Bibliarjamajja, kunatï cheqapun phoqhaskani ukar taqe chuyma confiyaña sañwa muni. Diosar iyawsäwinïki ukajja, kuntï Diosajj arsuwayki ukarojj taqe chuymaw confiyi.

Jakäwipan kunanaktï lurañ amtawaykän ukanwa Moisesajj Diosan arsutanakapar iyawsäwinïtap uñachtʼayäna (Génesis 22:15-18). Jupajj Egipto markanjja, sumaw jakasispäna, ukampis ‘Diosan markapamp chika uñisitäñwa munäna, mä jukʼa tiempo juchanakan kusisiñat sipansa’ (Hebreos 11:25). ¿Jan amuytʼasisat uk amtpachäna? ¿Qhepat pesayaspachänti? Janiwa, Bibliajj akham siwa: “Kuntejj amtkatayna ukjja janiw chhaqtayaskänti, jan uñjkañ Diosarojj uñjkaspas ukhama” sasa (Hebreos 11:27). Kuntï iyawsäwip laykojj amtawaykäna ukanakatjja, janipuniw pesayaskänti.

Ukat Moisesajj mayninakan Diosar iyawsäwinïpjjañapatakisa chʼamachasirakïnwa. Amtañäni, kunapachatï faraonajj ejercitopampi israelitanakar arktapjjäna ukhajja, israelitanakajj janis kawkir imantasiñapas utjkaspa ukham amuyasipjjäna. Uk uñjasajj wali sustjataw Jehová Diosaru ukat Moisesar arnaqasipjjäna. ¿Moisesajj kamachänsa?

Wila lamar qota payar jaljtayasin israelitanakan Jehová Diosan qhespiyañapjja, janiw amuykpachänti. Ukampis Diosajj markaparojj kunjamatsa qhespiyaniwa sasaw confiyasïna, ukat mayninakan confiyapjjañapatakis chʼamañcharakïnwa. Éxodo 14:13 qellqatanjja, akham siwa: “Moisesajj jupanakarojj sänwa: ‘Jan ajjsarapjjamti, mayjankapjjakim. Jichhawa uñjapjjäta Tatitojj kuntejj lurkani jichhüru jumanakaru qhespiyañataki ukjja’” sasa. ¿Israelitanakarojj jukʼamp iyawsäwinïpjjañapatakejj yanaptʼänti? Jïsa yanaptʼänwa, Bibliajj akham siwa: “Iyawsäwi laykurakiw israelitanakajj wañäkaspas ukhama Mar Rojo sat qotjja pasapjjäna” sasa (Hebreos 11:29). Moisesan iyawsäwipajj juparusa ukat jupat yateqasirinakarusa yanaptʼarakïnwa.

Kuntï Diosajj arsuwayki ukarojj phoqhasipuniniw sasin confiyaña ukat kun lurañ amtkasasa confiyatas uñachtʼayaña. Sañäni, jiwasatï Diosan munañap taqe kunat sipans nayrar uchañänejja, kunatï jakañatak munaski ukjja, churistaniwa (Mateo 6:33). Cheqansa yänakak munir akapacharu saykatañajj chʼamäspawa; ukampis kunatï utjkistu ukampik kusisit jakasiñäni ukat taqe chuyma Jehová Diosan munañap nayrar uchañatak chʼamachasiñäni ukhajja, Jupajj kunanakatï munaski ukanakjja churistaniwa. Jupajj akham siwa: “Janiw kunapachas jaytkämati ni armtʼaskämasa” sasa (Hebreos 13:5).

Ukatjja, mayninakan iyawsäwinakap chʼamañchañatakiw chʼamachasiñasa. Amuytʼañäni; awk taykanakajja, wawanakaparojj jiskʼitäsipki ukhaw Diosar iyawsäwinïpjjañapatakejj yatichapjjañapa. Ukhamatwa jupanakajj Diosan utjatapsa ukat kunatï askïki jan askïki uksa yatipjjarakini. Ukat Diosan ewjjanakapar istʼañajj kunja wakiskirisa uksa yateqapjjarakiniwa (Isaías 48:17, 18). Ukat kunapachatï awk taykanakajj wawanakapar “Diosajj utjatapa, ukhamaraki jupar thaqherinakarojj bendecirïtapa” yatichapkani ukajj ¡wali askipunïniwa! (Hebreos 11:6.)