Kʼari parlañajja, kunatï jan cheqäki uk parlañawa. ¿Mä kutis jumajj kʼaristati? *... Cheqansa, Diosar munasiri yaqhep jaqenakajj kʼarisipjjanwa. Maynïrejj Pedro satänwa, jupajj Jesusan 12 apostolonakapat maynirïnwa. ¿Kunatsa kʼarispachäna uk yatiñ munasmati? ukhamajj jupan sarnaqäwipat yatjjatañäni.

Jesusar katuntasajja, sacerdotenakan jilïripäkis ukan utaparuw apapjjäna. Ukat chika aruma pasatatjja, Pedrojj jan khitimp uñtʼayasisaw patior mantani, ukat kawkhantï ninamp juntʼurtʼasisipki ukharuw qontʼasi. Ukat kawkïr uywat tawaqotï Pedror mantayankäna ukajj jupar uñtʼjjasajj akham säna: “¡Jumajj Galileankir Jesusampïskarakïyätasä!” sasa. Pedrojj sustjasisajja, ukajj janiw cheqäkiti sänwa.

Ukat mä jukʼampitjja, yaqha uywat tawaqow akham sarakïna: “Aka jaqejj [...] Jesusampirakiw sarnaqaskirïna” sasa. Pedrojj wasitat jan uñtʼiriw tuküna. Ukat mä jukʼampjjarusti yaqhanakaw jupar akham sapjjarakïna: ‘¡Jumajj jupanakat maynirïtawa!’ sasa.

¡Janipuniw uka jaqerojj uñtʼkti! sasaw Pedrojj wal ajjsarayasisin kims kut kʼarisïna. Ukspachaw mä wallpajj artʼanïna. Jesusasti Pedroruw uñtäna, ukat kuntï Jesusajj siskäna uk Pedrojj amtasïna: “Janïr wallpa artʼkipanwa kimsa kuti nayarojj jan uñtʼiri tuküta” sasa. Ukhamïpanjja, Pedrojj uk amtasisin wal jachäna.

¿Ukhaman uñjasirakismati?... Escuelankasmas ukham amuytʼasim, escuelankir masinakamajj Jehová Diosan Qhanañchirinakapjjat akham parlir istʼasma: “Jupanakajj janiw markan qʼochup qʼochupkiti”, “Markap arjjatañatakejj janiw nuwasipkiti” ukat “Janirakiw Jesusan nasïwips ni navidadsa amtapkiti” sasa. Jupanakat maynejj jumar uñkatasajja, “Jumajj Jehová Diosan Qhanañchirïpatajjaya” sasin siristam ukhajja. ¿Kamsasmasa?...

 Janïr ukhaman uñjaskasaw ukar qhanañchañatak wakichtʼatañama. Cheqans janiw Pedrojj wakichtʼatäkanti, ukatwa jan walin uñjasisajj kʼarisïna. Ukat niyakejjay kʼarisitapat wali llaktʼata jikjjataschïnjja, Diosajj perdonänwa.

Jichhajj Ananías chachat parltʼañäni. Jupasa ukat Safira sat warmipasa, Jesusan nayrïr arkirinakapäkasin ukhamarakwa kʼarisipjjäna. Ukampis Diosajj janiw jupanakar perdonkänti. ¿Kunatsa? Uk uñjañäni.

Jesusajja, alajjpachankir Awkipan jakʼaparuw kutʼjjäna, ukat apostolonakapar jaytatapatjja, tunka urunakaw pasjjarakïna. Ukat Jerusalén markanjj kimsa waranqa jaqenakaw bautisasipjjäna, ukanakatjja waljaniw Pentecostés fiesta amtañatak jaya cheqanakat jutapjjäna. Ukat niyakejjay mä machaq iyawsäwinipjjchïnjja, uka iyawsäwipat jukʼamp yateqañatakiw qheparapjjäna. Ukhamajja, uka jilat kullakanakar yanaptʼañatakejj Jesusan yaqhep arkirinakapajja, qollqepatwa irtapjjäna.

Ananiasampi ukat warmipampejja, jichhak bautisasirinakar yanaptʼañ laykuw oraqep aljapjjäna. Ukat Ananiasajj apostolonakar qollqe churasajja, akaw taqpach qollqejja sasaw säna, ukampis ukajj janiw cheqäkänti, kunattejj chikatjja imaqapjjänwa. Ukat kuntï amtapkäna ukjja, Pedrojj Diosan yanaptʼapampiw yatjjäna ukatwa akham säna: “Cheqpachansa Diosaruw kʼarinttajja, janiw jaqenakaruti” sasa. Ukspachaw Ananiasajj jiwat liwitatti. Ukat warmipajj kimsa hora pasatat mantani. Cheqas kuntï chachapamp paskatayna uk janiw yatkänti, ukat kʼarisitapatjja ukhamarakiw jiwäna.

Kunatï cheqäki uk arsuñajj ¡kunja yateqaskayasa! Ukat taqeniw uk lurañasaraki. Ukampis taqeniw pantjastanjja, yamas waynäkasajj jukʼampiwa. Jehová Diosajj wal munasistu ukat Pedrorjamarakiw jiwasar perdonistani, ¡uk yatiñajj wali kusiskañawa! ¿janich ukhamäki?... Kunatï cheqäki uk arsuñajj kunja wakiskirisa uk amtapunin. Ukat akatjamat kʼarisiñänejja, Diosaruw perdonita sasin rogtʼasiñasa. Pedrojj ukwa luräna, ukatwa Diosajj perdonarakïna. Jiwasatï jan kʼarisiñatak chʼamachasiñänejja, Diosajj perdonarakistaniwa.