Inas mä religionajj jan ukajj mä yupaychäwejj luratanakapamp chuym ustʼayawaystam ukat religionat jan kuns yatiñ munjjstati. Ukampis mä atiniskay religionajj utjiwa. Amtañäni, Jesusajj aka Oraqenkkäna ukhajja, mä qawqhaniruw jupan arkirip tukuyäna ukat Diosan arunakaparjam sarnaqapjjañapatakiw yaticharakïna. Jichhürunakan Jesusan cheqpach arkirinakapajj utjarakiwa, jupanakajj Diosan arunakaparjam sarnaqañatakiw wal chʼamachasipjje. ¿Khitinakäpjjesa?

Ana warmejj akham saskakiwa: “Jehová Diosan Qhanañchirinakapamp yateqasaw Bibliat sum amuyjjayäta. Ukat kuntï Juan 8:32 qellqatajj siski uks sum amuyjjarakiyäta, ukan akham siwa: ‘Kunatï cheqäki uk uñtʼapjjäta, ukat ukarakiw qhespiyapjjätam’” sasa.

Ray chachajj akham sarakiwa: “Diosajj taqe jan walinak niyaw tukjani, ukampis mä suma amtanïtap laykuw jan jankʼak tukjkiti, ukat kuna jan walinakatï jichhürunakan utjki ukanakat janiw Diosajj juchanïkataynati taqe ukanakwa Jehová Diosan Qhanañchirinakapajj Bibliamp yatichawayapjjetu” sasa.

Cheqas akapachan walja jaqenakaw kunayman jan walinakan sarnaqasipki, ukat uka contra saytʼasiñajj chʼamakïspawa. Ukampis chʼamachassnawa. Waljaniw kuntï Bibliajj siski uk yateqaña ukat ukarjam sarnaqañ wal munapjje. Ukatwa Jehová Diosan Qhanañchirinakapajj sapa semanan walja millón millón jaqenakar utanakapan jan kun mayisak yatichapjje. Ukat waljaniw kuntï Bibliajj cheqpachapuni yatichki uk yateqasipki, ukhamatwa Taqe kun Lurir Diosar jakʼachasisin kusisita jakasipjje. *

Jupanakamp jikiskäta ukhajja, akham sasinwa jisktʼasma: ¿Kunatsa jumanakajj religionamar wal atinisipjjta?, sasa. Ukat yatichäwinakapata, sarnaqäwinakapata yatjjatañamarakïspawa, ukhamatwa mä atiniskay religionajj utjiti janicha uk sum amuyjjäta.