¿Kuna kasta regalonakas kusisiytamjja? ¿Munasiñamp churata jan ukajj phoqhañ laykuki churatacha? Cheqas musiñamp churataw wal kusisiyistu. Kunapachatï maynejj regalo churkistu ukhajja, wali wakiskiriw kuna amtampis churistu ukajja, ukampis Jehová Diosatakejj jukʼamp wakiskiriwa. Uka toqet amuytʼañatakejj kuntï Diosan amuytʼayatäsin apóstol Pablojj 2 Corintios 9:7 jiskʼa tʼaqan qellqkatayna uk yatjjatañäni.

¿Kunatsa Pablojj uka arunak qellqpachäna? Kunattejj Corinto markankir cristianonakaruw chʼamañchtʼäna Judea markankir jilat kullakanakar yanaptʼapjjañapataki, jupanakasti aynachtʼataw jikjjatasipjjäna. Uka arunakampejj ¿Corinto markankir jilat kullakanakarut munkir jan munkir yanaptʼapjjañapatak mayiskäna? Janiwa. Jupajj akham sänwa: “Sapa mayniw, kunjämtï chuymapanjja amtki ukhamarjam churañapa; janiw pä chuyma churañapäkiti, janirakiw maynin jariyatakis churañapäkarakiti, Diosasti kusisit chuymampi chuririruw munaraki” sasa. Uka ewjjtʼanakat sumpach amuytʼañäni.

“Kunjämtï chuymapanjja amtki ukhamarjam churañapa.” Pablon qellqataparjamajja, mä cheqpach cristianojj kuntï churki ukjja taqe chuymaw churi, kunattejj chuymapaw uk lurañatakejj chʼamañchtʼi. Ukampis jilat kullakanakar kuna toqet yanaptʼañas wakisi uk sumpach amuykiptʼi. Biblia toqet yatjjattʼat mä chachajja, “amtki” uka arojj griego arurjamajj akham sañ muni: “Janiräkipana ukat suma amuykiptʼaña”. Cheqans ukhamawa, cristianojj kunans jilat kullakanakajj aynachtʼat jikjjatasipjje ukat kunjamatsa yanaptʼasispa uka toqet sum amuykiptʼi (1 Juan 3:17).

“Janiw pä chuyma churañapäkiti, janirakiw maynin jariyatakis churañapäkarakiti.” Ukhamajj cristianonakajj pä jan wali amuyunak apanukuñapa: ‘Pä chuyma churaña’ ukat ‘maynin jariyata’ churaña sasaw apóstol Pablojj qhanañchi. ‘Maynin jariyata’ siski uka arojj griego arurjamajj akham sañ muni: “Chuym pisayasisa jan ukajj llakisisa” churaña. Uka toqet mä qellqatajj akham sasaw saraki, khititï thitita, colerata churki ukajja “qollqep ina ukhamarukis aptʼaskaspa ukham amuyasaw wali llaktʼat jikjjatasi” sasa. Maynitï churañapapunis waktʼkaspa ukham amuychi ukhajja, munkir jan munkiris apsutäkaspa ukhamaw jikjjatasi. ¿Khitirak ukham regalayasiñ munaspasti?

“Kusisit chuymampi chuririruw munaraki.” Jan ukajj kunjamtï Machaka Testamento Biblian siskejja: “Kusisiñampi chuririruwa Diosajj muni” sasa. Ukham amuyumpiw cristianonakajj yaqhanakar yanaptʼapjjañapa. Ukat maynitï ukham suma amtamp churchejja kusisitaw jikjjatasini (Hechos 20:35). Khititï ukham amtamp lurchejja, kusisiñapas qhana amuykayawa. Ukat kusisiña arojj kunjamsa maynejj chuymapansa, sarnaqäwipansa, uñnaqapansa kusisit jikjjatasi uk sañatakis apnaqasirakiwa. Ukhamajj khititï munasiñamp mä regalo maynir churki ukajj regal katoqerirojj chuymarupuniw purtʼi, ukat janiw uka aski churäwit kunäkipans armaskaniti, ukhamarakiw Diosas jan armaskaniti.

Cheqansa, apóstol Pablon qellqatapajj mä aski yatichäwiwa, ukarjamaw sapa cristianojj churañ jan ukajj wajjtʼasirïñ toqet chʼamachasiñapa. Ukhamajj kunaratutï tiempossa, chʼamassa, jan ukajj yänakassa churkañäni ukhajja, jan khitin jariyata ukat wal mayninakar khuyaptʼayañ munatas laykuw ukanak lurañasa, ukampis aynachtʼat jikjjatasipki ukanakarojj yanaptʼañasapuniwa. Ukhamtï lurañänejja, janiw kusisitak jikjjataskañäniti, jan ukasti Jehová Diosan munasiñap jikjjatarakiñäni, kunattejj Jupajj kusisit chuymampi chuririruw munasi.