 17). ¿Amuytanxaya? Jiwañampi jakañampi ajllisipxam sasaw Jehová Diosax Adanampir Evampir säna. Ukampis jupanakan juchachasipxañap yatispäna ukhaxa, ¿kuna askirakispänsti uka iwxanak churañasti? ¿Inamayäspänxaya? ¿Ukham sasax janit Diosax mä kʼari  ukat uñisiri ukhamäkaspäna? Diosax janipuniw Adanampir Evampirux kunsa inamayakix munaykaspänti. Jupax “askimpir chiqapampiruw munasi”.

Diosax wali munasiriwa sasaw Bibliax qhanañchi (Salmo 31:19). Ukat Jesusax sarakïnwa: “¿Utjaspati jumanak taypinxa maynixa, kunapachatix wawapax tʼantʼa mayispa ukatsti awkipax qalak churaspa ukhamaxa? ¿Jan ukax kunapachatix wawapax chawlla mayi ukkhax awkipasti mä asiru churaspati? Jumanakax ukham jan walïkasinsa, sumäkis ukwa wawanakamarux churapxtaxa. ¡Alaxpachankir Awkimasti ukatsa jukʼampiwa khitinakatix jupar mayki ukanakar sumanaka churañatakixa!” sasa (Mateo 7:9-11). Kunjamtï aka qillqatanakax amuytʼaykistuxa, Jehová Diosax wali ‘sumanakwa churistu’. Adanampir Evampir lurtʼasax mä suma paraison jakasipxañapatakiw uchäna. Ukhamasti kunja munasirisa ukat waxtʼasirisa ukwa taqi ukanakax uñachtʼayistu. Ukampis ¿aptʼasipxañapatakix taqi ukanak churaspänti? Chiqasa, Adanampi Evampin juchachasitapatxa janiw Jehová Diosax juchanïkiti.

Jupa sapakiw wali yatiñanixa

Maysa tuqitsti, Jehová Diosatxa Qullan Qillqatanakax akham sistuwa: “Jupa sapa[kiw] yatiñ kankañani” sasa (Romanos 16:27). Ukatxa, angelanakapasa Diosan wali yatiñanïtapxa sum yatipxaraki. Kunapachatï Diosax aka Uraqin taqi kuns lurkäna uk uñjasaxa, wal ‘kusisipxäna’ (Job 38:4-7). Ukhamarusa, kunas Edén paraison pasaskäna ukanak sum uñjapxäna. Ukhamax ak amuytʼañäni, Diosax alaxpachsa aka Uraqsa wali sum lurtʼasin jaqinakar jiwañapatakiki luraspäna ukhaxa, ¿kuna askïspänsa? ¿Qullan agelanakax kamsapxakispänsa? Juchar puripxañapatakik Adanampir Evampir luraspäna ukhaxa janipuniw walïkaspänti.

Ukat yaqhipax akham sasaw jisktʼasipxaspa: “Diosax niyakixay taqi kuns yatchixa, kunanakas pasañapäna ukanakxa sumwa yatispäna” sasa. Jïsa, Diosax taqi kunsa yatispawa, “taqi kunan tukusiñapsa, qalltatpach” yatispawa (Isaías 46:9, 10). Ukampis ¿taqi kun yatiñatakiti chʼamachasi? Janiwa. Sañäni, jupax taqi chʼamanïkchisa, janiw taqi kun lurañatakipuni uka chʼamapxa apnaqkiti. Ukhamasti, wali yatiñani Diosaxa, kunsa yatiñ munaspa ukxa ajlliwa. Ukat kunanak yatiñas wakisi ukanakakwa yatiraki.

Uk amuytʼañatakix jiwaspachat amtañäni, pelot anatirinakat grabat mä video uñtañ muntan ukhaxa, jiwasatäxiw qalltatpach uñchʼukiñasa, jan ukax tukuyaruki uñtasiñasa, ¿janicha? Ukampis niya taqiniw qalltatpach uñchʼukiñ yattanxa, ukhamat kunas pasaski uk sum yatiñataki. Jehová Diosampix niya ukhamarakiwa, jupax janiw kunjamas Adanampi Evampi tukuyani ukak yatiñ munkänti, jan ukasti, kunjamas qalltapxäna ukat kunanakas pasani ukanak sum “uñjañ” munäna.

Amtañäni, kunapachatï jaqinakar lurkäna ukhaxa, janiw maquinanakar uñtasit lurkänti. Jan ukasti, kuna lurañsa jupanak amtapxaspa ukwa wali yatiñani ukat wali munasir Dios Awkisax munäna. Ukat Adanampi Evampix Jupar istʼapxaspäna ukhaxa, qhawqsa Diosar munasipxäna ukat yuspärapxäna ukwa uñachtʼayapxaspäna. Ukat ukham lurasax jupanakas Jehová Diosas wali kusisitaw jikxatasipxaspäna (Proverbios 27:11; Isaías 48:18).

Jehová Diosax janiw jutïritxa taqi kunpun yatiñ munkiti. Qullan Qillqatanakanxa qhanaw ukax uñachtʼayasi. Abrahamat amtañäni, niya wawapar luqtañampïkäna ukhaxa, akham sasaw Diosax jupar säna: “Jichhasti yattwa Diosar axsaratama, janirakiw ‘Janiw’ sisktati sapa wawama nayar luqtaniñxa” sasa (Génesis 22:12). Ukhamarusa, jaqinakar jan walinak lurir uñjasaxa walja kutiwa ‘chuym usuyasi’ sasaw Bibliax saraki. Ukampis jutïrit  taqi kun yatispa ukhaxa, janiw chuym usuyaskaspati (Salmo 78:40, 41; 1 Reyes 11:9, 10).

Ukhamasti, wali yatiñani Jehová Diosax janiw Adanampin Evampin juchar puriñapxa janiräkipan yatkänti. Mä arunxa, wali yatiñani Luririsaxa, janiw taqi kunpun qalltatpach yatiñ munkänti. Ukat kunarus puripxani uk sum yatkasin luraspäna ukhaxa, janiw kuna askïkaspänsa.

“Diosax munasiñawa”

Chiqansa, Supayan aptʼataw Adanampi Evampix Diosar kutkatapxäna, ukhamatwa tʼaqhisiñasa juchas ukat jiwañas utji. Uka Supayax “jaqi jiwayiriwa” ukat “kʼarin awki[pawa]” sasaw Bibliax qhanañchi (Juan 8:44). Jïsa, wali munasir Qullan Awkisax jan wali amtanakampis jaqir lurkaspa ukhamwa uka Supayax amuyayañ munistu. Pacha Diosas Adanampir Evampirux juchar puripxañapatakix aptʼkaspa ukham amuyañaswa muni.

Ukampis nayra awk taykasan juchar puriñapxa, ¿kunatsa Jehová Diosax qalltatpach jan yatkpachäna? Kunattix Jupax wali munasiriwa. 1 Juan 4:8 qillqatanxa, “Diosax munasiñawa” sasaw qhanañchi. Ukat khititix munasiñanïki ukax mayninakan askipwa thaqhi. Ukhamasti, Adanampi Evampix wali sum sarnaqasipxaspa ukwa Jehová Diosax munäna.

Ukatxa, aski amtanakar purisin sum sarnaqasipxaspa ukwa wali munasir Diosax Awkisax munäna, janiw jan juchani wawanakapat pächaskänti. Maysa tuqitxa, kusisit jakasipxañapatakix taqi kun churäna ukat sum sarnaqapxañapatakis kamachinak jaytawayarakïnwa. Aka wawanakax taqi chuymaw nayar luqtapxitani sasaw sispachäna. Qhipatxa, ukhamaw pantjasir jaqïkasas yaqhipax Jupar taqi chuym luqtapxäna ukat istʼapxarakïna. Mä qhawqhanix akanakäspawa: Abraham, Job ukat Daniel.

Ukampis Jehová Diosax janiw Adanampin Evampin juchar puritapxa ukharuki jaytkaniti. Jan ukasti, taqi kunwa askichani. Jesusax akham sänwa: “Diosatakix janiw [kunas] chʼamäkiti” sasa (Mateo 19:26). Ukat niyakixay wali yatiñani, taqi chʼamani, taqi kunsa chiqapar uñjir ukat wali munasir Diosächixa, kunatix wakiskani ukanakxa phuqapuniniwa (Apocalipsis 21:3-5).

Ukhamasti, kunapachatï Jehová Diosax nayra chacha warmir lurkäna ukhaxa, janiw juchar puripxañapxa yatkänti. Ukat jan istʼasisin jan walinakan uñjasipxäna ukhaxa, wal chuym usuyasïna. Ukampis uka jan walinakax qhipat tukusiñapänwa. Kuntï Diosax aka Uraqitakisa jaqinakatakis amtkäna ukanakax phuqasiñapänwa. Ukampis ¿kunjamatsa phuqasini? ¿Ukat bendicionanak katuqañatakix kunanak lurañas wakisispa? Jumatix ukanakat jukʼamp yatxatañ munsta ukhaxa, aka tuqit yatxataskakiñamawa. *

[Qhanañchäwi]

[14 janan qhanañchäwipa]

Adanampi Evampix janiw maquinar uñtata luratäpkänti

[15 janan qhanañchäwipa]

Adanampi Evampix Diosar istʼapxaspänwa