Kunsa liytʼirinakax yatiñ munapxi

¿Diosax mä kasta jañchin jaqinakarukit askit uñjpacha?

▪ Janiwa. “Diosatakix taqi kasta jaqis maya[kiwa]. Jupasti kuna kast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” siw Bibliaxa (Hechos 10:34, 35).

Uka arunakarjamaxa, Jehová Diosan amuyupax jaqinakan amuyunakapat sipans jilankkatapaxa qhanawa. Ukampis waljanixa, yaqha kasta jañchin jaqinakat sipansa jupa kasta jañchin jaqinakas jilankkaspa ukhamwa amuyapxi. Ukham amuyasaxa, Charles Darwin sat jaqjamarakiw amuyapxi, jupax akham sänwa: “Akat mä qhawqha tiemporuxa, [...] taqi kunansa nayrar sartasipki uka kasta jaqinakaw yaqha kasta jañchin jaqinakar chhaqtayani” sasa. Ukat ukham amuyuni jaqinakampix waljaniw yaqhachata ukat jan waltʼayat uñjasipxi, jan jupanakjam jañchinïpxatap layku.

Ukampis ¿yaqha kasta jañchin jaqinakat sipans jilanksnas ukham amuyañax walikïskpachati? ¿Kuna kasta jañchin jaqinakas yaqha kasta jañchin jaqinakat jilankapxi uk genética tuqit yatxatatanakax uñachtʼayapxiti? Janiwa, genética tuqit yatxattʼata ukat Oxford sat jachʼa yatiqañ utan yatichiri Bryan Sykes sat jaqix akham siwa: “Genética tuqit janiw kuna kasta jañchin jaqis jilanki uk yatiñjamäkiti. [...] Ukat Grecia jan ukax Italia markankir jaqinakan ADN satäkis ukax utjiti sasin sapa kutiw jisktʼapxitu, janipï utjkitixa. [...] Taqiniw maynit jutatätanxa” sasa.

Uka arunakaxa, kunjamtï Biblian siski ukarjamawa; Diosax mä sapa chacha ukat mä sapa warmi luratayna jupanakatwa taqinis jutatätanxa (Génesis 3:20; Hechos 17:26). Ukhamasti Diosatakix taqiniw igualakïtanxa.

Jehová Diosax janiw kunjam kasta jañchin jaqïtansa ukat kunjam uñnaqtʼanïtansa uk uñjkiti, jan ukasti kunjam chuymanïtansa ukwa uñji. “Jaqix uñnaqakwa uñjixa, ukampisa nayax jaqin chuymapwa yatiraktxa, ukwa uñjaraktxa” sasin Jupa pachpaw sistu (1 Samuel 16:7). Uk yatiñax wal chuymachtʼistu, ¿kunatsa? Uka tuqit amuytʼañäni.

Kuna kasta jañchin jaqïskchiñänisa, inas awisax kunjam uñtanïtansa ukamp jan conformekstanti. Ukat janirakiw kunjamats sum askichksnati. Ukampisa, suma chuymanïñasataki ukat suma amuyunïñasatakiw chʼamachassna, ukaw wali wakiskirixa (Colosenses 3:9-11). Ukat suma amuytʼasisaxa, inas yaqha kasta jañchin jaqinakat jilanksnasa jan ukax minusäksnasa ukham amuystan. Ukham amuyañax janiw Diosatakix walïkiti, ukatwa ukham amuyunak chuymasat apsuñasa (Salmo 139:23, 24).

Ukhamasti, kunjamtï Jehová Diosax amuyki ukham amuyunïñataki chʼamachasiñänixa, Jupaw yanaptʼistani. Bibliax akham siwa: “Tatitusti sumwa uñjaski taqi akapachana kunanakatix lurasiski ukanakxa, ukhamata chʼama churañataki khitinakatix chiqpacha[puni] juparu iyawsasipki ukanakaru” sasa (2 Crónicas 16:9). ¡Uk yatiñax wali kusiskañapuniwa, kuna kasta jañchin jaqïskchiñänisa, uka arunakax phuqasipuniwa!