Biblian yatichäwinakapa

¿Kunatsa Diosat yatxatañasa?

Aka yatichäwixa, kawkïr jisktʼanaktï jumax jisktʼasirïta ukwa pachpa Bibliamampi yatxatañ yanaptʼätam. Jumatï munsta ukhaxa, Jehová Diosan Qhanañchirinakapampiw aka jisktʼanakat yatxatasma.

1. ¿Kunatsa Diosat yatxatañasa?

Jaqinakatakix Diosax mä suma yatiyäwiniwa. Uka suma yatiyäwixa Diosan Arupanwa jikxatasi. Jïsa, Bibliaxa Alaxpachankir Awkisas mä carta apayankistaspa ukhamawa. (Jeremías 29:11 liytʼäta.)

2. ¿Kuna suma yatiyäwinis Diosax jiwasatakixa?

Akapachankir apnaqirinakatxa janiw khitisa chʼaxwäwinaka, usunaksa ukat jiwañsa chhaqtayawaykiti, janirakiw chiqaparjam apnaqawaykiti. Ukampis Diosax mä apnaqäw uttʼayani ukat kunanakatï jaqinakar jan waltʼayki ukanaks wiñayatak chhaqtayani. (Daniel 2:44 liytʼäta.)

3. ¿Kunatsa Diosat yatxatañax wali wakiskirïpacha?

Diosax niyaw jan wali jaqinakxa chhaqtayani. Ukampis janïr uk lurkipanxa millón millón jaqinakaruw jaqi masipar munasipxañapataki ukat sum jakasipxañapatak yatichasiski. Kunjamsa jan waltʼäwinakar saykatsna, kusisit jakassna ukat Diosatakjam sarnaqsna uk Biblianwa yatiqtanxa. (Sofonías 2:3 liytʼäta.)

4. ¿Khitin arunakapas Biblian qillqataxa?

Bibliaxa 66 libronakaniwa ukxa 40 chachanakaw qillqapxatayna. Nayrïr phisqa libronakxa Moisés chachaw niya 3.500 maranak nayra qillqatayna ukat apóstol Juanaw Apocalipsis librxa niya 1.900 maranak nayra qillqatayna. Ukampis ¿jupanakan amuyunakapakti qillqapxäna? Janiwa, taqinis Diosan amuyunakapwa qillqapxäna. Ukhamasti, Diosan arunakapaw Biblian qillqataxa. (2 Timoteo 3:16 ukat 2 Pedro 1:21 liytʼäta.)

¿Kunatsa ukham sistanxa? Kunattixa, Bibliax chiqpunwa kunatï jutïrin paskani uk qhanañchi, jaqix janipuniw ukham qhanañchkaspati (Isaías 46:9, 10). Maysa tuqitxa, Diosax kunjamasa ukxa Bibliax wali sumwa qhanañcharaki. Ukatxa jaqinakan jakäwip chiqañchañatakisa wali chʼamanirakiwa. Taqi ukanakatwa, Bibliax Diosan Arupapunïskiwa sasin millón millón jaqinakax sapxi. (Josué 23:14 ukat 1 Tesalonicenses 2:13 liytʼäta.)

5. ¿Kunas Biblia amuytʼañatakix wakisi?

Jesusax wali sumwa Diosan Arupat yatichäna. Aka Uraqinkkäna ukhaxa, walja jaqinakaw Qullan Qillqatanak uñtʼapxäna, ukampis kun sañs muni ukxa janiw amuyapkänti. Jaqinakan sum amuyapxañapatakixa, Jesusax Bibliat jiskʼa tʼaqanakwa aytirïna ukat sum qhanañcharakïna. Aka wakichäwix ukhamarakiw jumarux Diosan yatichäwinakap sum amuytʼañatak yanaptʼätam. (Lucas 24:27, 45 liytʼäta.)

Diosat yatxataña ukat kuna amtampis jaqir luratayna ukanak yatiqañax wali askïniw jumatakixa. Ukham Bibliat yatxatatamatxa janiw taqinis kusisipkaniti. Ukampis yatiqaskakiñamawa. Khitinakatix Diosat jukʼampi yatxatapkani ukanakaxa, wiñay jakañ katuqani sasaw Bibliax qhanañchi. (Mateo 5:10-12 ukat Juan 17:3 liytʼäta.)

Jukʼamp yatxatañatakixa, ¿Kunsa Bibliax chiqpachapuni yatichi? aka libron 2 jaljap uñxattʼäta, ukax Jehová Diosan Qhanañchirinakapan luratawa.