Altʼat chuymanïñampi ukat jachʼa jachʼa tukuñampejj mayj mayjapjjewa. Altʼat chuymanïki ukajja, janiw mayninakat jilïrïkaspas ukham amuyaskiti. Ukat kuntï lurirjamäki ukakwa luraraki.

Moisesajj pʼeqtʼirjamajj janiw jachʼa jachʼa tukkänti. Kunapachatï maynirojj pʼeqtʼirjama ajllisi ukhaw altʼat chuymaniti janicha ukajj qhan amuyasi. Khä 1800 maranakan Robert G. Ingersoll sat arstʼirejj akham sänwa: “Jilaparte jaqenakajj jan waltʼäwinakjja, aguantakispawa ukampis pʼeqtʼirjam uttʼayasi ukhaw kunjam jaqëkitï ukajj qhan amuyasjje” sasa. Uka toqetjja, Moisesajj wali yateqaskañapuniwa, jupajj wali altʼat chuymanïnwa.

Jehová Diosajja, Moisesarojj Israel marka pʼeqtʼañapatakiw uttʼayäna. Ukampisa pʼeqtʼirjam uttʼayatajj janiw jachʼa jachʼa tukkänti. Uk amuyañatakejja, kunjamsa mä kutejj herencia toqet mä jan waltʼäwi utjkän ukhajj altʼat chuymanïtap uñachtʼayäna uk uñjañäni (Números 27:1-11). Kuna amtarutï purkani ukajja, wali wakiskirïnwa, qhepatjja ukarjamaw israelitanakajj lurjjapjjañapäna.

¿Moisesajj kuns luräna? ¿Israel marka pʼeqtʼirjamajja, nayaw kunjam lurañs yatta sispachänti? ¿Yatiñaparu ukat walja maranak loqtkäna ukarukit confiyaspachäna? ¿Jehová Diosajj kuntï amuyki uk nayajj sum yatta sispachänti?

Jachʼa jachʼa tukur jaqejja ukhamwa luraspäna, ukampis Moisesajj janiw ukham lurkänti. Bibliajj akham siwa: “Moisesajj Tatituruw yatiyäna” sasa (Números 27:5). Amuytʼañäni, 40 maranak israelitanakar pʼeqtʼkasasa, Jehová Diosarojj confiyasiskakïnwa, janiw jupa pachparuk atiniskänti. Cheqas wali altʼat chuymanïnwa.

Moisesajja, nayakiw pʼeqtʼañajajja sasajj janiw siskänti. Yaqha israelitanakar Jehová Diosajj profetjam uttʼaykän ukhajja, janiw mayjtʼaskänti antisas wal kusisïna (Números 11:24-29). Kunapachatï suegropajj mayninakampi yanaptʼayasim sasin ewjjtʼkäna ukhajja, altʼat chuymampiw istʼäna (Éxodo 18:13-24). Ukat niya jiwañap jakʼajja, chʼamanïskchïnsa Jehová Diosarojj naya lanti Israel marka pʼeqtʼañapatak ajllim sasaw mayïna. Ukat kunapachatï Josué chacharu ajllisïna ukhajja, Moisesajj taqe chuymaw jupar yanaptʼäna. Ukat israelitanakarojj Josué chachaw Suma Oraqer mantañatakejj irpapjjätam ukampis jumanakajj istʼapjjañamaw sasaw ewjjtʼarakïna (Números 27:15-18; Deuteronomio 31:3-6; 34:7). Cheqansa, Diosan markap pʼeqtʼirïñajj wali askitapwa Moisesajj uñjäna. Ukampisa, pʼeqtʼirjamajj janiw askipak thaqkänti antisas mayninakan askipwa thaqhäna.

Kun lurañ yatisasa, chʼamanïsasa jan ukajj pʼeqtʼirïsasa, janiw jachʼa jachʼa tukuñasäkiti. Jehová Diosajj janiw loqtirinakapajj qhawqsa yatipjje uk uñjkiti, antisas kunjam chuymanïtansa uk uñji (1 Samuel 15:17). Jiwasatï cheqpach altʼat chuymanïstanjja, “[Jehová Diosar] taqe chuymamampi katuyasim; juman chʼikhi kankañamarukejj jan alkatasimti” siski uka ewjjtʼarojj istʼañäniwa (Proverbios 3:5, 6).

Moisesatjja, akwa yateqasiraksna: wali suma luräwsa katoqchiñäni jan ukajj mayninakjjaru pʼeqtʼañataki uttʼayatäkchiñänisa, janiw jachʼa jachʼa tukuñasäkiti.

¿Moisesjam altʼat chuymanïñasajj wakisiti? Jïsa. Altʼat chuymanïñäni ukhajja, yaqhanakatakisa wali askïniwa ukat jupanakas suma chuymampiw uñjapjjarakistani. Ukampisa, Jehová Diosajj wali munasiñampiw uñjistani ukaw jukʼamp wakiskirejja, kunattejj Jupajj wali altʼat chuymaniwa (Salmo 18:35). “Diosajj jachʼa jachʼa tukurinakarojj jiskʼachiwa, llampʼu chuymaninakarusti munasiñapanjja yanaparakiwa.” (1 Pedro 5:5.) Cheqansa, uka arunakarjamajj Moisesat yateqasisin altʼat chuymanïñasajj wali wakiskiriwa.