Galicia markanwa nasta, uka markajj España markat alay toqenkiwa, ukanjja, awk taykajajj mä jiskʼa granjanipjjänwa. Kimsaqallqo jila sullkäpjjtwa, nayajj pusirïkis ukätwa. Wali kusisitaw jakasipjjayäta. Uka tiemponjja, familiat maynis convento utar sarapunirïnwa. Familiajat kimsaniw sarapjjta.

Ukat 13 maranëjjayät ukhajja, Madrid markan utjkäna uka conventoruw sarta, mä kullakajas ukankjjarakïnwa. Ukan janipuniw munasiñajj utjkänti, ni amiganiñjamakänsa. Taqe kunas leyinakaparjamakiw lurasiñapäna. Alwanakajja, Diosat lupʼiñatakiw capillar sarapjjerïta, ukampis nayajj yaqhanakakwa lupʼiskirïta. Ukjjarusti, qʼochupjjerïtwa ukat misaruw sarapjjerïta. Taqe ukanakajj latín arutwa lurasirïna, janiw kuns amuyirïkti, ukatwa Diosajj wali jayankkaspas ukham amuyirïta. Sapürus amukiw sarnaqapjjerïta. Kullakajampis “Ave María purísima” sasakiw pasjasiwayapjjerïta. Manqʼañ tukuyasajj 30 minutonakakiw parltʼasiñatak utjäna. Utajanjja janiw ukhamäkänti, wali kusisitaw jakasipjjayäta. Ukatwa saparstʼatjam amuyasisajj sapa kuti wal jachirïta.

Diosajj wali jayankkaspas ukhamsa amuykchiyätjja, mayipkitän ukjja phoqayätwa, ukatwa 17 maranirojj monjäjjayäta. Ukanakjja, phoqañ laykukiw lurayäta, ukampis qhepatjja, ¿cheqapunit monjäñ muntjja? sasaw lupʼiyäta. ‘Pächasirinakajj infiernonwa tʼaqhesipjjani’ sasaw monjanakajj sapjjetäna. Ukhamäkchïnsa, pächasiskakiyätwa. Jesusajj janiw jaqenakat yaqhaqtat sarnaqerïkänti, antisas jaqenakarojj yatichirïnwa ukat yanaptʼarakirïnwa (Mateo 4:23-25). Ukat 20 maranëjjayät ukhajja, janiw monjäñ munjjayätti. Ukatwa madre superiorajj “pächasisksta ukajj jankʼak sarjjam” sasin sitäna. Uk satajj jankʼakiw sarawayjjta. Amuyatajj mayni monjanakar jan pächasiyañaj laykuw ukham sispachïtäna.

Utar purta ukhajja, awk taykajajj janiw toqepkitänti. Ukat trabajo jan utjipanjja Alemaniaruw sarawayjjta, sullka  jilajajj ukanwa jakasïna. Jupajj comunista gruponkänwa, ukankirinakajj España markapat jaqsutäpjjänwa. Jupanakajj trabajadoranakan derechopata, ukat warminakan pachpa derechonïpjjañapatakiw arjjatapjjäna. Jupanakampïñajj wali askïnwa. Ukatwa tiempompejj uka grupor mantjjayäta ukat ukankir mä waynampiw casarasta. Uka grupor yanaptʼapjjañapatakiw qellqatanak lakirayäta ukat marchanakarus sararakiyäta. Uk lurañajj wali askïkaspas ukhamwa amuyirïta.

Qhepatjja, janiw uka gruponkjjañ munjjayätti. Amuyatajja, kuntï yatichapkäna ukjja janiw phoqapkänti. Ukajj 1971 maränwa qhan amuyasïna, españolanakan consuladoparuw Fráncfort markan comunistankir waynanakajj ninamp phichhantapjjäna. Españolanakan munañaparuk jan walinak lurapjjatap laykuw ukham lurapjjäna, ukajj janiw nayatakejj walïkänti.

Wawanëjjayät ukhajja, ‘janiw comunistanakan tantachäwinakapar sarjjati’ sasaw chachajar sista. Ukat saparstʼataw jikjjatasiyäta, ususjjayät ukhajj janiw khitis visittʼapkitänti. Ukatwa ¿kunjamsa kusisit jakassna? ¿Sum jakasiñatak chʼamachasiñajj wakisipunpachati? sasin jisktʼasiyäta.

Khä 1976 maranjja, mä chacha warmiw visittʼapjjetäna, jupanakajj Jehová Diosan Qhanañchirinakapäpjjänwa. Ukat Bibliat apstʼat qellqatanakwa jaytawayapjjetu. Mayampi visittʼapkitäna ukhajja, kunatsa tʼaqhesiñanakasa, yaqhachasiñanakasa ukat ina chʼusat tʼaqhesiñanakas utji sasaw wal jisktʼayäta. Jupanakajj taqe jisktʼanakajarojj Bibliampiw qhanañchapjjetäna. Ukat ‘Bibliat yatichäma’ satajja, jankʼakiw iyaw sayäta.

Qalltanjja, Bibliat yatjjatañ laykukiw iyaw sayäta. Ukampis Jehová Diosan Qhanañchirinakapan tantachäwinakapar chachajampi sarjjapjjayät ukhajja, janiw ukham amuyjjayätti. Ukhakamajja, pä wawanëjjapjjayätwa. Tantachäwinakansa, jupanakaw wawanak uñjañ yanaptʼapjjetäna. Ukhamatwa jupanakampejj yatthaptjjayäta.

Ukhamäkchïnsa, pächasiskakiyätwa. Ukat Españankir familiajar visittʼir sarkayät ukhajja, sacerdotëkis uka tiojajj janiw Bibliat yatjjatañaj munkänti. Ukampis kunjamtï Alemaniankir Jehová Diosan Qhanañchirinakapajj Bibliampi yanaptʼapkitänjja, ukhamarakiw España markan yanaptʼapjjetäna. Ukat Alemania markar kutʼjjasajja, chachajajj janis Bibliat yatjjatañ munjjchïnjja, nayajj jupanakamp yatjjataskakiyätwa. Ukatwa 1978 maran Jehová Diosan Qhanañchiripjam bautisasjjta.

Kunatï cheqäki uk Bibliat yatjjatañaw sum jakasiñatak yanaptʼawayitu. Sañäni, 1 Pedro 3:1-4 qellqatanjja, warminakajj chachanakapar istʼapjjañapawa ukat respetapjjañapawa, llampʼu chuymanïpjjañapawa, “Dios nayraqatansti ukajj wali askiwa” sasaw qhanañchi. Uka ewjjtʼasa ukat yaqha ewjjtʼanakas kuntï warmjamasa ukat taykjamas phoqañajäki ukatakiw yanaptʼawayitu.

Jehová Diosan Qhanañchiripjam bautisasjjta ukhatjja, 35 maranakaw pasawayjje. Diosar servisasa ukat markapankasas wali kusisitätwa. Ukat phesqa wawanakajat pusini Jehová Diosar servipjjatap uñjasas kusisiraktwa.