Jan waltʼäwinakajj janiw utj-jjaniti

“JAN waltʼäwinakajj niyaw tukusjjani” sasin sapjjeristam ukhajja, ¿kamsasmasa? “Ukajj mä samkawa, uka jan waltʼäwinakajj utjakipuniniwa” sasin inas sischisma. Jan ukajj inas jan amuytʼasirïkasmas ukham uñjat amuyaschisma.

Oraqen jan waltʼäwinakajj janis tukusirjamäkchejja, tukusjjaniw sañatakejj razonanakaw utji. Ukanakjja jaqejj janiw askichkaspati. Kunatsa ukanakajj utji ukat kunjamsa ukajj chhaqtayasispa ukanakjja jaqenakajj janiw sum amuyapkiti. Wali yatjjattʼata ukat amuytʼasirit uñtʼata nayra Israel marka apnaqer Salomón reyejja, akham sänwa: “Jaqejj janiw amuytʼkaspati Diosajj lurki ukatjja, aka Oraqen kunanakatejj luraski ukatsa, maynejja uruy arumasa jan ikthapisa thaqaskpan. Jaqejj wali chʼamanaksa tukchini ukasa, janiw yatjjatkaspati; yatiñan jaqejj ‘Yattwa’ sischinisa, cheqpachansa janiw jikjjatañataki chʼamanïkänti” sasa (Eclesiastés 8:17).

Jaqenakatï jan waltʼäwinak jan askichirjamäkchejja, ¿khitirak askichaspasti? Diosaw askichani sasaw Bibliajj qhanañchi. Jupaw taqe kunatï Oraqen utjki ukanak sum sarayaski, ukanakat mayajj umawa (Eclesiastés 1:7). Jaqenakat sipansa, Diosajj taqe chʼamaniwa. Ukatwa Jeremías profetajj akham säna: “Tata, jumaw jachʼa chʼamamampi alajjpachsa, akapachsa lurtajja. Janiw jumatakejj kunas jan lurasirjamajj utjkiti” sasa (Jeremías 32:17). Diosaw Oraqsa ukat oraqen utjki ukanaks luri, ukhamajj kunjamsa jaqenakajj suma ukat jan ajjsaras jakasipjjaspa uk Jupaw sum yati (Salmo 37:11; 115:16).

¿Kunjamsa Diosajj taqe uka jan waltʼäwinak askichani? Jumajj amtpachätawa, Oraqen utjki taqe uka jan waltʼäwinakajja, mä ‘chimpuwa’ ukaw ‘akapachan tukusiñapa’ uñachtʼayi sasinwa payïri yatichäwin saniwaytanjja. Ukat Jesusajj akham sänwa: “Akanak pasir uñjapkäta ukkhajja, yatipjjam Diosan reinopajj jakʼankatapa” (Mateo 24:3; Lucas 21:31). Uka Reinojja Diosan uttʼayat mä gobiernopawa, ukaw Oraqen utjki uka jan walinak askichani. Jehová Diosajj ukanak lurañatak chʼamanïkchisa, Yoqaparuw uk lurañatak jaytawayi, jupatjja Daniel profetajj akham sänwa: “Juparurakiw munañanïñasa, jachʼa kankañasa, reinosa churatarakïna, taqe  markankiri jaqenaka, kunayman casta parlani jaqenakarakiw juparojj servipjja[ni]” sasa (Daniel 7:14).

Diosan Yoqapajja, Awkipat chʼam katoqasin aka Oraq sumaptayani ukhamat jaqenakajj jan kunar ajjsaras jakasipjjañapataki. Akat pä waranqa maranak nayrajj Jesusajj aka Oraqenkkäna ukhajja, Oraq khatatinakaru ukat yaqha ukhamanakar sum uñjañatak chʼamanïtapwa uñachtʼayäna. Mä urojja, Jesusasa ukat arkirinakapas Galilea sat jachʼa lamar qotnam botet sarasipkäna, ukhajja “jachʼa thayarakiw sartäna; mathapisti boterojj umampiw chhaqtayirjamäna”. Arkirinakapajj sustjasipjjänwa ukat jakäwip jan aptʼasiñ munasaw Jesusarojj yanap mayipjjäna. ¿Jupajj kuns luräna? “Thayarojj toqenoqänwa. Qotarusti sarakïnwa: ‘¡Amuktʼam! ¡Tʼakurarakim!’ sasa. Thayasti tʼakurjjänwa, mathapinakasti chhaqtawayjjarakïnwa.” Muspharasinsti arkirinakapajj akham sapjjänwa: “¿Khitirakïpach akasti? ¡Juparojj thayas qotas jaysakirakisä!” sasa (Marcos 4:37-41).

Tiempompejja, Jesusajj alajjpacharuw sarjjäna ukhamat apnaqerjama ukat jukʼamp chʼama katoqäna. Diosan Reinopan Apnaqerjamajja, jaqenakan suma ukat jan kunar ajjsaras aka Oraqen jakasipjjañapatakiw jan walinak chhaqtayañapa, ukatak wakichtʼatarakiwa.

Ukampisa, aka Oraqen kunayman jan waltʼäwinakjja, uñisiri ukat jupak taqe kuns muniri jaqenakaw utjayi. ¿Kunsa Diosan Reinopajj ukham jaqenakar lurani? Jesusajj “alajjpachat nina taypina chʼamani angelanakapampi jutkani ukapachajja. Diosar jan katoqerinakar mutuyiriw jutani, ukhamarak Tatit Jesucristosan qhespiyasiñ arunakapar jan istʼirinakarusa” sasaw Bibliajj qhanañchi. Cheqansa jupaw ‘aka oraqe tʼunjirinakarojj tʼunjani’ (2 Tesalonicenses 1:7, 8; Apocalipsis 11:18).

Qhepatsti “reyinakans Reyipa” Jesucristojja, Oraq khatatinakarusa ukat yaqha ukhamanakarus jupaw sum uñj-jjani (Apocalipsis 19:16). Khitinakatï uka Reinon apnaqatäpkani ukanakarojja, jan tʼaqhesis jakasipjjañapatakiw sum uñjani. Ukat chʼamapampiw kunanakatï alajjpachansa Oraqensa utjki ukanak askichani, ukat tiempsa, kunanakatï pachapar utjañapäki ukanaksa jaqenakan askipatak utjayani. Ukhamatwa Jehová Diosajj kuntï markapar siskäna ukajj phoqasini: “Jallunaksa horasaruw apayanipjjäma, oraqesa ukhamarak frutanaka achuri qoqanakasa wali sumwa achupjjarakini” (Levítico 26:4). Akapachan jan waltʼäwinakajj utjki ukar jan ajjsarasaw jaqenakajj utanakap lurasipjjani. Bibliajj akham siwa: “Utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini[wa]” sasa (Isaías 65:21).

¿Kunsa jumajj lurañama?

Aka Oraqen jan waltʼäwinakapajj chhaqtjjani ukan jakasiñjja, jumasa ukat walja jaqenakasa wal munapjje. Ukankañatakejja, ¿kun lurañamasa? “Diosar jan katoqerinaka[ru]” ukat “Jesucristosan qhespiyasiñ arunakapar jan istʼirinaka[rojj]” Diosajj tukjañwa amti. Ukhamasti kunas Diosan munañapajj uk jankʼakiw yateqañasa ukat Diosajj aka Oraq apnaqañapataki uttʼayki ukarus atinisiñasarakiwa. Ukat Jupar uñtʼañasa ukat kuntï Yoqapajj Reino toqet suma yatiyäwinak uttʼayki ukar yanapañaswa Diosajj muni.

Ukatakisti Diosan Arupat yateqañaw wakisi, ukanwa Reinon jakañatakejj kun lurañas wakisi uka mayitanakajj utji. Kuntï Bibliajj siski uk yateqañatakejja, ¿janit Jehová Diosan Qhanañchirinakapar maykasma? Jupanakajj wali kusisitaw yanaptʼapjjätam. Diosar uñtʼañataki ukat istʼañataki chʼamachasïta ukhajja, kuntï Proverbios 1:33 qellqatajj siski uk juma pachpaw phoqasir uñjäta: “Khititejj nayar istʼkitani ukajja, sumankañanwa jakasini, ukatsti janiw ajjsarayaskaniti kuna jan waltʼañanakansa”.