NAYRÏR JANAN PʼEQEÑCHÄWIPA | ¿KUNA KʼARI YATICHÄWINAKAS JAQENAKAR DIOSAT JITHEQTAYI?
Diosarojj janiw uñtʼañjamäkiti sasaw kʼarisipjje
¿JAQENAKAJJ KAMSAPJJESA?
Mä qellqatajj akham siwa: “Diosajja, kimsa diosanakat mayar apthapitawa (Trinidad): Awki, Yoqa ukat Qollan Ajayu, ukat ukajj jan uñtʼañjamawa” sasa (Diccionario Akal crítico de teología). Ukat yaqha qellqatajj akham sarakiwa: “Católico, ortodoxo, anglicano ukat protestante iglesiankirinakajja, uka yatichäwiruw arkapjje” sasa (Diccionario abreviado del cristianismo).
¿BIBLIAJJ KAMSISA?
Diosan Yoqapa, mä arunjja, Jesusajj janipuniw Diosjamätwa jan ukajj Dios pachpätwa sasajj sirïkänti. Antisas akham sänwa: “Awkin ukaruw saraskta uk siri istʼasinjja kusisipjjasamänwa, jupajj nayatsa jukʼampïtap layku” sasa (Juan 14:28). Ukat arkirinakaparojj akham sarakïnwa: “Sarasktwa kawkinkkitejj Awkejjajj ukaru, jupasti jumanakan Awkimarakiwa, nayan Diosajjawa jumanakan Diosamarakiwa” sasa (Juan 20:17).
Qollan ajayojj janiw mä jaqëkiti. Nayrïr cristianonakajj “sapa mayniw qollan ajayumpi phoqtʼatäpjjäna”, ukat Jehová Diosajj akham sarakïnwa: “Nayaw qollan ajayojj taqe jaqenakjjar khitanï” sasa (Hechos 2:1-4, 17). Qollan ajayojj Diosan chʼamapawa, janiw kimsa diosanak mayar apthapitaw sapki uka taypinkkiti.
¿KUNATSA UK YATJJATAÑAJJ WAKISISPA?
Karl Rahner ukat Herbert Vorgrimler Biblia toqet yatjjattʼat catoliconakajj akham sapjjewa: “Qhanañchäwi jan utjkaspa ukhajja, [Trinidadajj] janiw uñtʼatäkaspati, ukat qhanañchäwi utjaspa ukasa, janiw sum amuyaskaspati” sasa. Ukhamajja, ¿khitirutï jan uñtʼktan ni amuyktan ukarojj munassnati? Janiwa. Ukatwa Trinidad sat kʼari yatichäwejj Diosar munañat jarkʼistu.
Nayrïr yatichäwin parlktan uka Marco sat chachajj Trinidad kʼari yatichäwejj Diosar uñtʼañatsa jupar jarkʼkaspa ukhamwa amuyäna. Jupajj akham siwa: “Diosajj janis uñtʼayasiñ munkaspa ukat janis jakʼachasiñjamäkaspa ukham amuyayäta” sasa. Ukampis Diosajj uñtʼayasiñwa muni. Jesusajj akham sänwa: ‘Nanakajj yatipjjta jan ukajj uñtʼapkta ukaruw yupaychapjjta’ sasa (Juan 4:22).
Marco sat chachajj akham saskakiwa: “Diosajja, kimsa diosanakat mayar apthapitaw sapki ukajj jan cheqätap yatisajja, Jupampejj sum apasjjayäta” sasa. Ukhamajj Diosarutï sum uñtʼañänejja, Jupar munasiñajj janiw chʼamäkaniti. Bibliajj akham siwa: “Khititejj jan munasiñanïki ukajj janiw Diosar uñtʼkiti, Diosajj munasiñawa” sasa (1 Juan 4:8).
